Nuhnkuh Yohk ke Luhngse Luhn Jeova Suc Oan Ma Pahtpaht
“Ac nga fah nuhnkuh yohk ke orekma kuh lom.”—PSALM 77:12.
1, 2. (a) Efuh kuh kom luhlahlfongi na pwacye lah Jeova el luhngse mwet lal uh? (b) Mwe enenuh fuhkah se oasr yurin mwet uh ke pacl se God el oracltahllah?
EFUH kuh kom luhlahlfongi na pwacye lah Jeova el luhngse mwet nuhkewa lal? Meet liki kom tohpohklah kihsen siyuck se inge, nuhnkuh ke mwe puhpuhlyuck inge: Ke yac pucspucs, mukul ac muhtwacn lili uh ahkkweye sie muhtwacn lili suc pahngpahng Taylene. Eltahl fahk nuh sel muh wo elan tiac nuhnkuh muh el enenuh in oruh ma nuhkewa ac elan tiac pac puhla muh srihklaclac ma el oraclah. Taylene el fahk: “Fin Jeova el tiac luhngse nga, el ac fah tiac ahkkahlwemye kahs in kahsruh lal pacl nuhkewa.” Brigitte, suc muhkwena tuhfahlah tuhlihk luo nahtuhl tukun mukul tuhmwacl ah misac, el fahk ohinge: “Sie ma suc upac emeet pa in tuhfahlah tuhlihk nahtuhsr uh ke facl se inge suc kolyuck sel Satan, yohk na nuh sin sie pahpah kuh ninac suc muhkwelacna. Ne ohinge, nga luhlahlfongi na pwacye ke luhngse luhn Jeova, mweyen el kol ac kahsreyuc ke pacl upac, ac el tiac lwelah nga in sun kuhtwena ma upac ma nga tiac kuh in muhtwacnglah.” (Sie Corinth 10:13) Sandra el kweok ke sie mas upac ma tiac kuh in onweyucklac. Ke sie toeni luhlahp, muhtwacn lili se ahkkahlwemye kuhlwacng nuh sel Sandra. Mukul tuhmwacl Sandra ah fahk: “Kuht finne tiac etwacl na pwacye, tuh kuhlwacng pwacye lal ac oacyacpac ke srihpen el nuhnkuh kacsr, pa inge ma kuht arlacna engankihn ah. Mwet lili wiyacsr fin eltahl ahkkahlwemye luhngse inge nuh sesr, ma inge ahkkahlwemye luhngse pwacye luhn Jeova nuh sesr.”
2 Jeova el oraclah mwet uh tuh eltahl in ahkkahlwemye luhngse ac in puhlakihn lah mwet sahyac uh luhngse pac eltahl. Tuhsruhktuh, arlacna fihsracsr kuht in muhnahslah ke srihpen mas, ma upac ke mani kuh ke wacngihn ma wo sikyak ke orekma in luti lasr uh. Kuht fin puhla muh Jeova el tilac luhngse kuht, kuht enenuh in esam lah el ahksacohkye kuht. El fototo nuh yohrohsr pacl nuhkewa oacna elan sruokyac lacpo leyot lasr ac kahsre kuht. El ac tiac muhlkihnkuhtlac kuht fin oaru nuh sel.—Isaiah 41:13; 49:15.
3. Meac kuh in ahkkweye luhlahlfongi lasr ke luhngse luhn Jeova nuh sesr ma pahtpaht?
3 Mwet loh suc sruhmuhnyuck ke muhtwacwackiyen mwe lutlut se inge ah luhlahlfongi na pwacye lah God el weluhltahl ke pacl upac uh. Kuht kuh in luhlahlfongi pac lah el ac wi kuht pacl nuhkewa. (Psalm 118:6, 7) Ke mwe lutlut se inge, kuht ac fah lutlutkihn mwe sang ahkosr ma ahkpwacyeye lah Jeova el luhngse kuht. Mwe sang ahkosr inge pa: (1) ma oreklac lal, (2) Bible, (3) puhruhe, ac (4) mwe molwelah. Kwacfeacng lasr in nuhnkuh yohk ke ma wowo nuhkewa ma Jeova el oraclah uh ac fah kahsre kuht in srui na pwacye ke luhngse lal suc oan ma pahtpaht.—Riti Psalm 77:11, 12.
NUHNKUH YOHK KE MA OREKLAC SIN JEOVA
4. Meac kuht kuh in lotwelah ke ma oreklac luhn Jeova uh?
4 Kuht fin lohacng ahkwoyac nuh ke ma oreklac sin Jeova, kuht ac kuh in akihlen lah el luhngse kuht na pwacye. (Rome 1:20) Ke sie mwe puhpuhlyuck, Jeova el oraclah facluh ke inkacnek na wowo tuh kuht in tahfwelah na in moul ac engankihn ma pucspucs. El use nuh sesr ma nuhkewa kuht enenuh uh tuh kuht in engankihn moul lasr. Kuht enenuh in mongo, pwacnacng Jeova el acse nuh sesr kain in mwe mongo ma kuht engan in kang! (Ecclesiastes 9:7) Sie muhtwacn lili suc pahngpahng Catherine el engankihn ma el liye ke ma oreklac uh, yohkna ke mahlwem luhn March ac April fin acn Canada. El fahk: “Arlacna usrnguck lah ma nuhkewa ac sifwil kapkapack ac fahrngwelihk. Kain in sahk ma oraclah ros uh sifwilpac kapwack liki infohk uh. Oasr pac kain in won sohksohk ma fohlohk liki fuhfahsryacsr laltahl, wekuhnacng won sohksohk srihsrihk se inge pahngpahng hummingbird. Won se inge kwacna tuhkuh nuh ke winto luhk uh ac kang mongo ma oan ke mwe neinyuck mongo nwacn won se lihkihnum ah. Kahlwem lah Jeova el luhngse kuht na pwacye pwacnacng el ahkinsewowoye kuht ke ma inge.” Pahpah tuhmwacsr el luhngse ma oreklac lal uh, ac el luhngse kuht in engankihn pac ma inge.—Orekma 14:16, 17.
5. Luhngse luhn Jeova uh kahlwem fuhkah ke ohiyac ma el oraclah mwet uh kac?
5 Jeova el orekuhtlac ac use kuh lasr in oruh orekma wowo ac engankihn ma inge. (Ecclesiastes 2:24) El sang kunohkohn nuh sin mwet uh in isus fahko ac nwacklah facluh, orek imac, ac karihngihn ik, won ac ma moul nuhkewa. (Genesis 1:26-28) El oacyacpac orekuhtlac ac use kain in ohiyac wo pucspucs nuh sesr tuh kuht in oacna el!—Ephesus 5:1.
AHKSACOHKYE KAHS LUHN GOD
6. Efuh kuh kuht enenuh in arlacna srui ke Kahs lun God?
6 Ke srihpen luhngse yohk luhn Jeova, el use Bible uh nuh sesr. Ma inge ahkkahlwemye nuh sesr ma kuht enenuh in etuh kacl ac ke puhlakihn lal nuh sin mwet uh. Ke sie mwe puhpuhlyuck, Bible uh ahkkahlwemye nuh sesr ke puhlakihn luhn Jeova ke mwet Israel, suc seahkos ke pacl puhs. Psalm 78:38 fahk ohinge: “Tuhsruhktuh God el pahkomuhta mwet lal. El nuhnak muhnahs ke ma kuluk lalos. Ac tiac kuhnahoseloslac. Pacl puhs El sruokyac mulat lal luhkelos. Ac kutongyac kasrkuhsrak lal.” Kuht fin nuhnkuh yohk ke fuhs se inge, ma inge ac kuh in kahsre kuht in liye luhngse yohk luhn Jeova nuh sesr ac el lah el arlacna nuhnkuh yohk ke kais sie sesr. Pwacnacng kuht kuh in luhlahlfongi lah Jeova el luhngse ac nuhnke kuht na pwacye.—Riti Sie Peter 5:6, 7.
7. Efuh kuh Bible uh ma na sacohk se nuh sesr?
7 Bible uh ma na sacohk se nuh sesr. Efuh? Mweyen Jeova el sramsram nuh sesr ke inkacnek luhn Kahs lal. Fin wo sramsram inmahsrlon sie pahpah ac tuhlihk, eltahl ac ahkkweye luhngse ac luhlahlfongi laltahl nuh sin sie sin sie. Ahok, Jeova pa pahpah tuhmwacsr suc kuhlwacng. Ac kuht finne tiacna liyacl kuh lohng puhsracl, el orekmakihn Bible uh in sramsram nuh sesr. Pwacnacng kuht enenuh in tahfwelah na in porongel! (Isaiah 30:20, 21) Ke pacl se ma kuht riti Kahs luhn God uh, kuht kuh in etwacllah ac luhlahlfongi na pwacye Jeova, suc kol kuht ac karihngihn kuht.—Riti Psalm 19:7-11; Soakas 1:33.
8, 9. Meac Jeova el ke kuht in etuh? Sang sie mwe puhpuhlyuck in Bible uh.
8 Jeova el ke kuht in etuh lah el luhngse kuht. El etuh lah kuht mwet sesuwohs, ne ohinge el liye pac ma wo sesr uh. (Luo Chronicle 16:9) Lwelah kuht in sramsramkihn lah Jeova el liye fuhkah ma wowo sel Tohkohsrah Jehoshaphat luhn acn Judah. Jehoshaphat el tuh oraclah sie sulaclah ma tiac wo. El weluhl Tohkohsrah Ahab luhn Israel ac eltahl tuhkweni mweuni mwet Syria in acn Ramoth-gilead. Mwet pahluh kikiacp 400 fahk nuh sel Ahab muh eltahl ac kuhtanglah ke mweun sac, tuhsruhktuh mwet pahluh pwacye se luhn Jeova suc pahngpahng Micaiah el fahk nuh sin tohkohsrah lah eltahl fin som wi mweun se inge, eltahl ac kuf kac. Ac pa inge ma sikyak ah! Ahab el misac ke mweun sac, ac Jehoshaphat el luhkuhn na tiac moullac liki. Tukun mweun sac, Jeova el orekmakuhnuhl Jehu in sang kai nuh sel Jehoshaphat ke ma tahfonglac lal inge. Ne ohinge, Jehu el fahk nuh sel: “Tuh finne ohinge, oasr ma wo in kom.”—Luo Chronicle 18:4, 5, 18-22, 33, 34; 19:1-3.
9 Ke muhtwacwacyen kolyuck lal Jehoshaphat ah, el sapkihn fihsrack, mwet Levi, ac mwet tol pucspucs eltahl in som rauneack city nuhkewa luhn acn Judah ac luti Masap luhn Jeova uh nuh sin mwet we. Orekma laltahl ah arlacna wo pwacnacng mwet ma muhta ke muhtuhnfacl sahyac uh muhtwacwack pac in eis etwacack kacl Jeova. (Luo Chronicle 17:3-10) Pwacnacng finne Jehoshaphat el tuh oraclah ma na kuluk se, Jeova el liye ma wowo ma el tuh oruh meet ah. Mwe srihkasrak se inge mwe ahkkweye na yohk se nuh sesr ke srihpen kuhtuh pacl uh kuht tahfonglac pac. Tuhsruhktuh, kuht fin sang kuhiyacsr in kuhlwacnsuhpuh Jeova, el ac tahfwelah na in luhngse kuht ac el ac tiac muhlkuhnlah ma wowo ma kuht oruh uh.
AHKSACOHKYE KUNOHKOHN LASR IN PUHRUHE
10, 11. (a) Efuh kuh puhruhe uh mwe sang na yohk se sin Jeova me? (b) God el ac topuk fuhkah puhruhe lasr? (Liye petsac se meet ke mwe lutlut se inge.)
10 Sie pahpah na luhngse el oraclah pacl lal in lohng tuhlihk nahtuhl uh ke pacl ma eltahl ke sramsram nuh sel. El ke etuh puhlakihn laltahl uh mweyen el arlacna nuhnkuh kacltahl. Jeova, Pahpah na luhngse se tuhmwacsr inge el oacpacna. El lohng kuht ke pacl ma kuht puhruhe nuh sel uh. Kunohkohn na sacohk se nuh sesr pa inge in sramsram nuh sin Pahpah tuhmwacsr!
11 Kuht kuh in puhruhe nuh sin Jeova ke oacna sie pacl. El Kawuck se lasr ac el ahkolah in lohng puhruhe lasr uh pacl nuhkewa. Taylene, suc kuht sramsramkihn piacng sac, el fahk: “Kom kuh in fahk ma nuhkewa nuh sel.” Ke pacl se ma kuht fahk nuh sin Jeova ke ma yohk kuht muhta nuhnkuh kac uh, el ac kuh in topuk kuht ke inkacnek luhn ma suhmuhslah uh, ke sie mwe lutlut ke mackuhsin nahtuhsr uh, kuh ke mwe ahkkweye ma tuhkuh sin sie mwet lili wiyacsr uh. Jeova el lohng mwe siyuck lasr uh ac el kahlwem ke ma kuht puhla uh finne mwet sahyac uh tiac kahlwem kac. Top lal nuh ke puhruhe lasr uh ahkpwacyeye lah luhngse lal nuh sesr uh ac fah oan ma pahtpaht.
12. Efuh kuh kuht enenuh in lutlutkihn puhruhe pucspucs ma oasr in Bible uh? Sang sie mwe puhpuhlyuck.
12 Yohk mwe lutlut ma kuht kuh in lotwelah ke puhruhe ma sramsramkihnyuck in Bible uh. Mwe kahsruh na yohk se in lutlutkihn kuhtuh sin puhruhe inge kuhtuh pacl ke lutlut luhn sucu lom uh. Inkacnek in puhruhe lasr uh ac wolac liki na meet ah ke pacl se kuht muhta nuhnkuh ke puhruhe pucspucs luhn mwet kuhlwacnsap luhn God in pacl meet ah. Ke sie mwe puhpuhlyuck, lutlutkihn puhruhe lal Jonah suc ahkkahlwemye ohiyen inse puhsisacl ke pacl se ma el tuh muhta luin insiacn ik luhlahp soko ah. (Jonah 1:17–2:10) Kalweni puhruhe lal Solomon nuh sin Jeova ke pacl se tempuhl sac kihsackihnyucklac. (Sie Tokosra 8:22-53) Ac oacyacpac muhta nuhnkuh ke puhruhe luhn Leum. (Luke 11:2-4) Yohk liki nuhkewa, “pacl nuhkewa kowos in siyuck sel ke inse kuloh.” Kuht fin oruh ma inge, “mislac luhn God, suc yohk liki ma mwet uh kuh in kahlwem kac, ac fah karuhnguhnwacng insiowos ac nuhnak lowos.” Srui lasr nuh ke luhngse ma pahtpaht luhn Jeova nuh sesr uh ac yohkyohkwelihk liki na meet ah.—Philippi 4:6, 7.
AHKKAHLWEMYE SRUI LOM NUH KE MWE MOLWELAH
13. Ma wo fuhkah oasr yohrohsr ke srihpen mwe lango kuh mwe molwelah?
13 Jeova el use nuh sesr mwe sang luhn mwe molwelah tuh “kuht fah kuh in moul.” (Sie John 4:9) Pa inge ma mwet sap Paul el fahk ke mwe sang se inge ma ahkkahlwemye luhngse luhn God: “Christ el misac kacsr suc mwet kuluk, ke pacl ma God el pakiyac. Ma na upac se sie mwet in misac ke sie mwet suwohswohs. Tuh sahp ac oasr mwet luhngse in misac ke sie mwet wo. Tuhsruhktuh God el ahkkahlwemye luhpan luhngse lal nuh sesr mweyen ke pacl se kuht srackna mwet kuluk, Christ el misac kacsr.” (Rome 5:6-8) Mwe molwelah se inge pa mwe srihkasrak yohk emeet ke luhngse luhn God uh ac ma inge sang sie pacl wo nuh sin mwet uh in fototo nuh sel.
14, 15. Meac mwe molwelah uh kalmackihn nuh sin (a) mwet Christian akmuhsralah? (b) mwet ma oasr finsrak la in muhta fin facluh?
14 Ke srihpen mwe lango kuh mwe molwelah se inge, sie u srihsrihk ke mwet Christian eltahl puhla luhngse ma pahtpaht luhn Jeova uh ke sie inkacnek na sacohk. (John 1:12, 13; 3:5-7) Mwet inge akmuhsralah sin God ke ngun muhtahl ac ke srihpac se inge eltahl ma lac nuhtin God lac. (Rome 8:15, 16) Ke srihpen kuhtuh seltahl srackna oasr fin facluh, efuh kuh Paul el fahk muh eltahl “weluhl [Christ Jesus] leumi acn inkuhsrao”? (Ephesus 2:6) Mweyen Jeova el sang nuh seltahl sie finsrak in moul ma pahtpaht inkuhsrao.—Ephesus 1:13, 14; Colossae 1:5.
15 Mwet nuhkewa sahyac ma tiac wi akmuhsralah uh kuh pac in kawuck nuh sin God eltahl fin ahkkahlwemye luhlahlfongi pwacye laltahl nuh ke mwe molwelah uh. Eltahl kuh in nuhtlac oacna tuhlihk nuhtin God ac moul ma pahtpaht ke sie paradise fin facluh. Mwe molwelah uh ahkkahlwemye luhngse luhn Jeova nuh sin mwet nuhkewa. (John 3:16) Mwe engan na yohk se nuh sesr in etuh lah kuht fin oaru in kuhlwacnsuhpuh God, el ac fah use moul se ma wo emeet ke facl sasuc uh! Pwacnacng kuht in ahkkahlwemye lah kuht ahksacohkye mwe molwelah uh, mwe ahkpwacyeye yohk emeet ke luhngse ma pahtpaht luhn God nuh sesr.
AHKKAHLWEMYE LUHNGSE LOM NUH SIN JEOVA
16. Ke kuht nuhnkuh yohk ke luhngse luhn God nuh sesr uh, meac ma inge ac mokle kuht in oruh?
16 Kuht koflah na oacklah inkacnek pucspucs ma Jeova el ahkkahlwemye luhngse lal uh nuh sesr. Tohkohsrah David el yuck ke soko on: “O God, arlacna puhs nuhnak lom, ac arlacna upac nuh sihk in kahlwem kac. Nga fin wek, pihsaclos ac puhs liki puhk uh.” (Psalm 139:17, 18) Ke kuht muhta nuhnkuh ke inkacnek pucspucs ma Jeova el ahkkahlwemye luhngse lal uh nuh sesr, ma inge ac mokle kuht in luhngse el ac sang kuhiyacsr nohfohn nuh sel.
17, 18. Meac kuhtuh inkacnek ma kuht kuh in ahkkahlwemye luhngse lasr nuh sin God?
17 Puhs inkacnek ma kuht kuh in ahkkahlwemye nuh sin Jeova lah kuht luhngse el. Ke sie mwe puhpuhlyuck, kuht kuh in ahkkahlwemye luhngse lasr uh ke kuht moniyuck in fahkwack ke Tohkohsrahi uh nuh sin mwet sahyac. (Matthew 24:14; 28:19, 20) Kuht kuh in oacyacpac ahkkahlwemye luhngse lasr nuh sel uh ke kuht oaru ac muhtwacnglah kuhtwena ma upac ma srihfe luhlahlfongi lasr uh. (Riti Psalm 84:11; James 1:2-5.) Mwe srihfe inge finne upac na pwacye, kuht kuh in luhlahlfongi lah Jeova el liye mwe kweok lasr uh ac el ac fah kahsre kuht, mweyen kuht sacohk sel.—Psalm 56:8.
18 Luhngse lasr nuh sin Jeova uh mokle kuht in nuhnkuh yohk ke ma wowo pucspucs ma el oraclah uh. Kuht ahkkahlwemye nuh sin Jeova lah kuht luhngse el ac Kahs lal uh ke kuht mwet lutlut wo ke Bible. Kuht puhruhe nuh sin Jeova pacl nuhkewa mweyen kuht luhngse el ac kuht ke ahkkweye fototo lasr nuh sel uh. Ac ke pacl se kuht nuhnkuh ke mwe sang lal nuh sesr ke mwe molwelah, luhngse lasr nuh sel uh ac fah yohkwelihk. (Sie John 2:1, 2) Pa inge kuhtuh na sin inkacnek pucspucs ma kuht kuh in ahkkahlwemye nuh sin Jeova lah kuht ahksacohkye luhngse lal nuh sesr suc fah oan ma pahtpaht.