Sie Inkanek In Karungin Ma Puspus Nu Ke Akpayeyen Akwuk Lun God

“[God] el oru ma nu kemwa oana papu in lungse Lal.”​—EFESUS 1:11.

1. Efu ku congregation nukemwa lun Met Lo lun Jeova elos fwa oru toeni lalos ke len ak 12 ke malem lun April, 2006?

KE EKUN Wednesday, April 12, 2006, oasr million 16 kutu sin met fwa wi ke sie toeni in akfulatye Mongo in Eku lun Leum. Ke kais sie an in toeni lalos, e fwa oasr bred su tia pulol, su lumeyuk nu ke monin Kraist, a wain srusra, su lumeyuk nu ke sral su aksuroryeyukla, e fwa akkalemyeyuk ke sie tepu. Apkurun nu ke saflaiyen me sramsram su aketeye ke kalmeyen Me Esmakin nu ke mise lal Jisus, oasr me akul luo​—su fwa kitakatla nu sin met nukemwa su wi ke toeni inge, ma se meet pa ke bred, a tokin ma inge wain. Ke kutu congregation lun Met Lo lun Jeova, ku in oasr met se ku pus liki fwa wi kang bred a nim wain. Tusruktu, ke congregation puspus, wangin fwinne sie met fwa wi ipeis ke me akul inge. Efu ku kutu na sin met Kristian, su oasr fwinsrak nu in kosrao, fwa wi ipeis ke bred a wain, tusruktu pus selos, su oasr fwinsrak in muta ma patpat fwin fwalu, elos tia wi kang bred a nim wain?

2, 3. (a) Fuka Jeova el orala ma puspus fwal nu ke akwuk lal? (b) Jeova el orala fwalu a metu nu ke akwuk fuka?

² Jeova el sie God su oasr akwuk mwomwo lal. In akpayeye akwuk lal, el “oru ma nu kemwa oana papu in lungse Lal.” (Efesus 1:11) El orala meet Mwen sefwanna isusla natul. (Jon 1:1, 14; Fwakyuk 3:14) Tokin ma inge, ke inkanek lun Mwen natul, Jeova el orala sie sou in ngun a el orala pa ma puspus in kosrao, wekunang fwalu a metu.​—Job 38:4, 7; Sam 103:19-21; Jon 1:2, 3; Kolosse 1:15, 16.

³ Jeova el tia orala fwalu in oana an in me srike nu sin met nukemwa in akyokye sou lun mwen natul in ngun nukemwa in kosrao, oana ma alu nukemwa lun Kristendom elos luti. Oasr akwuk lal in orala fwalu, pa tu “met in muta we.” (Isaia 45:18) God el orala fwalu nu sin metu a sang nu selos in muta fwin fwalu. (Sam 115:16) Fwalu nu fon fwa ekla nu ke sie paredais, sesesla ke met sumwosmwos, su ku in orala ma inge in kato a ku in karungin ma inge. Fwinsrak in som nu in kosrao ke saflaiye tia na akkalemyeyuk nu sin siyanyen se meet.​—Genesis 1:26-28; 2:7, 8, 15.

Akwuk lun Jeova Lainyuk

4. Fuka inkanek lun Jeova in kol lainyuk ke mutamweyen me sramsram lun metu?

⁴ Sie sin mwen nutin God in ngun el lainul a mutamwauk in akpayeye nunak koluk lal in tulokinye ku kunausla akwuk lun Jeova, el orekmakin sukosok lal oana me sang lun God ke inkanek koluk. El kunausla misla su pulakinyuk sin met nukemwa su akkalemye oiyen pusisel nu ke kolyuk sumwosmwoslanu lun Jeova. Setan el kol siyanyen se meet elos in mutamwauk ke sie inkanek su suk in sukosokla liki God. (Genesis 3:1-6) El akilen a tia pilesru ku lun Jeova, tusruktu el lain inkanek Lun God in oru kolyuk lal a ke ma inge el lain sumwos Lal in kol. Ke ma inge, oasr kusensiyuk nu ke sumwos lun Jeova in kol sin Setan nu fwin fwalu, ke mutamweyen me sramsram lun metu.

5. Kain in nunak in alolo fuka orek, a ma inge orek nu sin su?

⁵ In wekunang nu ke kusensiyuk ku nunak in alolo se meet ke sumwos lun Jeova in kol pa nunak alolo akluo su Setan el akkalemye in len lal Job. Setan el akkalemye nunak in alolo nu ke lungse lun ma orekla puspus lun Jeova in aksol a kulansupal. Setan el fwak mu elos oru ma inge ke sripen oasr ma elos ku in eis ka a fwin srifweyuk elos, elos fwa forla liki God. (Job 1:7-11; 2:4, 5) Fwinne nunak alolo inge orek nu sin sie met kulansap lun Jeova fwin fwalu, ma inge orek pa nu sin mwen nukemwa nutin God in ngun, a wekunang pa Mwen sefwanna isusla nutin Jeova.

6. Fuka Jeova el akpayeye la el oaru nu ke akwuk lal a nu ke in el?

⁶ Ke sripen el oaru nu ke akwuk lal a nu ke kalmeyen in el, paenang Jeova el orala nu sel sifwana in ekla oana sie Met Palu a Met Molela.a El fwakak nu sel Setan: “A nga fwa filiye srunga inmasrlom a mutan se inge, a inmasrlon fute lom a fute lal. El fwa kunausla sifwom, a kom fwa kunausla kapinniel.” (Genesis 3:15) Ke inkanek lun Fute lun “mutan” kiyel, ku u lal in kosrao, Jeova el fwa sang me top nu ke orekma in lain lal Setan a sang fwinsrak ke molela a moul nu sin tulik nukemwa natul Adam.​—Rom 5:21; Galetia 4:26, 31.

“Ma Lukma in Lungse Lal”

7. Akwuk fuka Jeova el akkalemye ke inkanek lal met sap Poul?

⁷ Ke leta lal nu sin met Kristian in an Efesus, met sap Poul el aketeye ke inkanek mwo su Jeova el oru nu ke ma puspus in akpayeye akwuk lal. Poul el simusla: “A fwakak nu sesr ma lukma in lungse Lal. Fwal nu ke nunuk mwo Lal, Su El pu in El nu ke orekma Lal in pal fwal, tu Lan esani nu sie ma nu kemwa in Kraist, ma on lung, a ma on fwalu.” (Efesus 1:9, 10) Akwuk mwolana lun Jeova pa in oru kosrao a fwalu su oasr ma orekla puspus ka in akpusiselyelos sifwana nu ke kolyuk sumwosmwos lal. (Fwakyuk 4:11) In el fwa akmutalyeyuk, su akpayeyuk tari la Setan el kikiap, a ma lungse lun God fwa akpayeyuk “oana in kosrao, oinge fwin fwalu.”​—Mattu 6:10.

⁸ “Me akinsemwomwoye a mwo” nu sin Jeova, ku akwuk lal, fwa akpayeyuk ke inkanek lun “sie orekma in karungin ma puspus” ku inkanek su el orekmakin in akpayeye akwuk lal. Poul el orekmakin sie kas su akkalemye kalme paye nu ke “orekma in karunganang loomu.” El sramsramkin, tia ke sie guferment, oana Togusrai lun Messaia, a el sramsramkin kas inge nu ke inkanek in karunganang ma puspus.b Oasr ma se su weang nu ke inkanek mwolana su Jeova el fwa oru nu ke ma puspus in akpayeye akwuk lal, su ma se inge pa sie “ma lukma” su fwa akkalemyeyuk kais kutu srisrik ke century ku yea puspus somla.​—Efesus 1:10; 3:9.

9. Fuka Jeova el akkalemye kais kutu srisrik ma lukma ke ma lungse lal?

⁹ Ke inkanek in mwuleang puspus, Jeova el akkalemye kais kutu srisrik ke akwuk lal nu ke Fute su mwuleyukla in imae Eden su fwa akpayeyuk. Mwuleang lun Jeova nu sel Ebream akkalemye la mwolela lal ke Fute fwa tuku ke sruf lal Ebream a pa inge inkanek se su “mutanfwal nukemwa fwin fwalu” fwa akinsemwomwoyelos sifwana ka. Mwuleang se inge akkalemyeyuk pa la oasr kutu met su fwa wi pa ke Fute se inge. (Genesis 22:17, 18) Mwuleang ke Masap su orekla nu sin met Israel in ikwe el akkalemye akwuk lun Jeova in oasr “sie togusrai lun met tol.” (Exodus 19:5, 6) Mwuleang nu sel Devid akkalemye la oasr Fute se su fwa Sifwen sie Togusrai nu tok ma patpat. (2 Samuel 7:12, 13; Sam 89:3, 4) Ke pal se mwuleang ke Masap el kol met Ju nu sin Messaia, Jeova el akkalemye kutupa me akpayeye nu ke akwuk lal. (Galetia 3:19, 24) Met puspus su fwa wi ke fute se meet inge fwa orala “togusrai lun met tol” su palyeyuk tari a utukla nu ke “sie mwuleang sasu” oana “Israel’ sasu, sie mutanfwal sasu in ngun.​—Jeremaia 31:31-34; Hibru 8:7-9.c

10, 11. (a) Ke inkanek fuka Jeova el akkalemye Fute se su palyeyuk tari? (b) Efu ku Mwen sefwanna isusla nutin Jeova tuku nu fwalu?

¹⁰ In akpayeye orekma in karunganang akwuk lun God, nu ke pal se Fute se su palyeyuk tari el tuku nu fwin fwalu. Jeova el supwelma lipufon Gabriel in fwakak nu sel Meri la el fwa oswela sie mwen su fwa pangpang Jisus. Lipufon sa fwak nu sel: “A el tufwa fulat a fwa pangpang El Mwen nutin El su fulat liki nu kemwa; a Leum God fwa sang nu sel tron lal Devid papa tumal, a el fwa leum fwin loom sel Jekob ma patpat, a wangin saflaiyen togusrai lal.” (Luk 1:32, 33) Paenang Fute se inge su mwuleyukla akkalemyeyuk.​—Galetia 3:16; 4:4.

¹¹ Mwen sefwanna isusla nutin Jeova el fwa tuku nu fwalu a fwa srifeyuk ke inkanek yok. Inkanek in moul lal Jisus e fwa sang me top mwo emeet nu ke kusensiyuk ku kas in alolo lal Setan. Ya el fwa sruokye oaru lal nu sin Papa tumal? Wekunang ma inge pa sie ma lukma lun God. Tok kutu met sap Poul el aketeye kunokon lal Jisus: “Tu yokna ma lukma in orekma lun God: ‘El fwa fwakyuk in ikwe aksumwosyeyuk in ngun, lipufon elos liyel, fwakyuk inmasrlon mutanfwalu, met fwalu elos lulalfongel, utkyak nu in mwolena.’” (1 Timote 3:16) Aok, oaru lal su tia ekyek nu ke mise, Jisus el sang sie me top mwo nu ke kas kikiap lal Setan. Tusruktu ma puspus saye nu ke ma lukma inge lun God soenna akkalemyeyuk in pal sa.

“Ma Lukma ke Togusrai lun God”

12, 13. (a) WMea sie ipen “ma lukma ke togusrai lun God”? (b) Mea weang nu ke orekma lun Jeova in sulela sie u srisrik lun met su fwa som nu in kosrao?

¹² Ke sie pal in fwufwasryesr lal Jisus nu in an Galili in luti peng mwo, el akkalemye la ma lukma el weang nu ke guferment lun Togusrai lun Messaia. El fwak nu sin met tuma lutlut lal: “Etukot nu sumwos in etu ma lukma lun togusrai in kosrao [“togusrai lun God,” Mark 4:11].” (Mattu 13:11) Wekunang nu ke ma lukma se inge pa orekma lun Jeova in srela sie “u srisrik” lun met 144,000 in wi Mwen natul oana ipen Fute sa, in welul kol in kosrao.​—Luk 12:32; Fwakyuk 14:1, 4.

¹³ Ke sripen metu orekla in muta fwin fwalu, oasr kutu sin met elos fwa som nu in kosrao su kalmeye nu sin Jeova pa el enenu in orala “sie ma orekla sasu.” (2 Korint 5:17) Met sap Piter su sie selos su suleyukla a fwinsrak in moul in kosrao, el simusla: “Insemwomwo God Papa tumun Leum lasr Jisus Kraist, Su oana ke pakoten lulap Lal sifwil oswekutla nu ke fwinsrak lun moul ke sifwil moulyuk lun Jisus Kraist liki mise, nu ke usru su tia ku in kulamwi, a tia kolukla, a tia ku in efla, lemla nu sumwos in kosrao.”​—1 Piter 1:3, 4.

14. (a) Fuka tu met puspus su tia met Ju elos weang nu ke “ma lukma lun togusrai lun God”? (b) Efu kut ku in etu “ma loal lun God”?

¹⁴ Siepa ip nu ke ma lukma lun God ke kolyuk lun Togusrai ke pal fwasru pa ke ma lungse lun God in eis kutu met su tia met Ju nu ke u srisrik lun met su fwa pangonyuk in welul Kraist in kol in kosrao. Poul el aketeye ma se inge ke “orekma in karungin” lun Jeova, ku inkanek lal in liaung me akpayeyen akwuk lal: “Su in fwil meeta tia akkalemyeyuk nu sin tulik nutin met, oana fwakyuk inge nu sin met sap mutal lal a met palu in ngun; pa inge, tu met pegan elos met usru yurolos, a mano siefwunnu, a met ipeis in mwuleung lun Kraist ke mwosasu.” (Efesus 3:5, 6) Etauk nu ke kutu ip lun ma lukma lun God akkalemyeyuk nu sin “met sap mutal.” Oapana ke pal inge, fwin tia ke kasru lun ngun mutal, kut fwa tia etu “ma loal lun God” inge.​—1 Korint 2:10; 4:1; Kolosse 1:26, 27.

15, 16. Efu ku Jeova el sulela kutu met in welul Kraist in oana met kol?

¹⁵ “Met siofok angngoul akosr tausen” su liyeyuk yurin “Lam” fwin Eol Saion in kosrao su “moliyukla tari liki fwalu,” a “moliyukla tari liki metu, tu elos fwako se meet nu sin God a nu sin Lam,” Jisus Kraist. (Fwakyuk 14:1-4) Jeova el sulela sie sin mwen natul in kosrao in ekla ip se meet nu ke Fute su mwoleyukla ke imae Eden, tusruktu efu ku el sulela met puspus in welul Kraist liki metu? Met sap Poul el aketeye la u srisrik inge “pangonyuk fwal nu ke papu Lal [Jeova],” a “fwal nu ke nunak mwo in lung Lal.”​—Rom 8:17, 28-30; Efesus 1:5, 11; 2 Timote 1:9.

¹⁶ Akwuk lun Jeova pa in akmutalye in el su yoklanu a mutal a in akmutalye sumwos lal in kol in kosrao a fwalu. Ke inkanek in “orekma lal in karungin ma puspus,” ku inkanek lal in liaung ma puspus, Jeova el supwema Mwen sefwanna isusla natul nu fwalu, a ke el tuku nu fwalu el srifeyuk ne ke el mise. Sayen ma inge, El lungse la kutu sin met su akpayeye la elos oaru pa nu ke kolyuk Lal nu ke mise elos ku in wi nu ke kolyuk lun Togusrai lun Messaia, Mwen Natul.​—Efesus 1:8-12; Fwakyuk 2:10, 11.

17. Efu kut ku in insemwomwo ka la Kraist a met kol puspus su welul elos moul fwin fwalu oana met meet liki elos som nu in kosrao?

¹⁷ Jeova el akkalemye lungse yok lal nu sin tulik nukemwa natul Edam ke el supwema mwen natul nu fwalu a ke el sulela kutu met su fwa wi Mwen natul oana met usru a met kol puspus ke Togusrai lun Kraist. Fuka akwuk inge ku in akinsemwomwoye met puspus su akpayeye la elos oaru nu sin Jeova, mutamwauk in pal lal Ebel fwasru ne ke pal inge? Ke sripen met sesumwos nukemwa elos sruo ye ma koluk a mise, paenang elos enenu in akkeyeyuk ke ngun a ikwe a enenu in kasreyuk in ekla met sumwosmwos, in fwal nu ke akwuk lun Jeova nu sin met ke mutamwauk me. (Rom 5:12) Sie me akkeye pa inge nu selos nukemwa su ngetla nu ke moul ma patpat fwin fwalu in etu la Togusra lalos el fwa akkalemye lungse a kulang oana ma el akkalemye tari nu sin met tuma lutlut nukemwa ke pal se el oasr fwin fwalu! (Mattu 11:28, 29; Hibru 2:17, 18; 4:15; 7:25, 26) A sie me akkeye nu selos in etu la met puspus su fwa welul Kraist in kulansap oana togusra a met tol in kosrao pa mokul puspus a mutan puspus su oasr lulalfongi lalos in pulakin pa me munas puspus a sun pa ma upa puspus lun moul, oana kut!​—Rom 7:21-25.

Akwuk lun Jeova su Tia Ku in Tafongla

18, 19. Efu ku kas lal Poul in Efesus 1:8-11 kalem nu sesr ke pal inge liki meeta, a mea fwa aketeyuki ke me lutlut toko?

¹⁸ Oasr kalem mwo lasr ingena ke kalmeyen kas lal Poul nu sin met Kristian akmusrala, su simusyukla in Efesus 1:8-11. El fwak la Jeova el akkalemye nu selos “ma lukma in lungse lal,” la elos “orekla sie me usrui” yurin Kraist, a elos “srusrngiyuki meet fwal nu ke nunuk lal su oru ma nukemwa oana papu in lungse lal.” Kut kalem ka la ma inge fwal nu ke “orekma in liaung ku kolyuk” mwolana lun Jeova nu ke ma puspus su akpayeyuk nu ke akwuk lal. Ma inge kasre kut pa in etu la efu ku supus pisen met Kristian su wi ke akfulatyeyen Mongo in Eku lun Leum in eis bred a nim wain.

¹⁹ Ke me lutlut toku, kut e fwa liye la mea kalmen Me Esmakin nu ke mise lun Kraist nu sin met Kristian puspus su oasr fwinsrak lalos in som nu in kosrao a efu ku million puspus sin met su oasr fwinsrak lalos in muta ma patpat fwin fwalu elos enenu in akkalemye insemwomwo yok lalos ke kalmeyen Me Esmakin inge.

[Footnotes]

Ke Inkanek lun Kalweni

• Efu ku Jeova el orala fwalu a filiye metu ka?

• Efu ku eneneyuk nu sin Mwen sefwanna isusla nutin Jeova in srikeyuk fwin fwalu?

• Efu ku Jeova el sulela kutu sin met in welul Kraist in kulansap oana met kol?

8. Mea kalmeyen kas inge “inkanek se in karungin ma puspus”?