‘Fwako lun Ku lun God’ Sang Mwolana nu sin God

“Ma inge mwolana lun Papa tumuk, tu komwos in isus fwako puspus.”—JON 15:8.

1, 2. (a) Pal mwomwo fuka oasr yurosr in akkeye met puspus saye? (b) Me sang fuka su tuku sin Jeova akmwoye ku lasr in kulansap nu sel?

NUNKU akmwoye ke ma sikyuk luo inge: Sie mutan Kristian el akilen la sie sister fwusr el fosrngala ke ma se. El orala akwuk tu elan ku in welul ke orekma lun forfor. Ke elos sramsram inmasrlon loom puspus ke elos oru orekma lun forfor, sister fwusr se inge el mutawauk in fwak me fosrnga lal nu sel. Tokin tari forfor, mutan fwusr se inge el pre a el sang kulo nu sin Jeova ke kulang a lungse lun sister matu se inge; paye la pa inge ma el enenu na paye. Ke siepa an, siyanyen se el tufwana folokla liki orekma in luti ke mutunfwal saye. Ke sie tukeni, elos insemwomwo in srumon experience lalos, a oasr sie brother fwusr su oasr we el loang akmwoye ke ma elos fwak. Tokin yea puspus, ke met lili se inge el akola in som nu ke orekma in kulansap lal ke an saye, el esamak siyanyen se a ke me sramsram lalos su akkeye lungse lal in ekla sie missionary.

² Saap ma sikyuk inge akesmakinye kom ke sie met lili su sang me akkeye yok ke moul lom, ku ke sie met su kom akkeye. Aok, sramsram nu sin sie met ke pal sefwanna ku in sang me akkeye nu sin met inge ke kutupal na a tia ke pal nukewa, tusruktu kais sie len, oasr pal mwomwo lasr in akkeye met puspus saye. Srike lumala ke nunak la oasr ma se su ku in akmwoye ku lom a oiya mwomwo lom, tu kom ku in kasru brother a sister wiyom ke inkanek yok, a kom fwal in oru orekma puspus nu sin God. Paye la arlana mwo ma inge! Aok, Jeova el ase nu sesr me sang mwomwo se inge, pa ku lal. (Luk 11:13) Ke ku lun God orekma ke moul lasr, ma inge orala oiya mwomwo puspus in kut su ku in kasre kut in akmwoye oiya nukewa ke orekma in kulansap lasr nu sin God. Aok sie me sang mwomwo pa inge!—Ridi Galetia 5:22, 23.

3. (a) Fuka kafweang lasr in akkeye ke moul lasr ‘fwako lun ku lun God’ kaksakin God? (b) Kusensiyuk puspus fuka kut fwa nunku akmwoye ka?

³ Oiya mwomwo puspus su ku lun God orala el me akkalemyeyen oiya mwomwo lun Jeova God, su sropon ku inge. (Kolosse 3:9, 10) Jisus el akkalemye ke sripe se yok emeet paenang met Kristian nukewa elos enenu in kafweang in etawi God ke el fwak nu sin met tuma lutlut lal: “Ma inge mwolana lun Papa tumuk, tu komwos in isus fwako puspus.”a (Jon 15:8) Ke kut akkeye ‘fwako lun ku lun God,’ arlana kalem ma inge ke inkanek kut kaskas a ke orekma lasr; a oiya mwomwo inge sang kaksak a mwolana nu sin God lasr. (Mattu 5:16) Ke inkanek puspus fuka fwako lun ku lun God siena liki oiya ke fwal lun Setan? Kut ku in akkeye fuka ke moul lasr fwako lun ku lun God? Efu ku oasr pal kut ku in pulakin la upa in oru ouinge? Kut fwa nunku yok ke kusensiyuk nukewa inge ke kut lutlutkin fwako tolu inge lun ku lun God, pa lungse, engun, a misla.

Lungse Fwal nu ke Akwuk Fulat a Mwo

4. Kain in lungse fuka Jisus el luti nu sin met tuma lutlut lal in orekmakin ke moul lalos?

⁴ Lungse su oana fwako lun ku lun God el arlana kalem la ma inge tia oana sie ke kain in lungse su met lun fwalu akkalemye. Ke inkanek fuka? Ke sripen ma inge el fwal nu ke akwuk fulat a mwo. Jisus el akkalemye ke ma tia oana sie inge ke pal se el oru Me Sramsram fwin Eol. (Ridi Mattu 5:43-48.) Jisus el akilen la fwinne met koluk elos lungse pa in oru ma met puspus oru nu selos. Kain in “lungse” inge el tia akkalemye la sie met el sifwana lungse in oru mwo nu sin met saye, tusruktu el akkalemye ma inge ke sripen metu akkalemye ma inge meet nu sel. Kut fwin lungse in akpayeye la ‘kut tulik nutin Papa tumasr su in kosrao,’ kut enenu in siena liki met puspus. Kut kafweang in nunku a oru mwo nu sin met puspus saye in oana ke nunak lun Jeova nu selos a ke oiya su el akkalemye nu selos, a tia in akkalemye oiya oana ke met puspus saye elos akkalemye nu sesr. Tusruktu, fuka kut ku in lungse met lokwalok lasr, oana Jisus el sapkin nu sesr?

5. Fuka kut ku in akkalemye lungse nu sin met nukewa su kalyai kut?

⁵ Nunku akmwoye ke sie me srikasrak in Baibel. Ke Poul a Sailas elos oru orekma in luti in an Filippai, metu elos srunglultal upa, a siseltalang nu in prison, a kapriye nieltal ke me kapur. Ke pal se elos oasr in prison, elos akkolukyeyuk pa sin met liaung prison. Ke elos sukosokla ke sripen oasr kusrusr su sikyak, ya elos insemwomwo in suk foloksak nu sin met inge? Mo. Lungse paye a nunak mwomwo lalos nu sel, moklelos in kasrel, ke elos akkalemye inkanek mwomwo nu sin met liaung prison se inge a nu sin met nukewa ke sou lal in ekla met lulalfongi. (Orekma 16:19-34) Oasr brother puspus wiyesr in pal inge elos fwasr tokin inkanek sepana inge in “akinsemwomwoyelos su kalyaelos.”—Rom 12:14.

6. Ke inkanek puspus fuka kut ku in akkalemye lungse paye nu sin met lili wiyesr?

⁶ Lungse lasr nu sin met lili wiyesr ku in oru ma se su arlana yok sripe. “Fwal nu sesr in filiye moul lasr ke met lili.” (Ridi 1 Jon 3:16-18.) Tusruktu, kut ku in akkalemye lungse ke inkanek srisrik pal nukewa. Ke sie me pupulyuk, kut fwin fwak ku oru ma se su aktoasrye met lili, kut ku in akkalemye lungse ke kut kafweang in folokonma misla. (Mattu 5:23, 24) A fuka fwin sie met el aktoasrye kut? Ya kut “lungse in nunak munas,” ku kutupal kut srukye mulat ke insiesr? (Sam 86:5) Lungse paye su tuku ke ku lun God ku in kasre kut in afwunye ma koluk, a nunak munas nu sin sie sin sie, “oana Leum [Jeova] el nunak munas” nu sesr.—Kolosse 3:13, 14; 1 Piter 4:8.

7, 8. (a) Fuka lungse nu sin God sang kasru nu ke lungse lasr nu sin metu? (b) Fuka kut ku in akyokye lungse lasr nu sin Jeova? (Srike liye me pupulyuk ten.)

⁷ Fuka kut ku in akkeye lungse paye nu sin met lili wiyesr? Ke kut akyokye lungse lasr nu sin God. (Efesus 5:1, 2; 1 Jon 4:9-11, 20, 21) Pal su kut orekmakin nu sin Jeova ke kut rid Baibel, sifwilpa nunku ka, a pre akkeye kut a akyokye lungse lasr nu sin Papa tumasr in kosrao. Tusruktu, kut enenu in molela pal in fototo nu sin God.

⁸ In pupulyukkin ma inge: Srike lumala ke nunak lom la kom ku in rid Kas lun God, sifwilpa nunku ka, a pre nu sin Jeova ke lusen sie pal kais sie len. Ya kom kafweang in karungin pal inge tu wangin kutena me kutong ke pal lom sifwana nu sin Jeova? Aok, wangin met ku in kutongye sramsram lasr nu sin God ke pre, a pus in masrlosr ku in rid Baibel pal nukewa kut lungse in oru. Ne ouinge, saap kut enenu in orala akwuk mwomwo in tia lela kain in orekma lasr ke len nukewa in tia tulokinye pal lasr sifwana nu sin God. Ya kom molela pal fwal kais sie len a orekmakin ma inge in kasre kom in fototo nu sin Jeova?

‘Engun su Tuku ke Ku lun God’

9. Mea oiya mwomwo lun engun su tuku ke ku lun God?

⁹ Sie ma mwomwo ke fwako lun ku lun God pa ma inge tia na ekla a ku in oan in kut fwinne oasr ma upa puspus. Engun, su fwako akluo lun ku lun God, su kut fwa lutlutkin, el sang me pupulyuk nu ke oiya su oan in kut fwinne oasr ma upa. Engun el pupulyukkin nu ke sak na fokoko su ku in kapak mwo fwinne ke an a pal koluk. Fwin fwalu nufon, met kulansap puspus lun God elos ‘eis tari kas, in keok lulap, wi engun su tuku ke ku lun God.’ (1 Tessalonika 1:6) Met puspus saye elos sun ma upa puspus. Tusruktu, Jeova el akkeyelos ke inkanek lun ku lal tu elos ‘ku in mutangla ma nukewa ke mongfusrasr, a elos in engun.’ (Kolosse 1:11, New Kosraean Version) Mea sropon engun inge?

10. Mea sropon engun lasr?

¹⁰ Tia oana ke “me kasrup” lun fwal lal Setan, ma saok su Jeova el ase nu sesr oan nu tok. (1 Timote 6:17; Mattu 6:19, 20) El akkalemye nu sesr fwinsrak ke engun yok ke pal fwasru su tia ku in wanginla. Oasr engun yok lasr meyen kut wi ke u lun met lili fwin fwalu nufon. Yok liki nukewa, engun lasr el oakiyuki ke fototo lasr nu sin God. Kut pulakin pa oana ke ma Devid el pula in pal meeta, su fwinne el moulkin moul lun sie met kaeng, el kaksakin Jeova ke inkanek lun on, a fwak: “Tu lungkulang lom mwo liki moul, ngoasrok fwa kaksakin kom. Ou inge nga fwa kulo nu sum ke nga moul.” (Sam 63:3, 4) Fwinne kut pulakin ma upa puspus, me kaksak nu sin God wi engun yok sesesla insiesr.

11. Efu ku arlana yok sripe kut in kulansapu Jeova ke engun?

¹¹ Met sap Poul el kaifwe met Kristian nukewa: “Engun in Leum pal e nukewa. A nga sifwil fwak, Engunak!” (Filippai 4:4) Efu ku arlana yok sripe nu sin met Kristian nukewa in akpayeye orekma in kulansap lalos nu sin Jeova ke engun? Ke sripen kas kikiap su Setan el akkalemye su lain sumwos lun Jeova in kol. Setan el fwak mu wangin kutena met kulansapu God ke sripen inse paye lalos nu sel. (Job 1:9-11) Kut fwin kulansapu Jeova ke sripen kut enenu in oru meyen ma kunesr pa orekma inge tusruktu kut tia engun, orekma lasr inge in sang kaksak nu sel el tia fwal a tia mwo. Ke ma inge kut kafweang in porongo kas in kaifwe lun met sim lun sam: “Kulansupu Jeova ke engun. Komwos in tuku nu yen mutal ke on.” (Sam 100:2) Orekma in kulansap su orek ke engun a inse mulala akfulatye God.

12, 13. Mea kut ku in oru in aksumwosye nunak tia mwo?

¹² Tusruktu, paye la, fwinne met kulansap paye lun Jeova elos ku pa in pulakin asor yok ke kais kutu pal a upa nu selos in akkalemye sie nunak mwomwo pal nukewa. (Filippai 2:25-30) Mea ku in kasre kut ke kain in pal inge? Kas lun God el akkalemye: “Komwos in tingtinginu ke ku lun God, in kaskas nu sin sie sin sie in sam a on a onkakin on in kaksak nu sin God, a onkakin on nu sumwos sifwana ke insiomwos nu sin Jeova.” (Efesus 5: 18, 19, NW) Fuka kut ku in orekmakin kas in kasru inge?

¹³ Kut fwin pulakin kain in nunak tia mwo, kut ku in siyuk Jeova ke inkanek lun pre a kafweang in sifwilpa nunku ke ma mwomwo puspus. (Ridi Filippai 4:6-9.) Kutu met lili elos koneak la alullul ke insielos wi recording ke on in kaksak nu sin Jeova akkeyelos a kasrelos in akmwoye nunak lalos. Sie brother su sun me keok el pulakin toasr a asor yok pal nukewa, el esamak: “Nga pre pal nukewa nu sin God ke inse paye luk, sayen ma inge nga kafweang in lutlut ke kutu on in kaksak nu sin Jeova God a oru ma inge in oan ke nunak luk. Ma inge use inse misla in onkin on in kaksak kato inge nu sin Jeova ke pusra yok ku ke pusra srisrik su nga mukena long. Ouyepa, buk se inge Akfototoye Kom nu sin Jeova, ke kas English orekla tari in pal san. Nga ridi ma inge pal luo ke lusen yea se toko. Ma inge el oru ngan pulakin inse misla. Nga etu la Jeova el akinsemwomwoye kafweang luk.”

“Me Kapur lun Misla”

14. Mea sie oiya su sikyak ke sripen misla su fwako lun ku lun God?

¹⁴ Ke toeni lulap nukewa lasr su met lili liki mutunfwal puspus wi ka, met lili su tuku ke kain in sruf a an saye elos engunkin asrouki nu sin brother a sister puspus wiyesr. Kain in ma sikyuk inge akkalemye ke oiyen misla su engunkin sin met kulansap lun God ke pal inge, aok inse sefwanna fwin fwalu nufon. Met puspus su liye ouinge elos lut na paye ke pal se elos liye un met inge su elos nunku mu oasr srunga sie sin sie, tusruktu met inge elos ‘moniyuk in karunganang inse sefwanna lalos ke me kapur lun misla.’ (Efesus 4:3) Kain in inse sefwanna inge arlana mwo a kalem na paye yokna kut fwin nunku ke kain in oiya puspus su met lili elos kutangla liki.

15, 16. (a) Mea oiya a nunak lal Piter ke met sa nukewa in pal meet, a ma inge oru ma upa fuka nu sel? (b) Fuka Jeova el kasrel Piter in aksumwosye nunak a oiyel?

¹⁵ Paye la upa in oru kain in met lun mutunfwal puspus su tuku ke kain in oiye puspus in oasr inse sefwanna lalos. In kasre kut in eis etauk ke ma puspus su kut enenu in kutangla liki in oasr inse sefwanna inge, lela kut in nunku ke sie me srikasrak in century se meet, el pa met sap Piter. Nunak lal nu sin met puspus su tia met Ju ku in liyeyuk ke kas lal inge: “Komwos sifwana etu fuka ma sufwal ke sie met Ju tu lan aenguni ku fwasr nu yurin met in siena mutanfwal; a God el fwakak nu sik tu ngan tia pangon kutena met ma oul ku tia nasnas.” (Orekma 10:24-29; 11:1-3) In fwal nu ke nunak lun met puspus in pal san, kalem la Piter el matula a lulalfongi la Masap kaifwel in lungse met Ju mukena. Kalem la ke nunak lal tia koluk in nunku ke met pegan oana met lokwalok su srungeyukla.b

¹⁶ Srike nunku ke pulakin lal Piter ke el utyuk nu in loom sel Kornilius. Ya met se inge su oasr nunak tia mwo ke met pegan el ku in “fwal a toeni nu sie” nu selos “ke me kapur lun misla”? (Efesus 4:3, 16) Aok, len ekasr meet liki pal san, ku lun God ikasla insiel Piter a kasrel in mutawauk in aksumwosye nunak lal ka a in akwanginyela srisri. Ke inkanek lun sie aruruma, Jeova el akkalemye kalem nu sel la nunak lun God ke metu pa elos oana sie fwinne siena sruf a mutunfwal selos. (Orekma 10:10-15) Ke ma inge Piter el ku in fwak nu sel Kornilius: “Paye nga liye tu God El tia sulosol met, a in mutanfwal e nu kemwa el su sangeng sel, a oru ma sumwosmwos, el akinsemwomwoyel.” (Orekma 10:34, 35) Piter el ekulla oiyel, a el lungse na paye in inse sefwanna yurin ‘u lun met lili nukewa.’—1 Piter 2:17.

17. Ke inkanek fuka inse sefwanna su engunkin sin met kulansap nukewa lun God arlana kalem ke pal inge?

¹⁷ Ma sikyak se inge nu sel Piter kasre kut in etu a aksaokye ma ekla lulap su sikyak inmasrlon met kulansap nukewa lun God ke pal inge. (Ridi Isaia 2:3, 4.) Million puspus sin met “sin mutunfwal nukewa, a sin sruf nu kemwa, a fwil nu kemwa, a loa nu kemwa” elos aksumwosye nunak lalos in akfwalye nu ke ma “lungse lun God, su mwo a me akinsemwomwo.” (Fwakyuk 7:9; Rom 12:2) Met puspus inge in pal meet elos kufusyukla ke oiyen srunga, lokwalok, srisri a wangin inse sefwanna ke fwal lal Setan. Tusruktu ke inkanek lun lutlut ke Kas lun God a ke kasru lun ku lal, elos etauk ke inkanek mwo in “fwasr tukin ma orala misla.” (Rom 14:19) Inse sefwanna su tuku ka sang kaksak nu sin God.

18, 19. (a) Fuka kais sie sesr ku in akkeye misla a inse sefwanna lun congregation? (b) Mea kut fwa lutlutkin ke me lutlut toko?

¹⁸ Fuka kais sie sesr ku in sang kasru in akkeye misla a inse sefwanna su oasr inmasrlon met nukewa lun God? Ke congregation puspus oasr kain in met su tuku liki mutunfwal saye. Kutu selos siena oiya a fasin lalos, ku elos tia arla etu in kaskaskin kas lasr. Ya kut kafweang in etalos na paye? Pa inge inkanek mwomwo su Kas lun God kaifwe kut in oru. Ke pal se Poul el simusla nu sin congregation in an Rom, su oasr met Ju a met saye puspus su wi ka, el akkalemye kas inge: “Komwos in eis sie sin sie, aok, oana Kraist el ouyepa eis komwos, nu ke mwolana lun God.” (Rom 15:7) Ya oasr met lili ke congregation lom su kom ku in etu na paye?

¹⁹ Mea pa kut ku in oru in lela ku lun God in orekma ke moul lasr? Me lutlut toko fwa sang me top mwo nu ke kusensiyuk se inge ke kut lutlutkin kutupa fwako lun ku lun God.

[Footnote]

Kom E Topuk Fuka?

• Kut ku in akkalemye fuka lungse paye nu sin met lili wiyesr?

• Efu ku yok sripe kut in akpayeye orekma in kulansap lasr nu sin God wi engun yok lasr?

• Fuka kut ku in akkeye misla a inse sefwanna lun congregation?

[Petsac ke sra 13]

Ya kom molela pal ke kais sie len a orekmakin pal inge in akfototoye kom nu sin Jeova?