Kwacfeacng na in Soano!

1, 2. Ohiyac fuhkah se ma oasr yurin mwet kuhlwacnsap pucspucs luhn Jeova uh?

MWET kuhlwacnsap luhn Jeova in pacl meet ah, mongfihsracsr ac soano na mwe ahkpwacyeyacn kahs pahluh pucspucs. Ke sie mwe puhpuhlyuck, Jeremiah el soano ke kuhnanuclac luhn acn Judah sin mwet Babylon, ac pa inge ma sikyak ke yac 607 B.C.E. (Jeremiah 25:8-11) Isaiah el palye lah Jeova el ac fah ahksukohsohkyelah mwet Jew liki sruhoh laltahl, tuh eltahl in fohlohk nuh Judah. El fahk: “Insewowo elos nuhkewa suc fihliyac luhlahlfongi lalos in LEUM GOD.” (Isaiah 30:18) Micah el oacyacpac soano in ahkpwacyeyuck wuhlelah pucspucs luhn Jeova. El fahk: “Nga fah tawi na LEUM GOD.” (Micah 7:7) Ac ke lusen yac pucspucs, mwet kuhlwacnsap luhn God inge luhlahlfongi pac ke wuhlelah kacl Messiah, kuh Christ, ke tuhkuh lal.​—Luke 3:15; Sie Peter 1:10-12.a (Liye footnote.)

² Ke pacl inge, oasr pac kahs pahluh ke Tohkohsrahi luhn Jeova ma kuht soano in ahkpwacyeyuck. Jesus suc Tohkohsrah kac, el ac fah molwelah mwet kuhlwacnsap luhn God liki facl kuluk se inge. El ac kuhnahoslah mwet kuluk ac ahkwacngihnyelah mwe kweok nuhkewa. (Sie John 5:19) Pwacnacng kuht enenuh in taran ac soano ke lwen luhn Jeova ac sang kuhiyacsr nohfohn tuh kuht in ahkolah nuh kac.

3. Kuht fin tuhpan sahflahiyen oakwuck se inge ke pacl na loeloes se, meac kuht kuh in muhtwacwack in nuhnkuh kac?

³ Kuht arlacna rahrahlac nuh ke lwen se ma luhngse luhn God uh ac orek fin facluh. (Matthew 6:10, BMK) Tuhsruhktuh kuht fin tuhpan sahflahiyen oakwuck se inge ke lusen yac pucspucs, sahp kuht muhtwacwack in nuhnkuh, ‘Efuh kuht enenuh in kwacfeacng na soano sahflahiyen oakwuck se ma apkuhran me inge?’

EFUH KUHT ENENUH IN KWACFEACNG NA IN SOANO SAHFLAHIYEN OAKWUCK SE SUC APKUHRAN ME INGE?

4. Efuh kuh yohk srihpac nuh sesr in “tawi”?

⁴ Jesus el sapkihn nuh sin mwet tuhma lutlut lal ah eltahl in “tawi” ac “soano.” Pwacnacng arlacna yohk srihpac nuh sesr in kwacfeacng na soano nuh ke sahflahiyen oakwuck se ma apkuhran me inge. (Matthew 24:42; Luke 21:34-36) Oacyacpac, pacl nuhkewa u luhn Jeova uh ahkacsmakihnye kuht in “tuhpan lwen luhn God” ac in lohacng ahkwoyac nuh ke wuhlelah pucspucs luhn Jeova ke oakwuck sasuc uh.​—Riti Luo Peter 3:11-13.

5. Srihpac fuhkah se pac sahyac pwacnacng kuht enenuh in taran ac soano lwen luhn Jeova uh?

⁵ Mwet tuhma lutlut lal Jesus in pacl meet ah fin enenuh in kwacfeacng na soano lwen luhn Jeova, na ma inge ac yohk srihpac pac nuh sesr ke pacl inge liki na pacl meet ah. Efuh? Mweyen mwe akucl ma Jesus el ahkkahlwemye inge ahkpwacyeye lah el Tohkohsrahlac ke Tohkohsrahi luhn God muhtwacwack in yac 1914 ac lah kuht moul ke lwen sahflah. Ke sie mwe puhpuhlyuck, in oacna ke ma Jesus el palye ah, upaclah ohiyac kuluk luhn facluh ac pweng wo ke Tohkohsrahi uh ac fah lutiyuck ke acn nuhkewa fin facluh. (Matthew 24:3, 7-14) Jesus el tiac fahk lah puhtahkah lwen sahflah se inge, pwacnacng kuht enenuh in ahkolah nuh ke sahflahiyen oakwuck se suc apkuhran me inge.

6. Kuht etuh fuhkah lah facluh ac kuluklac liki na meet ah ke kuht apkuhranyang nuh ke sahflahiyen oakwuck se inge?

⁶ Bible uh fahk lah mwet uh ac fah kuluklac liki na meet ah ke lusen “lwen sahflah uh.” (Luo Timothy 3:1, 13; Matthew 24:21; Fwackyuk 12:12) Pwacnacng, ma pucspucs finne arlacna kuluklac ke pacl inge, kuht etuh lah ac kuluklac liki na meet ah. Yac lwen sahflah uh kalmackihnyuck nuh ke pacl se ma facluh ac fah kuluklac liki na meet ah?

7. Matthew 24:37-39 luti nuh sesr ke meac ac sikyak fin facluh ke lwen sahflah uh?

⁷ Sahp kuhtuh sin mwet uh nuhnkuh muh meet liki lwen in ongaiyac luhlahp uh ac fah oasr mweun ke muhtuhnfacl nuhkewa ac inkaiyen mwet uh ac mas kuh masrinsracl. (Fwackyuk 7:14) Ma inge ac fin sikyak, ma na kahlwem se nuh sin mwet nuhkewa lah kalmen ma inge pa kahs pahluh in Bible uh ahkpwacyeyuck. Ma inge ac kahlwem pac sin mwet ma tiac luhngse lohng ma Bible uh fahk. Tuhsruhktuh, Jesus el fahk muh ke lwen sahflah inge, mwet pucspucs ac “tiacna etuh.” Eltahl ac oruh na ma eltahl kwacna oruh lwen nuhkewa uh ac eltahl ac fah lut ke lwen luhn Jeova uh tuhkuh. (Riti Matthew 24:37-39.) Arlacna kahlwem lah kuht tiac enenuh in nuhnkuh ac soano ke ohiyac kuluk luhn facluh in arlacna kuluklac liki na meet ah, na lwen in ongaiyac luhlahp uh ac fah tuhkuh.​—Luke 17:20; Luo Peter 3:3, 4.

8. Meac mwet ma ahkos kahs in sensen lal Jesus uh enenuh in arlacna taran ac kahlwem kac?

⁸ Mwe akucl ma Jesus el ahkkahlwemye nuh sin mwet tuhma lutlut lal kahs in sensen nuh ke puhlan pacl se ma eltahl ac fah muhta kac uh. Mwet tuhma lutlut luhn Jesus arlacna taran. (Matthew 24:27, 42) Ke yac 1914 ah me, kain in ip pucspucs ke mwe akucl lal Jesus inge ahkpwacyeyuck. Kuht luhlahlfongi na pwacye lah kuht moul ke lwen sahflah. Jeova el sulaclah tari pacl ma el ac fah kuhnahoslah oakwuck kuluk se lal Satan inge.

9. Efuh kuht enenuh in kwacfeacng na soano sahflahiyen oakwuck se ma apkuhran me inge?

⁹ Na pwacnacng, efuh kuh kuht enenuh in kwacfeacng na soano sahflahiyen oakwuck se ma apkuhran me inge? Mweyen kuht ahkos ma Jesus Christ el fahk uh. Oacyacpac, kuht liye na pwacye lah mwe akucl ma Jesus el ahkkahlwemye ke lwen sahflah uh ahkpwacyeyuck. Kuht luhlahlfongi lah sahflahiyen oakwuck se inge apkuhran me, tiac ke srihpen na kuht luhlahlfongi ma nuhkewa ma kuht lohng uh, tuhsruhktuh kuht luhlahlfongi na pwacye lah kahs pahluh in Bible uh ahkpwacyeyuck. Kuht enenuh in taran ac ahkolah nuh ke sahflah uh.

PUHTAHKAH KUHT ENENUH IN SOANO UH?

10, 11. (a) Efuh kuh Jesus el fahk nuh sin mwet tuhma lutlut lal ah in “taran ac soano”? (b) Meac Jesus el fahk muh mwet tuhma lutlut lal ah in oruh fin sahflah uh tiac sa in tuhkuh oacna ma eltahl motko muh ac sikyak? (Liye petsac se meet ke mwe lutlut se inge.)

¹⁰ Puhs na sesr suc ma arlacna oaru ke kuhlwacnsap lasr nuh sin Jeova ac ahkkahlwemye ohiyen muhtweng in soano ke lusen yac pucspucs, tuh lwen lal uh in tuhkuh. Ac finne ohinge, kuht enenuh na in kwacfeacng na soano sahflahiyen oakwuck se ma apkuhran me inge. Kuht enenuh in ahkolah nuh ke pacl se ma Jesus el ac fah tuhkuh in kuhnahoslah facl lal Satan uh. Esam ke ma Jesus el fahk nuh sin mwet tuhma lutlut lal ah in oruh: “Kowos liyekowosyang ac tuhpan, tuh kowos tiac etuh ke pacl se ac sikyak. Ac fah oacna ke sie mwet ac som liki facl sel, ac fihliyac mwet kuhlwacnsap lal in karihngihn ma lal. El sang orekma kunen kais sie, ac el fahk pac nuh sin mwet liyacacng motonoac in arlacna taran. Ke ma inge, kowos in arlacna taran, mweyen kowos tiac etuh lah piyac pacl se leum luhn lohm uh ac fohlohkoh, sahp ke ekuh, kuh ke infulwacn fong, kuh ke tahfuhn lutu, kuh ke lututacng ke faht uh takack. El fin sa tuhkuh, tiac wo elan konwekowosyak tuh kowos mutul. Ma nga fahk nuh suwos uh, nga fahk nuh sin mwet nuhkewa: Taran ac soano!”​—Mark 13:33-37.

¹¹ Ke pacl se mwet tuhma lutlut lal Jesus ah etwacack lah el muhtwacwack in kol ke yac 1914, eltahl kahlwemack pac kac lah sahflahiyen oakwuck se inge kuh in tuhkuh ke oacna sie pacl. Pwacnacng eltahl ahkolah nuh kac ke eltahl ahkyohkye pacl ac orekma laltahl in fahkwack. Jesus el fahk lah el ac fah tuhkuh ke “tahfuhn lutu, kuh ke lututacng.” Ma inge ac fin sikyak, meac mwet tuhma lutlut lal uh ac enenuh in oruh? Jesus el fahk: “Taran ac soano!” Pwacnacng kuht finne puhla muh kuht tuhpan ma inge in sikyak ke lusen pacl na loeloes, tiac kalmac pa sahflahiyen oakwuck kuluk se inge soenna apkuhran me kuh ac tiac tuhkuh ke pacl lasr uh.

12. Meac Habakkuk el siyuck sin Jeova ac Jeova el tohpohkuhl fuhkah?

¹² Mwet pahluh Habakkuk el muhtweng ac soano na nwe ke el fahkwack ke kuhnanuclac luhn acn Jerusalem. Kuhtuh pac mwet pahluh meet luhkel uh fahkwack pweng se pac inge ke lusen yac pucspucs. Habakkuk el kuh in liye lah orekma kuluk ac nuhnuhnkuh sesuwohs uh yohkyohkwelihk liki na meet ah. El siyuck sin Jeova ke kahsruh, ke pacl se el siyuck: “O LEUM GOD, lusac kac pacl nga ac pahng in suk kahsruh?” Jeova el finne tiac fahk lwen se ma sahflahiyen ma kuluk inge ac fah tuhkuh, el wuhlelah nuh sel Habakkuk: “Ac tiac kohtlah nwe tok.” Jeova el oacyacpac fahk nuh sel Habakkuk elan “soano na.”​—Riti Habakkuk 1:1-4; 2:3.

13. Nuhnak fuhkah Habakkuk el apkuhran na in ahkkahlwemye, ac efuh kuh ma inge sie mwe sensen?

¹³ Srihke nuhnkuh lah ac fin Habakkuk el ullac ke soaneyacn sahflah uh ac fahk: ‘Nga soano na kuhnanuclac luhn acn Jerusalem ke lusen yac pucspucs. Sahflahiyen ma inge arlacna pahtlaclac. Nga tiac enenuh in tahfwelah na fahkwack kac nuh sin mwet uh. Oasr mwet sahyac kuh in oruh.’ El fin nuhnkuh ohinge meac ac kuh in sikyak? Jeova el apkuhran na in tiac insewowo sel. Ac el fin tiac ahkolah nuh kac, apkuhran na in tuhlac moul lal uh.

14. Efuh kuh kuht kulohkihn lah Jeova el sensenkihn kuht in kwacfeacng na soano?

¹⁴ Srihke petsacelah muh kom oasr ke facl sasuc uh. Ma nuhkewa ma Jeova el palye muh ac sikyak ke lwen sahflah uh ahkpwacyeyuck oacna ke ma el fahk. Luhlahlfongi lom nuh sin Jeova ke pacl inge yohk liki kuhtwena pacl sahyac, ac luhlahlfongi lom uh yohk liki na meet ah ke ma pucspucs el wuhlelah muh el ac fah oruh. (Riti Joshua 23:14.) Kom enenuh in kulohkihn lah Jeova el oakiyac pacl na wowo se tuh elan ahksahfyelah oakwuck kuluk uh ac el sensenkihn mwet lal uh in kwacfeacng na soano.​—Orekma 1:7; Sie Peter 4:7.

KUHT TAHFWELAH IN FAHKWACK KE KUHT SOANO

15, 16. Efuh kuh kuht enenuh in sang kuhiyacsr nohfohn ke orekma in luti ke lusen lwen sahflah inge?

¹⁵ Pacl nuhkewa u luhn Jeova uh ahkacsmakihnye kuht in lohacng nuh ke moul in kuhlwacnsap lasr nuh sin Jeova uh. Mwe ahkacsmakihn inge kahsre kuht in liye na pwacye lah pweng inge yohk srihpac ac ahkkahfofoye kuht ke kuhlwacnsap lasr nuh sin God uh. Kuht luhlahlfongi na pwacye lah mwe akucl ma Jesus el ahkkahlwemye ah ahkpwacyeyuck ingena ac sahflahiyen oakwuck kuluk se inge apkuhran me na pwacye. Pwacnacng kuht fihliyac muh in Jeova pa ma se emeet ke moul lasr uh ac kuht tahfwelah na in fahkwack pweng wo ke Tohkohsrahi uh.​—Matthew 6:33; Mark 13:10.

¹⁶ Ke pacl se kuht fahkwack pweng wo uh nuh sin mwet sahyac, kuht sang kahsruh in molweltahllah liki sahflahiyen oakwuck kuluk se lal Satan ma apkuhran me inge. Mwe ongaiyac luhlahp se ma sikyak upac emeet ma sikyak inkof ah ke yac 1945 pa ke tili luhn oak soko pahngpahng Wilhelm Gustloff. Sun tausin nuh ke tausin mwet ma misac kac. Muhtwacn lili se wi mukul tuhmwacl ah eltahl kewana moullac. El esam lah finne ke pacl se ma oak soko ah fahsr in tili, oasr muhtwacn se suc nuh tuhng na ac fahk: “Ap luhk ah! Ap luhk ah! Mwe nahweyuck luhk ah! Mwe nahweyuck luhk ah oasr ke infuckihl se loac ngoh! Tuhlac ma nuhkewa luhk uh!” Tuhsruhktuh mwet sahyac ma wi oak soko ah etuh lah meac ma yohk srihpac emeet uh ac eltahl kwacfeacng na in molwelah mwet kac ah. Ke pacl inge, moul luhn mwet pucspucs oasr ke mwe sensen. Kuht ke oacna mwet ke oak soko ah ma tiac nuhnkuh kacltahl sifacna ac lohacng nuh ke orekma na yohk srihpac se inge in luti. Kuht enenuh in sang kuhiyacsr nohfohn in kahsruh mwet pucspucs tuh eltahl in wi moullac ke sahflahiyen oakwuck kuluk se inge.

17. Efuh kuh kuht enenuh in luhlahlfongi lah sahflahiyen oakwuck kuluk se inge ac kuh in tuhkuh ke oacna sie pacl?

¹⁷ Kuht kuh in liye na pwacye lah kahs pahluh in Bible uh ahkpwacyeyuck ac sahflahiyen oakwuck kuluk se inge apkuhran me. Kuht soano ke “koac singucul ac kosro suhlallacl soko” uh in foracng lain alu kikiacp, suc pa Babylon Luhlahp. (Fwackyuk 17:16) Lwelah kuht in tiac nuhnkuh muh srackna yohk pacl meet liki ma inge sikyak. Nikmet muhlkuhnlah lah God el ac “oruh tuh elos in” foracng lain alu kikiacp ac pacl se inge kuh in sa na sikyak ke oacna sie pacl! (Fwackyuk 17:17) Sahflahiyen oakwuck kuluk lal Satan uh apkuhran me. Pwacnacng kuht enenuh na in ahkos kahs in sensen lal Jesus inge: “Liyekowosyang tuh kowos in tia sislah pacl lowos ke kuhfa yok a mwe nihm kuh, ac fosrngah ke ma luhn facl se inge, pwacnacng lwen sac ac muh sa na in sruokkowosi oacna sie me kwacsrihp. Ac fah sikyak nuh sin mwet in acn nuhkewa fin facluh oacna sie mwe kwacsrihp.” (Luke 21:34, 35; Fwackyuk 16:15) Lwelah kuht in taran ac tahfwelah na in kahfofo ke kuhlwacnsap lasr nuh sin Jeova ac luhlahlfongi lah el “orek mwenmwen ohinge nuh selos suc fihliyac finsrak lalos in el.”​—Isaiah 64:4.

18. Kihsen siyuck fuhkah ac fah topukyucklac ke mwe lutlut se tok uh?

¹⁸ Ke kuht soano sahflahiyen oakwuck kuluk se inge, kuht enenuh in lohng kahs in kahsruh lal Jude inge sie mwet tuhma lutlut suc fahk ohinge: “Mwet kawuck luhk, kowos in sifacna muhsahikowosyak fin luhlahlfongi muhtahl lowos. Puhruhe ke kuh luhn ngun muhtahl. Ac liyekowosyang sifacna in muhta na in luhngse luhn God, oacna ke kowos tuhpan Leum lasr Jesus Christ ke luhngkuhlwacng lal in acsot moul ma pahtpaht nuh suwos.” (Jude 20, 21) Tuhsruhktuh, kuht ac ahkkahlwemye fuhkah lah kuht soano facl sasuc luhn God ma apkuhran in tuhkuh ac kuht silahklahklac in tari sun? Kuht ac fah sramsramkihn ma inge ke mwe lutlut se tok uh.