Ɛksodɔs
30 “Yu fɔ mek wan ɔlta we go bi ples usay dɛn de bɔn insɛns,+ yu fɔ mek am wit akeshia wud.+ 2 I fɔ bi skwaya, wan kyubit lɔng, wan kyubit* wayd, ɛn tu kyubit ay. In ɔn dɛn fɔ jɔyn pan am.+ 3 Yu fɔ kɔba am wit piɔ gold: pantap, in sayd dɛn rayt rawnd, ɛn in ɔn dɛn. Dɔn yu fɔ mek gold frem rayt rawnd am. 4 Yu fɔ mek bak tu gold riŋ dɛn fɔ am dɔŋ di frem na di tu ɔpozit say dɛn ɛn na de dɛn fɔ put di pol dɛn we dɛn de yuz fɔ kɛr am go. 5 Mek di pol dɛn wit akeshia wud ɛn kɔba dɛn wit gold. 6 Yu fɔ put am bifo di kɔtin we de nia di bɔks* we gɛt di tablɛt dɛn we gɛt di lɔ,+ bifo di kɔba we de pantap di Lɔ, usay a go sho misɛf to yu.+
7 “Erɔn+ go bɔn di pafyum insɛns+ pan am+ ɛn mek i pul smok na di ɔlta we i de pripia di lamp+ dɛn ɛni mɔnin. 8 Dɔn bak, we Erɔn layt di lamp dɛn ivintɛm,* i fɔ bɔn di insɛns. Na insɛns ɔfrin we fɔ de bɔn bifo Jiova ɔltɛm fɔ ɔl yu jɛnɛreshɔn dɛn. 9 Yu nɔ fɔ bɔn insɛns ɔ bɔn ɔfrin ɔ fud ɔfrin pan am we a nɔ tɛl yu fɔ bɔn,+ ɛn yu nɔ fɔ tɔn drink ɔfrin pan am. 10 Erɔn fɔ mek sakrifays fɔ fɔgiv sin wan tɛm insay di ia pan in ɔn+ dɛn. I fɔ yuz sɔm pan di blɔd fɔ di sin ɔfrin fɔ mek sakrifays fɔ fɔgiv sin+ fɔ am wan tɛm insay di ia fɔ ɔl yu jɛnɛreshɔn dɛn. Dis na sɔntin we oli pas ɔl to Jiova.”
11 Dɔn Jiova tɛl Mozis se: 12 “Ɛnitɛm we yu de rɛjista ɛn kɔnt di pipul dɛn na Izrɛl,+ ɛniwan pan dɛn fɔ gi prayz fɔ in layf* to Jiova di tɛm we yu de rɛjista dɛn. Dɛn fɔ du dis so dat bad tin nɔ go apin to dɛn we dɛn de rɛjista. 13 Dis na wetin ɔl di wan dɛn we de rɛjista fɔ gi: Af shɛkɛl* akɔdin to di shɛkɛl we dɛn de yuz na di oli ples.*+ Twɛnti gira* ikwal to wan shɛkɛl. Af shɛkɛl na di kɔntribyushɔn fɔ Jiova.+ 14 Ɛnibɔdi we rɛjista we ol 20 ia ɛn we dɔn pas 20 ia fɔ gi Jiova in kɔntribyushɔn.+ 15 Di wan we jɛntri nɔ fɔ gi pas wetin i fɔ gi ɛn di wan we po nɔ fɔ gi sɔntin we nɔ rich di af shɛkɛl* as kɔntribyushɔn to Jiova we go bi pemɛnt fɔ una layf.* 16 Yu fɔ tek di silva mɔni fɔ di sakrifays fɔ fɔgiv sin frɔm di Izrɛlayt dɛn ɛn gi am fɔ di wok we dɛn de du na di mitin tɛnt, so dat i go bi sɔntin fɔ mɛmba bifo Jiova fɔ di Izrɛlayt dɛn as pemɛnt fɔ una layf.”*
17 Jiova kɔntinyu fɔ tɔk to Mozis, i se: 18 “Mek kɔpa besin ɛn in stand fɔ was;+ dɔn put am bitwin di mitin tɛnt ɛn di ɔlta ɛn put wata insay de.+ 19 Na de Erɔn ɛn in bɔypikin dɛn go was dɛn an dɛn ɛn dɛn fut+ dɛn. 20 We dɛn de go insay di mitin tɛnt ɔ we dɛn de go nia di ɔlta fɔ wok ɛn fɔ yuz faya fɔ mek sakrifays ɛn fɔ mek smok go ɔp to Jiova, dɛn fɔ was wit di wata so dat dɛn nɔ go day. 21 Dɛn fɔ was dɛn an ɛn dɛn fut dɛn so dat dɛn nɔ go day, ɛn i fɔ bi lɔ we go de sote go fɔ in ɛn in pikin dɛn ɛn fɔ ɔl in jɛnɛreshɔn+ dɛn.”
22 Jiova kɔntinyu fɔ tɔk to Mozis, i se: 23 “Dɔn tek di bɛst pafyum dɛn: 500 shɛkɛl ma* we dɔn strɔng, 250 shɛkɛl swit sinamɔn, 250 shɛkɛl swit kalamus, 24 ɛn 500 shɛkɛl kasia.* Yu fɔ yuz di shɛkɛl we dɛn de yuz na di oli ples*+ fɔ mɛzhɔ dɛn togɛda wit wan hin* ɔliv ɔyl. 25 Dɔn yuz dɛn fɔ mek oli ɔyl fɔ anɔynt; dɛn fɔ tek tɛm miks dɛn fayn.*+ I fɔ bi oli ɔyl fɔ anɔynt.
26 “Yu fɔ yuz am fɔ anɔynt di mitin tɛnt+ ɛn di bɔks* we gɛt di tablɛt dɛn we gɛt di Lɔ, 27 togɛda wit di tebul ɛn ɔl di tin dɛn we dɛn de yuz na di tebul, di lampstand ɛn ɔl di tin dɛn we dɛn de yuz fɔ di lampstand, di ɔlta usay dɛn de bɔn insɛns, 28 di ɔlta usay dɛn de mek bɔn ɔfrin ɛn ɔl di tin dɛn we dɛn de yuz de, ɛn di besin ɛn in stand. 29 Yu fɔ mek dɛn oli so dat dɛn go bi tin dɛn we oli pas ɔl.+ Ɛnibɔdi we tɔch dɛn go oli.+ 30 Dɔn yu fɔ anɔynt Erɔn+ ɛn in bɔypikin+ dɛn, ɛn yu fɔ mek dɛn oli so dat dɛn go wok as prist dɛn fɔ mi.+
31 “Tɛl di Izrɛlayt dɛn se, ‘Dis fɔ kɔntinyu fɔ bi oli ɔyl fɔ anɔynt fɔ mi fɔ ɔl una jɛnɛreshɔn+ dɛn. 32 No mɔtalman nɔ fɔ rɔb am nain bɔdi, ɛn una nɔ fɔ mek ɛnitin wit di tin dɛn we dɛn yuz fɔ mek am. Na sɔntin we oli. I fɔ kɔntinyu fɔ bi sɔntin we oli fɔ una. 33 Una fɔ kil ɛnibɔdi we mek ɔyntmɛnt lɛk am ɛn we rɔb am pan pɔsin* we nɔ gɛt rayt fɔ rɔb am.’”+
34 Dɔn Jiova tɛl Mozis se: “Tek dɛn pafyum dɛn ya ikwal wan:+ stakti, ɔnika, galbanɔm, ɛn piɔ frankinsɛns.* 35 Yuz dɛn fɔ mek insɛns;+ yu fɔ tek tɛm miks di spays dɛn fayn fayn wan,* i fɔ gɛt sɔl,+ i fɔ piɔ, ɛn oli. 36 Yu fɔ bit sɔm pan am fɔ lɛ i tɔn to smut pawda ɛn put sɔm bifo di Lɔ we de na di mitin tɛnt usay a go sho misɛf to yu. I fɔ bi sɔntin we oli pas ɔl to yu. 37 Yu nɔ fɔ yuz di tin dɛn we dɛn yuz fɔ mek di insɛns fɔ mek sɔntin fɔ yusɛf.+ Yu fɔ si am as sɔntin we oli to Jiova. 38 Dɛn fɔ kil ɛnibɔdi we mek sɔntin lɛk am fɔ ɛnjɔy di sɛnt.”