Nunku Ke Ma Lun Ngun A Moul!
“Nunuk lun ngun moul.”—ROM 8:6.
1, 2. WKain in ma tia oanu sie fuka Baibel el oru inmaslon “ikwe” a “ngun”?
TIA fwusesr in srukye oiyen moul nasnas ye mutun God ke kut muta ke sie fwal su arulanu akfulatye orekma in akinsemwomwoye kena lun ikwe. Tusruktu, Ma Simusla el aketeye ke ma su tia oanu sie inmaslon “ikwe” a “ngun,” a el akkalemye na paye ke inkanek lun ma upa su sikyuk fwin sie met el lela ku lun ikwe in ilyuk nu in el a ke me insemwomwo su tuku fwin sie met el lela nu sel sifwanu ku lun ngun mutal lun God.
2 Ke sie me pupulyuk, Jisus Kraist el fwak: “Ngun me sang moul; wangin sripen ikwe. Kas su Nga fwak nu sumwos, kas inge ngun, a moul.” (Jon 6:63) Nu sin met Kristian fwin an Galetia, met sap Poul el simusla: “Tu ikwe lungse lain ngun, a ngun lain ikwe; tu ma inge lain sie sin sie.” (Galetia 5:17) Poul el ouyepa fwak: “Tu el su taknelik nu ke ikwel sifwanu, sin ikwe el fwa kosrani punoela; a el su taknelik nu ke ngun, sin ngun el fwa kosrani moul ma patpat.”—Galetia 6:8.
3. Mea eneneyuk tu kut in sukosokla liki kena koluk a in oru ma koluk?
3 Ngun mutal lun Jeova—ku lal—ku in eisla liki kut “kena lun ikwe” su tia nasnas a ke kolyuk koluk lun ikwe. (1 Piter 2:11) In sukosokla liki me kapur lun kena koluk, arulanu yok sripe in oasr me kasru tuku ke ngun mutal lun God, meyen Poul el simusla: “Tu nunuk lun ikwe mise; a nunuk lun ngun moul a misla.” (Rom 8:6) Mea kalmen nunuk lun ngun?
“Nunuk lun Ngun”
4. Mea kalmen “nunuk lun ngun”?
4 Ke pal se Poul el simusla “nunuk lun ngun,” el orekmakin sie kas Greek su akkalemye “inkanek in nunuk, nunuk su (-oakiyuki tari), . . . nien sun, ma kom lungse, ma kom kaifweung in oru.” Kas inge verb se su ku in kalmekin “in nunku, in nunku ke sie inkanek.” Ke ma inge, nunuk lun ngun ku in kalmekin inkanek ye koko, akpusisilyeyuk, a mokleyuk ke ngun mutal lun Jeova. Ma inge akkalemye la kut insemwomwo in lela nunuk lasr, kena lasr a nien sun lasr in oan ke inkanek su oan ye koko lun ngun mutal lun God.
5. Lupaka enenu lasr in akpusisilye kut sifwanu nu ke me akkeye lun ngun mutal?
5 Lupa ka kut enenu in oru in akpusisilye kut sifwanu ke me akkeye lun ngun mutal akkalemyeyuk sel Poul ke pal se el sramsram ke moul lal oanu ‘met kulansap lun ngun.’ (Rom 7:6) Ke sripen lalalfongi lalos ke me kise lun Kraist, met Kristian nu kemwa elos aksukosokyeyuk liki kolyuk lun ma koluk a ke ma inge elos lumeyuk nu ke “mise” ke moul lalos meet oanu met kos. (Rom 6:2, 11) Elos nu kemwa su mise ke sie kas pupulyuk elos srakna moul in manolos a ke pal inge elos sukosok in fwasr tokin Kraist oanu “met kulansap lun sumwosmwos.”—Rom 6:18-20.
Sie Ekla Lulap
6. Kain in ekla fuka nu sin met nu kemwa su ekla “met kulansap lun sumwosmwos” elos pulakin”?
6 Ekla lun ma inge mutamwauk ke moul lun sie met su “met kos lun ma koluk” nu ke el ekla met kulansap lun God su “met kos lun sumwosmwos” el sie me insemwomwo na paye. Nu selos su pulakin ekla inge, Poul el simusla: ‘Komwos aknasnasyeyuk tari, a komwos akmutalyeyuk tari, a komwos aksumwosyeyuk in en Leum Jisus Kraist, a in ngun lun God lasr.’—Rom 6:17, 18; 1 Korint 6:11.
7. Efu ku arulanu yok sripe in srukye nunuk lun Jeova nu ke ma nu kemwa?
7 In pulakin kain in ekla lulap inge, kut enenu meet in lutlut ke nunuk lun Jeova ke ma nu kemwa. Century puspis somla, met on Devid el pre nu sin God ke insiel: “Fwakak inkanek lom nu sik, O Jeova . . . Kol yu in paye lom a luti yu.” (Sam 25:4, 5) Jeova el porongel Devid, a El ku in topok kain in pre inge nu sin met kulansap lal ke pal inge. Ke sripen inkanek a paye lun God arulanu nasnas a mutal, paenang orekmakinyen ma inge sie me kasru yok nu sesr kut fwin srifweyuk nu ke kena koluk lun ikwesr.
Orekma Saok nu ke Kas lun God
8. Efu ku arulanu yok enenu nu sesr in lutlut ke Baibel?
8 Kas lun God, Baibel, sie buk su etuku ku ngun mutal lal. Ke ma inge, arulanu yok sripe nu sesr in lela ngun inge in orekma in kut ke kut rid a lutlut ke Baibel—len nu kemwa fwin ku. (1 Korint 2:10, 11; Efesus 5:18) Kut fwin nekla nunuk lasr a insiesr ke ma paye a ma sap lun Baibel ma inge fwa kasru kut in lain kutena me srifwe nu ke lalalfongi lasr. Aok, fwin me srifwe in oru orekma lun kosro sikyuk, ngun mutal lun God ku in akismakinye kut ke kas in luti lun Ma Simusla a ma sap nu kemwa su ku in kol kut a akkeye kut in oru orekma fwal nu ke ma lungse lun God. (Sam 119:1, 2, 99; Jon 14:26) Ke ma inge, kut nu kemwa tia ku in keapeyukla ke kutena ma in fwasr tokin inkanek sesumwos.—2 Korint 11:3.
9. Fuka ku lutlut lasr ke Baibel akkeye sulela lasr in kurungin futoto lasr nu sin Jeova?
9 Ke kut tafwela in oru lutlut mwo ke Ma Simusla ke kasru lun me rid puspis su tuku ke Ma Simusla, ngun mutal lun God ku in mokleyuk nunuk lasr a insiesr, oru kut in akfulatye ma sap lun Jeova ke inkanek yok. Futoto lasr nu sin Jeova pa yok emeet in moul lasr. Ke pal se kut sun me srifwe, lela kut in tia nunku yok ke lupan me insemwomwo su tuku ka. A, ma kut nunku meet pa in srukye oaru lasr nu sin Jeova. Sie me insemwomwo lulap ke futoto lasr nu sel ku in mokle kut in lain kutena kena koluk su ku in akkolukye ku kunausla ma inge.
“O Fuka Nga Lungse Ma Sap Lom!”
10. Efu ku in akos ma sap lun Jeova yok sripe in nunku ke ma lun ngun?
10 Etauk mukena ke Kas God lun tia fwal, kut fwin nunku ke ma lun ngun. Togusra Solomon el kalem na paye ke ma sap lun Jeova, tusruktu el tia akos ma inge ke pal se el matou. (1 Togusra 4:29, 30; 11:1-6) Kut fwin nunku ma lun ngun pal nu kemwa, kut ku in liye ke me enenu la in etu mukena ma Baibel el fwak tia fwal, a kut enenu pa in akos ma inge ke insiesr kemwa. Kalmen ma inge pa, kut enenu na paye in orekmakin insiyesr ke kut tuni ma sap lun Jeova a kut enenu in kaifweung in akos ma inge. Oasr kain in oiye inge yurin met sim lun Sam. El on: “O fuka Nga lungse ma sap lom! Nga nunku ka in len nu fon.” (Sam 119:97) Ke pal se kut nunku yok in akos ma sap lun God, kut akkeyeyuk in akkalemye oiye lun God. (Efesus 5:1, 2) Lela kut in tia loang nu ke ma koluk, a kut akkalemye fwako lun ngun, a kena yok in akinsemwomwoye Jeova ku in kasre kut in fwasr liki “orekma lun ikwe” su koluk.”—Galetia 5:16, 19-23; Sam 15:1, 2.
11. Fuka kom ku in aketeye la ma sap lun Jeova ke kosro sie me loeyuk nu sesr?
11 Fuka kut ku in akyokye akfulat a lungse ke ma sap lun Jeova? Sie inkanek pa ke kut arulanu taran in tuni ma saok su tuku ka. Loang akmwoye nu ke ma sap lun God su kurungin orek fwako sin seanyen payuk mukena a ke ma sap su lain orek kosro lun met payuk a met lolap. (Hibru 13:4) Ya akos lasr nu ke ma sap inge eisla kutena ma mwo liki kut? Ya sie Papa lun lungse in kosrao su lungse kut el ku in orala sie ma sap su tia ase nu sesr me insemwomwo? Paye, el tia ku in oru ou inge! Liye ma su sikyuk nu ke moul lun met puspis su tia moul fwal nu ke ma sap lun Jeova ke oiyen moul nasnas. Kutu puteteyuk ke tia lungse lalos, pal nu kemwa kol nu ke uniye lun tulik srisirk ke pal se elos srakna oan ke insien nine se ku elos payuk fwinne elos sonna akola su ku in kol nu ke asor. Met puspis su wangin mokul tuma ku mutan kie elos sifwanu kurunganang tulik nutulos. Sayen ma inge, elos nu kemwa su oru orekma lun kosro elos orala moul lalos nu ke me sensen in eis mas su sa in fwasrelik ke sripen kosro. (1 Korint 6:18) A fwin sie met kulansap lun Jeova el kosro, oiyen pulakin lun met inge arulanu akkolukyeyuk na paye. Kaifweung suk in mulkunla ma koluk inge tu upa in wanginla su arulanu akkolukyel oru el an tia ku in motul a keok in nunuk ke fong puspis. (Sam 32:3, 4; 51:3) Ke ma inge, arulanu kalem la, ma sap lun Jeova ke kosro orekla in kurungin kut? Aok, oasr ma lane yok su kut ku in eis kut fwin srukye sie moul nasnas!
Pre Ke Kasru lun Jeova
12, 13. Efu ku arulanu fwal in pre fwin kena koluk srifwe kut?
12 Nunuk ke ma lun ngun enenu in tuku ke insiesr na paye ke pal in pre nu kemwa. Arulanu fwal in siyuk ke kasru lun ngun mutal lun God, meyen Jisus el fwak: “Na komwos . . . fwin etu fuka in sang me sang mwo nu sin tulik nutumwos, fuka yokiyen Papa tumomwos su in kosrao el fwa sang ngun mutal nu selos su siyuk sel!” (Luk 11:13) Ke pre lasr, kut ku in akkalemye lalalfongi lasr ke ngun mutal in kasru kut ke munas lasr. (Rom 8:26, 27) Kut fwin akilen la kena koluk ku orekma koluk akkolukye kut, ku fwin sie met lili wiesr su kulang el akkalemye ma inge nu sesr, e mwo fwal nu ke sie inkanek lalmetmet in sramsramkin ma upa inge ke pre a siyuk sin God ke kasru in kutangla nunuk koluk inge.
13 Jeova el ku in kasru kut in loang mwo nu ke ma sumwosmwos, nasnas, mwo oiye, a ke me kaksak puspis. A arulanu fwal in siyuk ke insiesr in oru “misla lun God” in kurungin insiesr a ku lasr in nunuk! (Filippai 4:6-8) Ke ma inge lela kut in pre ke kasru lun Jeova nu sesr in “fwasr tokin sumwosmwos, mutal, lalalfongi, lungse, mongfwusesr, fwokpap.” (1 Timote 6:11-14) Ke kasru lun Papa tumasr in kosrao, asor lulap a me srifwe fwa tia kutangkutla paenang wanginla ku lasr nu ka. Tusruktu, moul lasr fwa arulanu akilenyuk ke misla su tuku sin God.
Lela Kom in Tia Akasorye Ngun Mutal
14. Efu ku ngun mutal lun God el sie me akkeye nu ke oiyen moul nasnas?
14 Met kulansap lun Jeova su matu in ngun elos orekmakin na paye kai lal Poul: “Nik komwos kunela ngun mutal.” (1 Tessalonika 5:19) Ke sripen ngun mutal lun God el sie “ngun lun ma mutal,” paenang el nasnas, a mutal. (Rom 1:4) Ke pal se ma inge orekma in kut, ngun mutal el akilenyuk oanu sie ku lun ma mutal, ku nasnas. Ma inge kasru kut in srukye sie moul nasnas su ku in akilenyuk ke akos lasr nu sin God. (1 Peter 1:2) Kutena orekma fokfok akilenyuk ke sripen pilesru nu ke ngun mutal, a ma inge ku in kol nu ke ma upa. Ke inkanek fuka?
15, 16. (a) Fuka kut ku in aktoasrye ngun mutal lun God? (b) Fuka kut ku in tia aktoasrye ngun mutal lun Jeova?
15 Poul el simusla: “A komwos in tia aktoasrye ngun mutal lun God, in el su komwos siliyuki tari nu ke len in molela.” (Efesus 4:30) Ma Simusla el akilen ngun mutal lun Jeova oanu seal se, ku sie ‘me akpayeye nu ke ma e fwa tuku,’ nu sin met Kristian akmusrala. A pa inge moul ma patpat in kosrao su tia ku in akkolukyeyuk. (2 Korint 1:22; 1 Korint 15:50-57; Fwakyuk 2:10) Ngun mutal lun God ku in kol met akmusrala a met nu kemwa su asrouki nu selos su oasr fwinsrak in moul nu fwin fwalu ke sie moul oaru a ku in kasrelos in fwasr liki orekma koluk.
16 Met sap el sang kas in sensen in lain kena lun orekma kikiap, pusrapasr, oiye koluk, a ma puspis saye. Kut fwin lela moul lasr in engunkin ma inge nu kemwa, na kut mutamwauk in lain kas in kai su tuku ke Kas lun God su etuku ke ngun. (Efesus 4:17-29; 5:1-5) Ke ma inge, kut fwin akasorye ngun mutal, su ke payeiya, kut srunga in oru ma inge. Ke sripe se inge, fwin oasr kutena met inmaslosr mutamwauk in pilesru kas in kai su tuku ke Kas lun Jeova, saap kut mutamwauk pa in akyokye sie kain in orekma koluk ke lungse lasr sifwanu a in tula na paye liki insemwomwo lun God nu sesr. (Hibru 6:4-6) Fwinne kut tia oru ma koluk ke pal inge, tusruk saap kut mutamwauk in som nu ke inkanek inge. Kut fwin tafwela na in oru orekma su tia fwal nu ke kolyuk lun ngun mutal lun God, na kut mutamwauk in aktoasrye ma inge. Kut mutamwauk pa in lain a aktoasrye Jeova, el su sropon ngun mutal. In oanu met su lungse God, kut enenu in srunga in oru ma inge. A, lela kut in pre nu sin Jeova ke kasru tu kut in tia aktoasrye ngun mutal lal a kut in akfulatye e mutal lal ke kut tafwela na in nunku ke ma lun ngun.
Kaifweung In Nunku ke Ngun
17. Mea kutu nien sun in ngun su kut ku in oakiye, a efu ku kaifweung lasr in sun ma inge sie inkanek lalmetmet?
17 Sie inkanek mwo tu kut in tafwela na in nunku ke ngun mutal pa in oakiye nien sun mwo ke ma lun ngun a kaifweung in sun nien sun inge. Fwal nu ke enenu lasr a ku lasr, kut ku in toeni nu ke nien sun lasr in orekma in akkapye oiye lasr ke lutlut, akyokye akesrui lasr ke orekma in luti, ku in sroang nu ke kutu orekma yok, oanu orekma lun pioneer, orekma ke Bethel, ku oru orekma lun missionary. Ma inge ku in kasru nunuk lasr in kafofo ke ma lun ngun a ma inge ku in kasru kut in lain a tia putatla nu ke kena lun ikwe ku in sremla nu ke nien sun ke ma lun ikwe a kena koluk su arulanu pengpeng ke fwal se inge. Paye, pa inge sie inkanek lalmetmet, meyen Jisus el kaifwe: “Nik komwos elosak ma saok nu sumwos fwin fwalu, yen mwotil a ras kangla, a yen met pusrapasr kunauselik a pusre. A elosak ma saok nu sumwos in kosrao, yen mwotil a ras tia kangla, a yen met pusrapasr tia kunauselik ku pusre. Tu yen ma saok lomwos on we, insiomwos fwa on we pa.”—Mattu 6:19-21.
18. Efu arulanu yok sripe in kaifweung in nunku ma lun ngun ke len safla inge?
18 Nunku ke ngun a in kutongye kena koluk lun fwal se inge pa inkanek lalmetmet emeet nu ke “len safla” se inge. (2 Timote 3:1-5) Aok, ou inge, meyen “fwalu wanginla, a lung kulokla, a el su oru ma lungse lun God fwa muta ma patpat.” (1 Jon 2:15-17) Ke sie me pupulyuk, fwin sie met Kristian fwusr el sun nien sun lun orekma lun pioneer, ma inge ku in ekla sie me kasru nu sel ke lusen pal in ma upa oanu sie met fwusr. Fwin mokleyuk el sin kutu met in kunausla ma sap lun God, kain in met inge ku in srukye nunuk sumwos ke ma el enenu in oru ke orekma lun God. Kain in met inge su nunku ke ma lun ngun el ku in akilen la sie inkanek lalfon, ku koluk, pa in kunausla nien sun lalos ke ma lun ngun ke sripen lungse ke ma lun fwalu ku me insemwomwo su tuku ke mwolela lun ma koluk. Esam Moses su nunku yok ke ma lun ngun su ‘nunku tu keok yurin met lun God mwo liki engun ke ma koluk in kitin pal na.’ (Hibru 11:24, 25) Fwinne met fwusr ku met matu, kut oru pa kain in sulela inge ke pal se kut kaifweung in nunku ke ma lun ngun a tia ma lun ikwe.
19. Kain in ma lane fuka kut ku in engunkin kut fwin kaifweung in nunku ke ma lun ngun?
19 “Nunuk lun ikwe me lokwalok nu sin God,” a, “nunuk lun ngun moul a misla.” (Rom 8:6, 7) Kut fwin kaifweung in nunku ke ngun, kut fwa pulakin misla yok. Insiesr a ku lun nunuk lasr ku in kurunginyuk in lain me akengun lun kena koluk lasr. Kut ku in lain me srifwe lun ma koluk nu ke inkanek mwo. A fwa oasr yurosr me kasru yok su tuku sin God in kutangla me keok su sikyuk inmaslon ikwe a ngun.
20. Efu kut ku in lalalfongi na paye la kut ku in kutangla ke meun inmaslon ikwe a ngun?
20 Kut fwin tafwela na in nunku ke ngun, kut ku in srukye na moul futoto nu sin Jeova, el su sropon moul a ngun mutal. (Sam 36:9; 51:11) Setan su Devil a met kulansap lal nu kemwa elos oru ma nu kemwa ke ku lalos in kunausla futoto lasr nu sin Jeova God. Elos srike in filiye nunuk lasr ye koko lalos, meyen el etu la kut fwin fuleak, ma inge ku in kol nu ke meun lasr lain God a nu ke mise. Tusruktu, kut ku in kutangla ke meun inmaslon ikwe a ngun inge. Pa inge ma Poul el pula, meyen ke pal se el simusla ke meun lal sifwanu, el siyuk meet: “Su a fwa tulayula liki monin mise se inge?” Ou inge, in akkalemye la oasr me kasru yurol, el fwak: “Nga kulo nu sin God ke Jisus Kraist Leum lasr!” (Rom 7:21-25) Kut ku in ouyepa sang kulo nu sin God ke Kraist ke el ase nu sesr inkanek in muteng ke munas lun met a in tafwela in nunku ke ngun wikin fwinsrak ke moul ma patpat.—Rom 6:23.
Ya Kom Esam?
• Mea kalmen in nunku ke ma lun ngun?
• Fuka kut ku in lela ngun mutal lun Jeova in orekma nu sesr?
• Aketeye efu, ke meun lasr lain ma koluk, arulanu yok sripe in lutlut Baibel, in akos ma sap lun Jeova, a in pre nu sel.
• Fuka orekma lasr in oakiye nien sun ke ma lun ngun ku in kurungin kut ke inkanek som nu ke moul?
[Picture on page 14]
Lutlut ke Baibel kasru kut in tu ku ke meun lain kutena ma su ku in akkolukye ku lasr in ngun
[Picture on page 15]
Arulanu fwal in pre ke kasru lun Jeova in kutangla liki kena koluk lasr
[Pictures on page 16]
Nien sun lasr ke ma lun ngun ku in kasru kut in kaifweung in nunku ke ma lun ngun