“Mise Okomyukla Ma Patpat”

NUNKU kom fwin ridi sie newspaper su sifwe se lung inge sramsramkinyuk. Paye, wangin newspaper ku in akkalemye me sramsram inge. Tusruktu kas su oan lung inge sikyuk ke sie buk su matwe oasr ke tausen puspus yea​—pa Baibel.

In Ma Simusla, kas se inge mise u el akkalemyeyuk kalem. Sayen ma inge, Baibel el tia akkalemye mukena la efu ku kut mise tusruktu el ouyepa aketeye ke oiyen met mise a sang fwinsrak nu sin met mise su kut lungse. Ke saflaiye, el sramsramkin ke sie pal mwomwo ke pal fwasru su fwa ku in akkalemye oinge: “Mise okomyukla ma patpat.”​—1 Korint 15:54, NW.

Baibel el aketeye oiyen mise ke inkanek fusrasr in kalem liki na kain in kas su upa in eteyuk. Ke sie me pupulyuk, mise el pupulyuk kinyuk nu ke inkanek in ‘motul,’ a el akkalemye la met mise el oasr ke inkanek in “motul lun mise.”​—Sam 13:3; 1 Tessalonika 4:13; Jon 11:11-14.

Kalem la, oasr kunokon yok lun Jisus Kraist in akwanginyela mise. El fwak la el tuku nu fwalu in “sang moul Lal in moli met puspus.” (Mattu 20:28) Akwuk inge ku in pupulyuk kinyuk nu ke inkanek in kapur lun sie met, su ku in sifwil eis inkanek in sukosok lal fwin oasr lupan mani se akwuki in sang molela lupa se su eneneyuk in sang aksukosokyella. Ke ma inge, me molela inge su ku in sang aksukosokye kut la liki ma koluk a mise pa moul sumwosmwos lun Jisus.​—Orekma 10:39-43.

Mise el sie met lokwalok. Sruf nukemwa lun metu oasr me lokwalok puspus ka, oana mas a matou, su orala me keok puspus. God el mwolela tari in akwanginyela ma inge nukemwa, saflaiye el sang kas in kai nu ke me lokwalok yok lun metu. “Met lokwalok se tok El fwa ella, mise.”​—1 Korint 15:26.

Ke mwolela inge akpayeyuk, metu fwa engunkin moul sumwosmwos, wanginla me akkoluk lun ma koluk a mise. Ke pal na sa, kut ku in eis me akkeye in etu la met su kut lungse su mise elos motul in mongla lalos, a fwin elos oasr ke me esmakin lun God, elos fwa akmoulyeyukyak ke pal pakiyuki lal.

“O Mise, Piya Me Anwuk Lom?”

Ke ma inge, fwin oasr etauk yok lasr ke oiyen met mise kut ku in eis me kasru mwo nu ke nunak sumwos ke oiyen moul. Mise el tia oana ma se su arulanu upa in eteyuk. Kut ku in engankin moul a wangin pulakinyen me aksangeng upa nu ke me lokwalok se su fwa aksangengye kut. A in eis etauk ka la mise el tia ku in eisla moul lasr ma patpat, ma inge ku in kasre kut in tia moulkin sie moul su lungse in suk me akengan, ke sripen oasr kain in lulalfongi nu ke nunak in nunku mu “moul el arulanu futoto.” In eis etauk ka la met su kut lungse su mise tari elos oasr ke me esmakin lun God a elos sano nu ke pal in sifwil moulyuk, su ma inge ku in akkeye kut a akkeye lungse lasr in engankin moul.

Aok, kut ku in ngetla nu ke pal fwasru nu ke pal se su Jeova God, El su Sropon moul, el fwa akwanginyela mise ma patpat. Sie me akinsemwomwo na paye nu ke pal se su kut fwa ku in siyuk sumwos: “O mise, piya kutangla lom? O mise, piya me anwuk lom?”​—1 Korint 15:55.