Sifwanu Taran Kom A Me Luti Lom
“Kom in sifwanu taran kom a me luti lom. Kom in mutanu in ma inge, tu in oru ou inge kom fwa sifwanu molikomla a ouyepa elos su long kom.”—1 TIMOTE 4:16.
“SOM . . . a oru met in mutanfwal nu kemwa tu elos in met tumal lutlut, . . . luti nu selos in liaung ma nu kemwa Nga sapkin nu sumwos.” (Mattu 28:19, 20) Ke sripen ma sap lal Jisus Kraist inge, paenang met Kristian nu kemwa enenu in kaifweung in ekla met luti. Met luti enenu in moniyuk in kasru met inse paye in eis etauk ke God meet liki elos patla. (Rom 13:11) Met sap Poul el kaifwe: “Kom in luti kas, moniyuk in pal fwal a in pal sufwal.” (2 Timote 4:2) Ma inge siyuk ke orekma in luti lu a likin congregation. Paye, kunokon in luti tia orek ke inkanek in sulkakin kas lun God mukena. Inkanek in luti mwo eneneyuk in ku in kasru met inse paye in ekla met tuma lutlut.
2 Kut moul ke “sie pal in ongoiye lulap.” (2 Timote 3:1, New World Translation) Nunuk lun met puspis akkolukyeyuk ke sripen lalmetmet lun met a me luti kikiap puspis. Nu sin met puspis “etu lalos losrla” a elos “alukela liki pulauk.” (Efesus 4:18, 19) Kutu selos arulanu keok inse ke sripen asor. Aok, met puspis elos “ongoiye a fwasrelik, oanu sip su wangin met sropu.” (Mattu 9:36) Fwinne ou inge, kut fwin orekmakin inkanek in luti mwo, kut ku in kasru met inse paye in ekla fwal nu ke ma eneneyuk.
Met Luti in Congregation
3 Ke inkanek lun akmwuk ke Baibel study, million puspis sin met elos eis me luti. Tusruktu, tokin elos baptaisla, oanu sie met sasu srakna yok enenu lun kasru tu elos in “okala a oakiyuki ku na ke foundeson.” (Efesus 3:17, NW) Ke kut oru ma Jisus el sapkin nu sesr in oru oanu ma simusla in Mattu 28:19, 20 a in kasru met sasu nu ke u lun Jeova, a elos fwa eis ma lane yok su tuku ke me luti in congregation. Fwal nu ke Efesus 4:11-13, mokul puspis pakiyuki in kulansap oanu “met sropu a met luti, tu in aksumwosye met mwo, nu ke orekma in kulansap nu ke musaiyuk monin Kraist.” Kutupal, orekma in luti lalos pa in “kai, kaiyuk, kaifwe wi mongfwusesr nu kemwa.” (2 Timote 4:2) Orekma lun met luti arulanu yok sripe paenang, leta lal nu sin met Korint, Poul el filiye met luti tokin met sap a met palu.—1 Korint 12:28.
4 Paye, tia met Kristian nu kemwa oru kulansap lalos oanu sie met elder, ku met sropu. Tusruktu, met nu kemwa akkeyeyuk in akkalemye “lungse a orekma mwo” sie sin sie. (Hibru 10:24, 25) In oru ou inge ke pal in meeting, kut enenu in akola mwo, sang comment lasr su tuku ke insiesr in ku in musaiyuk a akkeye kutupa met. Met orekma su yok experience lalos ku in ‘purakak pa kutu met ke orekma mwo’ fwin elos sang etauk a experience lalos nu sin met sasu ke pal se ma elos wilulos orekma ke pal in forfor sie loom nu ke sie loom. Oasr kutu pal, ku ke kutupal fwin tia pal in orekma lun forfor, me luti mwo ku in akkalemyeyuk nu selos. Ke sie me pupulyuk, mutan matu nu kemwa sapkinyuk in “met luti ke ma mwo.”—Taitus 2:3.
Akkeyeyuk in Lalalfongi
5 Kristian paye el siena liki alu kikiap puspis, su in alu kikiap elos arulanu taran a arulanu kaifweung in filiye nunuk lun met lalos ye koko lalos sifwanu. Ke pal se Jisus el muta fwin fwalu, met kol lun alu elos suk in sroukilye a suk in purakak oiyen moul nu kemwa lun met ke inkanek lun me luti lun met su orekla ke inkanek silolel. (Luk 11:46) Met kol lun alu wekunang Kristendom elos oru pal nu kemwa ou inge.
6 Tusruktu, alu paye, el sie “orekma mutal” su kut sang “fwal nu ke ku lun ngunasr kemwa.” (Rom 12:1, NW) Met kulansap lun Jeova “akkeyeyuk in lalalfongi lalos.” (2 Timote 3:14) Kutupal, met kol elos enenu in orala akmwuk in fwal a takla mwo orekma in congregation. Elos tia oru akmwuk in wi lungse lun met lili Kristian wielos, a, met elder elos luti nu selos in “akilen ma mwo a ma koluk.” (Hibru 5:14) Met elder elos oru ou inge yokna in akkeye congregation “ke kas lun lalalfongi a me luti paye.”—1 Timote 4:6.
Loang nu ke Me Luti Lom
7 Aok, lela kut in folokla nu ke kunokon yok lasr in luti. Ya enenu etauk yok, lutlut fulat, ku lalmetmet yok in oru orekma se inge? Mo, tia enenu. A yok, ke orekma in luti inge orek fwin fwalu nu fon sin met nu kemwa su ku a etauk lalos ma na fwal. (1 Korint 1:26-29) Poul el aketeye: “A ma saok inge oasr yurosr in alu fok, tu yoklanu lun ku fwa ma sin God me, a tia sesr sifwanu.” (2 Korint 4:7) Kapkapek yok su ku in liyeyuk ke orekma in luti fwin fwalu nu fon akkalemye ku lun ngun mutal lun Jeova!
8 Tusruktu, enenu kais sie met in kaifweung el fwa ku in ekla “met orekma su tia enenu in mwekin, su orekmakin sumwosna kas lun God.” (2 Timote 2:15) Poul el kaifwe nu sel Timote: “Kom in sifwanu taran kom a me luti lom. Kom in mutanu in ma inge, tu in oru ou inge kom fwa sifwanu molikomla a ouyepa elos su long kom.” (1 Timote 4:16) Fuka sie met el ku in taran me luti lal sifwanu, nu lu a likin congregation? Ya enenu orekma usnguk ku inkanek in luti usnguk in oru ou inge?
9 Jisus el akkalemye oiyen srikasrak mwo in luti ke me luti Pengpeng Lal Fwin Eolu. Ke el aksafyela sramsram lal, “met elos lut ke me luti lal.” (Mattu 7:28) Paye la, wangin sie inmaslosr ku in luti oanu Jisus Kraist el oru. Tusruktu, kut tia enenu in ekla met usrnguk in sramsram kut fwa ku in met luti mwo. Efu, meyen fwal nu ke Job 12:7, “kosro” a “mwon” elos ku in luti fwinne tia kaskas! Nu ke kutena ku a etu su oasr yurosr, wikin enenu yok pa, “kut kain in met fuka se”—kain in oiye mwo fuka oasr yurosr a kain in oiye fuka ke ma lun ngun kut akkapye in moul lasr su ku in kasru tulik lutlut in etawi.—2 Piter 3:11; Luk 6:40.
Tulik Lutlut ke Kas lun God
10 Sie met luti mwo ke ma paye lun Ma Simusla enenu in ekla tulik lutlut ke Kas lun God. (Rom 2:21) Jisus Kraist el sang me srikasrak mwo ke ma se inge. Ke lusen pal in orekma a forfor lal, Jisus el orekmakin ku sramsramkin ma simusla pus liki tafwu in buk puspis su simusyukla ke Ma Simusla lun Hibru.a Etauk yok lal ke Kas lun God arulanu kalem ke pal se ma el yiu 12 matwe, ke pal se ma konoiyukyuk el “muta inmaslon met luti, in longolos, a siyuk me siyuk selos.” (Luk 2:46) In oanu sie met matu, su fasin lal Jisus pa in som nu ke imwen lolngok, su Kas lun God ridiyuk we meet.—Luk 4:16.
11 Ya kom sie met su lungse ridi Kas lun God? Kaifweung kom in pukun, tu pa inge inkanek su “kom fwa ku in etu in sangeng sin Jeova, a konoiyuk etauk lun God.” (Soakas 2:4, 5) Ke ma inge oakiye srikasrak mwo nu ke lutlut. Kaifweung in ridi kais sie ip ke Kas lun God len nu kemwa. (Sam 1:2) Kaifweung in pala in ridi The Watchtower a Awake! pal nu kemwa kom eis. Long akmwoye ke pal in meeting nu kemwa lun congregation. Lotela akmwoye inkanek in tuni mwo me lutlut sa. Ke inkanek in lutlut in ‘takunla sumwos me lutlut,’ na kom fwa ku in tila sramsram alukela ma fwal a orekmakin me luti sufwal ke pal in luti lom.—Luk 1:3.
Lungse a Sunak Nu Selos Su Lutiyuk
12 Siepa fwako yok sripe a mwo pa ke oiye sumwos a paye nu selos su kom luti. Met Farisi elos akkalemye srunga lalos nu selos nu kemwa su porongo Jisus. “A un met puspis inge su tia etu ma sap elos selngawiyuk,” elos fwak. (Jon 7:49) Tusruktu Jisus el akkalemye lungse yok a sunak nu sin met tuma lutlut lal. El fwak: “Nga tia sifwil pangon komwos met kulansap, tu sie met kulansap el tia etu ma met kato lal el oru. A Nga pangon komwos met kamwuk, tu ma nu kemwa ma Nga long sin Papa tumuk Nga fwakak tari nu sumwos.” (Jon 15:15) Ma inge akkalemye ke inkanek fuka met tuma lutlut lal Jisus elos enenu in oru ke orekma in luti lalos.
13 Ke sie me pupulyuk, Poul el tiana akkalemye kulang a pakoten in oanu inkanek lun sie business, nu sin tulik lutlut lal. El fwak ou inge nu sin met Korint: “Tu fwinne oasr siengoul tausen met luti yuromwos in Kraist, a tia pus papa tumomwos; tu in Kraist Jisus Nga oswe komwosla ke mwosasu.” (1 Korint 4:15) Pal puspis, Poul el tung ke pal el kaifwe nu selos su el luti! (Orekma 20:31) El ouyepa akkalemye mongfwusesr a kulang yok. Ke ma inge el ku in fwak nu sin met Tessalonika: “A kut kulang inmaslomwos, oanu sie mutan to ke el kurunganang tulik nutul sifwanu.”—1 Tessalonika 2:7.
14 Ya kom etawi Jisus a Poul? Lungse paye nu sin tulik lutlut lasr ku in akmwoyela kutena me keok a munas su kut usru ka. Ya tulik lutlut lasr elos akilen la kut engun na paye selos? Ya kut sang pal yok kut in ku in etalosla? Oasr sie mutan Kristian su akilen upayen tulik mutan se su el lutlut nu in kapek ke ma lun ngun, na el siyuk sel: “Ya oasr kutena ma su akfosye kom? Mutan sa mutamwauk in ikasla insiel, a srumon nu sel me fosrnga a me asor puspis lal. Sramsram laltal arulanu mwo su ikasla inkanek mwomwo nu sin mutan se inge. Fwin oasr pal sikyuk luma ou inge enenu in orekmakinyuk Ma Simusla, a kas in ekengun a kas in akkeye su arulanu fwal. (Rom 15:4) Tusruktu, kut enenu pa in taran: “Saap sie tulik lutlut el arulanu pisrpisr in kapek tusruktu srakna oasr kutu orekma su tia fwal nu sin met Kristian su el enenu in fwasr liki. Ke ma inge tia sie inkanek mwo a lalmetmet in futoto alukela ma fwal nu sin kain in met ou inge. In kurungin inmaslon met Kristian a met saye enenu in sensenkinyuk.—1 Korint 15:33.
15 Kasru wikin sunak lasr nu sin tulik lutlut kut luti enenu kut in tia srukye sulela lun moul lalos in fwal nu ke lungse lasr. (1 Tessalonika 4:11) Ke me pupulyuk, fwin kut lutlut nu sin sie mutan su muta yurin sie mokul su el tia payuk nu se. Saap oasr tulik natultal. Meyen el eis etauk sumwos lun God, paenang mutan se inge lungse in aksumwosye moul lal fwal nu ke inkanek lun Jeova. (Hibru 13:4) Ya el enenu in payukyak sin mokul se inge ku lan som lukel? Saap kut e nunku yok pa, la el fwin payukyak sin mokul se inge su srikla ku wangin lungse lal nu ke ma lun ngun ma inge e ku in sroukye kapek lal ke pal fwasru. Fwin lumeyuk ke inkanek saye, saap kut pakomuta tulik natul a kut nunku mu saap mwo lan payuk sel. Ke ma inge, e fwa wangin sunak a wangin pa lungse kut fwin lutiyuk luma ou inge nu ke moul lun tulik lutlut a srike in patok nunuk lasr sifwanu nu ka. Ke saflaiye, mutan se inge sifwanu pa e pulakin kutena ma upa su tuku ke kain in sulela ou inge. Ke ma inge, ya tia mwo kut fwin kasru tulik lutlut in orekmakin “ku lal in akilen” a oru sulela lal sifwanu ke ma su el enenu in oru?—Hibru 5:14.
16 Arulanu yok sripe nu sin met elder lun congregation in akkalemye lungse a sunak nu sin met wielos nu kemwa. In sim leta nu sel Failimon, Poul el fwak: “Ke ma inge, fwinne oasr yurok pulaik nu kemwa in Kraist in kaifwe kom ke ma fwal, tusruktu ke lungse Nga siyuk nu sum.” (Failimon 8, 9) Kutupal, oasr ma upa sikyuk in congregation. Kaifweung in lalalfongi eneneyuk. Poul el kaifwe nu sel Taitus in “kaifwelos [met tafongla] ku, tu elos fwa sumwos in lalalfongi.” (Taitus 1:13) Ke ma inge, met sropu elos enenu in taran in tia kaskas sikulang nu sin congregation. “A tia fwal nu sin met kulansap lun Leum tu lan akukuin,” Poul el simusla, “a tu lan kulang nu sin met e nu kemwa akola in luti, mongfwusesr.”—2 Timote 2:24; Sam 141:3.
17 Met sropu enenu in akesmakinyelos sifwanu pal nu kemwa ke orekma lalos nu sin “u lun God.” (1 Piter 5:2) Moses, el arulanu fwokpap meet, tia pat tok ma inge tula. Met Israel elos “tunyuna lain ngunal, a el kaskas in luma tia sumwos ke ngoasrol.” (Sam 106:33) God el arulanu toasr ke orekma sesumwos inge lain met Lal, fwinne oasr pa meta lalos. (Oekyuk 20:2-12) Kut fwin sun kain in me srifwe inge ke len lasr, met elder nu kemwa enenu in kaifweung in luti ke lalmetmet a kulang. Met lili wiesr elos topuk ke pusra mwolanu fwin akkalemyeyuk nu selos oiye kulang a nunkeyuk elos oanu sie met su enenu kasru, a tia oanu sie met su wanginla fwinsrak la. Met elder nu kemwa enenu in srukye nunuk sumwos su oasr yurol Poul ke pal se el fwak: “A kut lalalfongi Leum keyumwos, tu komwos oru, a fwa oru ma kut sapkin nu sumwos.”—2 Tessalonika 3:4.
Loang nu ke Ma Enenu Lalos
18 Sie met luti mwo el insemwomwo in akfulatye ku a lupan etu lun tulik lutlut lal. (Srike liye Jon 16:12.) In me pupulyuk lal Jisus, leum el sang ma lal “nu sin kais sie selos fwal nu ke ku lalos.” (Mattu 25:15) Kut ku in fwasr tokin akmwuk se inge ke pal orek Baibel study. Ka ma inge, e fwa me insemwomwo na paye kut fwin aksafyela sie me rid su tuku ke Baibel ke lusen pal na futoto. Tusruktu, kut enenu in akilen la tia met nu kemwa oanu sie ke etu lalos in rid ku oanu sie ke etauk lalos in srukye me lutlut sasu. Ke ma inge liyaten eneneyuk nu ke pal in som liki sie me lutlut nu ke siepa me lutlut fwin sie met el insemwomwo in lutlut a el patla in srukye me lutlut fwin akmwuk lun lutlut el sa la. Kasru tulik lutlut in srukye a kalem ke me lutlut, mwo liki lutlut se su sana in aksafyeyukla.—Mattu 13:51.
19 Ma inge fwal pa in lumeyuk nu sin tulik lutlut Baibel su oasr ma upa nu selos in kalem ke me lutlut, su oanu me luti lun Trinity, ku me akfulat puspis lun alu. Pal nu kemwa tia enenu in toeni kutu me lutlut su tuku ke buk saye ke pal in lutlut, tusruktu, kut ku in oru ou inge kais kutu pal fwin ma inge eneneyuk. Nunuk sumwos enenu in orekmakinyuk in tia kosroila ku akmunasye kapkapek lun sie tulik lutlut.
Akkalemye Insemwomwo!
20 “Moniyuk in ngunumwos,” Poul el fwak. (Rom 12:11) Aok, fwinne kut oru sie Baibel study ku kut wi pa akesrui ke meeting lun congregation, kut enenu in oru ou inge ke moniyuk a alken. Poul el fwak nu sin met Tessalonika: “Fuka mwosasu lasr tia tuku nu yuromwos in kas mukena, a ouyepa in ku a in ngun mutal a in arulanu etu.” (1 Tessalonika 1:5) Poul a met su wilul elos sang “tia mwosasu lun God mukena, a ouyepa ngunalos sifwanu.”—1 Tessalonika 2:8.
21 Insemwomwo na paye tuku ke lalalfongi yok lun Baibel study lasr elos enenu na paye in long ma kut akola in fwak. Lela kut in tia nunku mu kutena kunokon in luti lasr orek in mena akfwal su kut pulakin tari in pal nu kemwa. Met sim Ezra el liksreni loang nu ke me luti lal ke ma se inge. El “sang insiel in suk ma sap lun Jeova, a in oru, a in luti ma sap a ma lo in Israel.” (Ezra 7:10) Kut enenu pa in oru ou inge, ke kut akola mwo a akkalemye ma saok lun me lutlut. Lela kut in pre nu sin Jeova in nekutla ke lalalfongi a moniyuk. (Luk 17:5) Insemwomwo lasr ku in kasru tulik lutlut in oakiye lungse paye nu ke ma paye. Paye, inkanek in luti puspis kut ku in orekmakin in kurungin me luti lasr. Me lutlut lasr toko e fwa sramsramkin kutu ma inge.
[Footnote]
a Srike liye Insight on the Scriptures, Volume 2, sra 1071, orekla sin Watchtower Bible and Tract Society of New York, Inc.
Ya Kom Esam?
◻ Efu met luti Kristian usnguk eneneyuk misinge?
◻ Kain in kena lun lutlut fuka kut enenu in akkapye?
◻ Efu ku lungse a sunak nu selos nu kemwa su kut luti arulanu yok sripe?
◻ Fuka kut ku in loang nu ke ma enenu lun tulik lutlut lasr ke Baibel?
◻ Efu alken a moniyuk arulanu yok sripe ke pal se ma kut luti kutu met?
[Study Questions]
1, 2. Efu met luti moniyuk puspis arulanu enenu ke len inge?
3. (a) Mea kutu me enenu nu ke kunokon in luti su Jisus el sapkin nu sesr in oru? (b) Su oasr kunokon yok in luti ke congregation?
4. Fuka etauk in luti lasr kasre kut in akos kas in kaifwe lal Poul simusyukla in Hibru 10:24, 25?
5, 6. (a) Fuka Kristian paye el siena liki alu kikiap? (b) Fuka met elder nu kemwa elos kasru met sasu in oru sulela sumwos a lalmetmet?
7, 8. (a) Fuka met puspis su oasr etauk sumwos elos ku in kulansap oanu met luti? (b) Mea akkalemye la kaifweung lun met se eneneyuk in oru elan ekla sie met luti mwo?
9. Mea ma saok su yok liki etauk su oasr yurosr?
10. Fuka Jisus el sang me srikasrak mwo nu sin sie tulik lutlut ke Kas lun God?
11. Kain in srikasrak mwo nu ke lutlut fuka sie met luti el enenu in orekmakin?
12. Kain in oiye fuka Jisus el akkalemye nu sin met tumal lutlut lal?
13. Mea pulakin lal Poul nu sin met nu kemwa el luti?
14. Efu insemwomwo lasr nu sin Baibel study lasr arulanu yok sripe? Sang me pupulyuk.
15. Fuka kut ku in akkalemye sunak nu sin Baibel study lasr?
16. Fuka met elder elos ku in akkalemye lungse a sunak nu ke u lun God?
17. Kain in tafongla fuka Moses el oru, a mea met elder elos ku in lotela ke ma se inge?
18, 19. (a) Fuka kut ku in loang nu ke me enenu lun Baibel study fwin srikla etauk? (b) Fuka kut ku in kasru tulik lutlut su pulakin ma upa ke kutu me lutlut?
20. Fuka Poul el orala me srikasrak mwo nu ke inkanek in akkalemye alken a moniyuk in luti?
21. Fuka kut ku in srukye insemwomwo pal nu kemwa ke kunokon in luti lasr?
[Picture on page 8]
Met luti mwo elos sifwanu tulik lultut ke Kas lun God
[Picture on page 11]
Akkalemye insemwomwo nu sin tulik lutlut ke Baibel