Report Ke Met Fwakelik Togusrai

India​—“Inse Siefwunnu Inmaslon Kain in Ma Puspis”

“INSE siefwunnu inmaslon Kain in ma puspis” pa sie soakas su arulanu pengpeng in akkalemye toeni lun kain in met puspis in an India. In srukye inse siefwunnu ke an lulap inge su oasr ke kain in fasin puspis, kas puspis, alu puspis, u puspis, nuknuk puspis, a me mongo puspis tia fwusesr. Tusruktu, kain in inse siefwunnu inge ku in liyeyuk ke ofus lulap lun Met Lo lun Jeova fwin an India, fwinne met orekma nu kemwa su pangpang volunteer ku met orekma su wangin molo su muta a orekma we tuku ke kain in states a territory puspis a kaskaskin kain in kas puspis.

• Lela kut in loang meet nu sel Rajrani​—sie mutan fwusr su tuku fwin an Punjab, sie an loes fwin an India leyen Eir. Ke pal se Rajrani el srakna lutlut, oasr sie sin classmate lal el mutamwauk in lutlut Baibel nu sin Met Lo lun Jeova. Mutan fwusr se inge el srike in akkeye pwar lun Rajrani ke Baibel. Ke sripen etauk ke kas English lun classmate se lal inge tianu yok a Tauer In San el tia orekla ke kas Punjabi ke pal se inge, paenang el siyuk sel Rajrani el an kasrel langasla koanon magasin inge nu sel. Ma Rajrani el rid ke Tauer In San mutamwauk in purakak insiel ke inkanek yok paenang fwinne papa a nine kiel elos srunga ma el oru inge, el arulanu kapkapek ne ke na el mwolela moul lal nu sin Jeova God. El orekma ke Bethel fwin an India ke pal inge, el oru orekma su ikasla mutal ke ma paye. El leng me rid lun met Kristian nu ke kas Punjabi!

• Loang akmwoye pa nu sel Bijoe, su tuku pa ke an saye fwin an India​—an Epang lun India, state lun Kerala. Bijoe el sisila liki high school meyen el srunga in wi ke lusen pal in akfulat pangpang nationalistic. Tokin sie court case loeloes lun court su aksafyeyukla tu na wi akmwuk lun alu nasnas, Bijoe el folokunyukla nu ke loom lutlut lal.a El som pa nu ke college in lutlut. Tusruktu, moul kosro ke loom lutlut arulanu akkolukye moul lal, ke ma inge el tui ke yiu se meet lal we. Ke pal inge, tokin yiu siengoul ke muta lal ke Bethel, el pulakin la el eis me insemwomwo yok ke el wi ke sou lun Bethel su tuku ke kain in an nu kemwa tusruktu elos srukye inse siefwunnu, mwo liki lutlut fulat su el akola in eis meet.

• Norma a Lily elos kemwanu yiu 70 kutu matwe a elos mutan katinmas ke lusen yiu puspis. Elos kemwanu orala yiu 40 kutu ke orekma lun forfor oanu sie pioneer. Lily el orekma ke branch ofus ke lusen yiu 20 kutu oanu sie met leng ke kas Tamil. Norma el tuku nu Bethel ke yiu 13 somla tokin mise lun mokul tumal. Sayen me srikasrak mwo ke moniyuk a met orekma mwo, elos oanu me akkeye nu ke inse siefwunnu lun sou lun Bethel. Elos insemwomwo in akpwarye met su mutana, a elos engunkin asrouki lalos nu sin met fwusr ke sou su muta Bethel, elos sromon me insemwomwo yok su tuku ke moul in Kristian ke lusen yiu puspis. A met fwusr nu kemwa akkalemye pa insemwomwo lalos ke pal se elos sulilos nu in room selos in asrouki nu selos a in sang kasru nu selos fwin eneneyuk. Sie me srikasrak mwo na paye pa inge!

Meyen elos kutangla liki kain in oiye puspis su tia oanu sie a srisri in an puspis, paenang met inge nu kemwa su kisekin moul lalos nu ke orekma su wangin molo elos insemwomwo in tukeni orekma in kulansap nu sin kutu met oanu sie sou lun Bathel su oasr inse siefwunnu lalos fwin an India.​—Sam 133:1.

[Footnote]

[Picture Credit Line on page 18]

Background: Mountain High Maps® Copyright © 1997 Digital Wisdom, Inc.