Ya Kom Fwa Akkalemye Mwolana Lun God?

“Kut . . . oana in selngun saromromelik su akkalemye mwolana lun Jeova.”​—2 KORINT 3:18, NW.

1. Mea Moses el liye, a mea ma sikyuk tokin ma inge?

OASR sie aruruma inmasrlon aruruma mwolana puspus su metu elos liye ke kutu pal. Ke el mukena muta fwin Eol Sainai, Moses el eis me top nu ke me siyuk lal. Ikakla nu sel in liye ma sakuruk su tia liyeyuk sin metu ke kutena pal​—ke mwolana lun Jeova. Aok, Moses el tia liye sumwos mutun Jeova. Arulanu kato a saromrom luman God paenang wangin met ku in liyel a moul. A, Jeova el filiye “paul” fwel Moses oana sie me afyuf in kosralla nu ke El alukela, kalem la el orekmakin sie lipufon lal. Tokin ma inge Jeova el lela Moses el an liye saromrom su akkalemyeyuk ke mwolana lal. Jeova el sramsram pa nu sel Moses ke inkanek lun sie lipufon. Baibel el akkalemye ma sikyuk tokin ma inge: “A ma te oru, ke Moses el oatume me liki eol Sainai . . . kulin mutal saromrom, meyen el kaskas Yurol [Jeova].”​—Exodus 33:18–34:7, 29.

2. Mea met sap Poul el simusla ke mwolana su met Kristian elos akkalemye?

² Nunku fwin kom welul Moses nu ke eol soko inge. Fuka lupan insemwomwo lom in liye mwolana sakuruk lun God Fulatlanu a in long ke kas nukemwa lal! Sie me engun yok in tuku liki Eol Sainai welul Moses, sie met iumwe nu ke mwuleung lun Masap! Tusruktu, ya kom etu la ke kutu inkanek met Kristian paye elos akkalemye mwolana lun God ke inkanek yok liki inkanek su Moses el akkalemye ke ma inge? Me akpayeye mwo ka ku in koneyukyak ke sie leta su simla sin met sap Poul. El simusla mu met Kristian akmusrala elos “oana selngun saromromelik su akkalemye mwolana lun Jeova.” (2 Korint 3:7, 8, 18, NW) In oapana, nu sin met Kristian nukemwa su oasr fwinsrak in moul fwin fwalu elos akkalemye pa mwolana lun Jeova.

Fuka Met Kristian Elos Akkalemye Mwolana lun God

3. Fuka kut lotela ma puspus kel Jeova ke inkanek puspus su Moses el tia kalem ka?

³ Fuka kut ku in akkalemye mwolana lun God? Kut tia liye ku long Jeova oana ke inkanek su sikyak nu sel Moses. Tusruktu, oasr etauk lasr kel Jeova su wangin sel Moses. Jisus el tuku oana Messaia ke yea 1,500 tokin Moses el mise. Ke ma inge, Moses el tia etu la fuka Masap el akpayeyuk kel Jisus, su mise in molela metu liki me akkoluk lun ma koluk a mise. (Rom 5:20, 21; Galetia 3:19) Yoklana fwako lun ma inge, paenang etauk lal Moses nu ke mwolana ke akwuk lun Jeova, su kupasr nu ke Togusrai lun Messaia a ke paredais fwin fwalu ke pal akpayeyuk ma inge fwa oru me insemwomwo yok. Kut liye mwolana lun Jeova, tia ke mutasr na paye, a ke inkanek lun mutun lalalfongi lasr fwal nu ke me luti nukemwa ke Baibel. Sayen ma inge, kut long pusren Jeova, tia ke inkanek lun lipufon, a ke inkanek lun Baibel, yokna ke buk akosr inge Mattu, Mark, Luk, a Jon, su akkalemye ke inkanek mwomwo ke me luti puspus a orekma in luti lal Jisus.

4. (a) Fuka met Kristian akmusrala elos akkalemye mwolana lun Jeova? (b) Ke inkanek puspus fuka met nukemwa su oasr fwinsrak in moul ma patpat fwin fwalu elos ku in akkalemye ke mwolana lun Jeova?

⁴ Paye met Kristian elos tia akkalemye mwolana lun God ke inkanek saromrom su tuku ke mutalos, tusruktu mutalos arulanu mwo oana in saromromelik ke elos pulakin me insemwomwo yok ke elos fwakak nu sin met puspus ke oiya mwomwo a akwuk nukemwa lun Jeova. Ke len lasr, met palu Isaia el palye la met kulansap lun God elos “fwa fwakak mwolanu lun [Jeova] in masrlon mutanfwalu.” (Isaia 66:19) Sayen ma inge, in 2 Korint 4::1, 2, kut ku in rid: “Ke ma inge, tu oasr yurosr orekma inge . . . , kut som liki ma lukma lun mekin, tia fwafwasryesr in kiapu, a tia akkikiapye kas lun God; a ke akkalemye lun paye kut sifwanu fwakkutyung nu ke ella lun met nu kemwa ye mutun God.” Poul el sramsramkin met Kristian akmusrala ke fus inge, elos su “met orekma in mwuleung sasu.” (2 Korint 3:6) Tusruktu orekma in luti peng mwo lalos sang kasru nu sin met puspus su oasr fwinsrak ke moul ma patpat fwin fwalu. Wekunang nu ke orekma in luti peng mwo lun u luo inge pa in akkalemye mwolana lun Jeova tia ke ma elos luti mukena a ke orekma pa lalos. Pa inge orekma a kunokon mwomwo lasr in akkalemye mwolana lun God su Fulatlanu!

5. Kapkapek lasr in ngun sang me akpayeye nu ke mea?

⁵ Ke pal inge, peng mwolana ke Togusrai lun God sulkakinyukelik fwin fwalu nu fon, oana ma Jisus el palye tari. (Mattu 24:14) Met puspus lun mutanfwal nukemwa, sruf puspus, a loa nukemwa elos insemwomwokin peng mwo a ekulla moul lalos in oru ma lungse lun God. (Rom 12:2; Fwakyuk 7:9) In oana met Kristian in pal meeta, elos tia ku in tui in sramsramkin ma puspus su elos liye a long tari. (Orekma 4:20) Pus liki met million onkosr, pus liki pisen met ke kutena pal ke me sramsram lun metu, elos akkalemye mwolana lun God ke pal inge. Ya kom sie selos? Kapkapek in ngun lun met kulansap lun God sang me akpayeye fukoko ke me insemwomwo a me karungin lun Jeova. Kalem yok liki pal meeta la ngunin Jeova oasr yurosr ke sripen oasr kain in ku puspus akoeyukla in lain kut. Lela kut in liye la efu ku oasr yurosr ngunin ku lun Jeova.

Met Kulansap lun God Tia Ku in Tulokinyuk in Sang Ma Lo

6. Efu ku lulalfongi a pulaik eneneyuk in orekmakin nu ke leyen lun Jeova?

⁶ Kom fwin sapkinyuk ku pangonyuk nu ke sie court in sang ma lo lain sie met akmas su wangin pakomuta yuru. Kom etu la oasr sie u su arulanu ku lun met akmas se inge a el fwa orekmakin inkanek nukemwa in kutongkomla in akkalemyel. Nu sum tu in sang ma lo lain sie met akmas inge eneneyuk kom in akkalemye pulaik a lulalfongi mu met kol puspus lun an u elos fwa loangekomla lukel. Kut oasr ke kain in luma oinge. In sang ma lo kel Jeova a ke akwuk lal, kut orek ma lo lain Setan su Devil, oru el an akkalemyeyuk oana sie met akmas a sie met kikiap su kiapella fwalu nu fon. (Jon 8:44; Fwakyuk 12:9) In akkalemye sulela lom in tu na ku ke leyen lun Jeova a in lain Devil eneneyuk in akkalemye lulalfongi a pulaik in tukeni orek.

7. Fuka lupan kuiyen Setan, a mea el srike in oru?

⁷ Aok, Jeova el pa sie God su Fulatlanu. Ku lal arulanu yok liki ku lal Setan. Kut ku in lulalfongi la oasr ku lun Jeova in karungin kut a el lungse in karungin kut fwin kut oaru ke orekma lasr in kulansupal. (2 Kronikel 16:9) Ne oinge, Setan pa met kol lun dimon nukemwa a lun fwalu su tia alu nu sin Jeova. (Mattu 12:24, 26; Jon 14:30) Ke sripen el tia ku in som liki fwalu a el pulakin “mulat ma lulap,” paenang Setan el lain upa met kulansap nukemwa lun Jeova a el orekmakin fwalu su oasr ye koko lal in srike in tulokinye orekma in sang ma lo lun met nukemwa su sulkakin peng mwo. (Fwakyuk 12:7-9, 12, 17) El oru ma inge fuka? Ke inkanek tolu.

8, 9. Fuka Setan el orekmakin kain in lungse tia mwo ke ma puspus, a efu kut enenu in sulela mwo met asrouki lasr?

⁸ Sie inkanek su Setan el srike in orekmakin in akkolukye kut pa ke nunkala lun moul. Met puspus ke len safla inge elos lungse mani, elos lungselos sifwana, a lungse me akengan puspus. Wangin lungse lalos nu sin God. (2 Timote 3:1-4) Kafofo ke inkanek nukemwa in oru ma puspus ke moul lalos, met puspus elos ‘tia etu’ ku tia loang mwo ke peng mwo su kut akkalemye nu selos. (Mattu 24:37-39) Kain in oiya inge orek sin met puspus su ku in akkolukye kut pa, ku in oru kut in munasla ke sripen wanginla lun insemwomwo in ngun. Kut fwin lela nu sesr sifwana in akkeye lungse lun ma puspus lun fwalu a ke me akengun lun moul, lungse lasr nu sin God fwa eoula ku wanginla.​—Mattu 24:12.

⁹ Ke sripe se inge, met Kristian elos enenu in sulela met puspus su elos enenu in asrouki nu se. Togusra Solomon el simusla: “El su fwufwasryesr yurin met lalmetmet, a el fwa lalmetmet; a el su wi met lalfon fwa ngal ka.” (Soakas 13:20) Lela kut in wi ‘fwufwasryesr’ yurin met su akkalemye mwolana lun Jeova. Sie me insemwomwo yok pa inge! Ke kut asrouki yurin met lili wiyesr in ngun ke pal in meeting a ke kutupa pal, kut ku in eis me akkeye ke lungse lalos, lulalfongi lalos, insemwomwo lalos, a lalmetmet lalos. Asrouki mwomwo inge akkeye sulela lasr ku lungse lasr in kaifweang in oru orekma lasr in luti peng mwo.

10. Ke inkanek puspus fuka Setan el orekmakin kas in aksruksruk in lainelos su akkalemye mwolana lun God?

¹⁰ Inkanek akluo su Setan el srike in tulokunye met Kristian nukemwa ke orekma in akkalemye mwolana lun Jeova pa ke kas kou ku kas in akkoluk. Inkanek inge tia enenu in aklutye kut. Ke lusen pal ke orekma lun forfor lal fwin fwalu, Jisus el aksruksrukyeyuk ku akkolukyeyuk​—isrenyuk el, yayaiyuk el, angonyuk el, kalyaiyuk el, a aniyuk el pa. (Mark 5:40; Luk 16:14; 18:32) Met Kristian nukemwa in pal meeta aksruksrukyeyuk elos pa. (Orekma 2:13; 17:32) Met kulansap lun Jeova ke pal inge elos sun pa me akkoluk oinge. In fwal nu ke ma met sap Piter el fwak, elos fwa pangonyuk oana “met palu kikiap.” Met sap Piter el palye, “Tu in len safla met aksruksruk a fwa tuku in aksruksruke, a fwafwasryesr oana lung koluk lalos sifwana a fwak: ‘Piye mwuleung lun tuku lal? Tu, . . . ma nukemwa on oana ke mutamwauk ke ma orekla.’” (2 Piter 3:3, 4) Met kulansap lun God aksruksrukyeyuk oana met puspus su tia orekmakin ma paye lun fwalu. Akwuk fulat lun Baibel nunkeyuk mu ma na lun met in pal meeta tila fwal nu ke pal inge. Nu sin met puspus, peng mwo su kut sulkakin akkalemyeyuk oana kas lalfon nu selos. (1 Korint 1:18, 19) Oana met Kristian, kut ku in pulakin me aksrusruk ke loom lutlut, ke niyen orekma, a oasr pal fwinne sin met in sou lasr sifwana. Ne oinge, kut tafwela in akkalemye mwolana lun God ke inkanek lun orekma lasr in sulkakin peng mwo, a kut etu la Kas lun God el ma paye oana ma Jisus el oru.​—Jon 17:17.

11. Fuka Setan el orekmakin me srife lun kalyai in tulokinye met Kristian nukemwa su sang ma lo?

¹¹ Inkanek aktolu su Setan el orekmakin in srike in tulokinkuti pa ke me lain ku me kalyai. Jisus el fwak nu sin met tuma lutlut puspus lal: “Na elos fwa eskomwosyung in akkeokye komwos, a fwa unikomwosi, a mutanfwal nukemwa fwa srungekomwos ke ek.” (Mattu 24:9) Paye la, oana Met Lo lun Jeova, kut sun me kalyai upa in an puspus. Kut etu la Jeova el palye tari in pal meeta la srunga, ku me lokwalok, fwa sikyak inmasrlon met puspus su kulansap nu sin God a elos su kulansupal Setan su Devil. (Genesis 3:15) Kut etu pa la ke kut sruokye oaru lasr ye me srife upa, kut sang me akpayeye nu ke sumwos lun Jeova in kol in kosrao a fwin fwalu. Fwin oasr eteyen ma inge ku in oru kut in tu ku ye me srife ku me kalyai upa. Wangin me kalyai ku in srifekutla ke inkanek nukemwa kut fwin sruokye ku sulela mwo lasr in akkalemye mwolana lun Jeova.

12. Efu kut enenu in engan ke kut sruokye oaru paye lasr kut fwin sun me lain upa lal Setan?

¹² Ya kom lain ma mwolana lusrongten lun fwalu a akpayeye la kom oaru fwinne oasr me aksruksruk koluk a me lain? Kom fwin oru ma inge oasr sripe mwo lom in engan. Jisus el mwolela nu selos su lungse in fwasr tokol: “Insemwomwo komwos ke met akangonye komwos, a kolyai komwos, a fwak kain koluk nu kemwa lain komwos in kikiap, Keik. Komwos engunak, a arulanu insemwomwo, tu yok ma lane lomwos in kosrao; tu oinge elos kolyai met palu su muta meet liki komwos.” (Mattu 5:11, 12) Oiyen mongfusesr lom sang me akpayeye la ngun mutal lun Jeova el oasr yurum, sang ku nu sum in akkalemye mwolana lal.​—2 Korint 12:9.

Mongfusesr Oasr Kasreye Sin Jeova Me

13. Mea sripe se meet paenang kut muteng nu ke orekma in luti lasr oana met Kristian?

¹³ Sie sripe mwo emeet la efu ku kut mongfusesr ke orekma in luti peng mwo pa ke sripen kut lungse Jeova a kut engankin in akkalemye mwolana lal. Oasr oiya lun metu in etawi met su elos lungse a sunakin, a Jeova God el arulanu fwal in etawiyuk liki na in etawi kutena met. Ke sripen lungse yok lal, el supwema Wen natul nu fwalu in sang ma lo nu ke ma paye a in molela met akosten nukemwa. (Jon 3:16; 18:37) In oana nunak lun God, kut lungse kain in met nukemwa in auliyak a eis molela; pa inge sripe paenang kut fwakak peng mwo nu selos. (2 Piter 3:9) Kena lasr inge, wekunang sulela paye lasr in etawi God, mokle kut in mongfusesr in akkalemye mwolana lal ke inkanek lun orekma lasr in sulkakin peng mwo.

14. Fuka Jeova el akkeye kut in mongfusesr nu ke orekma lasr in luti peng mwo?

¹⁴ Ma se safla su arulanu yok sripe, pa ku lasr in muteng ke orekma in luti lasr oana met Kristian su tuku sin Jeova me. El kasru a akkeye kut ke inkanek lun ngun lal, u lal, a Kas lal, Baibel. Jeova el “sang mongfusesr” nu selos su inse mulala in akkalemye mwolana lal. El topuk pre lasr a utuku nu sesr lalmetmet in muteng nu ke me srife ku ma upa puspus. (Rom 15:5; Jemes 1:5) Sayen ma inge, Jeova el tia lela kut in sun kutena me srife su kut tia ku in muteng ka. Kut fwin lulalfongi Jeova, el fwa oru inkanek tu kut in kaengkunla tu kut fwa ku in tafwela in akkalemye mwolana lal.​—1 Korint 10:13.

15. Mea kasre kut in mongfusesr ku muteng?

¹⁵ Mongfusesr ke orekma lasr in luti peng mwo oru me akpayeye la ngun mutal lun God oasr yurosr. In pupulyukin ma inge: Fwin sie met el siyuk sum in kitela sie kain in bread nu ke sie loom nu ke sie loom, ke wangin molo. Sapkinyuk nu sum mu kom in oru ma inge ke inkanek in orekmakin mani lom sifwana a ke pal su kom fwa ku in orekmakin ma inge ke pal lom sifwana. Ke kutu pal, su tia pat kom koneak la met pu na lungse bread lom inge; a kutu met elos lain kaifweang lom in kitala ma inge. Ya kom nunku mu kom ku in tafwela in oru ma inge pal nukemwa? Saap kom tia ku. Tusruktu, saap kom akkalemye kaifweang yok lom in sulkakin peng mwo orekmakin pal lom sifwana a mani lom sifwana ke lusen yea puspus, saap ke lusen yea ngoul puspus. Efu? Ya tia ke sripen kom lungse Jeova a ke inkanek lun ngun lal el akinsemwomwoye kaifweang lom in kasre kom in muteng? Aok paye ma inge!

Sie Orekma su Fwa Esamyuk

16. Mea kalmeyen mongfusesr lasr ke orekma in luti peng mwo nu sesr a nu selos su long kut?

¹⁶ Orekma in luti lasr ke mwuleung sasu pa sie me sang su arulanu yok sripe. (2 Korint 4:7) Ke oiya inge, orekma in luti peng mwo oana met Kristian su orek sin met puspus su wi ke u lun sip ngie fwin fwalu pa sie ma saok. Ke kom tafwela in muteng ke orekma in luti peng mwo, kom ku in “molikomla a ouyepa elos su long kom,” oana ma met sap Poul el simusla nu sel Timote. (1 Timote 4:16) Nunku ke kalmeyen ma inge. Peng mwo su kom sulkakin el sang pal mwomwo nu sin met puspus in eis moul ma patpat. Kom ku in akkeye sie me kapur fukoko ke oiyen kawuk lom nu selos su kom kasru in alu nu sin Jeova God. Nunku ke lupan insemwomwo a engun in moul ma patpat in sie Paredais yurin met puspus su kom kasru in lotela ke God! Paye la elos fwa tia na mulkunla kaifweang nukemwa lom in kasrelos. Pa inge sripe mwomwo in pulakin me insemwomwo paye!

17. Efu ku pal lasr inge el sie pal su wangin ma oana ke me sramsram lun metu?

¹⁷ Kom moul ke sie pal su wangin ma oana ke me sramsram lun metu. Peng mwo fwa tia sifwilpa sulkakinyuk nu sin met puspus su tia kulansap ku wangin futoto lalos nu sin God. Noa el moul tari inmasrlon met puspus su tia kulansapu God, a el liye la met nukemwa inge wanginla. Fuka lupan insemwomwo lal in etu la ke sripen el oaru ku paye in akpayeye ma lungse lun God in musai oak soko, paenang orekma lal inge kol nu ke molela lal a lun sou lal! (Hibru 11:7) Kom ku in pulakin pa kain in engun inge. Nunku ke ma kom fwa pula ke fwalu sasu ke kom fwin esamak orekma lom ke len safla inge, kom etu la kom oru ke ku lom kemwa in akkeye orekma nukemwa lun Togusrai lun God.

18. Mwolela fuka a kas in akkeye fuka Jeova el sang nu sin met kulansap nukemwa lal?

¹⁸ Ke ma inge, lela kut in akkalemye mwolana lun God pal nukemwa. Orekma lasr in oru oinge pa ma se su fwa esamyuk ma patpat. Jeova el esam pa orekma lasr. Baibel el akkalemye kas in akkeye inge: “Tu God el tia sesumwos in mulkunla orekma lomwos, a lungse su komwos fwakak nu ke El, ke komwos kasru met mwo meeta, a ouyepa inge. A kut lungse tu komwos nukemwa in oaru nu ke seseslanu lun fwinsrak, aok, nu ke saflaiye, tu komwos in tia alsranges, a komwos in met etawi lalos su, ke lulalfongi a mongfusesr, usrui ma mwolela.”​—Hibru 6:10-12.

Kom Ku In Aketeye?

• Fuka met Kristian elos akkalemye mwolana lun Jeova?

• Mea kutu inkanek su Setan el orekmakin in tulokinye met kulansap lun God elos in tui ke orekma lalos in sang ma lo?

• Mea akpayeye la ngun lun God oasr yurosr?

[Petsa ke sra 5]

Mutal Moses el akkalemye mwolana

[Petsa ke sra 6]

Kut akkalemye mwolana lun God ke orekma lasr in luti peng mwo