Elos Konealak Messaia!
“Kut konoielak Messaia.”—JON 1:41.
1. Mea paenang Andru el fwak kas inge: “Kut konoielak Messaia”?
JON BAPTAIS el tu yurin met tuma lutlut luo lal. Ke pal se Jisus el tuku nu yurolos, Jon el fwak: “Liye, Lam lun God!” Andru a siepa met tuma lutlut elos fwasr tokin Jisus a welul ke len nufon se. Tok, Andru el konealak Saimon Piter, mokul se wiyel, a kololla nu yurin Jisus tokin el fwak kas inge: “Kut konoielak Messaia.”—Jon 1:35-41.
2. Fuka kut fwa eis me insemwomwo yok kut fwin lutlutkin kutupa kas palu ke Messaia?
2 Fwafwala na tok, Andru, Piter, a kutupa met saye oasr pal yok lalos in tuni a nunku akmwoye ke ma Simusla a elos ku in fwak na paye la Jisus lun an Nasaret pa Messaia su God el mwulela. Lulalfongi lasr sifwana ke Kas lun God a ke Met Akmusrala Se lal fwa akkeyeyuk ke kut tafwela in lutlut ke kas palu puspus ke Messaia.
“Liye! Togusra Lom El Tuku”
3. Kas palu puspus fuka akpayeyuk ke pal se Jisus el ilyuk nu in Jerusalem oana sie togusra?
3 Messaia el fwa ilyuk nu in Jerusalem oana sie togusra. Kas palu lal Zekaraia el akkalemye kas inge: ‘Arulana engun, O an nutin Saion. Sala, O an nutin Jerusalem. Liye! Togusra lom el tuku nu yurum. El sumwosmwos, a oasr lango yuruk; pusisel, a kasrusr fwin soko ass, aok fwin soko ass fwusr su nutin soko ass.’ (Zekaraia 9:9) Met sim lun sam el simusla pa: “Insemwomwo el su tuku in en Jeova.” (Sam 118:26) U lulap sin met elos wowoyuk ke engan lulap ke Jisus el ilyuk nu in Jerusalem. Jisus el tia fwak nu sin u lulap se inge ma elos oru. Tusruktu elos oru fwal nu ke ma kas palu akkalemye. Ke kom rid ma simusla su akkalemye ma sikyuk ka, srike lumala ke nunak lom la kom oasr we a kom ku in long pusran met puspus su arlana insemwomwo.—Ridi Mattu 21:4-9.
4. Akuteye la fuka Sam 118:22, 23 akpayeyuk.
4 Jisus el arlana saok nu sin God, fwinne met puspus elos pulesrel oana Messaia. In oana ke ma akkalemyeyuk ke kas palu, Jisus el pulesreyuk a tia oayuk el sin met puspus su srunga in lulalfongi ke me akpayeye ka. (Isaia 53:3; Mark 9:12) Tusruktu, Baibel el fwak: “Eot se su met musa sisla el sifwen srumwasrik. Ma inge orekma lun Jeova.” (Sam 118:22, 23) Jisus el orekmakin fus se inge nu sin met kol puspus lun alu su lainul, a Piter el fwak la ma inge akpayeyuk nu sin Kraist. (Mark 12:10, 11; Orekma 4:8-11) Jisus el lumala pa nu ke eot su “sifwen sumwasrik” ku foundeson ke congregation lun met Kristian. Met su wangin lulalfongi elos pulesrel Jisus, tusruktu “God el sulella a aksaokye.”—1 Piter 2:4-6.
Tukakinyukyak a Met lal Som Lukel!
5, 6. Mea kas palu puspus akkalemye ke orekma in tukakunalak Messaia? A akpayeyuk ma inge fuka?
5 Kas palu akkalemye la Messaia fwa tukakunalak sin sie met kutasrik su welul. Devid el palye: “Aok, met kawuk saok sik, su nga lulalfongi, su kangla bred nak, el srukak kapinniel lain yu.” (Sam 41:9) Sie met su kang bread yurin sie met nunkeyuk oana sie met kawuk lal. (Genesis 31:54) Ke ma inge orekma lal Judas Iskariot in tukakunalak Jisus el sie orekma su arlana kutasrik. Jisus el akuteye kalem ke akpayeyen kas palu lal Devid ke el fwak ke met su fwa tukakunalak a el fwak nu sin met sap puspus lal: “Nga tia kaskas keyumwos nu kemwa; nga etalos su nga sulela. A tu ma Simusla in akpayeyuk, ‘El su mongo ke bred nak el srukak kapinniel lain yu.’”—Jon 13:18.
6 Met su tukakunalak Messaia el eis ipen silfer 30 su molin sie met kulansap! Mattu el orekmakin kas palu in Zekaraia 11:12, 13, a el akkalemye la Jisus el tukakinyukyak ke lupan mani srisrik inge. Tusruktu efu ku Mattu el fwak mu ma inge palyeyuk tari ‘ke inkanek lun Jeremaia met palu’? In len lal Mattu, saap buk lal Jeremaia pa buk se meet ke buk puspus lun Baibel su buk lal Zekaraia oasr pa ka. (Srike liye Luk 24:44.) Judas el tia na orekmakin mani su el eis, meyen el sisla ma inge nu in tempel a el som a sifwana loksakla.—Mattu 26:14-16; 27:3-10.
7. Fuka Zekaraia 13:7 akpayeyuk?
7 Met tuma lutlut lun Messaia elos fwa fwasrelik a som lukel. Zekaraia el simusla: “Uniye met seperd, a sip fwa fwasrelik.” (Zekaraia 13:7) In len ak 14 ke malem lun Nisan, yea 33 C.E., Jisus el fwak nu sin met tuma lutlut puspus lal: “Komwos nukewa fwa tukulkul keik in fong se inge, tu ma simusla, ‘Nga fwa uniye met sropu, a un sip fwa fwasrelik.’” A pa inge ma sikyak, meyen Mattu el simusla pa la “met lutlut nu kemwa elos som lukel, a kaengla.”—Mattu 26:31, 56.
Kutu Met Elos Kas Kikiap Kel a Onel
8. Isaia 53:8 akpayeyuk fuka?
8 Metu fwa usalak Messaia nu sin met nununku a elos selngawel nu ke mise. (Ridi Isaia 53:8.) Ke pal se ma lenelik in Nisan 14, met nukewa su wi ke Sanedrin elos tukeni nu sie in sramsram, elos kaprilye Jisus, a esalang nu sel Pontius Pailat, Governor lun an Rom. El siyuk kusensiyuk puspus nu sel Jisus a el koneak la wangin kutena ma koluk el oru. Tusruktu ke pal se Pailat el fwak in aksukosokyel Jisus, u lulap sin met elos wowoyuk: “Lela lan mise fwin sak soko!” a elos fwak nu sin togusra in aksukosokye met koluk se inge su pangpang Barabbas. Ke sripen Pailat el lungse in akengunye u lulap se inge, el aksukosokyel Barabbas, a esalang Jisus in mise fwin sak soko.—Mark 15:1-15, NW.
9. Mea sikyak in len lun Jisus oana ma palyeyuk in Sam 35:11?
9 Met lo kikiap elos sang me akpayeye kikiap in lain Messaia. Met sim lun sam se inge Devid el simusla: “Met lo sesumwos tuyuk, elos siyuk sik ke ma nga tia etu ka.” (Sam 35:11) Kas palu se inge akpayeyuk na paye ke pal se “met tol fulat a un met papu nu kemwa elos suk ma lo kikiap lainul Jisus, tu elos fwa ku in unilye.” (Mattu 26:59) Aok, oasr ‘met puspus orek lo kikiap lainul, a elos tia kas siefwanna.’ (Mark 14:56) Met lokwalok koluk lun Jisus su suk inkanek in unilye elos tia asor a nunku ka fwinne met lo puspus elos sang ma lo kikiap.
10. Akuteye la fuka Isaia 53:7 akpayeyuk.
10 Messaia el misla ye mutun met lokwalok su fwak mu el oru ma koluk. Met palu Isaia el palye: “El sringelik, a ke el mwaiok el tia oalngelik oalul. Oana soko sip fwusr su kokola nu nien anwuk, a oana soko sip sikas ye mutun met kalkul, ouinge el tia oalngelik oalul.” (Isaia 53:7) Ke pal se “met tol fulat a met matu” elos fwak mu oasr ma koluk el oru, Jisus “el tia topuk.” Pailat el siyuk: “Ya kom tia long ma puspus elos lo lain kom ka?” Ne ouinge Jisus “el tia topuk nu sel sie kas, a ouinge leum [governor] el arlana lut.” (Mattu 27:12-14) Jisus el tia kaskou nu sin met lokwalok nukewa lal.—Rom 12:17-21; 1 Piter 2:23.
11. Mea sikyak ke pal se Isaia 50:6 a Maika 5:1 akpayeyuk?
11 Isaia el palye la elos fwa onel Messaia. Met palu se inge el simusla: “Nga sang fwintukuk nu sin met uni, a likintupak nu selos su fwusla unuk, Nga tia mwukunla mutuk liki mekin a ani.” (Isaia 50:6) Met palu Maika el palye pa: “Elos fwa sringil met nununku lun Israel ke sogo sak fwin likintupal.” (Maika 5:1) Met lun Gospel su pangpang Mark el akkalemye ke me akpayeyen kas palu luo inge, el simusla: “A kutu elos mutamwauk in anel, a in afwunye mutal, a in fuskel, a in fwak nu sel: ‘Palye!’ A, met roso elos puokol in paulos.” Mark el akkalemye la met meun “elos puok sifwel ke sogo aa, a anel, a sikukmutunti [in anglol] a alu nu sel.” (Mark 14:65; 15:19) Paye la, Jisus el tia oru kutena ma in purakak met in oru orekma koluk inge nu sel.
El Oaru nu sin God nu ke El Mise
12. Fuka Sam 22:16 a Isaia 53:12 akpayeyuk nu sel Jisus?
12 Messaia a fwa mise fwin sak soko. Devid el fwak: “Sie un met orek ma koluk apinyula, elos [oana soko laion] fwakisye pouk a niuk.” (Sam 22:16) In oana ke ma met rid lun Baibel elos etu a ke ma Mark el simusla in Gospel lal, kas palu inge akpayeyuk. Mark el simusla la ke ao yu ke lututang, elos unilye Jisus. Elos patikye paol a niel fwin sak soko.” (Mark 15:25) Oasr pa kas palu su akkalemye la Messaia el fwa oekyukla oana sie met koluk. Met palu Isaia el simusla: “Tu el okaot ngunal [moul lal] nu ke mise, a oaoala yurin met koluk.” (Isaia 53:12) Ma inge akpayeyuk ke pal se oasr “met pusrapasr luo oelul mise fwin sak soko, sie on lepaul leyut a sie on lepaul lese.”—Mattu 27:38, NW.
13. Ke inkanek fuka Sam 22:7, 8 akpayeyuk nu sel Jisus?
13 Devid el palye la met puspus elos aksruksruk koluk nu sin Messaia. (Ridi Sam 22:7, 8.) Metu elos aksruksrukel Jisus ke pal se el keok fwin sak soko. Mattu el simusla: “A elos su fwasr alukela kaskas enum nu sel, a usruk kaiwelos a fwak: ‘Kom su kunausla tempelu, a musai in len tolu, sifwanu molikomla! Kom fwin Mwen nutin God, fwuni liki sak soko!’” Met tol fulat, met sim, a met matu elos aksruksruk el, a fwak: “El molela met ngia; el koflanu sifwana molella! El Togusra lun Israel; lela lan fwuni liki sak soko a kut fwa lalalfongel. El lulalfongi God; lela lan molella inge, el fwin lungse el tu el fwak, ‘Nga Mwen nutin God.’” (Mattu 27:39-43) Paye la Jisus el keok ka, ne ouinge el muteng a tia fwak kutena ma koluk. El sie me srikasrak mwomwo nu sesr.
14, 15. Akuteye la fuka kas palu puspus kel Messaia akpayeyuk ke nuknuk lal a ke metu sang finiger tu lan nim.
14 Metu elos orek susfwa ke nuknuk lun Messaia. Met sim lun sam el simusla: “Elos kitelik nuknuk luk in masrlolos, a koto srifwin me nukumyula.” (Sam 22:18) Pa inge ma sikyak, “ke [met solse lun an Rom] elos unilye [Jisus] tari fwin sak soko, elos kitelik nuknuk lal in masrlolos ke susfwe.”—Mattu 27:35, NW; ridi Jon 19:23, 24.
15 Met elos sang finiger a aa. Met sim lun sam el simusla: “Elos se pa nu sik aa nak, a in malu luk elos se nu sik finiger nimuk.” (Sam 69:21) Kut etu la kas palu inge akpayeyuk meyen Mattu el fwak nu sesr: “Elos sang nu sel wain karkar ke aa tu lan nim; a ke el emakin, el srangesr nim. A kitenmisenge sie selos kasrusr a eis insral a nekla ke finiger a filiye fwin soko aa a sang nu sel in nim.”—Mattu 27:34, 48.
16. Akuteye la fuka kas palu in Sam 22:1 akpayeyuk.
16 Motkoyuk mu God el fwasr lukel Messaia. (Ridi Sam 22:1.) Kas palu se inge akpayeyuk ke inkanek inge, “a ke aur se akeu [ao tolu ke tafun len tok] Jisus el wowoyuk ke pusra lulap: ‘Eloi, Eloi, lama sabaktani?’ oana fwak: ‘God luk, God luk, efu kom ku fwasr liki yu?’” (Mark 15:34) Tia tula lulalfongi lal Jisus nu sin Papa tumal. Kalmen kas inge su God el som lukel Jisus ke pal se el oasr yurin met lokwalok lal pa el tia loangella in pal san tu oiyen oaru lun Kraist ku in srufweyuk yok. A ke el wowoyuk ke pusra lulap, Jisus el akpayeye Sam 22:1.
17. Fuka Zekaraia 12:10 a Sam 34:20 akpayeyuk?
17 Met lokwalok elos fwa fwaksilye Messaia, tusruktu sri ke manol fwa tia koptelik. Met su muta fwin an Jerusalem ‘elos fwa nget nu sin Sie su elos fwakis.’ (Zekaraia 12:10) A Sam 34:21 akkalemye ouinge: “[God] el srukye srel nu kemwa; wangin soko koptelik.” Met sap Jon el akkalemye la ma inge akpayeyuk, el simusla: “Sie sin met meun inge el fwakisye lasiel ke soko mwusra, a kitenmisenge sra a kof surorla. A el su liye el orek ma lo, a ma lo lal paye . . . Tu ma inge te oru, tu ma Simusla in akpayeyuk: ‘Wangin soko srel fwa kaptelik.’ A siepa ma simusla fwak: ‘Elos fwa ngetang nu sel su elos fwakisye.’”—Jon 19:33-37.
18. Ke inkanek fuka Jisus el pukpuki yurin met kasrup?
18 Messaia e fwa pukpuki yurin met kasrup. (Ridi Isaia 53:5, 8, 9.) Ke ekela in Nisan len 14, “sie met kasrup lun Arimatia, el Josef,” el siyuk Pailat ke manol Jisus, a met kol se inge lela in orek ma el siyuk ka. Mattu el simusla pa: “A Josef el eis manol, a lumani in nuknuk linen nasnas, a filiye in lufin mas sasu se lal, ma el tufla in eotu. A el epusang sie eot lulap nu ke mutunpot in lufin mas sa, a som.”—Mattu 27:57-60.
Kaksakin Messaia Togusra!
19. Ma fuka sikyak in akpayeye kas palu su oasr in Sam 16:10?
19 Jeova el fwa akmoulyelak Messaia. Devid el simusla: “Kom [Jeova] fwa tia likiye ngunik in Hedis.” (Sam 16:10) Srike lumala ke nunak lom ke me lut lulap lun mutan luo su tuku ke inkalyuk se su manol Jisus filiyuki we. Elos liye sie lipufan in an se inge, su fwak nu selos: ‘Nik komwos lut. Komwos sokol Jisus met Nasaret, su mise fwin sak soko. El moulyuk, el tia inge. Liye! Yen elos fililye we.’ (Mark 16:6) Piter el fwak nu sin u lulap sin met su oasr in Jerusalem ke len in Pentecost 33 C.E., kas inge: “[Devid] el etu ma se inge meet el kaskas ke sifwil moulyuk lun Kraist, tu el tia filiyuki in Hedis, a ikwel tia liye kulamwi.” (Orekma 2:29-31) God el tia lela monun Mwen kulo natul in kalamwi. Sayen ma inge, God el akmoulyelak Jisus nu in kosrao!—1 Piter 3:18.
20. Kas palu ke kolyuk lun Messaia el akpayeyuk fuka?
20 Oana ke ma palye tari, God el fwakak la Jisus pa Mwen natul. (Ridi Sam 2:7; Mattu 3:17.) Oayepa, u lulap sin met elos kaksakunul Jisus a ke Togusrai su fwa tuku, a ke pal inge kut insemwomwo pa in kaskas kel a ke kolyuk mwolana lal. (Mark 11:7-10) E fwa tia pat Kraist el fwa kunausla met lokwalok nukewa lal ke el sroang kasrusr “meyen paye a fwokpap a sumwosmwos.” (Sam 2:8, 9; 45:1-6) Kolyuk lal oana sie togusra fwa sang misla a moul mwomwo fwin fwalu nufon. (Sam 72:1, 3, 12, 16; Isaia 9:6, 7) Oana Met Lo lun Jeova, oasr sie kunokon na mwomwo lasr in fwakak ma paye nukewa inge. Aok kut in fwakak la Mwen kulo nutin God el kol in kosrao oana sie Togusra Messaia!
Kom E Topuk Fuka?
• Ke inkanek fuka Jisus el tukakinyukla a met lal som lukel?
• Mea kutu oiya ke kas in palye ke mise lun Kraist ke sak soko?
• Efu ku kom lulalfongi yok la Jisus pa Messaia su God el mwulela?
[Petsac ke sra 8]
Ilyuk mwolana lun Jisus nu in Jerusalem akpayeye kas palu fuka?
[Petsac ke sra 10]
Jisus el mise ke ma koluk lasr, tusruktu ke pal inge el kol oana sie Togusra Messaia