Jisus Kraist​—Messaia Su God el Mwulela

IN KASRE kut in akilen Messaia, Jeova God el kasru met palu puspus in simusla me akuteye puspus ke isusla, orekma in luti, a ke mise lun met Molela se inge su el mwulela ka. Kas palu nukewa inge lun Baibel el akpayeyuk kel Jisus Kraist. Kas palu nukewa inge sumwos na paye a oasr ma puspus akkalemyeyuk ka. In pupulyukkin ma inge, lela kut in akuteye kutu kas palu su palye tari ke ma puspus su sikyak su kupasr nu ke isusla lun Messaia a moul lal oana tulik sriksrik.

Met palu Isaia el palye la Messaia el fwa tuku ke sruf ku sou lal Togusra Devid. (Isaia 9:7) Aok kas palu inge akpayeyuk tari la Jisus el isusla ke sruf lal Devid.​—Mattu 1:1, 6-17.

Maika, siepa met palu lun God, el palye ka la tulik mokul srisrik se inge fwa ekla sie met leum a el fwa isusla in an “Betleem Efrata.” (Maika 5:2) Ke pal sepana ke isusla lun Jisus, oasr siti luo in an Israel su pangpang Betleem. Sie el on apkuran nu in an Nasaret leyen eir lun mutanfwal sa, a siepa, el on apkuran nu in an Jerusalem lun an Juda. Betleem se inge su apkuran nu in an Jerusalem tok pangonyuk oana an Efrata. Jisus el isusla in siti se inge, oana ke ma met palu el palye tari!​—Mattu 2:1.

Siepa kas palu in Baibel el akkalemye la Mwen nutin God el fwa pangonyuk “liki an Ijipt.” Ke el tulik srisrik, Jisus el utukla nu in an Ijipt. El sifwil utukla nu in an sel tokin mise lal Herod, ke inkanek inge kas palu akpayeyuk.​—Hosia 11:1; Mattu 2:15.

Ke chart ma oasr ke sifac se inge “Kas Palu Puspus Ke Messaia,” ma suhmushlah ye sifac se inge “Kas Palu” oasr kac mwe akuhtweyac pucspucs kacl Messaia. Nunak munas srike liye kas palu puspus inge nu ke ma simusla puspus su simusyukla ye sifwe se inge “Akpayeiyen Kas Palu.” Kafweang lom in oru ma inge fwa akkeye lulalfongi lom nu ke Kas lun God la ma inge paye.

Ke pal se kom tuni a lutlutkin yok ma simusla nukewa inge, esam la kas palu nukewa inge palyeyuk a simusyukla ke foko foko yea meet liki Jisus el isusla. Jisus el fwak: “Tu fwal tu ma nukewa in akpayeyuk, su simla in masap lal Moses, a in kas lun met Palu a in Sam keik.” (Luk 24:44) Oana ke ma kom ku in akpayeye ke Baibel nutum sifwana, paye la kas palu nukewa inge akpayeyuk​—ke oiya nukewa!