Kafweang in “Sano” Pal Nukewa
“Tu safla lun ma nukewa apkuran me. Sano ke pre.”—1 PITER 4:7.
1. Mea Jisus el luti ka pal nukewa?
KE PAL se Jisus el oasr fwin fwalu, el luti pal nukewa ke Togusrai lun God. Ke inkanek lun Togusrai inge, Jeova el fwa akmutalye kolyuk lal a akfulatye inel. Ke ma inge, Jisus el luti met tuma lutlut lal in pre nu sin God: “Togusrai Lom in tuku. Ma lungse Lom in orek, oana in kosrao, ouinge fwin fwalu.” (Mattu 4:17; 6:9, 10) Ke pal na fototo Togusrai lun God fwa aksafyela akwuk nukewa lal Setan a tokin ma inge el fwa sang kasru yok nu sin met nukewa in akpayeye ma lungse lun God fwin fwalu nufon. In oana ke Daniel el palye tari, Togusrai lun God “fwa kunausla togusrai [ke pal] inge nukewa, a a fwa tu ma patpat.”—Daniel 2:44.
2. (a) Met tuma lutlut nukewa lun Jisus elos etu fuka la el oasr tari a oru kolyuk lal oana sie Togusra? (b) Mea me akul el akkalemye pa?
2 Ke sripen arlana yok sripe nu sin met tuma lutlut nukewa lun Jisus ke tuku lun Togusrai lun God, paenang elos siyuk sel: “Mea akul in oasr tari lom a ke saflaiyen akwuk nukewa lun fwal se inge?” (Mattu 24:3, NW) Oasr tari lun Kraist oana sie Togusra el tia ku in liyeyuk sin met nukewa, ne ouinge oasr me akul ka fwa ku in liyeyuk. Ma Simusla el akkalemye ke kas palu la e fwa oasr kain in me akul puspus ka. Aok, met tuma lutlut nukewa lun Jisus su moul in pal sa fwa ku in akilen la el mutamwauk tari ke kolyuk lal in kosrao. Ma inge el sang pa akul nu ke mutaweyen pulanpal se su akkalemyeyuk in Baibel oana “len safla” lun akwuk koluk nukewa su oasr yen nukewa fwalu.—2 Timote 3:1-5, 13; Mattu 24:7-14.
Kafweang in Sano ke Len Safla
3. Efu ku met Kristian elos enenu in kafweang in sano?
3 Met sap Piter el simusla: “Tu safla lun ma nukewa apkuran me. Ke ma inge komwos in nunak sumwos a sano ke pre.” (1 Piter 4:7) Met kulansap nukewa lun Jisus elos enenu in kafweang in sano, loang akmwoye ke ma puspus su sikyak fwin fwalu su akkalemye la el mutamwauk tari ke kolyuk lal oana sie Togusra. A kafweang lalos in sano fwa arlana eneneyuk ke saflaiyen akwuk nukewa inge apkuran. Jisus el fwak nu sin met tuma lutlut nukewa lal: “Ke ma inge sano, tu komwos tia etu pal se ke leum lun loomu el fwa tuku [in oru nununku nu ke fwal lal Setan].”—Mark 13:35, 36.
4. Akkalemye ma tia oana sie ke oiyen met nukewa ke fwal lun Setan a ke met kulansap nukewa lun Jeova. (Liye pa pok.)
4 Met puspus elos oasr ke ku lal Setan, a elos tia loang akmwoye nu ke kalmeyen ma puspus su sikyak fwin fwalu. Elos tia etu a akilen ke oasr tari lun Kraist la el mutamwauk tari in oru kolyuk lal oana sie Togusra. Tusruktu met kulansap paye lun Kraist elos kafweang in sano mutamwauk in pal meeta elos kalem ke kalme paye nu ke ma nukewa su sikyak in century somla. Mutamwauk in yea 1925, Met Lo lun Jeova elos kalem ka la Meun Lulap I a ma puspus su sikyak tokin pal sa el me akpayeye la Kraist el mutamwauk tari ke kolyuk lal oana sie Togusra in yea 1914. Ke ma inge len safla lun akwuk koluk nukewa lal Setan el mutamwauk tari. Met puspus su loang akmwoye nu ke ma puspus su sikyak, fwinne elos tia etu ke kalmeyen ma inge, elos akilen ke ma inge la tia oana sie nu ke ma sikyak meet liki Meun Lulap I a tokin pal sa me nu ke pal inge.—Srike liye pok se inge “Pal in Me Keok Puspus Mutamwauk Tari.”
5. Efu ku arlana yok sripe kut in kafweang in sano?
5 Apkuran nu ke yea siofok ingena, oasr ma upa puspus sikyak fwin fwalu a ma inge nukewa sang me akpayeye la kut oasr tari ke len safla. Arlana srikla pal lula meet liki Jeova el sapkin Kraist lan kol lipufan nukewa in kunausla met koluk a akwuk nukewa lal Setan. (Fwakyuk 19:11-21) Oasr masap nu sin met Kristian paye nukewa elos in kafweang in sano. Ke ma inge, arlana yok sripe kut in oru ma inge pal nukewa ke kut sano saflaiyen akwuk koluk nukewa inge. (Mattu 24:42) Kut enenu in kafweang in sano, a ke kolyuk lun Kraist, kut enenu in aksafyela sie orekma yok sripe fwin fwalu nufon.
Sie Orekma Nu Fwin Fwalu Nufon
6, 7. Fuka orekma in sulkakin peng mwo el yokyokelik ke len safla?
6 Orekma su met kulansap nukewa lun Jeova elos enenu in oru el palyeyuk tari. Ma inge el oasr pa ke akul puspus su akkalemye la kut oasr tari ke len safla lun akwuk koluk nukewa inge. Jisus el akkalemye ke orekma inge su fwa orek fwin fwalu ke pal se el akuteye ke ma puspus su fwa sikyak ke len safla. Weang nu ke kas palu lal pa kas yok sripe lal inge: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa; a na safla a fwa tuku.”—Mattu 24:14.
7 Nunku ke ma mwomwo su tuku ke kas palu lun Jisus inge. Pisen met su sulkakin peng mwo elos arlana supus ke mutaweyen len safla in yea 1914. Ke pal inge piselos arlana yokyokelik. Oasr Met Lo lun Jeova su pus liki 7,000,000 elos sulkakin peng mwo fwin fwalu nufon, su oasr ke congregation 100,000 kutu. Oasr met 10,000,000 saye su wi met Lo lun Jeova ke tukeni lalos in akfulatye mise lun Kraist in yea 2008. Pisen met inge su wi ke yea se inge el pus liki pisen met su wi ka ke yea tari a.
8. Efu ku me lain el tia ku in tulokinye orekma lasr in sulkakin peng mwo in oasr fwako mwomwo puspus?
8 Aok oasr ma lo fukoko ke Togusrai lun God orek nu sin mutanfwal nukewa meet liki akwuk nukewa lun fwalu aksafyeyukla! Ma inge akpayeyuk fwinne Setan pa “god lun fwal se inge.” (2 Korint 4:4) Oasr ye ku lal akwuk lun fwal se inge ke politic, alu, a ke business, a akwuk in akkalemye ma lusrongten nukewa lun fwalu. Ke ma inge, mea sang kasru yok nu ke orekma in sulkakin peng mwo in oasr fwako mwomwo puspus? Me kasru inge tuku sin Jeova. Ke sripe se inge, orekma in sulkakin peng mwo el akpayeyuk ke inkanek nukewa fwinne Setan el kafweang yok in tulokinye ma inge.
9. Efu ku yokelik pisen met su kulansap nu sin Jeova a ke etauk lalos kel el sie mwenmwen?
9 Fwako mwomwo nukewa ke orekma in sulkakin peng mwo lun Togusrai a ke pisen met kulansap lun Jeova su yokyokelik a ke yokelik lun etauk lalos kel Jeova ku in akkalemyeyuk mu sie mwenmwen yok. Fwin wangin me kasru, wekunang me kolyuk lal a me karungin lun God nu sin met kulansap lal, paye la orekma in sulkakin peng mwo el tia ku in akpayeyuk. (Ridi Mattu 19:26.) Kut ku in lulalfongi la ke kasru yok lun ngun mutal lun God nu sin met nukewa su kafweang in sano a lungse na paye in kulansapul, paenang orekma in sulkakin peng mwo inge fwa aksafyeyukla ke inkanek mwo, “a na safla e fwa tuku.” Aok pal se inge arlana apkuran tari in tuku.
“Ongoiye Lulap”
10. Jisus el akkalemye fuka ma e fwa sikyak ke ongoiye lulap su apkuran in tuku?
10 Saflaiyen akwuk koluk nukewa inge e fwa tuku ke pal se “ongoiye lulap” sikyak. (Fwakyuk 7:14) Baibel el tia akkalemye nu sesr ke lusen pal sa, tusruktu Jisus el fwak: “Tu in pal sa a fwa ongoiye lulap, oana tia liyeyuk ke mutamweyen fwalu nu inge, mo, a fwa tia nu tok.” (Mattu 24:21) Kut fwin nunku ke ongoiye nukewa su sikyak tari fwin fwalu, oana ke pal in Meun Lulap II ke pal sa oasr million 50 nu ke 60 sin met elos mise, ongoiye lulap su fwa tuku el upa liki na ma inge. Ma inge fwa upala nu ke meun lun Armagedun sikyak. Pa inge pal su Jeova el fwa orekmakin un lipufan nukewa lal in kunausla a akwanginyela akwuk nukewa lal Setan fwin fwalu.—Fwakyuk 16:14, 16.
11, 12. Ma sikyak fuka sang akul nu ke mutaweyen ongoiye lulap?
11 Kas palu lun Baibel el tia akkalemye ke len a pal ke mutaweyen ongoiye lulap. Ne ouinge, el akkalemye nu sesr ma sakuruk puspus su fwa sikyak in sang akul nu ke mutaweyen ma inge. Me akul inge pa ke orekma lun guferment nukewa in kunausla alu kikiap nukewa. Ke kas palu lun Baibel su simusyukla in Fwakyuk sapta 17 and 18, alu kikiap el pupulyukkinyuk nu ke sie mutan kosro su orek kosro nu sin togusra nukewa lun fwalu. Fwakyuk 17:16 el akkalemye la tia pat pal se fwa tuku ke met kol puspus lun fwalu “elos fwa srunga mutan kosro sa, a elos fwa oru tu lan mukena muta koflufol, a elos fwa kangla ikwel, e fwa arlana eskulak in e.”
12 Fwin pal se inge tuku in akpayeye ma inge, God el fwa “filiye insielos [insien togusra puspus] in oru lungse lal, a tu elos in nunak siefwanna” in kunausla alu kikiap nukewa. (Fwakyuk 17:17) Ke ma inge kunanela lalos inge ku in fwak mu ma tuku sin God. Ma inge pa nununku lal nu ke alu kikiap nukewa su ke lusen pal loeloes elos luti me luti puspus su lain ma lungse lun God a elos kalyai met kulansap puspus lal. Met puspus fwin fwalu elos tia etu ke kunanela lun alu kikiap nukewa inge su apkuran in tuku. Tusruktu met kulansap lun Jeova elos etu a sano ma inge. A ke lusen len safla inge, elos akkalemye ma inge nu sin met nukewa.
13. Mea akkalemye la saflaiyen alu kikiap fwa sikyak ke pal su arlana sa?
13 A fwa me lut lulap nu sin met puspus in liye la alu kikiap nukewa kunausyukla. Kas palu lun Baibel el akkalemye la fwinne “togusrai puspus lun fwalu” elos fwa fwak kas inge ke kunanela lal: “We, we, . . . tu in sie ao nununku lom tuku!” (Fwakyuk 18:9, 10, 16, 19) Ke pal se Baibel el orekmakin kas inge “sie ao,” el kalmekin la ma se inge fwa sikyak arlana sa.
14. Ke pal se met lokwalok nukewa lun Jeova elos som in lain a kalyai met kulansap nukewa lun Jeova, mea el fwa oru?
14 Kut kalem ka la ke kitin pal tokin alu kikiap kunausyukla, e fwa oasr me lain upa nu sin met kulansap nukewa lun Jeova, su fwakak kas in nununku lal. (Ezikiel 38:14-16) Ke pal se me lain upa inge mutamwauk, met lokwalok nukewa elos fwa lain Jeova, su mwulela in loangela a molela met kulansap oaru nukewa lal. Jeova el fwak: “Tu in lemta luk, a in e in kasrkusrak luk, Nga fwak tari. . . . A elos fwa etu tu Nga Jeova.” (Ridi Ezikiel 38:18-23.) God el akkalemye in Kas lal: “El su kalkomwosi [met kulansap oaru nukewa lal] kalye atron mutuk.” (Zekaraia 2:8) Ke ma inge ke pal se met lokwalok nukewa lal elos mutamwauk in kalyai met kulansap lal, Jeova el fwa lainelos. El fwa akpayeye akwuk lal in aksafyela ongoiye lulap, su fwa aksafyeyukla ke Armagedun. Ye kolyuk lun Kraist, lipufan elos fwa akpayeye nununku lun Jeova nu ke fwal lal Setan.
Mea Ma Inge Ku in Oru Nu Sesr
15. Fuka etauk lasr la saflaiyen akwuk koluk nukewa apkuran ku in kasre kut?
15 Fuka etauk lasr la arlana apkurun saflaiyen akwuk koluk nukewa inge ku in kasre kut? Met sap Piter el simusla: “Ke ma inge, meyen ma inge nu kemwa fwa kunausyukla ou inge, yen met su fwa fwal nu sumwos in muta in moul mutal a sumwosmwos!” (2 Piter 3:11) Kas inge akkalemye ma eneneyuk yok kut in akpayeye nu ka la oiyesr a ella lasr el fwal nu ke masap lun God a oru in kalem ke moul lasr la kut moniyuk ke orekma in kulansap nu sin God a oasr lungse yok lasr nu sin Jeova. Kut enenu pa in oru ke ku lasr kewa in wi sulkakin peng mwo lun Togusrai meet liki safla tuku. Piter el simusla pa: “Tu safla lun ma nukewa apkuran me. . . . Sano ke pre.” (1 Piter 4:7) Kut akfototoye kut nu sin Jeova a akkalemye lungse lasr nu sel ke kut sramsram nu sel pal nukewa ke pre, siyuk sel in ase nu sesr me kolyuk lal ke inkanek lun ngun mutal a ke u lal fwin fwalu.
16. Efu ku kut enenu in liaung in akos masap lun God?
16 Ke pal inge su oasr kain in ma upa yok, kut enenu in liaung in akos Kas lun God: “Ke ma inge, komwos in arulanu liaung oiyen fwafwasryesr lomwos, tia oana met nukin, a oana met lalmetmet, molela pal tu len koluk.” (Efesus 5:15, 16) Oasr ma upa puspus ke pal inge yok liki meeta. Setan el orekmakin me sruf puspus in sang kosrala metu in tia oru ma lungse lun Jeova a in akkolukyelos. Kut su met kulansap lun God, kut etu tari ma inge, a kut tia lela kutena ma in akmunasye oiyen oaru lasr nu sin God. Kut etu pa ke ma su apkuran in sikyak, a kut filiye lulalfongi lasr nu sin Jeova a ke akwuk nukewa lal.—Ridi 1 Jon 2:15-17.
17. Akkalemye pulakin lun met nukewa su moliyukla liki Armagedun ke pal se sifwil moulyuk lun met mise akpayeyuk.
17 Aok mwulela lun God ke sifwil moulyuk lun met mise fwa akpayeyuk, meyen kas lal el akkalemye, “tu a fwa oasr sifwil moulyuk nu sin met sumwos a met sesumwos.” (Orekma 24:15) Arlana fukoko a mwo kas in mwulela inge: “Tu a fwa oasr sifwil moulyuk”! Wangin alolo ka la ma inge fwa akpayeyuk, meyen Jeova el mwulela ma inge! Isaia 26:19 el akkalemye kas in mwulela se inge: “Met mise lom fwa moul. . . . Ngetalik a on, komwos su muta in kutkutu! . . . A fwalu fwa sisak met mise.” Kas palu inge el akpayeyuk in pal meeta ke pal se met kulansap lun God elos folokla nu in an selos sifwana. Ma inge akkeye lulalfongi lasr la ke akwuk sasu lun God su fwa tuku ma inge fwa akpayeyuk ke inkanek yok. Oasr engan lulap su fwa sikyak ke pal se met nukewa su akmoulyeyukyak elos sifwil tukeni nu sin met su elos lungse! Aok, saflaiyen fwal lun Setan el apkuran, a akwuk sasu lun God fwa akpayeyuk ke pal na fototo fwasru. Ke ma inge arlana yok sripe kut in kafweang in sano pal nukewa!
Ya Kom Esam?
• Mea Jisus el luti pal nukewa?
• An ekasr orekma in sulkakin peng mwo lun Togusrai orek ke pal inge?
• Efu ku yok sripe in kafweang in sano pal nukewa?
• Fuka kas in mwulela in Orekma 24:15 el sie me akkeye nu sum?
[Box/Picture on page 18, 19]
PAL IN ME KEOK PUSPUS MUTAMWAUK TARI
Pal in Me Keok Puspus Mutamwauk Tari: Ma Sikyak Puspus ke sie Fwal Sasu pa sifwe se ke sie buk su orekla sin sie met pangpang Alan Greenspan ke yea 2007. Ke lusen yea 20, el pa chairman ke United States Federal Reserve Board, su karungin mukuikui nukewa ke akwuk lun bank nu ke mutanfwal san. Greenspan el akkalemye yok ke ma tia oana sie su sikyak fwin fwalu meet liki 1914 a tokin yea se inge fwasru:
“Report puspus ke ma nukewa su sikyak meet liki yea 1914 akkalemye la arlana mwo metu elos sunakin sie sin sie. A metu elos kafweang in kapkapek ke akwuk lun moul lalos, a akwuk ke technology kapkapek pa ke inkanek yok. Century aksingoul yuh el aksafyela a ekulla akwuk koluk su kukakin met puspus in oralos oana met sruo a met kos. A metu elos fwinsrak kin mu orekma koluk, sulallel, a akmas fwa srikeni. . . . Sukyen lalmetmet in orala ma sakuruk puspus el orek fwin fwalu yok liki meeta ke century aksingoul yuh, musaela lun inkaneku in orekmakin railroad, orekmakinyen telephone, sarom, petsa mukuikui, sitosa, a appliances puspus su ku in orekmakinyuk in loomu. Orekma lun science nu ke ono, me kasru lun mongo nu ke mano, karunginyen kof nasnas in akloesye moul . . . Aok met nukewa in pal san elos lulalfongi mu kain in kapkapek inge el fwafwala na pal nukewa.”
Tusruktu . . . “Fwinne Meun Lulap I el kunausla ma puspus wekunang met puspus, tusruktu Meun Lulap II el akkolukyela yok akwuk puspus lun metu, aok el kunausla nunak a fwinsrak mwomwo lun metu. Nga tia ku in mulkunla akwuk mwomwo a misla su oasr meet liki ke Meun Lulap I el orek ke lusen yea pus, a ke pal sa metu elos orala kain in akwuk puspus su ku in orekmakinyuk nu ke akwuk lun metu ke pal fwasru. Tusruktu misenge akwuk lun metu el ekla liki akwuk ke century somla a ke kutu pal elos srike in sruokye na kutu sin akwuku. Ya me aksangeng a keok, ekyek lun pulanpal, ku lungse in pengpeng su orekmakinyuk yok ke moul lun metu in pal inge fwal in sang ekulla inkanek in moul mwomwo a misla su pulakinyuk meet liki Meun Lulap I a ke kutu pa pal meet? Wangin sie met ku in filiye lulalfongi lal nu ke me top ka.”
Greenspan el esamak ke pal se el wi lutlut a long ke me sramsram lun sie met lalmetmet su eteyuk a pangpang el Economics Professor Benjamin M. Anderson (in yea 1886-1949): “Met nukewa su matu tari a oasr etauk a lalmetmet lalos nu ke ma nukewa su oasr a pulakinyuk meet liki Meun Lulap I elos liye a nunku ke ma nukewa su sikyak tok la oasr ekla lulap ka. Oasr inkanek yok eneneyuk nu ke karunginyen insemwomwo a misla in pal inge liki na ke pal meeta su wangin eneneya.”—Akwuk Puspus in Suk ke Ma Enenu lun Moul a Akwuk in Sang Kasru nu sin Met Puspus, ke kas English.
Buk se inge Sie Akwuk ke Fwalu su Wanginla ke kas English, su simusyukla sel Gerald J. Meyer in yea 2006, el akkalemye pa kas ouinge: “Ma sikyak puspus fwin fwalu fwakyuk pal nukewa mu el ‘ekulla ma nukewa.’ Aok ma inge arlana paye oana ke ma sikyak ke lusen pal in Meun Lulap [in yea 1914 nu ke 1918]. Paye la meun se inge el ekulla ma nukewa: el ekulla inmasrlon kais sie mutanfwal, el ekulla akwuk ke guferment puspus a ke pal fwasr lun an puspus, oayepa el ekulla nunak lun met puspus ke akwuk puspus lun fwalu a kelos sifwana. El orala akwuk puspus ke fwal se inge su tia oana sie nu ke akwuk mwomwo su oasr fwin fwalu meet liki meun se inge sikyak.”
[Picture on page 20]
Ke pal in Armagedun, Jeova el fwa orekmakin lipufan kulana nukewa