Oru Sulela Mwomwo su Ku In Akfulatye God

“Sie met lalmetmet arulanu liaung fwufwasryesr lal.”—SOAKAS 14:15.

1, 2. (a) Mea kut enenu in nunku yok ke sulela nukewa su kut oru? (b) Kusensiyuk puspus fuka kut fwa lutlutkin?

KUT oru ma inge ke pal puspus kais sie len. A ma puspus ka ku in kasre kut ke kitin pal na. Tusruktu kutu sin ma inge oasr me kasru yok nu ke moul lasr, ku oasr pal ma inge orala fwako koluk nu sesr. Mea ma inge? Pa sulela lasr. Ke sulela nukewa su kut orala, ma lulap ku ma srisrik, lela kut in nunku yok in sang me akfulat a mwolana nu sin God.—Ridi 1 Korint 10:31.

² Ya fusrasr nu sum in oru sulela lom, ku upa nu sum in oru? Kut fwin kapkapek nu ke oiyen met Kristian su fokoko ke lulalfongi, kut enenu in lotela in akilen ma sumwos a ma koluk. A tokin ma inge kut ku in orala sulela lasr su fwal nu ke ma kut lulalfongi yok, a tia fwal nu ke nunak a lulalfongi lun met saye. (Rom 12:1, 2; Hibru 5:14) Mea kutu pa sripe mwomwo paenang kut enenu in lutlut in orala sulela na mwomwo? Efu ku kutupal arlana upa in oru sulela? A ke inkanek puspus fuka kut ku in oru in akpayeye la sulela nukewa su kut oru akfulatye God?

Efu ku Kut Enenu in Oru Sulela Lasr?

3. Mea kut fwa tia lela in kufuskutla ke orekma lasr in oru sulela?

³ Kut fwin tia ku in oru sulela ke pal se kut enenu in orekmakin akwuk fulat lun Baibel, tulik lutlut wiyesr, ku met su wi kut orekma elos ku in nunku mu kut tia arlana lulalfongi ke ma paye a ke ma inge ku in sa kufuskutla. Elos ku in kaskaskin ma kikiap, kutasrik, ku pusre ma lun met saye, a kaifwe kut in wi “fwasr tokin met puspus” ku oru pa ma elos oru, a saap kut kasrelos in mwukunla ma koluk su elos oru. (Exodus 23:2) Tusruktu, sie met su etu in oru sulela mwomwo su ku in akfulatye God el fwa tia lela sangeng lal sin met, a kena lal tu met in insemwomwo kel, in kufusella elan akkalemye oiya su lain ella ku conscience mwomwo lal su pala tari ke akwuk mwomwo lun Baibel.—Rom 13:5.

4. Efu ku kutu met saap elos lungse in oru sulela in kasre kut?

⁴ Tia met nukewa su oru sulela kesr ku in oru me sensen nu sesr. Met kawuk mwomwo lasr elos ku in fwak nu sesr kut in porongo kas in kasru lalos. Kut fwin tila muta yurin papa a nine kiyesr, saap uncle ku auntie ku cousin lasr elos nunku yok pa kesr a elos lungse pa in oru sulela yok sripe kesr. Ke sie me pupulyuk, nunku ke akwuk lun ono. Baibel el akkalemye kalem la kut tia ku in orekmakin sra. (Orekma 15:28, 29) Tusruktu, kutupa ma su kupasr pa nu ke karunginyen manosr in unwela mas, wangin masap kalem ka, a oasr ma eneneyuk nu sin kais sie sesr in oru sulela lasr sifwana la kain in akwuk ke ono fuka kut fwa eis ku kut tia eis.a Saap met in sou lasr elos fwa akkalemye nunak lalos ka a elos lungse kut in orekmakin sulela lalos. Tusruktu, ke pal in oru sulela ka, kais sie met Kristian su baptais tari el sifwana enenu in us “ma toasr lal.” (Galetia 6:4, 5) Ma kut nunku yok pa in karungin sie ella ku conscience mwomwo ye mutun God, a tia ye mutun met.—1 Timote 1:5.

5. Mea kut ku in oru tu in tia musalla lulalfongi lasr oana soko oak musalla?

⁵ Sie me sensen yok nu sesr kut fwin inse luo in orala sulela lasr. Met tuma lutlut Jemes el simusla la met inse luo el “seokak oiyel in ma nukewa.” (Jemes 1:8) In oana ke sie mokul su oasr ke soko oak su wangin ikwik ka oasr in sie mwea pulkulak, sie met su inse luo fwa sa in kufusyukla ke kain in nunak lun metu su ekyek pal nukewa. Arlana fusrasr nu sin met inge in musalla lulalfongi lal oana soko oak musalla a el sis meta nu sin met saye ke ma upa su sikyak nu sel! (1 Timote 1:19) Mea kut ku in oru tu ma inge in tia sikyak nu sesr? Kut enenu in fokoko a “ku in lulalfongi.” (Ridi Kolosse 2:6, 7.) Kut fwin lungse in musai a ku in lulalfongi, kut enenu in lotela in oru sulela su akkalemye ke lulalfongi lasr ke Kas lun God. (2 Timote 3:14-17) Tusruktu, mea ku in kutongkuti in tia orala sulela mwomwo?

Efu Ku Upa in Oru Sulela

6. Fuka sangeng lasr sin met el ku in kufuskutla?

⁶ Sangeng ku in oru kut in tia orala kutena ma, saap kut sangeng in oru sulela tia mwo, kut sangeng in tia akpayeye ma se, ku kut sangeng ke sripen kut e fwa oana met lalfon nu sin met saye. Kut ku in kalem ke kain in nunak inge. Paye la wangin met lungse in oru sie sulela su tia mwo, su ku in orala fwako koluk a me akmwekin. Ne ouinge, lungse nu sin God a ke Kas lal ku in kasre kut in akwanginyela sangeng lasr. Ke inkanek puspus fuka? Lungse lasr nu sin God fwa akkeye kut in orekmakin, a in tuni akmwoye Kas lal pal nukewa a me rid nukewa su tuku ke Baibel meet liki kut oru sulela puspus lasr su yok sripe. Ke ma inge kut fwa aksrikyela ma tafongla su kut fwa ku in oru. Efu? Meyen Baibel el ku in “sang lalmetmet nu sin met nukin, nu sin met fwusr etauk a lalmetmet.”—Soakas 1:4.

7. Mea me srikasrak lal Togusra Devid el ku in luti nu sesr?

⁷ Ya kut fwa ku in oru sulela sumwos a mwo pal nukewa? Mo. Kut nukewa oru ma sito, a ma koluk. (Rom 3:23) Ke sie me pupulyuk, Togusra Devid el sie met lalmetmet a oaru. Tusruktu, oasr pal el oru sulela tia mwo su oru me keok nu sel sifwana a nu sin met puspus saye. (2 Samuel 12:9-12) Ne ouinge, Devid el tia lela ma sito lal in akmunasyel a kutongilye in oru sulela mwomwo lal su oasr me insemwomwo lun God. (1 Togusra 15:4, 5) Kut ku in oru sulela mwomwo fwinne kut orala ma sito in pal somla fwin, kut oana Devid, kut esam la Jeova el fwa tia loang akmwoye ke ma koluk lasr a el nunak munas ke ma koluk lasr. El fwa tafwela in sang kasru nu selos nukewa su lungsel a aksol.—Sam 51:1-4, 7-10.

8. Mea kut ku in lotela ke kas lal met sap Poul ke payuk ku marry?

⁸ Kut ku in aksrikyela me fosrnga lasr ke pal kut lungse in oru sulela puspus. Fuka? Kut fwin akilen la kutupal oasr inkanek sumwos puspus su kut ku in oru sulela lasr nu ka. Ke sie me pupulyuk, nunku ke inkanek mwo su Poul el akuteye ke sifwe se inge ke payuk. Ke kasru lun God el simusla kas inge: “A sie met fwin nunku el tia oru mwo ke sripen oiyen virgin lal, fwin el alukela tari ke yea lal su arlana upa kena koluk lun ikwel oana sie met fwusr, a fwin pa inge ma fwal in orek, lela nu sel in oru oana el lungse; el tia orek ma koluk. Lela lan mari. Tusruktu fwin kutena met el tu ku ke insiel, wangin enenu lal, a oasr ku lal in kutongye kena a lungse lal, a el papu insiel, tu lan liaung oiyen virgin lal a el tia mari, el oru mwo.” (1 Korint 7:36-38, NW) Poul el akkalemye la moul su tia payuk pa inkanek mwo emeet, tusruktu tia pa inge inkanek sefwanna su sumwos, oasr pa sulela saye.

9. Ya kut enenu in nunku yok la mea nunak lun met puspus saye ke sulela lasr? Akuteye.

⁹ Ya kut nunku yok la mea nunak lun met saye ke sulela su kut oru? Aok ke kutu oiya. Loang akmwoye ke ma Poul el fwak ke me mongo su saap kisekinyuk nu ke ma srulela. El akilen la sulela ka el tia koluk, tusruktu ma inge ku in akkolukye conscience ku ella munas lun sie met. Sulela fuka Poul el oru? El simusla: “Ke ma inge mongo fwin aktukulkulye ma lik, nga tia mongo ikwe nu tok ma patpat, tu nga in tia aktukulkulye ma lik.” (1 Korint 8:4-13) Kut enenu pa in nunku akmwoye la mea sulela lasr ku in oru nu sin met puspus saye. Paye la, kut nunku yok la mea sulela lasr ku in oru nu ke oiyen kawuk lasr nu sin Jeova. (Ridi Rom 14:1-4.) Me lutlut yok sripe fuka lun Baibel fwa kasre kut in oru sulela mwomwo su akfulatye God?

Inkanek Onkosr in Orala Sulela Mwomwo

10, 11. (a) Fuka kut ku in tia akkalemye oiyen fulang nu sin met nukewa ke sou? (b) Mea met elder elos enenu in esam ke pal se elos oru sulela ke congregation?

¹⁰ Fwasr liki oiyen fulang. Meet liki kut oru kutena sulela lasr, kut enenu in siyuk sesr sifwana, ‘Ya oasr ku luk in oru sulela se inge?’ Togusra Solomon el simusla: “Ke fulang tuku, na mekin tuku; a lalmetmet on yurin met fwokpap.”—Soakas 11:2.

¹¹ Papa a nine elos ku in lela tulik natulos in oru kutu sulela lalos, tusruktu tulik fwusr elos tia enenu in nunku mu oasr ku lalos in oru sulela fwinne papa a nine tia lela elos in oru. (Kolosse 3:20) Mutan payuk a nine puspus oasr ku lalos ke sou, tusruktu elos enenu in akilen la mokul tuma pa sifwen sou. (Soakas 1:8; 31:10-18; Efesus 5:23) Oayepa, mokul payuk nukewa elos enenu in akilen la oasr ku lalos tusruktu elos enenu pa in akpusiselyelos nu sin Kraist. (1 Korint 11:3) Met elder elos orala sulela lalos su ku in kasru congregation. Tusruktu, elos enenu in akpayeye la elos in “tia alukela liki ma simusla” ke Kas lun God. (1 Korint 4:6) Oayepa elos fwasr tokin kas in kolyuk su elos eis sin met kulansap oaru. (Mattu 24:45-47) Kut e fwa tia oru kut sifwana a met puspus saye in pulakin fosrnga a asor yok kut fwin inse pusisel in akilen la kut ku in oru sulela lasr fwin oasr ku lasr in oru ma inge.

12. (a) Efu ku kut enenu in oru research? (b) Akuteye ke inkanek mwo su sie met ku in oru research lal.

¹² Oru research. Solomon el simusla: “Nunak lun met alken kol na nu ke ma pus; a met e nu kemwa su sa, sa nu ke enenu mukena.” (Soakas 21:5) Ke sie me pupulyuk, ya kom nunku ke sie me lemlem in orek business? Lela pulakin lom in tia kufuskomla ka. Suk ke oiya paye nukewa ka, a ke kas in kasru sin met su oasr etauk lalos ka, a liye la akwuk mwomwo fuka lun Baibel ku in sang kasru nu ka. (Soakas 20:18) Ke kom oru research lom, kom in akola ma simusla luo, sie el akkalemye ke me insemwomwo su kom ku in eis ka, a sie el akkalemye ke ma tia mwo su ku in sikyak ka. Meet liki kom oru sulela lom, “oekla me mol in orek.” (Luk 14:28) Nunku la mea sulela lom ku in oru nu ke akwuk lom ke mani a ke fototo lom nu sin Jeova. Paye la pal a kafweang yok eneneyuk in oru research. Tusruktu kom fwin oru ma inge, kom e fwa fwasr liki in silaklak in oru sulela su ku in orala me fosrnga yok.

13. (a) Kas in mwulela fuka oasr in Jemes 1:5? (b) Fuka kafweang lasr in pre siyuk ke lalmetmet ku in kasre kut?

¹³ Pre siyuk ke lalmetmet. Sulela lasr e fwa akfulatye God kut fwin siyuk sel in kasre kut in oru ma inge. Met tuma lutlut Jemes el simusla: “A kutena sumwos fwin enenu in lalmetmet, lela lan siyuk sin God ka, el su ase nu sin met nu kemwa yokna, a el tia mulat; a a fwa sang nu sel.” (Jemes 1:5) Kut tia enenu in mwekin kut fwin fwak mu kut enenu lalmetmet su tuku sin God in kasre kut in oru sulela mwomwo. (Soakas 3:5, 6) Tusruktu, kut fwin fungfung ke etauk lasr sifwana ku in aktafongye kut in oru sulela. Ke kut pre a siyuk ke lalmetmet a suk ke akwuk mwomwo puspus ke Kas lun God, kut lela ku lun God in kasre kut in akilen nunak paye lasr paenang kut lungse in oru sie sulela ku orekma lasr.—Hibru 4:12; ridi Jemes 1:22-25.

14. Efu ku kut fwasr liki ke kain in oiya su arlana patla in oru sulela ku kutena orekma?

¹⁴ Oru sulela lasr. Lela kut in tia arlana sa in oru step se inge fwin kut soenna oru research a soenna pre ke lalmetmet. Sie met lalmetmet el orekmakin pal tu lan ‘arlana liaung fwufwasryesr lal.’ (Soakas 14:15) Tusruktu, lela kut in tia arlana patla a senunku in oru sulela. Sie met su senunku a patla in oru sulela pal nukewa el fwa fwak kain in sripe puspus ke el tia oru orekma ku sulela lal. (Soakas 22:13) Tusruktu el srakna oru sulela, ne ouinge el lela met puspus in kufusella in oru sulela lal.

15, 16. Mea ma eneneyuk in akpayeye sulela lasr?

¹⁵ Akpayeye sulela lasr. Kafweang lasr in oru sulela mwomwo e fwa wangin sripe kut fwin tia orekmakin a akpayeye ma inge. Solomon el simusla kas inge: “Kutena ma poum koneak in oru, oru ke ku lom.” (Ekklisiastis 9:10) Tu kut in eis me insemwomwo ka, kut enenu in inse mulala in orala akwuk mwomwo in orekmakin ku a pal lasr su eneneyuk in akpayeye sulela lasr. Ke sie me pupulyuk, sie publisher ke congregation saap el oru sulela lal in sroang nu ke orekma lun pioneer. Ya el fwa ku in akpayeye ma inge? El ku in akpayeye ma inge fwin el tia orekmakin ku a pal lal kewa nu ke orekma lal a me akengan, paenang wanginla pal lal in oru orekma lal in sulkakin peng mwo.

¹⁶ Tia ma fusrasr in akpayeye pal nukewa sulela mwo emeet lasr. Efu? Meyen “fwalu nufon oan ye ku lun met koluk se.” (1 Jon 5:19, NW) Kut enenu in lain pal nukewa leum in losr lun fwal se inge, a lain un lipufan koluk yen engyengu. (Efesus 6:12) Met sap Poul a met tuma lutlut Jud elos akkalemye la met nukewa su oru sulela lalos in akfulatye God fwa kafweang yok su oana sie ke orekmakin paulos nu ke meun.—1 Timote 6:12; Jud 3.

17. Ke sulela puspus su kut oru, mea Jeova el lungse kut in oru?

¹⁷ Sifwilpa kalweni sulela lasr a oru me aksumwos nu ka fwin eneneyuk. Oasr pal sulela lasr tia orek in fwal nu ke ma kut oakiye. Meyen “pal a ma sikyuk” su kut nukin ku in tuku nu sesr nukewa. (Ekklisiastis 9:11) Ne ouinge, Jeova el tupan kut in muteng in akpayeye kutu sulela lasr fwinne oasr ma upa puspus su sikyak nu sesr. Sulela lun sie met in mwulela moul lal nu sin Jeova, ku sulela lal in oru mwulela nu sin mutan ku mokul su el payuk nu se el tia ku in ekulla. God el lungse kut in akpayeye ke moul lasr sulela inge. (Ridi Sam 15:1, 2, 4.) Tusruktu, kutu sulela tia arlana yok sripe. Kais kutu pal, sie met lalmetmet el fwa sifwilpa tuni sulela su el orala. El fwa tia lela oiyen inse fulat ku likkeke in kutongilye in aksumwosye ku ekulla sie sulela su el orala tari. (Soakas 16:18) El enenu in nunku yok la fuka el ku in akpayeye la inkanek in moul lal srakna akfulatye Jeova.

Sang Akpa nu sin Met Puspus Elos in Oru Sulela su Akfulatye God

18. Fuka papa a nine elos ku in sang akpa nu sin tulik natulos in oru sulela mwomwo?

¹⁸ Papa a nine elos ku in kasru tulik nutulos ke inkanek yok in etu in oru sulela mwomwo su ku in akfulatye God. Sie me srikasrak mwomwo pa inkanek mwo emeet in luti tulik. (Luk 6:40) Ke pal mwomwo nukewa, papa a nine elos ku in akuteye nu sin tulik nutulos ke inkanek mwo su elos orekmakin ke pal se elos oru sulela lalos in pal somla. Saap elos lungse pa in lela tulik natulos in oru sulela nu selos sifwana a sang kas in kaksak nu selos fwin sulela lalos mwo. Na fuka fwin sie tulik el oru sulela su tia mwo? Saap ma sie papa ku nine el oru pa in kasru tulik natul liki fwako koluk nukewa lun sulela tia mwo lal, tusruktu tia pa inge inkanek mwo su orek nu sin tulik natulos. Ke sie me pupulyuk, saap sie papa el lela tulik natul in eis driver’s license lal. Fwin oasr pal tulik el kunausla masap in kasrusrkin sitosa a el enenu in sang me mol. Saap papa se el ku in molela molin kunausla masap. Tusruktu, fwin elos sapkin tulik natul elan orekma tu elan ku in molela molin kunausla masap, paye la el fwa lotela la oasr kunokon lal sifwana ke ma el oru.—Rom 13:4.

19. Mea kut enenu in luti nu sin met su kut oru lutlut lun Baibel nu se, a kut ku in oru fuka?

¹⁹ Jisus el fwak nu sin met tuma lutlut lal in luti met puspus saye. (Mattu 28:20) Sie ke me lutlut yok sripe emeet kut ku in luti nu sin met su kut luti ke Baibel pa ke inkanek mwo in oru sulela mwomwo. Tu kut in oru ma inge ke inkanek mwo, kut enenu in tia fwak nu selos la mea elos ku in oru. Arlana mwo kut fwin lutelos in orekmakin nunak lalos sifwana in nunku fwal nu ke akwuk mwomwo lun Baibel tu elos in ku in oru sulela lalos la mea elos fwa oru. Paye la “kais sie sesr fwa fwakak kel sifwana nu sin God.” (Rom 14:12) Aok, kut nukewa oasr sripe mwomwo lasr in oru kain in sulela puspus su akfulatye God.

[Footnote]

Kom E Topuk Fuka?

• Efu ku kut enenu in lutlutkin la fuka kut ku in oru sulela?

• Fuka sangeng ku in kufuskutla, a kut ku in akwanginyela fuka sangeng lasr?

• Inkanek onkosr fuka kut ku in oru in akpayeye la sulela nukewa lasr ku in akfulatye God?

[Box/Petsac ke sra 10]

Inkanek Puspus in Oru Sulela Mwomwo

1 Fwasr Liki Orekma in Fulang

2 Oru Research

3 Pre Siyuk ke Lalmetmet

4 Oru Sulela Lom

5 Akpayeye Sulela Lom

6 Sifwilpa Tuni Sulela Lom a Oru Me Aksumwos

[Petsac ke sra 9]

Sie met su inse luo el oana sie met su oasr ke soko oak su wangin ikwik ka su oan in mwea pulkulak