Ahkolah Ingena nuh ke Moul ke Facl Sasuc Uh

1, 2. (a) Meac kom rahrahlac in liye ke Paradise uh? (Liye petsac se meet ke mwe lutlut inge.) (b) Meac ma se emeet ma ac ahkenganye kuht ke facl sasuc uh?

KUHT arlacna rahrahlac in “moul ma pahtpaht.” Mwet sap Paul el ahkuhtweyac lah pa inge “moul pwacye” uh. (Riti Sie Timothy 6:12, 19.) Nuh sin mwet pucspucs, kalmen ma inge pa in moul nwe tok ke sie Paradise fin facluh. Kuht tiac kuh in petsacelah lah ac fuhkah ke kuht ac muh tuhkahkwek ac puhla lah kuht fokoko, engan, ac luhngse kais sie lututacng. (Isaiah 35:5, 6) Srihke nuhnkuh lah fuhkah woiyac in wi sucu ac kawuck nuhkewa lom, weacng pac mwet ma ac muh sifwil ahkmoulyeyuckyak uh. (John 5:28, 29; Orekma 24:15) Ac fah yohk pacl lom in etwaclah ma pucspucs ac kom in suhmaht in oruh ma pucspucs ma kom engan in oruh. Ke sie mwe puhpuhlyuck, kom kuh in ahkyohkye etwacack lom ke science. Kuh sahp kom kuh in etwaclah sritaclkihnyen sie mwe sritacl on kuh in luhmahlah sie lohm ah sum sifacna.

² Kuht finne rahrahlac in sun ma wowo pucspucs inge, kuhlwacnsap lasr nuh sin Jeova uh pa ma se meet ma ac ahkenganye kuht uh. Srihke nuhnkuh lah ac fuhkah ohiyen moul lasr uh fin mwet nuhkewa ahkmuhtahlye inen Jeova ac eisacl oacna mwet kol laltahl. (Matthew 6:9, 10, BMK) Kuht ac engan in liye ke facluh nwacnwaclah ke mwet suwohswohs, oacna ke God el oakiyac ke muhtwacwackiyac ah. Ac srihke nuhnkuh luhpan fihsracsriyac nuh sesr in ahkkweye fototo lasr nuh sin Jeova ke kuht kais kuhtuh na eklac mwet suwohswohs!​—Psalm 73:28; James 4:8.

3. Meac kuht enenuh in ahkolah nuh kac ingena uh?

³ Kuht luhlahlfongi lah Jeova el ac fah oruh ma wowo inge nuhkewa mweyen “God El kuh in oruh ma nuhkewa.” (Matthew 19:25, 26) Kuht fin ke moul nwe tok ke facl sasuc uh, pa inge pacl kuht in “sruokyac kuh” ke moul ma pahtpaht. Kuht etuh lah sahflahiyen oakwuck se inge arlacna apkuhran me, pwacnacng kuht enenuh in moulkihn moul lasr uh ke sie inkacnek ma ahkkahlwemye lah kuht soano sahflahiyen oakwuck kuluk se inge mweyen kuh in tuhkuh ke oacna sie pacl. Kuht enenuh in sang kuhiyacsr kewa ingena in ahkolah nuh ke moul se ke facl sasuc uh. Lwelah kuht in liye lah kuht ac oruh fuhkah ma inge.

KUHT AC AHKOLAH FUHKAH?

4. Kuht ac ahkolah fuhkah nuh ke moul ke facl sasuc uh ingena? Sang sie mwe puhpuhlyuck an.

⁴ Kuht ac ahkolah fuhkah nuh ke moul ke facl sasuc uh ingena? Fin pa kuht ahkoo kuht in mukwilac ac muhta ke siena muhtuhnfacl, sahp oasr ma kuht ac enenuh in oruh in ahkoekuhtlac nuh ke moul se ke muhtuhnfacl sacn. Ke sie mwe puhpuhlyuck, sahp kuht ac enenuh in muhtwacwack lutlut ke kahs ac facsin luhn mwet ke acn sacn. Sahp kuht ac kang kain in mongo ma eltahl oruh uh. Ke inkacnek se pacna inge, kuht kuh in ahkoekuhtlac ingena nuh ke moul se ke facl sasuc uh. Kuht oruh ma inge ke kuht sang kuhiyacsr kewa in moulkihn moul lasr ingena uh in na muh kuht oasr tari we. Lwelah kuht in tuni kuhtuh inkacnek ma kuht ac kuh in oruh ma inge.

5, 6. Ke kuht etwaclah in ahkos kahs in kolyuck ke u luhn Jeova ke pacl inge, ma inge ac kahsre kuht fuhkah in ahkolah nuh ke facl sasuc uh?

⁵ Ke oakwuck se inge, Satan el ke mwet uh in nuhnkuh na muh eltahl kuh in oruh na ma eltahl luhngse uh. Mwet pucspucs puhla muh yohk srihpac in sukohsohk ke luhngse laltahl ac eltahl tiac enenuh in ahkos God. Meac sahflahiyen ma inge? Yohk mwe kweok ac inse toasr ma tuhkuh kac. (Jeremiah 10:23) Tuhsruhktuh, Jeova el mwet kol na luhngse se. Oakwuck sasuc uh ac arlacna wo ke pacl se mwet nuhkewa ahkos Jeova!

⁶ Ke facl sasuc uh, kuht ac engan in ahkos kahs in kahsruh ma tuhkuh ke u luhn Jeova suc ac fah kahsre kuht in ahkwoye facluh nuh ke sie paradise na kahto. Oacyacpac kuht ac luti mwet ma ac moulyak uh. Puhs orekma ma Jeova el ac use nuh sesr. Tuhsruhktuh, meac kuht ac oruh fin mwet ma kol kuht ke pacl sacn siyuck sesr in oruh sie ma suc kuht tiac arlac luhngse in oruh? Yac kuht ac ahkos? Yac kuht ac oruh ke kuhiyacsr kewa in oruh ac engankihn kunohkohn se ma ituckuh inge? Kuht fin ke ahkolah nuh ke moul ma pahtpaht ke facluh sasuc uh, kuht enenuh in ahkos kahs in kolyuck nuhkewa ke u luhn Jeova uh ingena.

7, 8. (a) Efuh kuh enenuh se nuh sesr in akacsruhi nuh sin mwet ma kol kuht ke pacl inge? (b) Kain in eklac fuhkah ma kuhtuh sin mwet Christian uh sun? (c) Meac kuht kuh in luhlahlfongi na pwacye kac ke facl sasuc uh?

⁷ In ahkolah nuh ke moul se ke facl sasuc uh, oasr pac ma sahyac kuht enenuh in oruh sahyacn ahkostwen lasr nuh ke u luhn Jeova uh. Kuht enenuh pac in etwaclah in falkihn ma oasr yohrohsr uh ac akacsruhi. Ke sie mwe puhpuhlyuck, ke pacl se ituckuh kunohkohn sasuc se nuh sesr, kuht engan in akacsruhi ac in sang kuhiyacsr in engan ac falkihn ma oasr yohrohsr uh. Kuht fin etwaclah in akacsruhi nuh sin mwet ma kol kuht ke pacl inge, kuht ac kuh pac in oruh ma inge ke facl sasuc uh. (Riti Hebrew 13:17.) Ke pacl se mwet Israel ah utyak nuh ke Facl Wuhlelah, srihsrngiyucki acn in muhta laltahl. (Oekyuk 26:52-56; Joshua 14:1, 2) Kuht tiac etuh lah acn oyac kais sie sesr ac srihsrngiyucki in muhta kac. Tuhsruhktuh kuht fin etwaclah in akacsruhi, kuht ac engan in oruh ma luhngse luhn Jeova uh ke oacna sie acn.

⁸ Srihke nuhnkuh luhpan woiyac in kuhlwacnsuhpuh God ye Tohkohsrahi lal ke facl sasuc uh! Ke srihpac se inge, kuht engan in akacsruhi nuh sin u luhn Jeova ke pac inge ac in oruh ma nuhkewa ma siyuckyuck sesr in oruh. Tuhsruhktuh, kuhtuh pacl uh eklac kunohkohn ma ituckuh nuh sesr uh. Ke sie mwe puhpuhlyuck, kuhtuh sin mwet lili ma orekma ke Bethel fin acn Macrike eltahl eis kunohkohn sasuc in som liki Bethel ac wi kahsruh ke orekma in luti uh. Ac ke srihpen mahtohuh kuh kuhtuh pac srihpac sahyac, kuhtuh sin mukul lili ma fuhfahsryacsr nuh ke congregation pucspucs eltahl srihsrngiyucki in special pioneer. Eltahl engan ke kunohkohn sasuc laltahl inge ac Jeova el ahkinsewowoyacltahl. Kuht fin puhruhe siyuck kahsruh sin Jeova, sang kuhiyacsr kewa in kuhlwacnsuhpwacl, ac etwaclah in falkihn kunohkohn ma oasr yohrohsr uh, kuht ac arlacna engan ac Jeova el ac ahkinsewowoye kuht. (Riti Soakas 10:22.) Ac fuhkah fin pa ke facl sasuc uh kuht arlacna ke muhta ke sie acn tuhsruhktuh siyuckyuck sesr in som muhta ke sie pacna acn? Ke pacl sacn ac tiac arlacna elyah lah acn oyac kuht muhta kac kuh meac kuht ac oruh. Kuht ac arlacna srui lah kuht wi moul muhta ke facl sasuc uh.​—Nehemiah 8:10.

9, 10. (a) Efuh kuh kuht enenuh in ahkkahlwemye ohiyen mongfihsracsr ke facl sasuc uh? (b) Kuht ac ahkkahlwemye fuhkah ke pacl inge lah kuht mongfihsracsr?

⁹ Ke facl sasuc uh, kuht ac enenuh in mongfihsracsr kuhtuh. Ke sie mwe puhpuhlyuck, sahp kuht lohng engan luhn mwet sahyac ke sucu ac kawuck laltahl uh moulyak. Tuhsruhktuh, sahp kuht enenuh in soano moulyak luhn mwet lasr. Fin ma inge sikyak, yac kuht kuh in wi mwet sahyac uh engan ac mongfihsracsr soano pacl lasr? (Rome 12:15) Kuht fin etwaclah in mongfihsracsr sanel Jeova elan ahkpwacyeye wuhlelah lal nuh sesr ke pacl inge, ma inge ac kahsre kuht in mongfihsracsr ke pacl fahsruh uh.​—Ecclesiastes 7:8.

¹⁰ Kuht kuh pac in ahkoekuhtlac nuh ke facl sasuc uh ke kuht ahkkahlwemye ohiyen mongfihsracsr ke pacl se ma eklac kahlwem lasr ke mwe luti pwacye in Bible uh. Yac kuht lutlutkihn mwe luti sasuc inge, ac mongfihsracsr kuht finne tiac arlacna kahlwem kac? Fin ahok, ke facl sasuc uh ac fihsracsr nuh sesr in ahkkahlwemye ohiyen mongfihsracsr ke kais sie pacl ma Jeova el fahk nuh sesr sie ma sasuc suc el luhngse kuht in oruh.​—Soakas 4:18; John 16:12.

11. Efuh kuh yohk srihpac kuht in etwaclah in nuhnak muhnahs nuh sin mwet sahyac ke pacl inge, ac ma inge ac kahsre kuht fuhkah ke facl sasuc uh?

¹¹ Sie pac inkacnek ma kuht kuh in ahkoekuhtlac nuh ke facl sasuc uh pa ke kuht etwaclah in nuhnak muhnahs. Ke lusen Sie Tausin Yac ke Kolyuck lal Christ, srackna yohk pacl ma ac enenweyuck nuh sin mwet nuhkewa tuh eltahl in eklac suwohswohs. (Orekma 24:15) Yac kuht ac ahkkahlwemye ohiyen luhngse ac nuhnak muhnahs nuh sin sie sin sie? Kuht fin etwaclah in nuhnak muhnahs nuh sin mwet sahyac ac in fototo nuh seltahl ke pacl inge, ma inge ac fihsracsr nuh sesr in oruh ke facl sasuc uh.​—Riti Colossae 3:12-14.

12. Efuh kuh kuht enenuh in ahkolah ingena nuh ke moul se ke facl sasuc uh?

¹² Ke facl sasuc uh, sahp kuht ac tiac eis ma kuht ke uh pacl nuhkewa, kuh sahp kuht ac enenuh in soano. Kuht ac enenuh in srui ac falkihn ma oasr yohrohsr ke ohiyac nuhkewa ma kuht oasr kac. Kalmac pa kuht ac enenuh in ahkkahlwemye kain in ohiyac pucspucs ma Jeova el luti nuh sesr ke pacl inge. Pwacnacng ke kuht etwaclah in ahkkahlwemye ohiyac inge nuhkewa ke pacl inge, kuht ahkpwacyeye lah facl sasuc uh ma na pwacye se nuh sesr ac lah kuht ahkoekuhtlac in wi moul ma pahtpaht. (Hebrew 2:5; 11:1) Oacyacpac, kuht ahkkahlwemye lah kuht arlacna ke muhta ke sie facl ma mwet nuhkewa kac uh ahkos Jeova.

LOHACNG NUH KE KUHLWACNSUHP LOHM NUH SIN JEOVA

13. Meac kuht ac likiyac emeet ke moul lasr ke facl sasuc uh?

¹³ Ke facl sasuc uh, kuht ac fah eis ma nuhkewa ma kuht enenuh tuh kuht in engankihn moul lasr uh. Tuhsruhktuh engan yohk lasr uh ma tuhkuh ke fototo wowo lasr nuh sin Jeova. (Matthew 5:3) Kuht ac kahfofo ke kuhlwacnsap lasr nuh sin Jeova uh, ac kuht ac engan in kuhlwacnsuhpwacl. Pwacnacng ke pacl se kuht oruh Jeova elan ma se emeet ke moul lasr uh ingena, kuht ahkoekuhtlac nuh ke moul se ke facl sasuc uh.​—Riti Matthew 6:19-21.

14. Kain in nien sun kuh finsrak fuhkah mwet fuhsr uh kuh in oakiyac eltahl in oruh in kuhlwacnsuhpuh Jeova?

¹⁴ Kuht ac oruh fuhkah kuht in engankihn orekma in kuhlwacnsap lasr nuh sin Jeova uh yohk liki meet ah? Sie inkacnek an pa in oraclah sie nien sun kuh sie finsrak ah. Kom fin srackna fuhsr, nuhnkaclah ahkwoyac kom in orekmakihn moul lom in kuhlwacnsuhpuh Jeova. Kom kuh in orek research ke mwe rit pucspucs nahtuhsr ke kain in orekma pucspucs in kuhlwacnsuhpuh Jeova. Kom kuh in oakiyac sie sin ma inge kom in orekma nuh kac.a (Liye footnote.) Sramsram nuh sin sie mwet ma wi oruh orekma in kuhlwacnsap ke pacl ac kuh lal kewa ke lusen yac pucspucs. Kom fin orekmakihn moul lom in kuhlwacnsuhpuh Jeova, kom ac kuh in eis mwe ahkpah yohk suc arlacna wo. Ke kom oruh kain in orekma inge, ac fah kahsre kom in kuhlwacnsuhpuh Jeova ke facl sasuc uh.

15. Meac kuhtuh pac nien sun ma kuht kuh in oakiyac ke orekma in kuhlwacnsap lasr nuh sin Jeova uh?

¹⁵ Puhs kain in nien sun ma kuht kuh in oakiyac ke orekma in kuhlwacnsap lasr nuh sin Jeova uh. Ke sie mwe puhpuhlyuck kuht kuh in oraclah sie nien sun ah lasr in etwaclah sie inkacnek wo ke orekma in luti uh. Kuh sahp kuht kuh in srihke kuht in kahlwem na pwacye ke kahs in kahsruh luhn Bible uh ac etwaclah lah kuht ac orekmakihn ma inge fuhkah ke moul lasr uh. Kuht kuh in srihke ahkwoye inkacnek in rit kuh sramsram lasr nuh sin mwet pucspucs ac wekuhnacng top lasr ke pacl in miting. Ma yohk srihpac uh pa: Ke pacl se kom oakiyac sie finsrak kuh nien sun ke orekma in kuhlwacnsap lom uh, ma inge ac kahsre kom in ahkyohkye moniyuck lom ac in ahkolah nuh ke moul se ke facl sasuc uh.

INKACNEK SE MA WO EMEET IN MOULKIHN MOUL KE PACL INGE

16. Efuh kuh inkacnek se ma wo emeet in moulkihn moul lom uh pa in kuhlwacnsuhpuh Jeova?

¹⁶ Ke kuht orekmakihn pacl lasr in ahkoekuhtlac nuh ke facl sasuc luhn God, yac kuht sislah inkacnek wowo in moulkihn moul lasr ke pacl inge? Moh! Inkacnek se ma wo emeet in moulkihn moul lasr uh pa in kuhlwacnsuhpuh Jeova. Kuht tiac kuhlwacnsuhpwacl ke srihpen mwet se pahtok kuht in oruh kuh ke na srihpen kuht ke wi moullac ke lwen in ongaiyac luhlahp uh. Ke pacl se kuht fototo na pwacye nuh sin Jeova, moul lasr uh wo ac engan liki na meet ah. Pa inge inkacnek ma el orekuhtlac kac tuh kuht in moulkihn. Ke luhngse luhn God uh oasr yohrohsr ac ke kuht eis kahs in kolyuck lal nuh ke moul lasr uh, ma inge wo liki kuhtwena ma sahyac. (Riti Psalm 63:1-3.) Kuht nuhkewa kuh in engan ke srihpen kuht alu nuh sin Jeova ke insiacsr kewa. Mwet ma kuhlwacnsuhpwacl ke lusen yac pucspucs eltahl kuh in fahk na pwacye lah pa inge inkacnek se ma wo emeet in moulkihn moul.​—Psalm 1:1-3; Isaiah 58:13, 14.

17. Fuhkah luhpan yohk srihpaciyen pacl lasr nuh ke mwe engan ac monglac lasr ke Paradise?

¹⁷ Ke Paradise, kuht ac engankihn pacl lasr nuh ke ma kuht ke oruh kacsr sifacna, ac mwe ahkengan ke kais kuhtuh pacl. Ke ma na pwacye uh, Jeova pa orekuhtlac ac use kena se nuh sesr in engankihn moul lasr uh ac el wuhlelah lah el ac fah “ahkfalye enenuh luhn ma nuhkewa suc moul.” (Psalm 145:16; Ecclesiastes 2:24) Kuht enenuh in oruh mwe ahkengan ac kuht enenuh pac in monglac, tuhsruhktuh kuht engankihn ma inge yohk na ke pacl se kuht oruh tuh fototo lasr nuh sin Jeova uh in pa ma se ma yohk srihpac emeet uh. Ma inge ac oacpacna ke facl sasuc uh. Pwacnacng inkacnek lahlmwetmwet se in tahfwelah na “suk meet tohkohsrahi” ac in lohacng nuh ke mwe insewowo ma kuht eis ke kuht kuhlwacnsuhpuh Jeova.​—Matthew 6:33.

18. Kuht ac ahkkahlwemye fuhkah lah kuh ahkoekuht in wi moul ma pahtpaht ke Paradise?

¹⁸ Ke facl sasuc uh, moul lasr uh ac wo liki na ma kuht kuh in motko. Kuht kuh in ahkkahlwemye lah kuht arlacna ke muhta we ke kuht ahkoekuhtlac ingena nuh ke “moul pwacye” uh. Lwelah kuht in ahkkahlwemye ohiyac wowo ma Jeova el luti nuh kuht in ahkkahlwemye uh ac kuht in moniyuck in luti pweng wo. Kuht kuh in puhla luhpan engan ma tuhkuh ke kuht oruh alu lasr nuh sin Jeova in pa ma se ma yohk srihpac emeet ke moul lasr uh. Kuht luhlahlfongi na pwacye lah ke facl sasuc uh, Jeova el ac ahkpwacyeye ma nuhkewa ma el wuhlelah nuh sesr uh. Pwacnacng, kuht kuh in moulkihn moul lasr ke pacl inge uh oacna in muh kuht oasr tari we.