Oru in Sun Insien sie Tulik
YA KOM pulakin asor fwin liyeyuk sie tulik el sritelkin me sritel su orekla nu ke meun? Ma sikyuk inge arulana pengpeng fwinne in masrlon tulik su arulanu fwusr, ke sripen orekma sulallel el oasr pa ke me akengun lun fwalu. Fuka kom ku in kasru sie tulik in pwarkin me sritel su ku in orala misla a tia me sritel su orekla nu ke me meun? Waltraud, sie missionary lun Met Lo lun Jeova ke lusen pal loeloes el muta in an Africa, a el koneak sie inkanek su ku in kasru tulik mokul se in oru oinge.
Ke sripen meun, Waltraud el enenu in som liki mutanfwal se su el muta we a som nu ke siepa mutanfwal fwin an Africa. Ke an se inge el mutamwauk in oru lutlut Baibel lal nu sin nine se kiyen sie tulik mokul su yea limekosr matwe. Pal nukemwa ke el muteta nu yurin nine se inge, tulik mokul se natul inge lungse in sritelkin sie likesik plastic srisrik, ke sripen pa inge me sritel sefwanna oasr yurol. Waltraud el tiana loang in liyel fwin el likaskiya kutena ma, tusruktu tulik mokul se inge el kafofo pal nukemwa in ikasla liye a kaliye likesik sa, a liye fwin el sang sot nu ka.
Waltraud el siyuk sin tulik mokul sa: “Werner, Ya kom etu la efu ku Nga muta ke mutanfwal sum? Sripa u pa ma ke sripen meun—Nga enenu in kaengla liki mutanfwal sik ke sripen met koluk su lungse in likaskiya metu ke likesik su oana likesik se nutum ingan. Kom nunku mu oiya se inge in orekmakin likesik el mwo?”
“Mo, tia mwo,” Werner el asor ke el topuk.
“Paye sum,” Waltraud el fwak. El siyuk: “Ya kom etu la efu ku Nga muteta nu yurum a nu yurin nine kiyom ke kais sie wik? Meyen Met Lo lun Jeova elos lungse in kasru met puspus in engankin misla, in oasr futoto mwomwo nu sin God a nu sin met tulan lalos.” Ke sripen insese lun nine kiyel Werner, Waltraud el fwak nu sel: “Fwin kom use nu sik likesik nutum, Nga fwa sisla ma inge, a Nga mwulela nu sum la kom fwa eis sie sitosa toy su oasr wil akosr ka.”
Werner el sang nu sel likesik toy lal. El enenu in sano nu ke wik akosr, tokin ma inge el fwa eis toy sasu natul—sie toy truck su orekla ke sak, su ke el eis el arulana engun na paye.
Ya kom sang pal in sramsram nu sin tulik nutum, in srike in sun insiyelos tu elos fwa lungse in sisla me sritel toy nu kemwa su orekla in oana kofwen me meun? Fwin oinge, kom oakiya sie me srikasrak su fwa akinsemwomwoyelos ke lusen moul lalos.