Akinsemwomwoyeyuk Elos Su Sang Mwolana Nu Sin God

“Elos fwa alu ye mutom, O Jeova, a elos fwa sang mwolana nu ke em.”​—Sam 86:9.

1. Efu ku kut ku in sang mwolana nu sin God ke inkanek puspus su mwo liki ma orekla nukemwa su wangin moul elos ku in oru?

JEOVA el fwal in kaksakinyuk sin ma nu kemwa su el orekla. Fwinne ma orekla nukemwa lal su wangin moul elos sang mwolana nu sel ke inkanek usrnguk, kut metu oasr ku lasr in sang me top, in etu in akkalemye kulo, a in alu. Paenang, met sim lun Sam el fwak nu sesr: “Komwos in srukak pusremwos ke engun nu sin God, fwalu nu fon. Komwos in on in fwakak mwolana lun El. Komwos in oru kaksak lal in mwolana.”​—Sam 66:1, 2.

2. Su met puspus su akos masap in sang mwolana nu ke en God, a efu?

² Met puspus sin metu elos pilesru God in sang mwolana nu sel. Fwinne oinge, oasr in an 235, pus liki million onkosr Met Lo lun Jeova elos akkalemye la elos liye “oiya mwomwo nukemwa lun God su tia liyeyuk” ke inkanek lun ma orekla nukemwa lal a elos “long” ma lo usrnguk lun ma orekla. (Rom 1:20; Sam 19:2, 3) Ke inkanek lun lutlut Baibel, elos eis etauk a lotela in lungse Jeova. Sam 86:9, 10 el palye: “Mutanfwal nukemwa su kom orala fwa tuku a alu ye mutom, O Jeova, a elos fwa sang mwolana nu ke Em. Tu kom yok a oru ma sakuruk; Kom God, kom mukena.” (NW)

3. Ke inkanek fuka “u lulap” elos oru “orekma in kulansap mutal ke len a fong”?

³ Fwakyuk 7:9, 15 el akkalemye pa ke “sie u lulap” lun met puspus su alu nu sin God a “elos kulansapul len a fong in tempel lal.” God el tia sapkin met kulansap nukemwa lal in kulansapul pal nukemwa a tia tui, tusruktu met nukemwa su alu nu sel oasr fwin fwalu nufon. Paenang tafwu an fwin fwalu fongeni, a tafwu an len, a met kulansap lun God elos kafofo ke orekma in sang ma lo lalos. Ke ma inge fwal in fwak nu selos su sang mwolana nu sin Jeova God mu fwatu tia na tilli lukelos. Tia pat, “ma nukemwa su oasr momong” fwa akyokye pusrelos in kaksakin Jeova. (Sam 150:6) Tusruktu, in pal inge, mea kais sie sesr ku in oru in sang mwolana nu sin God? Kain in ma upa fuka kut fwa sun? A me insemwomwo puspus fuka sanolos su sang mwolana nu sin God? In etu me top, lela kut in nunku ke sie me sramsram lun Baibel ke sruf lal Gad fwin an Israel.

Sie Ma Upa in Pal Meeta

4. Kain in ma upa fuka sruf lal Gad el sun?

⁴ Meet liki elos ilyuk nu in Fwal Mwolela, met nukemwa ke sruf lal Gad sin met Israel elos siyuk in itukyang nu selos in muta ke sie an su fwal in karungin kosro puspus natulos leyen kutulap lun infwal Jordan. (Oekyuk 32:1-5) In muta ke an se inge ku in kalmekin la elos fwa sun kain in me lain upa puspus. Nu sin sruf su muta leyen roto fwa oasr me karungin lalos ke sripen Infwalfwal lun Jordan​—pa inge sie akwuk mwo nu ke an inge in sang kosrala solse elos in tia sruokye an se inge. (Josua 3:13-17) Tusruktu, ke an puspus leyen kutulap lun Jordan, The Historical Geography of the Holy Land, su simusyukla sel George Adam Smith, el fwak: “[An nu kemwa] an tupasrpasr, apkuran in wangin ma kosrala, fwin an fulat lun an Arabia. Ke sripe inge, yok me sensen pal nukemwa ke sripen orekma koluk lun met sulallel su suk me enenu lalos, a in yea nukemwa met inge tuku in sruokye an tupasrpasr inge nu sin kosro puspus natulos in eis me mongo ke maa nelos.”

5. Fuka Jekob el akkeye tulik nutin tulik natul Gad in lain met puspus su lungse in akkolukyelos?

⁵ Fuka sruf lun Gad fwa ku in lain kain in ma upa inge fwin sikyuk pal nu kemwa? Ke century puspus somla, meet liki el apkurun in mise, Jakob papa matou tumalos el palye: “Gad, sie u e fwa eoksalak, a el fwa eokis kapinnielos.” (Genesis 49:19) In tuni ke pal se meet, kas inge me akasorye. Tusruktu ke payeiya, ma inge akkalemye la sruf lun Gad sapkinyuk in lain met lokwalok lalos. Fwin elos oru oinge Jekob el akkeyelos, a met lokwalok inge fwa kaengla ke inkanek lalos, a met Gad fwa ukwelos.

Ma Upa Puspus Su Sun Alu Lasr Ke Pal Inge

6, 7. Fuka oiya a ma sikyuk puspus nu sin met Kristian in pal inge oana sie nu ke ma sikyuk nu sin sruf lal Gad?

⁶ In oana sruf lun Gad, met Kristian puspus in pal inge elos pulakin ma upa puspus a me aktoasr puspus ke akwuk lun Setan; wangin kutena inkanek in menmen ku in eiskutla in tia sun me keok upa puspus ke pal inge. (Job 1:10-12) Pukanten sesr enenu in tu ku ke ma upa puspus orek ke loom lutlut, ke sukyen ma enenu lun moul, a in karungin tulik srisrik puspus. Oasr pa kain in ma upa puspus su kut sifwanu pulakin. Kutu sesr enenu in muteng ke “otunmu in ikwe” lun mas upa ku sekapasrla lun mano. (2 Korint 12:7-10) Kutu met elos tia insemwomwo ke sripen elos pulakin mu wangin sripelos. “Len koluk” lun matou saap kutongye met Kristian matou puspus in tui ke kulansap lalos nu sin Jeova ke sripen ku su oasr yurolos in pal meeta wanginla.​—Ekklisiastis 12:1.

⁷ Met sap Poul el akesmakinye kut la “oasr sie lain lasr . . . lain un ngun koluk yen engyengu.” (Efesus 6:12) Pal nukemwa kut pulakin me sensen su tuku ke “ngun lun fwalu,” ngun lun nunak a oiya koluk su akkeyeyuk sin Setan a dimon nukemwa lal. (1 Korint 2:12; Efesus 2:2, 3) In oana Lot su sangeng sin God, ke pal inge kut ku in sun me keok puspus sin met puspus su raunikutla ke ma elos fwak a oru. (2 Piter 2:7) Kut pulakin pa me sensen ke me kolyai lun Setan. Setan el meuni met lula sin met akmusrala, “elos su liaung ma sap lun God a sruokye lo lun Jisus.” (Fwakyuk 12:17) Wekunang “Sip ngie” lun Jisus elos wi pulakin orekma in lain lun Setan ke inkanek lun me kolyai a akwuk puspus su orek in kutongye lalalfongi lalos.

In Fuleak ku In Lain?

8. Kut fwa lain fuka me akkoluk puspus lun Setan, a efu?

⁸ Mea nunak ku me top lasr nu ke orekma koluk lun Setan? Oana sruf lun Gad in pal meeta, kut enenu in fukoko ke ma lun ngun a akoela in lain Setan fwal nu ke kas in kasru puspus lun God. Sie me asor in fwak, kutu selos mutamwauk in fuleak ke sripen ma upa puspus lun moul, paenang in tille oru kunokon lalos ke ma lun ngun. (Mattu 13:20-22) Sie met lo el fwak ke sripe su paenang supuseni pisen met ma wi ke meeting lun congregation lal: “Brother puspus elos ulle tari. Elos munasla ke ma lun ngun ke sripen ma upa puspus.” Paye, oasr sripe puspus lun met elos in ulle ke pal inge. Paenang, fusresr in nunku mu alu nu sin God pa siepa ma upa, sie kunokon su aktoasrye met. Tusruktu ya nunak sumwos se pa inge​—ku fwal—​ku nunak mwo?

9. In orekmakin srenenu lun Kraist, ma inge kol nu ke mongle fuka?

⁹ Nunku ke ma Jisus el fwak nu sin un met puspus ke pal lal su akmunasyeyukla pa ke sripen ma upa puspus lun moul: “Fwasru nu yuruk, komwos nukemwa su orekma a fwuni, a Nga fwa sot mongle nu sumwos.” Ya Jisus el lungse in akkalemye la in eis mongle enenu in aksrikye orekma in kulansap lun sie met nu sin God? Tia oinge, a Jisus el fwak: “Eis srenenu luk nu fomwos a lutlut sik, tu Nga fwokpap a inse pusisel, a komwos fwa koneak mongle in ngunumwos.” Srenenu pa sie ma su orekla ke sak ku mwusra su orekmakinyuk sin sie met ku sin kosro in us me utuk toasr. Paenang, efu ku, sie met el lungse in eis srenenu oinge? Ya kut tia “us ma toasr tari?” Aok, tusruktu ma simusla ke kas Grik ku in ridiyuk pa ke inkanek inge: “Eis srenenu luk nu fwomwos.” Nunku ke kas inge: Jisus el lungse in kasre kut in us me utuk lasr! Kut tia enenu in oru ma inge ke ku lasr sifwana.​—Mattu 9:36; 11:28, 29, footnote; 2 Korint 4:7.

10. Fwako puspus fuka fwa tuku ke kaifweung lasr in sang mwolana nu sin God?

¹⁰ Kut fwin us srenenu su Jisus el lungse in use nu sesr oana met tuma lutlut lal, ke inkanek inge kut ku in lainul Setan. “Komwos in lain Devil, a el fwa kaengla liki komwos,” Jemes 4:7 el mwolela ka. Tia kalme pa in lain Devil fusresr in orek. In kulansap nu sin God enenu in orek ke paye wikin in kaifweung yok. (Luk 13:24) Tusruktu Baibel el mwolela in Sam 126:5 ke kas oinge: “Elos su taknelik in sroninmet elos fwa kosrani engun.” Aok, kut alu nu sin God su etu paye in sang kulo. El pa “met sang moul nu selos su sokol,” a el akinsemwomwoyelos su oru mwolana paye nu sel.​—Hibru 11:6.

Sang Mwolana nu sin God oana Met Luti ke Togusrai

11. Fuka orekma lun forfor ku in karungin kut liki me akkoluk puspus lun Setan?

¹¹ Jisus el sapkin: “Ke ma inge komwos som a oru met in mutanfwal nukemwa tu elos in met tumuk lutlut.” Orekma in luti peng mwo pa inkanek yok emeet in oru “sie me kise nu sin God ke kaksak.” (Mattu 28:19; Hibru 13:15) In nawela “a fwalkeang niomwos ke me ako lun mwosasu lun misla” pa sie me enenu saok nu ke “me meun nukemwa” lasr​—me loeyuk lasr nu ke orekma koluk puspus lun Setan. (Efesus 6:11-15) In kaksakin Jeova ke orekma in luti lasr pa inge sie inkanek mwo in akkeye lalalfongi lasr. (2 Korint 4:13) Ma inge kasre kut in karungin nunak lasr in tia nunku ke ma puspus su tia mwo. (Filippai 4:8) Ke inkanek in wi ke orekma lun forfor kut engunkin me akkeye su tuku ke asrouki mwo lasr nu sin met lili puspus.

12, 13. Fuka sou puspus ku in eis ma lane ke elos wi pal nu kemwa ke orekma lun forfor? Sang me pupulyuk.

¹² Orekma in luti peng mwo pa sie orekma lun sie sou su ku in akinsemwomwoyelos. Paye, met fwusr elos enenu me akengun mwomwo. Tusruktu, pal ma orekmakinyuk sin sou nu ke orekma lun forfor tia enenu in me aktoasr. Papa a nine enenu in oru orekma lun forfor in oana sropon me insemwomwo lalos ke elos sang akpa nu sin tulik natulos tu elos in oru orekma in luti ke inkanek mwo. Ya met fwusr elos tia engunkin ma puspus elos oru fwin mwo? In akkalemye inkanek sumwos, lela in tia siyuk sin met fwusr alukela ma fwal elos ku in oru, elos enenu in kasreyuk sin papa a nine in ku in koneak engun lalos ke orekma in luti peng mwo.​—Genesis 33:13, 14.

¹³ Oayepa, fwin sie sou elos tukeni kaksakin God elos ku in engun a futoto nu sin sie sin sie. Nunku ke sie sister su mokul tumal su selalalfongi el sisilla wi tulik limekosr natultal su muta yurol. Ke sripe se inge, el sun ma upa a el enenu in orekma in eis kasru nu ke me enenu lun tulik puspus natul. Ya el totola ke orekma lal in paenang el mwulkunla ku pilesru ma enenu in ngun nu sin tulik limekosr natul? El esam: “Nga kaifweung in lutlut Baibel a me rid puspus su tuku in Baibel a nga srike in orekmakin ma nga ridi tari. Pal nukemwa Nga us tulik limekosr nutik nu ke meeting puspus a nu ke orekma lun forfor sie loom nu ke sie loom. Mea fwokin kaifweung puspus luk? Tulik limekosr nukemwa nutik elos baptaisla.” Ke kain in inkanek inge, in wi ke orekma lun forfor ke ku kemwa ku in kasre kom ke kaifweung lom in karungin tulik natum “ke kai a kaiyuk lun Jeova.”​—Efesus 6:4.

14. (a) Ke inkanek fuka met fwusr elos ku in sang mwolana nu sin God in loom lutlut? (b) Mea ku in kasru met fwusr elos in tia “mwekin ke mwosasu”?

¹⁴ Met fwusr, kom fwin muta ke sie an su ma sap el lela metu in sramsram ke alu, ya kom sang mwolana nu sin God ke kom sang ma lo ke loom lutlut, ku kom lela sangeng sin met in tulokinkomi? (Soakas 29:25) Sie met lo fwusr su yea 13-matwel in an Puerto Rico el simusla: “Nga tia na pulakin mwekin in fwakak peng mwo ke loom lutlut meyen nga etu la pa inge ma paye. In class ke loom lutlut pal nukemwa nga srukak pouk a nga srumon ma nga lotela tari ke Baibel. Ke pal se wangin class luk, Nga som nu ke library a ridi buk inge Young People Ask.”a Ya Jeova el akinsemwomwoye kaifweung lun mutan fwusr inge? El fwak: “Kutu pal classmate puspus luk elos siyuk kusensiyuk puspus a siyuk ke sie copy lun buk.” Kom fwin sangeng in oru oinge, saap kom enenu in akpayeye nu sum sifwana “ma mwo a me akinsemwomwo a ma lungse sumwosmwos lun God” ke kom moniyuk in oru lutlut lom sifwana. (Rom 12:2) Kom fwin lalalfongi na paye la ma kom lotela pa ma paye, kom fwa tia na “mwekin ke mwosasu.”​—Rom 1:16.

Sie ‘Srungal Ikak’ nu ke Orekma in Kulansap

15, 16. Kain “srungal lulap su kol nu ke orekma” fuka met Kristian elos ilyak nu ka, a me insemwomwo puspus fuka tuku ka?

¹⁵ Met sap Poul el simusla la “sie srungal lulap su kol nu ke orekma” ikakla tari nu sel. (1 Korint 16:9) Ya pal lom lela nu sum in ilyuk nu ke sie srungul su ikakla nu ke orekma? Nu ke me pupulyuk, fwin ku in wi orekma lun regular ku auxiliary pioneer, enenu in oasr ao 70 ku 50 ke orekma lun forfor ke malem se. Aok, pioneer puspus elos kaksakinyuk sin met Kristian wiyelos ke orekma in kulansap oaru lalos. Tusruktu fwinne paye elos orekmakin pal yok ke orekma lun forfor ma inge tia oru elos in yok liki brother a sister puspus wiyelos. A, elos akyokye akwuk su sapkinyuk sin Jisus: “Kut met kulansap su wangin sripe. Kut oru ma fwal nu sesr in oru.”​—Luk 17:10.

¹⁶ Orekma lun pioneer enenu kut in sifwana lafwekin kutla, in oakiye nu sesr ke nunak paye, a engun in moniyuk ke orekma in kulansap pal nukemwa. Ke ma inge, oasr me insemwomwo puspus. “In orekmakin kas lun God ke inkanek sumwos sie me insemwomwo na paye,” sie pioneer fwusr pangpang Tamika el fwak. “Kom fwin oru orekma lun pioneer, kom orekmakin Baibel pal nukemwa. Inge ke nga som nu ke sie loom nu ke sie loom, Nga ku in esam ma simusla puspus su fwal nu sin kais sie met in loom’u.” (2 Timote 2:15) Sie pioneer pangpang Mika el fwak: “In liye la fuka ma paye kasru moul lun met puspus el sie pa me insemwomwo sakuruk” Sie met fwusr pangpang Mattu el oayepa kaskas ke insemwomwo su ku “in liyeyuk sin sie met su forla nu ke ma paye. Wangin kutena kain in insemwomwo su ku in aolla ma inge.”

17. Fuka sie met Kristian el ku in kutangla pulakin ku nunak sito lal ke orekma lun pioneer?

¹⁷ Ya kom ku in nunku in wi ke orekma lun pioneer? Saap kom lungse in wi tusruktu kom pulakin mu kom tia fwal nu ka. “Pulakin luk ke pioneering tia mwo,” sie sister fwusr pangpang Kenyatte el fwak. “Nga pula mu nga supa. Nga nukin in orekmakin kas in mutamwauk puspus ku in sang topuk su tuku ke ma simusla.” Fwinne oinge, met elder elos ku in pakiye sie pioneer sister su matou in ngun in orekma welul. “Nga insemwomwo in orekma welul,” Kenyatte el esam. “Ma inge oreyu in engunkin in wi ke orekma lun pioneer.” Fwin oasr kutu me kasru a akkeye, saap kom ku in lungse pa in pioneer.

18. Kain in me insemwomwo puspus fuka ku in tuku nu selos su ilyuk nu ke orekma in kulansap lun missionary?

¹⁸ Orekma lun pioneer ku in ikasla srungal nu ke kutu pa kunokon mwomwo ke orekma in kulansap. Ke me pupulyuk, seanyen puspus fwal in eis kunokon lun misssionary a elos supweyukla nu ke mutanfwal saye in oru orekma in luti. Missionary elos enenu in akpayelos nu ke moul lun mutanfwal sasu san, nu ke kas lalos, nu ke fasin lalos, a nu ke kain in mongo puspus nalos. Tusruktu kain in me elya inge nukemwa tia fwal fwin srikeyuk nu ke me insemwomwo puspus su tuku ke kunokon inge. Mildred, sie missionary in an Mexico ke lusen pal loeloes el fwak: “Nga tia na auli ke sulela luk in ekla sie missionary. Pa inge nien sun luk mutamwauk ke nga srakna tulik mutan srisrik.” Kain in me insemwomwo fuka el engunkin? “In mutanfwal sik, in suk met su lungse in lutlut Baibel arulanu upa. In an se inge, oasr Baibel study akosr luk su mutamwauk tari in wi ke orekma lun forfor!”

19, 20. Fuka orekma ke Bethel, orekma in an saye, a Ministerial Training School ku in kasru ke me insemwomwo puspus?

¹⁹ Me insemwomwo puspus oasr pa yurin met su orekma ke branch ofus puspus lun Met Lo lun Jeova pangpang Bethel. Sven, sie brother fwusr su orekma in an Germany, el fwak ke orekma lal in Bethel: “Nga pulakin la ma nga oru el arulanu saok a ku in oan nu tok. Nga ku in orekmakin etauk luk nu ke fwal se inge. Tusruktu in oru oinge e ku in lumeyuk oana mani su filiyuki ke sie bank su apkurun in brok ku bankrupt.” Paye, in oru orekma oana sie volunteer su wangin molo tia fusresr. Tusruktu Sven el fwak: “Fwin kom folok nu in loom sum, kom etu la ma nukemwa su kom oru ke len san ma nu sin Jeova. A ma inge me insemwomwo yok nu sum.”

²⁰ Kutu sin met lili elos engunkin me insemwomwo ke orekma in kulansap in an saye, in musai branch ofus in mutanfwal puspus saye. Seanyen se su kulansap tari ke mutanfwal alkosr elos simusla: “Met lili puspus in an inge elos arulanu mwo. Sie me asor yok in som​—ke pal se akalkosr insiesr in ‘keok,’ kut asor na paye. Fuka lupan mwolana lun experience su kut pulakin tari!” Oasr pa akwuk lun Ministerial Training School. Ma inge sang akpa nu sin brother puspus su soenna payuk fwal in eis kain in me akpa inge. Sie brother su srola tari ka el simusla: “Upa nu sik in akkalemye kas fwal in sang akkalemye kulo nu sumwos ke akwuk mwolana nu ke kain in lutlut inge. Ya oasr kutena u saye su insemwomwo in sang kain in akpa inge?”

21. Kain in me lain fuka met Kristian nukemwa elos sun ke elos oru orekma in kulansap nu sin God?

²¹ Aok, srungal puspus nu ke orekma ikakla. Paye, pus inmasrlos tia ku in oru orekma in kulansap in Bethel ku in sie mutanfwal saye. Jisus sifwana el etu la met Kristian puspus elos fwa isus “fwako” su tia oana sie ke sripen oiya ku luma puspus su tia oana sie. (Mattu 13:23) Ke ma inge, oasr me lain nu sesr oana met Kristian, pa ke ma mwo kut in oru ke ma oasr yurosr​—in sang kasru orekma in kulansap lasr ke insiesr kemwa nu sin Jeova ke ma nu kemwa su sikyuk nu sesr. Kut fwin oru ma inge, kut sang mwolana nu sin Jeova, a kut ku in lalalfongi la el insemwomwo ka. Nunku kel Ethel, sie sister su matou tari el muta ke sie nursing home. El sang ma lo pal nukemwa nu sin met puspus su muta pa in nursing home inge a el sang pa ma lo ke inkanek lun telefon. Fwinne el matou a el munasla tari, el oru orekma in kulansap lal ke insiel-kemwa.​—Mattu 22:37.

22. (a) Ke inkanek puspus fuka saye kut ku in sang mwolana nu sin God? (b) Kain in pal mwolana fuka sane kut?

²² Ke ma inge, esam la orekma in luti peng mwo pa sie inkanek su kut ku in sang mwolana nu sin God ka. Ke kut akkalemye me srikasrak mwo ke oiya lasr, a ke me yun lasr ke kut muta ke nien orekma lasr, ke loom lutlut, a ke loom sesr, kut oru insien Jeova in engun. (Soakas 27:11) Soakas 28:20 el mwolela: “Sie met oaru el fwa eis me insemwomwo puspus.” Paenang, kut enenu in ‘taknelik pus’ ke orekma in kulansap lasr nu sin God, in etu la kut fwa kosrani me insemwomwo puspus. (2 Korint 9:6) In oru oinge, kut fwa engunkin sie moul mwomwo ke pal se “ma moul nu kemwa su oasr momong” fwa sang mwolana su arulanu fwal nu sin Jeova!​—Sam 150:6.

[Footnote]

Ya Kom Esam?

• Fuka met kulansap puspus lun God elos kulansupal ke “len a fong”?

• Kain in me lain fuka sruf lal Gad elos sun, a mea ma inge luti nu sin met Kristian in pal inge?

• Ke inkanek fuka orekma lun forfor el oana me karungin liki orekma in akkoluk lun Setan?

• Mea se inge ‘srungal ikakla’ su kutu met lili elos ilyuk nu ka, a kain in me insemwomwo fuka elos engunkin?

[Picture on page 23]

In oana ke met Gad elos meun lain un met meun koluk, Met Kristian puspus elos enenu pa in lain orekma koluk puspus lun Setan

[Picture on page 25]

Kut engunkin asrouki mwo su akkeye kut ke orekma lun forfor

[Pictures on page 26]

Orekma lun pioneer ku in ikasla srungal nu ke kunokon puspus saye, wekunang:

1. Orekma in kulansap in mutanfwal saye

2. Orekma in kulansap in Bethel

3. Orekma in kulansap oana Missionary