Yac Kom Liye Ma Enenweyuck in Kapkapwack ke Kuhlwacnsap Lom nuh sin Jeova?
“Kom in moniyuck in riti Ma Suhmuhslah nuh sin walihl uh, ac in fahkwack ac luti.”—SIE TIMOTHY 4:13.
1, 2. (a) Fuhkah Isaiah 60:22 ahkpwacyeyuck ke lwen sahflah inge? (b) Meac enenweyuck ingena ke u luhn Jeova fin facluh?
KAHS luhn God uh palye lah, oasr sie u na srihsrihk ma ac fah eklac sie muhtuhnfacl na kuh. (Isaiah 60:22) Ma palyeyuck inge ahkpwacyeyuck ingena ke lwen sahflah inge. Ke yac 2015, oasr 8,220,105 ke mwet kuhlwacnsap luhn Jeova suc luti ke pweng wo ke Tohkohsrahi fin facluh nohfohn! God el fahk ke kapkapwack ke mwet lal uh: “Nga fah oruh ma inge in sa sikyak ke pacl fal.” Pwacnacng, ke pacl inge fahlac, ac fah puhs orekma nuh sesr nuhkewa ma kuht ac enenuh in oruh. Yac kuht sang kuhiyacsr kewa ingena in fahkwack ac luti ke pweng wo uh? Puhs sin mukul ac muhtwacn lili wiyacsr suc wi tari ke orekma luhn regular kuh auxiliary pioneer. Kuhtuh seltahl som nuh ke acn sahyac in sang kahsruh nuh ke orekma in luti uh, ac kuhtuh pac seltahl orekma upac in muhsahelah Lohm in Toeni pucspucs.
2 Ke yac nuhkewa, apkuhran nuh ke 2,000 congregation sasuc pa oakiyucki. Congregation inge enenuh mwet elder ac mwet suc kahsruh mwet elder inge. Ke kais sie yac, tausin sin mwet suc kahsruh mwet elder inge enenuh in eklac mwet elder ac tausin sin mukul lili wiyacsr inge enenuh in eklac mwet suc kahsruh mwet elder uh. Kahlwem lah, oasr orekma pucspucs pwacnacng kuht in “moniyuck in orekma nuh sin Leum pacl nuhkewa.” Ke ma inge, kewana mukul ac muhtwacn lili enenuh in moniyuck in oruh orekma inge.—Sie Corinth 15:58.
MEA ENENWEYUCK IN AHKWOYE OHIYACSR IN ETAHI JEOVA AC IN ORUH MA AHKINSEWOWOYACL
3, 4. Nuh sum, meac kalmac in ahkwoye ohiyacsr in etahi Jeova ac in oruh ma ahkinsewowoyacl?
3 Riti Sie Timothy 3:1.a Mwet sap Paul el kaksakihn mukul lili suc kwacfeacng in kapkapwack in eklac sie mwet liyacacng. Nuh sin sie mwet suc srihke in eis ma se ma oan loes nuh yohrohl, el enenuh in lihksreni ahsroelah pahol in eis ma se ingacn. Na, kom petsacelah sie mukul lili suc luhngse in eklac sie mwet suc kahsruh mwet elder. El akihlen lah, el enenuh in kwacfeacng in ahkwoye ohiyacl oacna sie mwet Christian. Na, tukun el muhtwacwacack in kuhlwacnsap oacna mwet suc kahsruh mwet elder, el tahfwelah na orekma wo lal inge elan muh kuh in fal in eklac sie mwet liyacacng.
4 Kuhtuh mukul ac muhtwacn lili wiyacsr inge eltahl ekuhllah moul laltahl mweyen eltahl luhngse in oruh ma pucspucs ke kuhlwacnsap laltahl nuh sin Jeova. Ke sie mwe puhpuhlyuck, eltahl ac ke oruh orekma luhn pioneer, orekma ke Bethel, kuh kahsruh in muhsahelah Lohm in Toeni pucspucs. Lwelah kuht in liye lah fuhkah Bible uh kuh in kahsre kuht nuhkewa in kapkapwack.
AHKYOHKYE KENA LASR IN KAHSRUH MWET SAHYAC KE KUHIYACSR KEWA
5. Fuhkah mwet fuhsr uh orekmakihn kuh laltahl in kuhlwacnsap ke Tohkohsrahi uh?
5 Mwet fuhsr uh kuh in oruh orekma yohk ke orekma in kuhlwacnsap nuh sin Jeova mweyen eltahl fokoko ac kuh in mahno. (Riti Soakas 20:29.) Kuhtuh sin mukul fuhsr ke Bethel inge kahsruh in printiyac ac oraclah puk ac Bible. Puhs sin mukul ac muhtwacn lili fuhsr suc muhsahelah Lohm in Toeni kuh kahsruh in ahkwoyelah. Kuhtuh seltahl kahsruh ke pacl ma oasr mwe ongaiyac sikyak. Oacyacpac, puhs sin mwet fuhsr suc pioneer eltahl lotwelah kahs sahyac kuh som nuh ke sie pac acn in luti ke pweng wo.
6-8. (a) Fuhkah sie mukul fuhsr el ekuhllah nuhnak lal ke kuhlwacnsap lal nuh sin God, ac meac sikyak? (b) Ke inkacnek fuhkah kuht kuh in “sifacna akihlenack luhpan woiyen Leum God”?
6 Kuht luhngse Jeova ac kuht luhngse in sang nuh sel ma wo emeet lasr uh. Finne ohinge sahp, kuht ac puhla oacpacna ma mukul lili se inge suc inel pa Aaron el puhla. El luhngse in engankihn kuhlwacnsap lal nuh sin Jeova, tuhsruhktuh el tiac na engan. Aaron el finne wi ke miting ac wi oruh orekma in forfor muhtwacwacack ke pacl se el srackna fuhsr, el fahk, “Nga tiac na pwacr ke nga wi miting ac orekma in forfor.” Ke ma inge, meac el oruh?
7 Aaron el kwacfeacng in riti Bible pacl nuhkewa, ahkolah nuh ke miting, ac sang top lal. El oacyacpac muhtwacwacack in puhruhe ke pacl puhs. Ma inge nuhkewa kahsrel in ahkkweye fototo lal nuh sin Jeova. El muhtwacwacack in etwacllah ac luhngse Jeova liki na meet ah. Ke srihpac se inge, Aaron el puhla insewowo. El oruh orekma in pioneer, kahsruh mwet sahyac ke pacl ma oasr mwe ongaiyac sikyak, ac el som fahkwack ke acn sahyac. Ingena, el eklac sie mwet elder ac el kuhlwacnsap ke Bethel. Meac el puhla ke moul lal uh? Aaron el fahk: “Nga sifacna puhla ac ‘akihlenack luhpan woiyen Leum God.’ Ke srihpen mwe insewowo lal, nga sang kuloh na pwacye nuh sel ac nga ahkkweyeyuck in kuhlwacnsuhpwacl yohk liki na meet ah, ac oasr mwe insewowo yohk pac sahyac ma tuhkuh kac.”
8 Mwet sihm luhn psalm el suhmuhslah ohinge: “Sifacna akihlenack luhpan woiyen Leum God.” El suhmuhslah pac: “Elos suc ahkos LEUM GOD, ma wo elos enenuh tiac kuh in wacngihn.” (Riti Psalm 34:8-10.) Ahok, ke pacl se kuht sang nuh sin Jeova ma wo emeet lasr uh, kuht arlacna engan mweyen kuht etuh lah kuht ahkinsewowoyacl. Ac el ac sruokyacna wuhlelah lal in karihngihn kuht.
NIK KOM FUHLEACK
9, 10. Efuh kuh yohk srihpac kom in “tuhpan” na?
9 Sahp, kuht luhngse in oruh orekma in kuhlwacnsap lasr nuh sin Jeova yohk liki na meet ah. Tuhsruhktuh, ac fuhkah fin kuht soano ke lusen pacl na loeloes se in eis kunohkohn ke congregation kuh oasr ma eklac ke ohiyen moul lasr uh? Kuht ac enenuh in mongfihsracsr ac “tuhpan.” (Micah 7:7) Ac finne Jeova el ac lwelah ohiyac ma kuht oasr kac ingacn in fahsr na, kuht kuh in luhlahlfongi lah el ac kahsre kuht ke pacl nuhkewa. Kuht kuh in lotwelah ke mwe srihkasrak lal Abraham. Jeova el wuhlelah nuh sel muh e oasr wen se nahtuhl, tuhsruhktuh el soano ke lusen yac pucspucs meet liki Isaac el isuslac. Ke pacl se ingacn, Abraham el muhtweng ac el tiac na fuhleack luhlahlfongi lal nuh sin Jeova.—Genesis 15:3, 4; 21:5; Hebrew 6:12-15.
10 Pwacye lah tiac fihsracsr in soano. (Soakas 13:12) Tuhsruhktuh, kuht fin tahfwelah na in nuhnkuh ke ohiyac ma kuht oasr kac uh, ac ke puhlakihn lasr uh, ma inge ac kuh in oruh kuht in arlacna ahsor. A, ma wo kuht in oruh pa kuht in orekmakihn pacl inge in kapkapwack ke ohiyac wowo ma kuht ac enenuh in karihngihn kuhtuh kunohkohn ke congregation uh.
11. Kain in ohiyac wo fuhkah ma kuht enenuh in ahkkapye? Ac efuh kuh ma inge yohk srihpac?
11 Ahkkapye ohiyac ac etwacack ma kom enenuh. Ke kom rit Bible ac nuhnkuh ahkwoyac ke ma kom riti an, kom kuh in eis lahlmwetmwet, in nuhnkaclah ahkwoyac ac oruh sulaclah wo. Ahok, mukul lili uh enenuh kain in ohiyac ac etwacack inge in karihngihn congregation uh. (Soakas 1:1-4; Titus 1:7-9) Ke pacl kuht lutlut Bible, kuht kuh in konwacack lah meac Jeova el puhla ke kain in ma pucspucs. Na, ke kais sie lwen, kuht kuh in orekmakihn ma kuht lotwelah inge in oruh sulaclah ma ac ahkinsewowoye Jeova. Ke sie mwe puhpuhlyuck, kuht kuh in etwaclah lah ohiyac fuhkah kuht enenuh in ahkkahlwemye nuh sin mwet sahyac, orekmakihnyen mani, ac sulaclah nuh ke mwe ahkengan ac nuknuk.
12. Mwet lili ke congregation uh kuh in ahkpwacyeye fuhkah lah eltahl fal in luhlahlfongiyuck?
12 Kwacfeacng ke kuhtwena kunohkohn ma utuckot nuh sum. Ke pacl se mwet luhn God eltahl sifwilpac muhsahi tempuhl, Nehemiah el enenuh mukul in karihngihn kain in kunohkohn. El sulaclah mukul suc oasr ohiyac wo yohroh. El etuh lah mukul inge luhngse Jeova ac eltahl alken in oruh kuhtwena orekma ma ituckyang nuh seltahl. (Nehemiah 7:2; 13:12, 13) Ke inkacnek se pacna inge, mwet nuhkewa suc oaru ac alken in orekma, etweyuck eltahl kac, ac oasr pac orekma sahyac ma ituckyang nuh seltahl. (Sie Corinth 4:2) Pwacnacng, finne kuht mukul kuh muhtwacn lili, kuht enenuh in oruh kuhtwena orekma ma utuckuh nuh sesr ke kuhiyacsr kewa.—Riti Sie Timothy 5:25.
13. Kom ac etahi fuhkah mwe srihkasrak lal Joseph fin mwet sahyac uh oruh kuluk nuh sum?
13 Luhlahlfongi Jeova. Meac kom kuh in oruh fin mwet sahyac uh oruh kuluk nuh sum? Sahp, kom ac kuh in ahkuhtweyac nuh seltahl puhlakihn lom an. Tuhsruhktuh, kom fin fahk kuh ahkpwacyeye pacl nuhkewa lah kom pa suwohs uh, kom ac oruh ma upac inge in upaclah liki na meet ah. Yohk ma kuht kuh in lotwelah ke mwe srihkasrak lal Joseph uh. Tamuhlwel lal ah oruh ma na kuluk nuh sel. Mwet uh fahk kahs kikiacp kacl, ac fihliyucki el in presin ke ma el tiac oruh. Tuhsruhktuh, Joseph el fihliyac luhlahlfongi lal in Jeova. El nuhnkuh na ke wuhlelah nuhkewa luhn Jeova, ac el sruokyacna oaru lal. (Psalm 105:19) Ke kain in pacl upac inge, el ahkkweye ohiyac wowo ma ac kahsrel ke pacl se ma ituckyang orekma yohk srihpac elan oruh. (Genesis 41:37-44; 45:4-8) Fin mwet sahyac oruh kuluk nuh sum, puhruhe nuh sin Jeova in eis lahlmwetmwet. El ac kahsre kom in oasr inse mislac ac in ahkkahlwemye kuhlwacng ke pacl se kom sramsram nuh seltahl uh.—Riti 1 Peter 5:10.
ORUH IN OASR KAPKAPWACK KE OREKMA IN LUTI
14, 15. (a) Efuh kuht enenuh in “sifacna taran” ke inkacnek in luti lasr uh? (b) Kom ac orekmakihn fuhkah inkacnek in luti sasuc ke pacl inge? (Srihke liye petsac se meet ac pohk se inge “Yac Kom Luhngse in Srihke Sie Inkacnek Sahyac in Luti?”)
14 Paul el fahk nuh sel Timothy elan tahfwelah na in ahkwoye inkacnek in ahkuhtweyac lal ke ma suhmuhslah uh. “Kom in moniyuck in riti Ma Suhmuhslah nuh sin walihl uh, ac in fahkwack ac luti nwe ke pacl se nga sun kom. Kom in sifacna taran kom ac mwe luti lom.” (Sie Timothy 4:13, 16) Timothy el oruh orekma in luti uh ke yac pucspucs tari. Pwacnacng, efuh el enenuh in ahkwoye orekma in luti lal uh? Timothy el etuh lah mwet uh ac oacyacpac ohiyac ma eltahl oasr kac uh ekyek. El luhngse mwet uh in tahfwelah na in lohngohl, pwacnacng el enenuh in tahfwelah na in ahkwoye ac ekuhllah inkacnek ma el lotweltahl kac uh. Ke kuht oruh orekma in luti ke pacl inge, kuht enenuh in oruh oacpacna.
15 Ke kuhtuh acn uh, kuht konwacack lah puhs mwet suc wacngihn ke lohm seltahl uh ke kuht som sie lohm nuh ke sie lohm. Ke kuhtuh acn sahyac uh, sahp oasr mwet ke lohm seltahl uh, tuhsruhktuh kuht tiac kuh in som nuh ke sruhnguhl laltahl uh, sahp mweyen kuht tiac kuh in utyak nuh ke lohm seltahl ma oasr kalkal kac. Fin ma ingacn sikyak ke acn in forfor lom an, yac kom kuh in srihke pac sie inkacnek sahyac an?
16. Efuh kuht kuh in fahk muh oasr fahko wo ma tuhkuh ke orekma in luti ke acn ma puhs mwet we uh?
16 Puhs sin mukul ac muhtwacn lili suc arlacna engankihn orekma in luti ke acn ma puhs mwet we uh. Ke sie mwe puhpuhlyuck, eltahl som nuh ke acn luhn train, acn in bus, acn in kuhka ac oacyacpac acn in muhtwacta uh in konwacack mwet eltahl in muh kuh in sramsram nuh seltahl. Sie mwet loh el ac kuh in muhtwacwacack in sramsram nuh sin sie mwet ke ma ma sikyak ac sruhmuhnyuck sasuc ke news uh. Kuh mwet loh se ingacn ac kuh in kaksakihn ac fahk ma wo ke tuhlihk nuhtin mwet sacn kuh kihsen siyuck sel ke orekma lal an. Fin mwet se ingacn ahkkahlwemye pwacr lal in lohng, mwet loh sacn kuh in ahkuhtweyac ke sie fuhs ke Bible ac siyuck lah meac nuhnak lal kac. Ke inkaiyen pacl uh, mwet uh luhngse in ahkyohkye etwacack laltahl uh ke Bible.
17, 18. (a) Kom ac puhlaiklac fuhkah in oruh orekma in luti ke acn ma puhs mwet we uh? (b) Efuh kom kuh in fahk muh ohiyac lal David in kaksakihn Jeova yohk srihpac nuh ke orekma in luti uh?
17 Sahp, kom ac kuh in puhla muh e upac in sramsram nuh sin mwet ma oasr ke inkacnek uh suc kom tiac etuh. Pa ingacn ma Eddie, sie mwet suc oruh orekma in pioneer fin acn New York, el puhla. Tuhsruhktuh, oasr ma el konwacack ma kahsrel in puhlaik ke orekma inge. El fahk: “Ke pacl se kuht oruh lutlut in sucu lasr uh, nga ac muhtwacn kiyuck ah oruh research in konwacack top nuh ke kahs in lain ac ke nuhnak ma mwet uh ahkkahlwemye. Kuht oacyacpac siyuck sin mwet Loh sahyac ke kuhtuh pac kahs in kahsruh laltahl uh.” Ingena, Eddie el rahrahlac in tari wi oruh orekma in luti ke acn ma puhs mwet we.
18 Ke pacl se kuht engankihn orekma in luti lasr uh yohk liki na meet ah ac ahkwoye inkacnek in sramsram lasr nuh sin mwet uh ke pweng wo, kapkapwack lasr uh kuh in liyeyuck sin mwet sahyac.(Riti Sie Timothy 4:15.) Ac kuht kuh in kahsruh sie mwet in eklac sie mwet kuhlwacnsap luhn Jeova. David el fahk: “Nga fah kaksakihn Jeova pacl e nuhkewa; kaksak lal fah oan in oalihk pacl e nuhkewa. Nguhnihk fah kohnkihn in Jeova; mwet fakpacp fah lohng kac, ac engan.”—Psalm 34:1, 2.
TAHFWELAH NA IN KAKSAKIHN JEOVA KE KOM AHKYOHKYE KENA LOM IN KUHLWACNSUHPUH MWET SAHYAC AC ORUH MA NUHKEWA IN KAHSRELTAHL
19. Efuh kuh sie mwet kuhlwacnsap oaru luhn Jeova enenuh in engan, finne ohiyac ma el oasr kac an upac nuh sel in fahkwack?
19 David el fahk pac: “O LEUM GOD, ma oreklac lom nuhkewa fah kaksakihn kom, ac mwet lom nuhkewa fah sot kuloh nuh sum. Elos fah kahskahskihn wolacna ke kuh luhn tohkohsrahi lom, ac fahkwack kuh lom. Tuh mwet nuhkewa fah etuh ke orekma kuh lom, ac ke wolacna ac fuhlwact luhn tohkohsrahi lom.” (Psalm 145:10-12) Elos nuhkewa suc luhngse Jeova ac oaru nuh sel oasr kena yohk laltahl in fahkwack nuh sin mwet sahyac uh kacl. Tuhsruhktuh, ac fuhkah kom fin tiac kuh in orekmakihn pacl yohk lom in oacna ma kom ke an nuh ke orekma in luti ke sie lohm nuh ke sie lohm ke srihpen mas kuh mahtuhoh? Esam pacl nuhkewa lah, kom kaksakihn Jeova ke pacl nuhkewa ma kom sramsram kacl nuh sin mwet suc kom ohsun nuh se, oacna nurse kuh doctor. Kom fin muhta in presin ke srihpen luhlahlfongi lom an, kom srackna kuh in fahkwack nuh sin mwet sahyac kacl Jeova, ac ma inge oruh insiacl in engan. (Soakas 27:11) El oacyacpac engan kom fin kuhlwacnsuhpwacl finne kuhtuh mwet in sucu lom an tiac. (Sie Peter 3:1-4) Finne nuh ke pacl oasr ma upac sikyak, kom kuh in kaksakihn Jeova, tahfwelah na in fototo nuh sel, ac oruh kapkapwack ke orekma in kuhlwacnsap lom nuh sel.
20, 21. Fin oasr kunohkohn ma utuckot nuh sum ke u luhn Jeova, kom ac ahkkweye fuhkah mwet sahyac uh?
20 Jeova el ac fah ahkinsewowoye kom fin kom tahfwelah na in fototo nuh sel ac sang nohfohn kuhiyom in kuhlwacnsuhpwacl. Sahp, ke kom oruh kuhtuh ma eklac ke pacl lom kuh ohiyen moul lom an, ac oasr pacl yohk lom in kahsruh mwet uh in etuh ke wuhlelah pucspucs luhn God. Ac oasr pac pacl yohk lom in kahsruh mwet lili uh. Ac nuhnkuh pac ke luhngse yohk luhn mukul ac muhtwacn lili nuh sum ke eltahl liye orekma upac lom ke congregation uh.
21 Kuht finne engan in kuhlwacnsuhpuh Jeova ke lusen yac pucspucs, kuh mahlwem na ekahsr, kuht nuhkewa kuh in tahfwelah na in fototo nuh sel ac oruh kapkapwack ke orekma in kuhlwacnsap lasr nuh sin Jeova. Ke mwe lutlut tohkoh uh, kuht ac fah sramsramkihn lah fuhkah kuht kuh in kahsruh mwet sahyac in kapkapwack.
a Sie Timothy 3:1, (NW) “Kahs inge pwacye. Sie mukul el fin kwacfeacng tuh elan fal in oacna sie mwet kol, el ke na pwacye in oruh sie orekma na wowo.”