Lela Ku lun God in Kol Kom nu ke Moul a Misla

“Tia fwafwasryesr fwal nu ke ikwe, a fwal nu ke ku lun God.”—ROM 8:4, NW.

1, 2. (a) Me sensen fuka ku in sikyak fwin oasr ma puspus su akkolukye sie met ke el kasrusr ke sitosa? (b) Me sensen fuka ku in sikyak fwin oasr ma puspus su akkolukye kut ke alu lasr nu sin Jeova?

OASR sie met kol ke guferment lun an Merika el fwak mu oasr met puspus su kasrusrkin sitosa okwelos tusruk tia loang akmwoye ka, a ma upa inge yokyokelik yea nukewa. Ke sie me pupulyuk, fwin elos orekmakin cell phone ke elos kasrusr ke sitosa okwelos, ma inge ku in akkolukyelos. Oasr met puspus su sun accident, ku lukun na sun accident, meyen driver saye el orekmakin cell phone ke el kasrusr ke sitosa okwel. Saap metu elos nunku mu elos orekmakin mwo pal lalos fwin elos orekmakin cell phone ke elos kasrusr ke sitosa, tusruktu ma inge ku in sripen sie accident upa.

² Sie met su tia loang akmwoye ke kasrusr lal tia liye me sensen ke inkaneku. Oiya oapana inge ku pa in sikyak ke fototo lasr nu sin Jeova. Kut fwin lela ma puspus in akkolukye kut, ma inge arlana sensen. Poul el fwak la lulalfongi lasr ku in musalla oana soko oak musalla. (1 Timote 1:18, 19) Met sap Poul el akkalemye kas in sensen inge ke pal se el simusla nu sin met Kristian su oasr in an Rom: “Orekma in nunku ke ikwe kalmekin nu ke mise, a in nunku ke ku lun God kalmekin nu ke moul a misla.” (Rom 8:6, NW) Mea kalmen kas lal Poul inge? Kut oru fuka in tia “nunku ke ikwe” a kafweang yok in “nunku ke ku lun God”?

“Wangin Lusla Nu Selos”

3, 4. (a) Poul el simusla ke kain in oiya upa fuka su el sifwana pulakin? (b) Efu ku kut nunku pa ke oiya su sikyak nu sel Poul?

³ Ke leta lal nu sin met Kristian in an Rom, Poul el simusla ke ma upa yok su el pulakin ke moul lal. El fwak la el pula mu nunak a laan manol lain sie sin sie. (Ridi Rom 7:21-23.) Poul el tia kaskaskin ma inge in orala kain in sripe puspus nu ke ma el oru ku ke sripen el pakomutal sifwana. El tia akkalemye la el tia ku in oru ma su sumwos. El sie met Kristian su fokoko ke lulalfongi, sie met akmusrala a God el sulella in supweyukla oana met sap nu sin met lun mutunfwal puspus. (Rom 1:1; 11:13) Ke ma inge efu ku Poul el simusla ke oiya upa inge su el pula?

⁴ Poul el fwak mu el tia ku in oru ma lungse lun God ke inkanek su el lungse na paye in oru. Efu ku el tia ku? El fwak: “Met nukewa orekma koluk, a elos nukewa tia sun lupan wolana se ma God el akoo nu selos.” (Rom 3:23, LSK) In oana tulik nukewa natul Adam, Poul el sie met sesumwos a oasr pa kena koluk lal. Kut ku in kalem ke pulakin lal. Kut kafweang pa in lain oiyen sesumwos lasr a kena koluk lasr len nukewa. A oasr ma puspus su ku in kufuskutla ke orekma in kulansap lasr nu sin God a oru kut in fwasr liki inkanek ousriksrik su kol nu ke moul. (Mattu 7:14) Tusruktu oiya inge su Poul el pula tia kalme mu wangin fwinsrak lal, a oapana kut.

5. Poul el eis oya me kasru a me akkeye?

⁵ Poul el siyuk la su ku in molella liki ma upa su el pula, a tokin ma inge el fwak: “Nga kulo nu sin God ke Jisus Kraist Leum lasr.” (Rom 7:24, 25) A, Poul el kaskas pa nu sin met Kristian akmusrala, met su “ma sefwanna yurin Kraist Jisus.” (Ridi Rom 8:1, 2.a) Jeova el nutelosla oana tulik natul ke inkanek lun ku lal. El oralos “met usru yurin Kraist.” (Rom 8:14-17) Ku lun God a lulalfongi su elos akkalemye ke me kise lun lango lun Jisus kasrelos in kutangla ke meun lalos oana ke ma Poul el kaskaskin. Ke ma inge God el tila selngawelos ke sripen oiyen sesumwos lalos. Elos sukosokla “liki masap lun ma koluk a mise.”

6. Efu ku met kulansap nukewa lun God enenu in eis kalem ke kas lal Poul?

⁶ Fwinne Poul el sramsram nu sin met Kristian akmusrala, ma el fwak ke ku mutal lun God a ke me kise lun lango lun Jisus ku in akinsemwomwoye met kulansap nukewa lun Jeova, fwinne oasr fwinsrak lalos in moul in kosrao ku fwin fwalu. God el kasrel Poul ke kas in kasru su el simusla, ke ma inge yok sripe nu sin met kulansap nukewa lun God in kalem a akos ke ma el simusla.

God El Lusla Fuka Ma Koluk lun Ikwe

7, 8. (a) Ke inkanek fuka Masap el “munas in ikwe”? (b) Mea God el oru ke inkanek lun ku lal a me kise lun lango?

⁷ In Rom sapta 7, Poul el akuteye la met sesumwos oasr ke ku lun ma koluk. In sapta 8 el sramsram ke ku lun God. El akuteye la ku lun God ku in kasru met Kristian nu ke kafweang lalos in lain ku lun ma koluk. Ma inge ku in kasrelos in oru ma Jeova el lungse a eis me insemwomwo lal. Poul el akuteye la God el orekmakin ku lal a me kise lun lango lun Kraist in oru ma se su Masap itukyang nu sel Moses tia ku in oru.

⁸ Masap el lusla met orala ma koluk meyen metu tia ku in oru a akos ma nukewa su sapkinyuk ke Masap inge. Sayen ma inge, met tol fulat su kulansap ye Masap elos met sesumwos a tia ku in kisekin me kise fwal in eisla ma koluk. Ke ma inge, God el supwema Mwen natul oana met ke “luman ikwe su koluk,” a me lango lal “lusla ma koluk lun ikwe.” Me kise lun Jisus ku in molela metu liki ma koluk. Ke sripen oasr lulalfongi lun met Kristian akmusrala ke me kise lun Jisus, paenang Jeova el ku in nunku kelos oana met sumwosmwos. Kas in kasru lal Poul akkeye met Kristian akmusrala in tia fwufwasryesr fwal nu ke ikwe, a fwal nu ke ku lun God. (Ridi Rom 8:3, 4.b) Elos enenu in oru ma inge nu ke saflaiyen moul lalos fwin fwalu. Fwin elos oaru, elos fwa eis “tefuro lun moul.”—Fwakyuk 2:10.

9. Mea kalmen kas se inge “masap” in Rom 8:2?

⁹ Poul el sramsram pa ke “masap lun ku lun God” a ke “masap lun ma koluk a mise.” (Rom 8:2, NW) Mea kalmen masap nukewa inge? Kas su el orekmakin nu ke fus se inge tia kalmekin nu ke akwuk lun masap su oasr ke Masap su itukyang nu sel Moses. Oasr sie buk akkalemye la kas Grik ke “masap” kalmekin nu ke ma se su sang kasru ku kufusla orekma lun sie met, fwinne ma inge mwo ku ma koluk. Ma inge ku in kalmekin pa nu ke kas in kasru puspus la fuka sie met el moulkin moul lal.

10. Masap ke ma koluk a mise kutongkuti fuka?

¹⁰ Met sap Poul el simusla: “Oana ke sie met ma koluk ilyuk nu fwalu, a mise ke ma koluk, a ouinge mise tuku nu fwin met nu kemwa, meyen elos nu kemwa oru ma koluk.” (Rom 5:12) Ke sripen kut nukewa ma natul Adam, masap lun ma koluk a mise kutongkuti. Ke sripen kena koluk lasr, kut oru ma puspus su tia akinsemwomwoye God. Tusruktu ma inge nukewa kol nu ke mise. Ke leta lal nu sin met Kristian in an Galetia, Poul el fwak la orekma a oiya koluk inge pa “orekma lun ikwe.” A el fwak pa la: “Elos su oru ma ou inge fwa tia usru in togusrai lun God.” (Galetia 5:19-21) Met su oru ma inge elos fwufwasryesr “fwal nu ke ikwe.” Elos oru kena lalos in ikwe. (Rom 8:4) Kena lun ikwe sesumwos lalos moklelos in oru ma puspus. Tusruktu, met su orek ma koluk oana orekma lun kosro, alu nu ke ma srolela, orekma lun inutnut, ya elos mukena akos kena koluk lalos in ikwe? Mo. “Orekma lun ikwe” su simusyukla in Galetia oasr pa ma puspus wi ka su met puspus elos nunku mu orekma inge me munas mukena lun sie met. Wekunang ma inge pa lemta, kasrkusrak, amei, a sok. Kut fwa tia nunku mu kut tia enenu in lain kena koluk lun ikwesr.

11, 12. Mea Jeova el orala in aksukosokye kut liki masap lun ma koluk a mise? Mea kut enenu in oru in oasr me insemwomwo lun God?

¹¹ Kut insemwomwo meyen Jeova el orala akwuk in aksukosokye kut liki ma koluk a mise! Jisus el fwak: “God El lungsel fwalu ouinge, tu El ase Mwen siefwanna isusla natul, tu el su lalalfongel fwa tia tula, a el fwa eis moul ma patpat.” Kut fwin moulkin moul ke sie inkanek su akkalemye la kut lungse God a oasr lulalfongi lasr ke me kise lun lango lun Jisus, kut ku in sukosokla liki nununku su tuku ke ma koluk. (Jon 3:16-18) Kut fwa pula oana ma Poul el pula ke pal se el fwak: “Kulo nu sin God ke Jisus Kraist Leum lasr!”

¹² Ma sikyak nu sesr oana sie nu ke oiya ke kut kela liki sie mas upa. Kut ku in kela na paye kut fwin oru ma taktu el fwak nu sesr in oru. Lulalfongi lasr ke me kise lun lango ku in aksukosokye kut liki masap lun ma koluk a mise, tusruktu kut srakna sesumwos a oru ma koluk. Oasr ma se su kut enenu in oru in kasre kut in oasr fototo mwomwo nu sin Jeova pal nukewa a in oasr me insemwomwo lal. Kut fwin lungse in kela ke oiyen sesumwos su oana mas upa, Poul el fwak nu sesr la kut in fwufwasryesr fwal nu ke ku lun God.

Kut Ku In Fwufwasryesr Fuka Fwal nu ke Ku lun God?

13. Mea kalmen in fwufwasryesr fwal nu ke ku lun God?

¹³ Kut fwin fwasr nu ke sie an, kut kafweang in sun an se inge. Kut enenu in kapkapek ke ma paye tu kut in fwufwasryesr fwal nu ke ku lun God. (1 Timote 4:15) Fwinne kut tia ku in oru ma inge ke inkanek su arlana sumwos, kais sie len kut oru ke ku lasr kewa in akos kolyuk lun ku lun God. Kut fwin “fwufwasryesr ke ku lun God,” kut fwa ku in akinsemwomwoye God.—Galetia 5:16, NW.

14. Met puspus su moul “fwal nu ke ikwe” elos nunak a oru ma puspus ke inkanek fuka?

¹⁴ Ke leta lal nu sin met Kristian in an Rom, Poul el kaskas pa ke met puspus su oasr kain in nunak luo su tia oana sie. (Ridi Rom 8:5.c) Ke fus se inge kas se inge “ikwe” el tia kalmekin mukena ke manosr. Kutupal in Baibel, kas se inge “ikwe” ku in kalmekin nu ke oiyen sesumwos lasr. Oiyen sesumwos lasr inge oru kut in pulakin la lungse lun ikwe a nunak lasr lain sie sin sie oana ke ma Poul el sramsramkinyuk. Poul el meuni kena lun ikwel, ku oiyen sesumwos lal. Tusruktu oasr met puspus ke pal se inge su tia srike in meuni kena koluk lalos, ke ma inge elos moul “in fwal nu ke ikwe.” Elos tia nunku ke ma God el lungselos in oru, a elos tia siyuk sel in kasrelos in kutangla ke meun lalos ka. Elos “nunku ke ma lun ikwe,” a lela kena koluk lalos in kufuselosla. Na met puspus su moul “in fwal nu ke ku lun God” elos lela Jeova in kololos.

15, 16. (a) Kut fwin nunku akmwoye ke ma se, fuka ma inge ku in kufusla nunak lasr? (b) Mea met puspus ke pal inge elos insemwomwo ka?

¹⁵ Ridi Rom 8:6.d Meet liki metu elos oru ma mwo ku ma koluk, elos nunku yok meet ke ma puspus su elos lungse in oru. Fwin met elos nunku yok ke ma puspus lun ikwe, ma inge ku in moklelos in oru ma puspus lun ikwe. Nunak lalos, ma elos lungse, a pulakin lalos e fwa oasr nu ke ma puspus inge.

¹⁶ Ma fuka met puspus ke pal inge elos lungse? Met sap Jon el simusla: “Tu ma nu kemwa su on in fwalu, lung lun ikwe, a lung lun muta a mwolanu lusrongten lun moul, tia ma sin Papa me, a ma sin fwalu me.” (1 Jon 2:16) Kena ku lungse su Jon el simusla kalmekin nu ke ma puspus oana orekma lun kosro, lungse in eteyuk sin met nukewa a in pengpeng, a lungse ke ma puspus lun fwalu. Buk puspus, magasin, petsa mukuikui, program ke TV, a Internet akkeye kena koluk inge pal nukewa. Pa inge ma puspus su metu nunku yok ka meyen pa inge ma puspus su elos lungse na paye. Poul el fwak la orekma in “nunku ke ikwe kalmekin nu ke mise.” Ma inge ku in kunausla fototo lasr nu sin God, a ke pal fwasru kut ku in tula pa moul lasr. Efu? “Meyen nunuk lun ikwe me lokwalok nu sin God, tu ma se inge tia akos masap lun God, a koflanu oru. A elos su muta in ikwe elos tia ku in akengunye God.”—Rom 8:7, 8.

17, 18. Kut ku in lela fuka ku lun God in kol kut? Mea fwako mwo puspus kut fwin oru ma inge?

¹⁷ Orekma “in nunku ke ku lun God kalmekin nu ke moul a misla.” Kalmen ma inge pa moul ma patpat ke pal fwasru a misla su oan ke insiesr a nunak lasr, a misla yurin God ingena. Kut ku in akkalemye fuka la kut nunku ke ku lun God? Kut fwin akos pal nukewa kolyuk lun God a ku lal, kut fwa kapkapek ke inkanek lun nunak lasr su fwal nu ke nunak lun God. Kut lungse nunak lasr in “akos masap lun God.” Ke ma inge, kut fwin sun kain in oiya su kut enenu in lain me srufwe, kut fwa etu ma kut enenu in oru. A fwa oasr yurosr kena in oru sulela sumwos. Kut fwa oru sie sulela su oasr kolyuk lun ku lun God.

¹⁸ Kut enenu in akkalemye kena lasr in nunku akmwoye nu ke ma puspus lun God. Kut lungse in oru orekma nukewa lasr oana met Kristian in ma yok sripe emeet ke moul lasr. Orekma inge pa in pre pal nukewa, ridi a lutlutkin Baibel, wi ke tukeni nukewa a ke orekma in fwakak peng mwo. (1 Piter 1:13) Kut enenu in etawi inkanek in nunak lun God a lela ku lal in kol kut a tia lela kena koluk lasr in leum fwesr. Kut fwin oru ma inge, kut fwa eis me insemwomwo puspus, a kut fwa eis pa moul ma patpat a misla.—Galetia 6:7, 8.

[Footnote]

Ya Kom Ku In Akuteye?

• Mea Masap su itukyang nu sel Moses tia ku in oru? God el akmwoye ma inge fuka?

• Mea kalmen “masap lun ma koluk a mise”? Kut aksukosokyela fuka liki ma inge?

• Mea kut enenu in oru in akkeye oiya mwo in “nunku ke ku lun God”?

[Petsac ke sra 8]

Ya kom fwufwasryesr in fwal nu ke ikwe ku fwal nu ke ku lun God?