Messaia Pa Inkanek Lun God In Molela Metu

“Tu oana in Adam met nukewa elos mise, ouyepa in Kraist met nukewa elos fwa moul.”​—1 KORINT 15:22.

1, 2. (a) Oiya fuka Andru a Filip elos akkalemye ke pal se elos osun nu sel Jisus? (b) Efu kut ku in fwak mu oasr me akpayeye puspus la Jisus pa Messaia ke pal inge liki me akpayeye su oasr yurin met Kristian in century se meet?

“KUT konealak Messaia,” Andru el fwak nu sel Piter, tumalel wiyel, a el lulalfongi na paye la Jisus lun Nasaret pa Met Akmusrala lun God. Filip el long pa kel Messaia, a el suk met kawuk se lal inge Natanael a fwak nu sel: “Kut koneak el, su Moses in Masap, a met Palu elos simusla kel, Jisus lun Nasaret, mwen natul Josef.”​—Jon 1:40, 41, 45.

² Ya kom lulalfongi na paye la Jisus pa Messaia su God el mwulela, su ‘Kaptin lun lango’ lun Jeova? (Hibru 2:10) Ke pal inge, oasr me akpayeye puspus su kut liye liki me akpayeye su oasr yurin met tuma lutlut lal in pal meeta la el pa Met Akmusrala lun God. Mutawauk ke pal se Jisus el isusla nu ke pal el sifwil akmoulyeyukyak, Kas lun God el sang me akpayeye puspus la el pa Kraist. (Ridi Jon 20:30, 31.) Baibel el akkalemye pa la Jisus el kafweang in akpayeye kunokon lal oana sie Messaia. (Jon 6:40; ridi 1 Korint 15:22.) In fwal nu ke ma kom lotela ke Baibel, kom ku pa in fwak mu kom “konealak Messaia” ke pal inge. Lela kut in lutlutkin meet la fuka met tuma lutlut in pal meeta elos lulalfongi la elos konealak Messaia.

“Ma Lukma Mutal” kel Messaia Akkalemyeyuk Kais Kutu Srisrik

3, 4. (a) Fuka met tuma lutlut in century se meet elos ‘konealak Messaia’? (b) Efu ku kom ku in fwak mu Jisus mukena ku in akpayeye kas palu nukewa kel Messaia?

³ Fuka met tuma lutlut lun Jisus in century se meet elos ku in fwak la el pa Messaia? Ke inkanek lun met palu puspus, Jeova el akkalemye kais kutu srisrik la fuka tuku lun Messaia. Sie scholar lun Baibel el pupulyukkin ma inge nu ke orekma in sruleye ma se su orek ke eot saok puspus. Srike nunku la oasr met puspus su soenna etu a sramsram nu sin sie sin sie kais sie selos us ipin eot marble se inge nu luen infwokil se. Fwin ip srisrik nukewa inge fwal nu sin sie sin sie in orala sie ma srolela kato, kom ku in fwak mu oasr sie met su orala tari kais sie ip saok ka, a supwela ip puspus inge nu sin kais sie met inge su fwa filiye ip srisrik inge nu ke an fwal. In oana ke kais sie ip srisrik lun ma srolela kato se inge, kais sie kas palu kel Messaia el akkalemye ke etauk mwomwo ke Messaia.

⁴ Ke ma inge, ya kas palu nukewa ke Messaia ku in sifwana akpayeyuk nu sin sie met fwinne wangin kutena akwuk su orek ka? Sie met su oru lutlut yok ka el fwak mu fwin wangin “akwuk su orek tari, kas palu nukewa ke Messaia tia ku in akpayeyuk. Ke sripe se inge, scholar se inge el fwak mu, “Jisus, el sifwana a wangin kutena met saye, ku in akpayeye kas palu nukewa kel.”

5, 6. (a) Nununku nu sel Setan fwa orek fuka? (b) God el akkalemye fuka kais kutu srisrik ke sruf se su “fute” se inge su el mwulela fwa tuku?

⁵ Ke kas palu nukewa ke Messaia akkalemye yok ke “ma lukma” mutal ke oiya yok sripe puspus. (Kolosse 1:26, 27; Genesis 3:15) Wekunang nu ke ma lukma inge pa nununku lun God nu sel Setan su Devil, “serpent matu,” su kiapela metu paenang elos eis ma koluk a mise. (Fwakyuk 12:9) Nununku inge fwa orek fuka? Jeova el palye la “mutan” se fwa orala sie “fute” su fwa kunausla sifwel Setan. “Fute” se inge su God el mwulela fwa kunausla sifwen serpent soko inge, a el fwa akwanginyela sropon orekma in lain nukewa, mas, a mise. Tusruktu, God el fwa lela Setan in oru kinet nu ke kapinniyen “fute” lun mutan se.

⁶ Kais kutu srisrik Jeova el akkalemye la su “fute” se inge su el mwulela. God el mwulela nu sel Ebream: “A in fute lom mutanfwal nu kemwa fwin fwalu fwa insemwomwo.” (Genesis 22:18) Moses el palye la fute se inge e fwa ekla sie “met palu” su yok lukel. (Duteronomi 18:18, 19) God el fwak nu sel Devid, a met palu puspus kalweni nu sel, la Messaia fwa tuku ke sruf lal a e fwa usrui tron lal Devid ma patpat.​—2 Samuel 7:12, 16; Jeremaia 23:5, 6.

Me Akpayeye Puspus la Jisus pa Messaia

7. Ke inkanek fuka Jisus el tuku liki u lun God su oana “mutan” kiyel?

⁷ God el supwema Mwen natul, ma orekla se meet lal, liki u lun ma orekla in ngun in kosrao su oana mutan kiyel, tu in akpayeye mwulela lal ke “fute.” Oasr ma eneneyuk nu sin Mwen nutin God in ‘akpusiselyel sifwana’ in som liki an in kosrao a in isusla oana sie met sumwosmwos. (Filippai 2:5-7; Jon 1:14) Ke sripen ‘ngun mutal tuku’ nu yurol Mary, paenang tulik se su el oswela el “ma mutal se su . . . pangpang Mwen nutin God.”​—Luk 1:35.

8. Jisus el akpayeye fuka kas palu ke Messaia ke pal se el akkalemyel sifwana nu ke baptais ke kof?

⁸ Kas palu puspus ke Messaia akkalemye ke an se a ke pal su Jisus el sikyak. Jisus el isusla fwin an Betleem oana ma palyeyuk tari. (Maika 5:2) In century se meet, met Ju elos tawinu a nunku yok ke tuku lun Messaia. Ke sripe se inge, kutu selos asiyuki kel Jon Baptais: ‘Ya met se inge pa Kraist, ku tia?’ Tusruktu Jon el topuk nu selos: “A sie tuku su ku liki yu.” (Luk 3:15, 16) In yea 29 C.E. Jisus el tuku nu yurol Jon, elan eis baptais lal ke el yea 30 matwe, a el akkalemyel sifwana oana Messaia ke pal fwal. (Daniel 9:25) Tokin pal se inge, el mutawauk in oru orekma lal in sulkakin peng mwo, a el fwak: “Pal fwalnu, a togusrai lun God apkuran me.”​—Mark 1:14, 15.

9. Met tuma lutlut lun Jisus elos soenna etu ma nukewa ke Messaia, tusruktu elos lulalfongi yok ke mea?

⁹ Ne ouinge, oasr ma eneneyuk in aksumwosye nunak lun met puspus ka. Aok Jisus el akfulatyeyuk oana sie Togusra, tusruktu elos tia kalem ka la kolyuk lal el tia mutawauk in pal se ingo a ke pal fwasru a kolyuk lal fwa orek in kosrao. (Jon 12:12-16; 16:12, 13; Orekma 2:32-36) Ke pal se Jisus el siyuk sin met tuma lutlut lal kusensiyuk se inge, “Ku komwos mu suo Ngao?” Piter el topuk: “Kom Kraist, Mwen nutin God moul.” (Mattu 16:13-16) Piter el topuk pa ouinge ke pal se oasr met tuma lutlut puspus su forla lukel Jisus, ke sripen elos aktukulkulyeyuk ke me luti lal.​—Ridi Jon 6:68, 69.

Akos Messaia

10. Efu ku Jeova el akkalemye ke ma eneneyuk in porongo Mwen natul?

¹⁰ In kosrao, Mwen nutin God el sie met in ngun su arlana ku. Fwin fwalu, Jisus pa met tutafpo lun Papa tumal. (Jon 16:27, 28) El fwak: “Me luti luk tia ma luk, a ma lal su supeyume.” (Jon 7:16) Jeova el akpayeye la Jisus pa Messaia ke sie aruruma, el fwak ouinge: “Komwos longol.” (Luk 9:35) Aok, kut enenu in porongo, ku akos, Met se inge su God el Sulela. Oasr ma eneneyuk in akkalemye lulalfongi a orekma mwomwo, su yok sripe in akinsemwomwoye God a in eis moul ma patpat.​—Jon 3:16, 35, 36.

11, 12. (a) Met Ju in pal meeta elos pulesrel Jisus ke kain in sripe puspus fuka? (b) Su filiye lulalfongi lalos nu sin Jisus?

¹¹ Fwinne oasr me akpayeye puspus la Jisus pa Messaia, tusruktu met Ju puspus in century se meet elos pulesrel oana Messaia. Efu? Meyen oasr tari nunak lalos sifwana ke Messaia, wekunang kain in nunak mu el fwa ekla sie met kol lun an selos su fwa aksukosokyelos liki ma upa nukewa ye kolyuk lun an Rom. (Ridi Jon 12:34.) Ke sripe se inge, elos tia ku in lulalfongi ke sie Messaia su akpayeye kas palu puspus su akkalemye mu el fwa srungeyuk, met sisella, el fwa pulakin ngal puspus a asor ke el liye met mas a pakomutalos, a ke saflaiye el fwa anwuki. (Isaia 53:3, 5) Oasr kutu sin met tuma lutlut oaru lun Jisus elos asor pa ke sripen el tia aksukosokyelos liki mutanfwal saye in pal san. Ne ouinge, elos sruokye oaru lalos nu sel, a tokin kutupal, elos eis etauk sumwos ka.​—Luk 24:21.

¹² Siepa sripe paenang elos pulesrel Jisus oana Messaia su God el mwulela pa ke me luti lal, su met puspus elos nunku mu upa in lulalfongi ka. Fwin elos lungse in ilyuk nu ke Togusrai lun God elos enenu in ‘lafwekinulos sifwana,’ a in ‘kang’ ikwe a sral Jisus, in “sifwil isusla,” a in “tia ma lun fwalu.” (Mark 8:34; Jon 3:3; 6:53; 17:14, 16) Met insefulat, met kasrup, a met mwosounkas nukewa elos nunku ke ma eneneyuk inge mu arlana upa in akpayeyuk. Tusruktu, nu sin met Ju nukewa su inse pusisel, elos lulalfongi la Jisus pa Messaia, oana met Samaria puspus elos oru, su fwak kas inge: “Tu paye el inge met lango lun fwalu.”​—Jon 4:25, 26, 41, 42; 7:31.

13. Jisus el pulakin fuka me kunausla kapinniyel?

¹³ Jisus el palye la met tol fulat fwa selngawi el, a el fwa srupusrak sin met Pegan puspus, tusruktu ke len aktolu, el fwa sifwil akmoulyeyukyak. (Mattu 20:17-19) Ke pal se el fwak nu sin met nukewa ke Sanedrin la el pa “Kraist Mwen nutin God,” elos sang nununku nu sel mu el sie met kaskaskou. (Mattu 26:63-66) Pailat el tia koneak kutena ma koluk “fwal tu lan mise ka,” tusruktu ke sripen met Ju elos fwak mu el lain akwuk lun guferment paenang Pailat el “esalang Jisus nu ke ma lungse lalos.” (Luk 23:13-15, 25) Ke ma inge elos “lafwekunul” a akesrui in uniye “Leum lun moul,” fwinne oasr me akpayeye puspus la God el supweyukme. (Orekma 3:13-15) Messaia el “sisila” oana ma palyeyuk tari, ke pal se srupsrupyak el fwin sak soko ke len in Kofwen Alukela in yea 33 C.E. (Daniel 9:26, 27; Orekma 2:22, 23) Ke inkanek upa inge ke mise lal, el sun ngal a musalla “kapinniyel” su akkalemyeyuk in Genesis 3:15.

Efu ku Messaia el Enenu in Mise

14, 15. (a) Jeova el lela Jisus in mise ke sripe luo fuka? (b) Mea Jisus el oru tokin el akmoulyeyukyak sin God?

¹⁴ Jeova el lela Jisus in mise ke sripe luo. Ma se meet, oaru lun Jisus nu ke mise el akkalemye ke sie oiya yok sripe lun “ma lukma” mutal. El akpayeye la sie met sumwosmwos ku in sruokye ‘paye a oaru lal nu sin God’ a ku in akfulatye kolyuk lun God fwinne el sun me keok upa su Setan el oru. (1 Timote 3:16) Ma se akluo, in oana ke ma Jisus el fwak, “Mwen nutin met el tuku . . . in sang moul lal in moli met puspus.” (Mattu 20:28) “Me mol” ku me lango inge el moli ma koluk su usrui sin tulik nukewa natul Adam. A ma inge ku in sang moul ma patpat nu sin met nukewa su eisel Jisus oana inkanek lun God ke molela.​—1 Timote 2:5, 6.

¹⁵ Tokin len tolu ke inkalyuku, God el akmoulyelak Kraist, a ke lusen len 40 el sikyak nu sin met tuma lutlut puspus lal, in akkalemye nu selos la el moul a sang kas in kasru puspus nu selos. (Orekma 1:3-5) Tokin ma inge el somwak nu in kosrao in akkalemye nu sin Jeova saokiyen me kise lun lango lal a el sano nu ke pal pakiyuki nu ke pal in mutaweyen oasr tari lal oana sie Togusra Messaia. Ke el sano pal se inge in tuku, oasr ma puspus su el enenu in oru.

Akpayeye Kunokon Lal oana Messaia

16, 17. Akkalemye ke kunokon lun Jisus oana Messaia tokin el somwak nu in kosrao.

¹⁶ Ke lusen century puspus tokin sifwil moulyuk lal, Jisus el karungin orekma nukewa lun congregation lun met Kristian su el kol mutawauk in century se meet oana sie Togusra. (Kolosse 1:13) Ke pal pakiyuki, el fwa mutawauk in orekmakin ku lal oana sie Togusra ke Togusrai lun God. Kas palu puspus su oasr in Baibel a ma sikyak puspus fwin fwalu sang me akpayeye la Kraist el oasr tari mutawauk in yea 1914, a kut oasr pa ke ‘saflaiyen akwuk puspus lun fwalu.’ (Mattu 24:3; Fwakyuk 11:15) Tia pat tokin ma inge, el kol lipufan nukewa lal in sisella Setan a dimon nukewa lal liki in kosrao.​—Fwakyuk 12:7-10.

¹⁷ Orekma in sulkakin a in luti peng mwo su Jisus el sramtauk in oru in yea 29 C.E. el apkuran na in akpayeye ke inkanek yok. Ke pal apkuran el fwa sang nununku nu sin met nukewa. El fwa fwak nu sin met nukewa su oana sipu su lulalfongi la el fwa inkanek lun Jeova in molela metu elos in “usrui togusrai su akola nu [selos] ke mutamweyen fwalu me.” (Mattu 25:31-34, 41) Nu selos nukewa su pulesrel Jisus oana sie Togusra fwa kunausyukla ke pal se el kol un lipufan nukewa in aksafyela ma koluk nukewa. Tokin ma inge Jisus el fwa kaprilye a sisella Setan a dimon nukewa lal nu in “abyss.”​—Fwakyuk 19:11-14; 20:1-3.

18, 19. Mea Jisus el fwa akpayeye oana sie Messaia, a me insemwomwo fuka orekma lal inge ku in oru nu sin met nukewa su aksol?

¹⁸ Ke Kolyuk lal ke lusen Sie Tausan Yea, Jisus el fwa akpayeye kunokon lal nukewa, oana “Met Papu Mwolana, God Ku, Papa Ma Patpat, Fwisrak in Misla.” (Isaia 9:6, 7, NW) Metu fwa ekla met sumwosmwos ye kolyuk lal ke Togusrai lun God, wekunang met nukewa su akmoulyeyukyak liki mise. (Jon 5:26-29) Messaia el fwa kol met nukewa nu ke “lufin kof in moul,” su ku in oru met nukewa su akosten in engunkin fototo mwomwo nu sin Jeova. (Ridi Fwakyuk 7:16, 17.) Tokin me srufwe safla, met lain nukewa, welulang Setan a dimon nukewa lal, fwa “sisila nu in lulu in e,” a ma inge kalmekin nu ke orekma in kunausla sifwen “serpent,” ku mise lal Setan.​—Fwakyuk 20:10.

¹⁹ In pal san, Jisus el akpayeye orekma ku kunokon nukewa lal oana Messaia ke inkanek mwomwo! Fwalu nufon su paredais tari e fwa nenela sin met su el molela, a elos fwa moul ma patpat oasr mano fokoko a wangin kutena mas a elos fwa engunkin insemwomwo yok. E mutal lun Jeova e fwa akmutalyeyuk liki me akkoluk nukewa. A sumwos lal in kol in kosrao a fwalu fwa akfulatyeyuk. Aok ke pal se su arlana apkuran oasr me usru mwomwo nu sin met nukewa su lungse in akos Met Akmusrala lun God!

Ya Kom Konealak Messaia?

20, 21. Mea sripe mwomwo puspus paenang kom lungse in fwakak nu sin met puspus kel Messaia?

²⁰ Mutawauk in yea 1914 kut oasr tari ke lusen pal ke pa·rou·siʹa, ku oasr tari lun Kraist. Fwinne oasr tari lal inge oana sie Togusra ke Togusrai lun God el tia ku in liyeyuk, ma inge arlana kalem ke me akpayeyen kas palu puspus ka. (Fwakyuk 6:2-8) Ne ouinge, in oana ke met Ju in century se meet, met puspus ke pal inge elos pulesru me akpayeye ke oasr tari lun Messaia. Elos lungse pa ke kain in messaia ku met kol su fwa orekma ke inkanek lun akwuk lun politic. Tusruktu, kom eis etauk ka la Jisus el kol ke pal inge oana sie Togusra ke Togusrai lun God. Ya kom tia insemwomwo ke sripen kom lotela ma inge? In oana ke met tuma lutlut nukewa in century se meet, kom lungse pa in fwak ouinge: “Kut konealak Messaia.”

²¹ Ke pal inge, pal nukewa kom sramsramkin ma paye, ya kom akkalemye yok ke kunokon lun Jisus oana Messaia? Kom fwin oru ma inge kom ku in akkeye kulo lom ke ma nukewa su el orala tari keim, ke ma el oru ke pal inge, a ke ma el fwa akpayeye ke pal fwasru. In oana Andru a Filip, wangin alolo ka la kom sramsram nu sin met puspus ke sou lom a met kawuk puspus lom ke Messaia. Efu ku kom tia sramsram nu selos wi moniyuk yok lom ke pal inge a akkalemye nu selos la Jisus Kraist el fwa Messaia su God el mwulela, a inkanek lun God in molela metu?

Ya Kom Ku In Akuteye?

• Fuka met tuma lutlut in century se meet elos konealak Messaia?

• Ke sripe luo fuka Jisus el mise?

• Mea Jisus el fwa oru ke pal fwasru in akpayeye kunokon lal oana sie Messaia?

[Pictures on page 25]

Fuka met in century se meet elos ku in fwak la Jisus pa Messaia su God el mwulela?

[Picture on page 27]

Fwin kom sramsram nu sin met puspus, ya kom akkalemye yok ke kunokon lun Jisus oana Messaia?