1 Kronikul

20 We di ia bigin,* di tɛm we kiŋ dɛn kin go fɛt, Joab+ bin lid di ami fɔ go fɛt ɛn dɔnawe wit di Amɔnayt dɛn; i kam sɔrawnd Raba,+ bɔt Devid in bin lɛf na Jerusɛlɛm.+ Joab atak Raba ɛn dɔnawe wit am.+ 2 Na de Devid tek di krawn na Malkam in ed, ɛn i si se in wet na bin wan talɛnt* gold, ɛn i bin gɛt valyu ston dɛn pan am; dɔn dɛn put am na Devid in ed. I tek bak bɔku bɔku prɔpati dɛn frɔm di siti.+ 3 Ɛn i briŋ di pipul dɛn we bin de na di siti ɛn mek dɛn bigin fɔ kɔt ston dɛn, fɔ wok+ wit shap ayɛn tul dɛn, ɛn wit aks dɛn. Na dat Devid bin du to di pipul dɛn we bin de na ɔl di Amɔnayt siti dɛn. Faynali, Devid ɛn ɔl in fɛtman dɛn go bak na Jerusɛlɛm.

4 Afta dat, wɔ bin de bak bitwin di Izrɛlayt dɛn ɛn di Filistin dɛn na Giza. Na de Sibikay,+ di Ushatayt, kil Sipay we na Rɛfeim,+ ɛn dɛn win di Filistin dɛn.

5 Afta dat, wɔ bin de bak bitwin di Izrɛlayt dɛn ɛn di Filistin dɛn. Ɛlenan, we na Jea in bɔypikin, kil Lamay we na Golayat,+ di Gitayt, in brɔda. Di andul pan Lamay in spia ɛvi lɛk di stik we dɛn de yuz fɔ wiv kɔntri klos.+

6 Wɔ bin de bak na Gat+ usay wan man bin de we rili big ɛn ay.+ I bin gɛt 6 finga dɛn na ɔl tu in an dɛn ɛn 6 to dɛn na ɔl tu in fut dɛn, ɔl in ɔl na 24, ɛn insɛf na bin Rɛfeim.+ 7 I bin de provok di Izrɛlayt+ dɛn. So Jonɛtan, we na Shimia+ in bɔypikin, kil am. Shimia na Devid in brɔda.

8 Dɛn man dɛn ya na di Rɛfeim+ dɛn pikin dɛn, dat na, di Rɛfeim dɛn we bin de na Gat,+ ɛn na Devid ɛn in savant dɛn kil dɛn.