“Kom Akpayeye Ke Inkanek Nukemwa Orekma In Luti Lom”
“Oru orekma in kulansap lom ke inkanek nukemwa.”—2 TIMOTE 4:5, Byington.
1, 2. Fwinne met Kristian nukemwa elos met fwakak lun peng mwo, tusruktu mea me siyuk ke ma Simusla nu sin met elder nukemwa.
YA KOM sie met luti ke togusrai? Fwin oinge, fwal kom in sang kulo nu sin Jeova God ke kunokon mwomwo inge. Ya kom sie met elder ke congregation? Sie pa kunokon mwo su tuku sin Jeova. Tusruktu kut enenu in esam pal nukemwa la tia lutlut lulap ku pa in sramsram ku in oru kutena sesr in fwal nu ke orekma in luti ku in liaung congregation. Jeova pa oru kut in fwal nu ke orekma lun forfor, a ke sripen kutu sin mokul su wi kut elos sun me enenu puspus lun ma Simusla paenang elos ku in kulansap oana met kol.—2 Korint 3:5, 6; 1 Timote 3:1-7.
2 Met Kristian nukemwa su mwolela moul lalos tari elos oru orekma lun met fwakak lun peng mwo, tusruktu yok eneneya nu sin met kol, ku met elder puspus, in akkalemye me srikasrak mwomwo ke orekma in luti peng mwo. Met elder puspus su “moniyuk in orekma in luti a sramsram” elos kuranginyuk sin God a Kraist, ouyepa sin Met lo lun Jeova puspus su welalos. (1 Timote 5:17; Efesus 5:23; Hibru 6:10-12) Fwin oasr kutena ma sikyak, me luti lun met elder enenu in me akkeye ke ma lun ngun nu sin met nukemwa, in oana ke met sap Poul el fwak nu sel Timote sie met kol: “Tu pal se a fwa tuku ke elos fwa tia muteng me luti paye: a, meyen srelos srun, elos fwa akpusye nu selos met luti su oana lun koluk lalos sifwanu; a forokla srelos liki ma paye, a kufla nu ke sramsram lusronten. A kom in efwal in ma nukemwa, kom in mutenan ma upa, oru orekma lun met fwakak Kraist a akfwalye ma kunom.”—2 Timote 4:3-5.
3. Mea me enenu puspus su enenu in orek tu me luti kikiap puspus in tia akkolukye ma lun ngun ke congregation?
3 In akpayeye la wangin me luti kikiap ku in oru me sensen nu ke ma lun ngun ke congregation, met kol nukemwa enenu in loang akmwoye nu ke me kai lal Poul: “Kom akkalemye nunak mwo lom ke ma nu kemwa, . . . akfwalye ma kunom.” (2 Timote 4:5, Byington) Aok, sie met elder el enenu in ‘akfwalye ma kunel.’ El enenu in oru ke inkanek paye, ke ku lal kemwa. Sie met elder su oru kunokon lal ke ku lal kemwa enenu in loang akmwoye nu ke kunokon lal fwin ma nukemwa takla a sumwos. Met oinge enenu in oaru fwinne ke ma srisrik.—Luk 12:48; 16:10.
4. Mea ku in kasre kut in akpayeye inkanek nukemwa ke orekma lun forfor lasr?
4 In akmwoye orekma in luti lasr ke inkanek nukemwa tia enenu pal yok nu ka, tusruktu kut enenu in orekmakin pal lasr ke inkanek fwal. Oasr me kasru nu sin met Kristian nukemwa in oasr balance a moniyuk ke orekma tu in yok kapkapek nu ke orekma in luti lasr. Tu in orekmakin pal yok lal ke orekma lun forfor, sie met elder enenu in oakiye sie akwuk mwomwo nu sel sifwana tu in sumwos schedule lal in etula mea el ku in sang nu sin met a fuka el ku in oru oinge. (Hibru 13:17) Ke ma inge, sie met elder oaru el enenu in oru kunokon lal sifwanu, oana Niemaia, ke el wi orekma in sifwilpa musai pot lun an Jerusalem. (Niemaia 5:16) Met kulansap nukemwa lun Jeova elos enenu in wi pal nukemwa ke orekma in luti lun Togusrai.—1 Korint 9:16-18.
5. Pulakin fuka kut enenu in pula ke orekma in luti lasr?
5 Sie kunokon mwomwo oasr yurosr oana met fwakak lun togusrai in kosrao su oakiye tari! Ke ma inge lela ku in aksaokye kunokon lasr inge in sang kasru ke orekma in luti peng mwo fwin fwalu nu fon meet liki safla tuku. (Mattu 24:14) Fwinne kut sesumwos, kut ku in akkeyeyuk ke kas lal Poul: “A ma saok inge oasr yurosr in alu fok, tu yoklanu lun ku fwa ma sin God me, a tia ma sesr sifwanu. (2 Korint 4:7) Aok, kut ku in oru orekma in kulansap mwomwo-tusruktu ke ku a lalmetmet su God el ase nu sesr.—1 Korint 1:26-31.
Oru Mwolanu Lun God in Kalem
6. Mea ma tia oana sie inmasrlon Met Israel na paye a Met Israel in ngun?
6 In sramsramkin met Kristian akmusrala, Poul el fwak la God el “oru kut oana met orekma lun sie mwuleang sasu.” Met sap inge el sramsramkin akwuk lun mwuleang sasu su orekla nu sin Israel in ngun sin Jisus Kraist nu ke mwuleang matu lun masap su orekla nu sin met Israel in ikwe ke inkanek lal Moses. Poul el akkalemye pa la ke pal se Moses el tuku liki Eol Sinai us eot luo su Masap Siengoul simla ka, mutal arulanu saromrom paenang met Israel nukemwa tia ku in ngetang. Tusruktu, tia pat tokin ma inge, oasr ma sikyak su tia mwo meyen insielos upa oru “ku lun nunak lalos munasla” a oasr sie veil ku me lusrlusr ilyak nu insielos. Tusruktu, fwin oasr kutena kain in orekma su orek ke nunak paye nu sin Jeova, veil inge kanausyukla. In sramsramkin orekma in kulansap su sapkinyuk nu selos nukemwa su wi ke mwuleang sasu, Poul el fwak: “A kut nukemwa, . . . wangin veil fwin mutasr oana in selngun su akkalemye mwolanu lun Jeova.” (2 Korint 3:6-8, 14-18; Exodus 34:29-35) Oasr pa kunokon mwomwo nu sin “sip ngie” lun Kraist ke pal inge in akkalemye mwolanu lun Jeova.—Jon 10:16.
7. Ke inkanek fuka metu ku in akkalemye mwolanu lun God?
7 Fuka met sesumwos elos ku in akkalemye mwolanu lun God, fwin wangin kutena met ku in liye mutal a moul? (Exodus 33:20) Lela in kalem, la sayen mwolanu lun Jeova, oasr pa akwuk mwolanu lal in akmutalye ku lal sifwana a in akpengpengyel ke inkanek lun Togusrai lal. Misla paye su tuku ke togusrai pa ip yok ke “orekma sakuruk puspus lun God” su sulkakinyuk sin met kulansap puspus su eis ngun mutal lun God mutamwauk ke Pentecost 33 C.E. (Orekma 2:11) Ke kasru lun ngun mutal, elos akpayeye orekma in luti su sapkinyuk nu selos.—Orekma 1:8.
8. In oru orekma in luti ke peng mwo, mea Poul el lungse yok in oru?
8 Poul el tia lela kutena ma in kutongilye in akpayeye orekma in luti lal. El simusla: “Ke ma inge, tu oasr yurosr orekma inge, oana kut eis kulang, kut tia mulalla; A kut som liki ma lukma lun mwekin, tia fwafwasryesr in kiapu, a tia akkikiapye kas lun God; a akkalemye lun paye kut sifwanu fwakutyung nu ke ella lun met nu kemwa ye mutun God.” (2 Korint 4:1, 2) Ke inkanek inge Poul el fwak “orekma inge,” akkalemye ma paye a kalem in ngun sulkakinyukelik fwin an puspus.
9, 10. Ke inkanek fuka mwolanu lun Jeova ku in akkalemyeyuk?
9 In sramsramkin sropon kalem lun fwatu a kalem lun ngun, Poul el simusla: “Tu God el fwak: ‘Kalem fwa tolak in losr,’ su tolak insiesr in ase lun etauk lun mwolanu lun God in mutun Jisus Kraist.” (2 Korint 4:6; Genesis 1:2-5) Ke sripen kunokon mwomwo inge su oana met kulansap lun God, lela kut in aknasnasye kut sifwanu tu kut in oana selngun su ku in akkalemye mwolanu lun Jeova.
10 Met puspus su muta in losr lun ngun elos tia ku in akilen mwolanu lun Jeova ku mwolanu lun ma inge su tuku sin Jisus Kraist, su yok lukel Moses. Tusruktu oana met kulansap puspus lun Jeova, kut eis etauk lun ngun ke ma Simusla a akkalemye ma inge nu sin kutu pa met. In sang kasru nu sin met puspus su muta in losr lun ngun tu elos in kaengla liki ongoiye lulap, elos enenu kalem paye su tuku sin God. Ke ma inge, in oasr pulakinyen insemwomwo a moniyuk yurosr, kut enenu in akos masap mutal a lela kalem in tolak losr nu ke mwolanu lun Jeova.
Lela Kalem Lomwos in Tolak Oru Lutlut Baibel lun Loom
11. In lela kalem lasr in tolak mea Jisus el fwak ka, a mea sie inkanek in oru ma inge ke orekma in luti lasr?
11 Jisus el fwak nu sin met tuma lutlut puspus lal: “Komwos kalem lun fwalu. Sie siti su on fwin eolu koflanu mwukunla. Metu elos tia elosak lamu, a filiye ye tupu, a fwin sekunlamu, a kofleak nu kemwa in loomu. Oinge komwos sang kalem lomwos in tolak ye mutun metu, tu elos fwa liye orekma mwo lomwos a kaksakin Papa tumomwos su in kosrao.” (Mattu 514-16) Oiya mwo lasr nukemwa ku in kasru kutu met in sang mwolanu nu sin God. (1 Piter 2:12) A ke inkanek puspus lun orekma in luti lasr ke peng mwo ku in ikasla pal mwo yok in lela kalem lasr in tolak. Sie nien sun lasr pa in oru kalem lasr in tolak lutlut Baibel lasr nu sin met in loomu ke inkanek mwo. Orekma inge pa sie inkanek su arulanu yok sripe in oru ke orekma in luti lasr. Kain in me kasru fuka ku in kasre kut in oru lutlut Baibel lasr in sun insien met puspus su suk ma paye?
12. Fuka pre el kupasr nu ke orekma in lutlut Baibel nu sin met?
12 Pre nu sin Jeova God in kasre kut ke ma inge akkalemye lungse lasr in oru sie lutlut Baibel. Ma inge akkalemye pa la kut liye yok sripen orekma in kasru kutu met in eis etauk lun God. (Ezekiel 33:7-9) Jeova God el topuk pre lasr a akinsemwomwoye kaifweung paye lasr ke orekma in luti. (1 Jon 5:14, 15) Tusruktu kut tia pre mukena in koneak met su kut ku in oru lutlut Baibel nu se in loomu. Tokin kut oakiye sie lutlut Baibel, pre a sifwilpa nunku ke ma enenu lun met su lungse in lutlut Baibel in kasre elos ke inkanek mwo su ku in sun insiel pal nukemwa.—Rom 12:12.
13. Mea ku in kasre kut in oru lutlut Baibel in loom in pukanten ke inkanek mwo?
13 In oru sie lutlut Baibel in loom ke inkanek mwomwo, kut enenu in akola mwo ke kais sie pal in lutlut. Fwin kut pulakin tu kut sufwal in oru, oasr me kasru yok kut ku in oru fwin kut tuni mwo la fuka met kol Lutlut lun Congregation ke Buk el oru lutlut lal ke kais sie me lutlut ke wik nukemwa. Kutu pal, kut ku in wi kutu met orekma su oasr fwako mwomwo la in oru lutlut ke Baibel in loomu. Aok, yok liki nukemwa lela kut in nunku yok ke oiya mwo a inkanek mwo puspus ke orekma in luti lun Jisus Kraist.
14. Ke inkanek fuka kut ku in sun insien met lutlut Baibel?
14 Jisus el insemwomwo in oru ma lungse lun Papa tumal in kosrao a el insemwomwo in sramsram nu sin met puspus ke God. (Sam 40:8) El akkalemye inse-fwokpap a me luti lal sun insien met puspus su longol. (Mattu 11:28-30) Ke sripe inge lela kut in kaifweang in sun insien tulik lutlut Baibel puspus lasr. Fwin kut oru oinge, kut enenu in akola ke kais sie lutlut a in nunku ke me enenu lun ngun nu sin met inge su lutlut Baibel. Ke sie me pupulyuk, fwin sie met el tuku liki sie an su met we tia lalalfongi ke Baibel, kut enenu in akkalemye me akpayeye puspus in sang kasrel in lalalfongi ke Baibel. In oru oinge, kut enenu in ridi ma Simusla puspus a aketeye ma inge.
Kasru Met Puspus su Lutlut Baibel in Etu Me Pupulyuk Puspus
15, 16. (a) Fuka kut ku in kasru sie met lutlut su tia kalem ke me pupulyuk su orekmakinyuk in Baibel? (b) Mea kut enenu in oru fwin me rid natusr orekmakin sie me pupulyuk upa in kalem nu sin met lutlut Baibel?
15 Sie met su lutlut Baibel saap el nukin kalmeyen me pupulyuk su orekmakinyuk in Baibel. Ke sie pupulyuk, saap el tia kalem ka la mea kalmeyen kas lun Jisus ke el sramsramkin sie lam su filiyuki fwin sikunlamu. (Mark 4:21, 22) Jisus el sramsramkin lam in pal meeta su orekmakin oil a oasr wik furrurrur ka. Kain in lam inge filiyuki fwin sikunlamu a ku in sang kalem in tolak kutu an in loomu. In suk kalmeyen kas inge “Lamp” a “Lampstand” ke sie buk Insight on the Scriptures in sang aketeyuki in kalem me pupulyuk lun Jisus.a Ke ma inge oasr me insemwomwo yok koneyukyak in sang aketeye nu sin tulik lutlut Baibel tu in kalem a me akengun nu sin met lutlut inge!
16 Saap oasr kutu me rid su orekla ke Baibel in sang aketeye sie me pupulyuk su arulana upa in kalem nu sin met lutlut. Orekmakin pal yok in sang aketeye ma inge, ku orekmakin siepa me pupulyuk su oana sie nu ke me lutlut san. Oasr sie me rid su akkalemye la sie met kasru mwomwo a in kaifweung in akesrui arlana yok sripe nu ke sie moul in payuk. In pupulyukin ma inge, oasr me sramsram se ke sie met su sok ke sie me sok ku trapeze, el srola liki me sok soko inge yen engyengu, a el fwinsrakin mu oasr siepa met sritel su welul fwa srukye paul tu el fwa tia putatla nu ten. Oasr sie pa me pupulyuk su ku pa in orekmakinyuk, in akkalemye ke ma eneneyuk nu ke sie met kasru mwomwo a in kaifweang in akesrui ku in pupulyukinyuk nu ke orekma in akesrui lun met puspus su srike in tella pok puspus a ma inge enenu in tutaf nu sin kutu pa met su wi orekma in tella koanon soko oak.
17. Mea kut ku in lotela kel Jisus ke me pupulyuk puspus?
17 In orekmakin me pupulyuk enenu in akola mwo meet liki pal in lutlut nu sin met. Fwin oinge, kut akkalemye inkanek in lungse lasr sifwana nu sin sie met su lutlut Baibel. Jisus el orekmakin me pupulyuk fusresr in sang aketeye me lutlut upa puspus. Me Sramsram lal Fwin Eol akkalemye ke me pupulyuk lun ma inge, a Baibel akkalemye la me luti lal oasr fwako mwomwo ka nu sin met puspus su longol. (Mattu 5:1-7-29) Jisus el mongfusresr in akkalemye ma puspus meyen oasr insemwomwo paye lal nu sin met nukemwa.—Mattu 16:5-12.
18. Mea ma enenu in orek ke ma simusla puspus su orekmakinyuk ke me rid puspus natusr?
18 Insemwomwo lasr nu sin kutu pa met fwa mokle kut in ‘aketeye ma Simusla.’ (Orekma 17:2, 3) In oru ma inge enenu in kafweang in lutlut a pre a orekmakin ke inkanek lalametmet me rid puspus su tuku ke Baibel sin “met kulansap oaru a lalmetmet.” (Luk 12:42-44) Ke sie pupulyuk, buk inge Etauk su Kol nu ke Moul Ma Patpat orekmakin ma simusla puspus.b Ke sripen srikla an lula ke buk inge, paenang ma Simusla inge simla mukena. Ke pal in lutlut Baibel, arulanu yok sripe in ridi a aketeye ma simusla su oasr ka. In oru oinge, me luti lasr fwal kalem la tuku ke Kas lun God, a yok ku lun ma inge. (Hibru 4:12) Orekmakin Baibel pal nukemwa ke pal in lutlut, liye in Baibel ma simusla puspus su koneayukyak in paragraph nukemwa. Kasru met lutlut in liye la mea Baibel el fwak ke sie me lutlut ku ke sie inkenek in moul. Kafweang in akkalemye nu sel la fuka el ku in eis ma lane ke orekma in akos God.—Isaia 48:17, 18.
Siyuk Kusensiyuk Puspus su Oru met in Nunku
19, 20. (a) Efu kut enenu in orekmakin kusensiyuk su yok sripe ke kut oru lutlut Baibel ke loom? (b) Mea fwal in orek fwin sie me lutlut eneneyuk in aketeyuki ke inkanek yok?
19 Jisus el utuftuf ke inkanek in orekmakin kusensiyuk puspus in sang mokle nunak lun metu. (Mattu 17:24-27) Kut fwin siyuk kutu kusensiyuk su tia na akmwekinye sie met lutlut ke Baibel, me topuk lal fwa akkalemyela mea on in nunak lal ke sie me lutlut. Oinge kut fwa ku in koneak la el srakna lalalfongi ke me luti su wangin in ma simusla. Ke sie me pupulyuk, fwin el lalalfongi ke Trinity. In sapta 3, ke buk inge Etauk el akkalemye la kas inge “Trinity” wangin in Baibel. Buk se inge el orekmakin ma simusla puspis su akkalemye la Jeova el siena lukel Jisus a ngun mutal pa ku lun God, tia sie met. In ridi a aketeye ma simusla puspus lun Baibel ku in sang me akpayeye fwal nu ke me lutlut inge. Tusruktu fuka fwin srakna yok enenu nu ke me lutlut inge? Saap ke sie pal tokin akwuk lun lutlut orekla, na mwo in sramsramkiyuk me aketeye nu ke kusensiyuk san wi me rid saye lun Met Lo lun Jeova, oana buk srisrik inge Should You Believe in the Trinity? Tokin ma inge, kut ku in tafwela lutlut‘an orekmakin buk inge Etauk.
20 Fuka fwin me top lun met lutlut nu ke kusensiyuk lun ip yok in me lutlut sitoela ku tia mwo. Fwin me lutlut san orekmakin pipe, ku kutu me lutlut upa, lutlutkinyuk, kut in fwak nu sin met lutlut san la kut enenu in tafwela na lutlut‘u tusruktu nu ke me lutlut upa se inge e fwa aketeyuki ke kutu pal saye. Fwin eteyuk mu met lutlut inge el srakna sismok srike in lutlutkin pipe su mokle kut in suk me kasru ke me rid lasr su tuku in Baibel in kasrel in karungin yok ma lun ngun. Ke kut kafweang in akkeye insien met lutlut, kut ku in pre nu sin Jeova in kasrel in srukye ku ma lun ngun.
21. Mea fwa sikyuk fwin kut akfwalye inkanek in luti lasr nu ke ma enenu lun sie met lutlut Baibel?
21 Ke inkanek lun akola mwo a ke kasre lun Jeova, paye kut ku in akfwalye inkanek lasr in luti tu in fwal nu ke me enenu puspus lun met lutlut ke Baibel. Kais kutu srisrik, saap kut fwa kasrel in srukye ku sie inse su oasr lungse paye nu sin God. Kut ku pa in kasru in oasr akfulat a kaksak nu ke U lun Jeova. A sie me insemwomwo yok fwin met lutlut puspus ke Baibel elos akilen la ‘paye God el muta inmasrlomwos. (1 Korint 14:24, 25) Ke sripe se inge lela kut in oru lutlut in Baibel ke inkanek mwo a lela kut in kasru met puspus ke ku lasr kemwa in ekla met tuma lutlut lun Jisus.
Sie Me Kasrup Enenu in Aksaokyeyuk
22, 23. Mea eneneyuk fwin kut akpayeye orekma in luti lasr ke peng mwo ke inkanek nukemwa?
22 In oru orekma in luti lasr ke peng mwo ke inkanek nukemwa, kut enenu in orekmakin ku su tuku sin God. In sramsramkin orekma lun forfor, Poul el simusla nu sin met Kristian akmusrala: “A ma sok inge oasr yurosr in alu fok, tu yoklanu lun ku fwa ma sin God me a tia ma sesr sifwanu.”—2 Korint 4:7
23 Fwinne kut wi ke u lun met akmusrala ku ke “sip ngie,” kut oana alu munas orekla ke fok. (Jon 10:16) Fwinne oinge, Jeova el ku in ase nu sesr ku su eneneyuk in akpayeye kunokon puspus lasr fwinne oasr me kutong puspus su sun kut. (Jon 16:13; Filippai 4:13) Paeneng, lela kut in filiye lalalfongi paye nu sin Jeova, aksaokye orekma in kulansap lasr oana sie ma saok, a akpayeye ke inkanek nu kemwa orekma in luti lasr ke peng mwo.
[Footnotes]
a Orekla sin Met Lo lun Jeova.
b Orekla sin Met Lo lun Jeova.
Kom E Topuk Fuka?
• Mea met elder puspus elos enenu in oru in akpayeye orekma in luti lalos ke peng mwo ke inkanek nukemwa?
• Fuka kut ku in akmwoye inkanek in luti lasr ke lutlut Baibel in loom puspus?
• Mea kom enenu in oru fwin met lutlut Baibel el tia kalem ke sie me pupulyuk ku enenu kutu pa me kasru ke sie me lutlut?
[Picture on page 24]
Met Kristian elder puspus elos luti in congregation a sang akpa nu sin kutu pa met su wi ke lalalfongi ke orekma in luti
[Picture on page 26]
In oru lutlut Baibel ke loom sin met ke inkanek mwo pa sie inkanek in lela kalem lasr in tolak