Fuka Met Fwafwasyesr Elos Orekma Oanu Met Kulansap Oaru
“Oanu kais sie eis me sang, a orekmakin in maslomwos oanu met tutafpo mwo in lungse lun God in oiye puspis.”—1 PITER 4:10.
JEOVA el orekmakin met Kristian oaru nu kemwa oanu met tutafpo. Sie met tutafpo pa sie met kulansap su kol ke sie loom. El ku in ouyepa kurunganang ma lun met kato lal. (Luk 16:1-3; Galetia 4:1, 2) Jisus el pangon un met akmusrala oaru lal fwin fwalu oanu “met kulansap oaru.” Nu sin met tutafpo inge el sang “ma lal nu kemwa,” wekunang orekma in luti ke Togusrai.—Luk 12:42-44; Mattu 24:14, 45.
2 Met sap Piter el fwak la met Kristian nu kemwa elos met tutafpo ke lungkulang lun God su akkalemyeyuk ke inkanek puspis. Oasr an lun kais sie met Kristian tu lan ku in oru orekma lal oanu met tutafpo oaru. (1 Piter 4:10) Met Kristian elder nu kemwa su pakiyuki elos inge met tutafpo, a in maslolos oasr met fwafwasyesr. (Taitus 1:7) Fuka met fwafwasyesr elder inge ku in nunkeyuk? Kain in oiye a nien sun fuka oasr yurolos? A fuka elos ku in kasru mwo na paye?
Sang Kulo nu ke Orekma Lalos
3 Ke pal se ma elos simusla leta nu sin sie met fwafwasryesr a mutan kiel, sie seanyen Kristian elos fwak: “Kut lungse in akkalemye kulo lasr ke pal nu kemwa a lungse su komwos ase nu sesr. Oanu sie sou, kut eis ma lane yok ke kas in akkeye a kai lomwos. Kut etu la kut enenu in tafwela in kapkapek ke ma lun ngun, tusruktu ke kasru lun Jeova a met lili mokul a mutan su oanu komwos, kapkapek fwinne ngal ma inge fwusesr.” Kain in kas inge arulanu pengpeng ke sripen met fwafwasyesr elos loang mwo nu sin met lili wielos, oanu orekma lun met tutafpo oaru su kurunganang ma enenu ke sie loom. Kutu selos usrnguk ke elos sramsram. Kutu selos usrnguk ke orekma lun forfor, a kutu selos pengpeng ke oiye kulang a pakoten. Ke pal se ma elos orekmakin me sang inge nu selos ke kulansap lalos nu sin kutu met, na met fwafwasyesr nu kemwa elos fwal in pangonyuk “met tutafpo oaru.”
4 “A inge pa siyukyuk ke met tutafpo, tu met in liyelos met oaru,” met sap Poul el simusla. (1 Korint 4:2) In kulansap nu sin met Kristian wielos ke kais sie congregation wik nu ke wik sie me sang mwo a akinsemwomwo. Tusruktu, ma inge sie kunokon yok. Ke ma inge, fuka met fwafwasyesr elos ku in oaru a oru na paye kunokon lalos?
Elos Oru na Paye Kunokon Lalos oanu Met Tutafpo
5 Pre in akkalemye lalalfongi nu sin Jeova pa yok sripe fwin sie met fwafwasyesr el lungse in oru na paye kunokon lalos oanu met tutafpo. Ke sripen schedule kafofo lalos a kunokon puspis, paenang kutupal elos pulakin toasr. (Srike liye 2 Korint 5:4.) Ke ma inge elos enenu in oru orekma fwal nu ke on lal Devid met sim lun Sam: “Filiye me utuk lom fwin Jeova, a El a fwa kasru kom. El koflanu filiye met sumwosmwos tu in mokuikui.” (Sam 55:22) Sie me pwarak pa kas lal Devid inge: “Jeova fwa kaksakinyuk, su wis me utuk lasr len nu kemwa.”—Sam 68:19.
6 Piye Poul el eis ku lal tu lan ku in oru kunokon lal in ngun? “Nga ku in oru ma nu kemwa in El su akkeyeyu,” el simusla. (Filippai 4:13) Aok, Jeova God el sropon ku lal Poul. In oupanu, Piter el sang kai lal: “Kutena met fwin kulansapu, lela lan kulansapu oanu ku su God el sang; tu in ma nu kemwa God el fwa akfulatyeyuk ke Jisus Kraist.” (1 Piter 4:11) Sie brother su wi ke orekma lun met fwafwasyesr meet ke lusen yiu puspis el akkalemye ma enenu ke lalalfongi nu sin God, el fwak: “Ngetuk nu sin Jeova pal nu kemwa kom aksumwosye ma upa, a suk kasru lun u lal.”
7 In fwal ke ma nu kemwa eneneyuk sin met fwafwasryesr mwo. Oanu kutu met Kristian, el kaifweung in “akilen ma mwo.” (Filippai 1:10)a Fwin oasr kusensiyuk lun un met elder ke ma se, sie inkanek lalmetmet in siyuk ma inge nu sin met fwafwasyesr su muteta nu yurolos. (Soakas 11:14; 15:22) Aok, tuni fwal lal ke ma puspis a kai lal su tuku ke Baibel sie me kasru yok na paye nu sin met elder su tafwela in orek meeting nu ke ma se fwinne el som liki tari congregation. Fwal nu ke ma inge, Poul fwak nu sel Timote: “A ma su kom long sik ye mutun Met Lo puspis, ma inge kom in filiye yurin met oaru, su fwa ouyepa ku in luti nu sin met ngie.”—2 Timote 2:2.
8 Lutlut ke Ma Simusla, tuni, a kalweni ke me lutlut, pa eneneyuk tu in ku in sang kai mwomwo. (Soakas 15:28) Sie district overseer el fwak: “Ke pal in meeting nu sin met elder, lela kut in tia sangeng in fwak la kut tia etu topuk nu ke sie kusensiyuk.” Kom fwin kaifweung in eis “nunuk lun Kraist” fwin oasr ma se sikyuk ma inge ku in kasru kom in sang kai mwomwo su tuku ke Baibel su ku in kasru kutu met in oru ma lungse lun God. (1 Korint 2:16) Kutupal met fwafwasyesr elos enenu in sim ke Watch Tower Society ke kasru. Ke kutena ma, lalalfongi nu sin Jeova a lungse ke ma paye pa yok sripe emeet liki lumasr ku kas lalmetmet. El tia tuku ke “kaskas lalmetmet, ku arulanu mwo,” Poul el mutamwauk orekma lun forfor lal fwin an Korint ke “munas a in sangeng, a in rarrar lulap.” Ya ma inge orel in wangin sripe? Mo, ma inge sang kasru nu sin met Korint in lalalfongi, “tia ke lalmetmet lun met, tu in ku lun God.”—1 Korint 2:1-5.
Kutu Oiye Mwo
9 Nunku kutu met in oanu elos ku in kasru met fwafwasryesr in eis fwako mwo. Piter el kaifwe nu sin met Kristian nu kemwa in akkalemye ‘nunuk nu sin kutu met oanu elos’ ku in “pakoten.” (1 Piter 3:8, footnote) Sie circuit overseer el pulakin la el enenu in ‘nunku met nu kemwa in congregation a in akkalemye la el loang na paye selos.’ In oiye sena, Poul el simusla: “Engun yurolos su engun; tung yurolos su tung.” (Rom 12:15) Kain in oiye se inge purakak met fwafwasyesr in kaifweung in kalem nu ke ma upa a kutena ma sikyuk nu sin met lili wiel in lalalfongi. Ke ma inge el ku in sang kas in musaiyuk su tuku ke Ma Simusla su ku in oswela fwako mwo na paye fwin orekmakinyuk. Sie circuit overseer su arulanu usnguk ke pakoten el eis leta se inge su tuku ke sie congregation futoto nu ke an Turin, Italy: “Kom fwin lungse met in pwar nu sum, kom enenu in pwar meet nu selos; Kom fwin lungse met in insemwomwo nu sum, akkalemye insemwomwo nu sin kutu met, kom fwin lungse met in lungse kom, kom enenu in lungse pa kutu met, kom fwin lungse met in kasru kom, kom enenu pa in akola in sang kasru. Ma inge nu kemwa kut lotela nu sum!”
10 Akkalemye inse pusisel a fwusesr in siyukyuk sang kasru nu sin met fwafwasyesr in oru ma mwo puspis. Sie circuit overseer el tuni: “Arulanu yok sripe in akkalemye inse pusisel pal nu kemwa.” El kai met fwafwasryesr sasu nu kemwa: “Nik komwos lela kutu met lili kasrup in mokle nunuk lomwos pal nu kemwa ke ma se ke sripen ma lane su elos ku in oru nu sum, ku nik kom lela in kamwuk nu selos mukena, a kaifweung in kamwuk nu sin met nu kemwa a in tia sulosol met.” (2 Kronikel 19:6, 7) A sie met fwafwasryesr su inse pusisel na paye el tia nunku yok kel sifwanu oanu met tutafpo lun Society. Sie district overseer el sang comment fwal: “Akkalemye inse pusisel a akola in porongo nu sin met lili. Oru met lili in tia pulakin sensen ke elos osun nu sum.” Oanu mokul lulap emeet inge su moul, Jisus Kraist el ku in oru met puspis in sensen nu sel, tusruktu, el arulanu inse pusisel a fwusesr in siyukyuk paenang fwinne tulik srisrik elos tia sensen nu sel. (Mattu 18:5; Mark 10:13-16) Met fwafwasyesr elos lungse tulik srisrik, met fwusr, a met matu—paye elos nu kemwa su oasr ke congregation—in tia sensen nu selos in osun
11 Aok, “tu in ma puspis kut nu kemwa tukulkul,” a wangin met fwafwasyesr su tia ku in tafongla. (Jemes 3:2) Ke pal se ma elos oru ma tafongla, sie nunuk munas su tuku ke insielos sang me srikasrak mwo ke inse pusisel nu sin met elder nu kemwa. Fwal nu ke Soakas 22:4, “Molin fwokpap a sangeng sin Jeova, me kasrup, a sunak, a moul.” Ya tia eneneyuk nu sin met kulansap nu kemwa lun God in ‘fwasr wi inse fwokpap yurin God lalos.’? (Maika 6:8, 1960 Edition) Ke pal se ma siyukyuk nu sel mea el ku in fwak in sang kasru nu sin si met fwafwasyesr elder sasu, sie circuit overseer el fwak: “Akkalemye sunak lulap nu sin met lili nu kemwa, a nunkelos oanu fulat liki kom. Kom ku in lutlut ma pukanten nu sin met lili. Kaifweung in srukye inse pusisel. Nik kom orek luma. Nik kom inse fulat.”—Filippai 2:3.
12 Moniyuk ke orekma lun forfor lun met Kristian akkeye sramsram lun met fwafwasyesr in arulanu fukoko. Ke ma paye, fwin el a mutan kiel elos akkalemye me srikasrak ke moniyuk ke orekma lun forfor, met elder, mutan kielos, a met nu kemwa in congregation elos akkeyeyuk in akkalemye pa moniyuk ke orekma lun forfor lalos. Kaifweung in moniyuk nu ke orekma,” Sie circuit overseer el kaifwe. El tafwela in fwak: “Nga akilen pal puspis la, fwin congregation el arulanu moniyuk ke orekma lun forfor, arulanu supus ma upa su elos sun.” Siepa circuit overseer el fwak: “Nga lalalfongi la fwin met elder nu kemwa elos akesrui nu sin met lili wiel ke orekma lun forfor, a kasrelos in engunkin orekma lun forfor lalos, ma inge ku in kol nu ke misla in nunuk a insemwomwo lulap ke orekma in kulansap nu sin Jeova.” Met sap Poul el ‘pulaikna in fwakak mwosasu lun God nu sin met Tessalonika wi akukuin lulap.’ Wangin allolo oasr me esmakin puspis lalos ke muteta lal a ke orekma lun forfor, a lungse in sifwil liyel!—1 Tessalonika 2:1, 2; 3:6.
13 Ke pal se ma elos wi ke orekma lun forfor nu sin met lili Kristian wielos, sie met fwafwasyesr el enenu in nunku ke ku lalos in oru a ke ma elos tia ku. Fwinne kas in kasru lal saap arulanu mwo, tusruktu el etu la kutu sin met lili saap elos sensen ke pal se ma elos oru orekma lun forfor wikin met elder su oasr experience yok. Ke ma inge ke kutu oiye, saap kas in akkeye pa yok liki kas in kai. Ke pal se ma el wi ke kutu met orekma ku pioneer ke sie Baibel Study, saap el fwa ku in orala sramsram. Sripen ma inge pa tu lan ku in kasrelos in akmwoye lutlut lalos ke kutu inganek.
14 Met fwafwasyesr moniyuk el purakak moniyuk nu sin kutu met. Sie circuit overseer fwin an Uganda el fwafwasryesr ke insak ke lusen aur se wikin sie brother su oasr Baibel study su tianu arle kapek. Ke lusen pal in fwafwasyesr lalos af upa tuku paenang ke pal se ma elos sun we elos arulanu sroksrok. Ke pal se ma sou se inge su oasr tulik ongkosr elos akilen la met fwafwasyesr pa muteta nu yurol, elos arulanu insemwomwo. Elos etu la met lulap ke alu lalos elos tia ku in akkalemye kain in oiye se inge nu sin met lalos. Ke sie Senri toko, elos tuku in wi meeting se meet lalos a akkalemye kena lalos in ekla Met Lo lun Jeova.
15 Ke state lun Oaxaca fwin an Mexico, sie circuit overseer el oru sie orekma su metu elos tia nunku. El pakiye in muta ke sie nien kalbos ke lusen fong akosr tu lan ku in muteta nu sin met kalbos itkosr su ekla tari met orekma lun Togusrai. Ke lusen len ekasr el wi sin met kalbos inge ke pal in orek lo ke kais sie infwokil a ke Baibel study lalos. Ke sripen pwar su elos akkalemye, kutu nu ke Baibel study inge elos tafwela na ke lutlut nu ke fongoeni. “Ke saflaiyen muteta, met kalbos a nga arulanu insemwomwo ke sripen me akkeye sie sin sie,” pa inge circuit overseer moniyuk inge el simusla.
16 Met fwafwasyesr elos srike in akkeye met nu kemwa. Ke pal se ma Poul el muteta nu ke congregation lun Macedonia, ‘el akkeyelos ke kas puspis.’ (Soakas 20:1, 2) Kas in akkeye arulanu ku in kasru yok in purakak met fwusr a met matu in orala nien sun lalos ke ma lun ngun. Ke sie ofus lulap lun Watch Tower Society, sie lutlut akkalemye la circuit overseer elos purakak percent 20 lun met orekma we tu elos in sroang nu ke orekma lun forfor pal nu kemwa. Ke me srikasrak mwo lal, mutan kien met fwafwasryesr ku in ouyepa sropon me akkeye lulap.
17 Met matu a met asor yokna elos enenu na paye me akkeye. Sie circuit overseer su matu tari el simusla: “Ma yok ke orekma luk su purakak me insemwomwo lulap su wangin ma oanu pa in kasru met ma tui ke orekma a munas inmaslon u lun God. Kas se su oasr in Rom 1:11, 12 oasr kalme yok nu sik, ke Nga nunku ke me akkeye yok a ku ‘tu Nga fwa ku in sang nu selos kutu me lung lun ngun, tu elos fwa oakiyuki.’ ”
Me Lane ke Orekma Insemwomwo Lalos
18 Met fwafwasyesr elos nunku yok fuka elos ku in kasru met lili wielos in lalalfongi. Elos lungse in akkeye congregation a musaiyuk elos ke ma lun ngun. (Orekma 15:41) Sie met fwafwasryesr elos oru orekma upa “tu lan ku in sang me akkeye, mongle, a purakak kena lun sie met in akpayeye orekma lun forfor lal a in fwafwasyesr in ma paye.” (3 Jon 3) Siepa circuit overseer el suk tu lan ku in kasru met lili wiel in fukoko in lalalfongi. (Kolosse 2:6, 7) Esam la met fwafwasyesr elos “met orekma wi kut,” a tia leum lun lalalfongi lun met saye. (Filippai 4:3; 2 Korint 1:24) Muteta lal sie pal in akkeye sie sin sie a orekma yok, a pal mwo lun un met elder in kalweni kapkapek su elos oru a in nunku ke nien sun ke pal fwasru. Ke kas a me srikasrak lal, met orekma lun congregation, pioneer, ministerial servant, a met elder elos ku in lalalfongi la elos e fwa akkeyeyuk a mokleyuk ke orekma ke pal fwasru. (Srike liye 1 Tessalonika 5:11.) Ke ma inge, sang kasru ke muteta lun circuit overseer ke insiom kemwa, a eis ma lane su tuku ke orekma lun district overseer.
19 Met fwafwasyesr a mutan kielos arulanu akinsemwomwoyeyuk ke orekma oaru lalos, a elos ku in lalalfongi la Jeova el akinsemwomwoyelos ke orekma mwo su elos oru. (Soakas 19:17; Efesus 6:8) Georg a Magdalena seanyen matuo se su kulansap meet oanu circuit overseer ke lusen yiu puspis. Ke sie toeni lulap fwin an Luxembourg, sie met el osun nu sel Magdalena pa inge mutan se ma el orek lo nu se yiu 20 kutu somla. Lungse ke ma paye lun mutan Ju inge purakak yok ke me rid in Baibel su Magdalena el likiye nu sel, a tia pat toko el baptaisla. Sie sister su osun nu sel Georg el srakna esam muteta lal in loom sel apkurun yiu 40 somla. Sramsram mwo lal ke peng mwo purakak insiel a mokul tumal in eis ma paye. Aok, Georg a Magdalena arulanu insemwomwo ke ma inge.
20 Orekma lun forfor mwo lal Poul fwin an Efesus arulanu akinsemwomwoyel a el mokleyuk in srukak kas lal Jisus: “Insemwomwo in sang yok liki insemwomwo in eis.” (Orekma 20:35) Ke sripen orekma lun met fwafwasyesr pal nu kemwa kol nu ke orekma in sang, paenang elos nu kemwa su wi ke orekma se inge elos pulakin insemwomwo, yokna fwin elos akilen fwako mwo ke orekma lalos, Sie circuit overseer su sang kasru nu sin sie elder su arulanu toasr el eis sie leta: “Kom sie sin ‘me kasru yok’ na paye ke moul luk in ngun—yok liki ma kom etu. . . . Kom tia ku in etu na paye lupan kasru su kom oru nu sin met su oanu Asaph ke len lasr, su ‘nielos lukunu sirirla.’ ”—Kolosse 4:11; Sam 73:2.
21 Sie met Kristian matou su oru orekma lun met fwafwasyesr ke lusen yiu puspis in pal meeta el lungse in nunku ke 1 Korint 15:58, Poul el kaifwe: “Komwos in tu ku, tia mokuikui, a akkeye komwos in orekma nu sin Leum pal e nu kemwa, tu komwos etu tu orekma lomwos tia pilesr in leum.” Paye oasr orekma yok lun met fwafwasryesr nu sin Leum pal nu kemwa. A fuka me insemwomwo nu sesr meyen elos kulansap ke insemwomwo oanu met tutafpo ke lungkulang lun Jeova!
[Footnote]
a Srike in liye me lutlut inge “Ya Kom Ku In Insemwomwo Fwinne Pukanten Ma Kom Enenu in Oru” ke The Watchtower, May 15, 1991, sra 28-31.
Fuka Kom Topuk?
◻ Efu ku met fwafwasyesr nu kemwa fwal in nunkeyuk oanu “met tutafpo mwo”?
◻ Mea kutu akmwuk su ku in kasru circuit a district overseer in oru ma mwo puspis?
◻ Efu ku inse pusisel a moniyuk arulanu yok sripe nu selos su sroang nu ke orekma lun met fwafwasryesr?
◻ Kain in nien sun mwo fuka oasr yurin met fwafwasyesr?
[Study Questions]
1, 2. (a) Fuka kom ku in aketeye kalmen kas se inge “met tutafpo”? (b) Su ku in wi ke met tutafpo su God el orekmakin?
3. Efu ku fwal nu sin met fwafwasryesr in pangonyuk “met kulansap mwo”?
4. Kain in kusensiyuk fuka kut akola in sramsramkin?
5, 6. Efu ku pre nu sin Jeova in akkalemye lalalfongi arulanu yok sripe ke moul lun met fwafwasyesr?
7. Fuka oiye fwal el kasru yok ke orekma lun met fwafwasyesr?
8. Efu ku lutlut ke Baibel, tuni a suk, a kalweni ke nunuk me lutlut se arulanu yok sripe?
9. Efu ku nunku kutu met in oanu elos eneneyuk sin met fwafwasyesr elder?
10. Mea circuit a district overseer elos fwak ke inse pusisel, a me srikasrak fuka Jisus el akkalemye ke ma se inge?
11. Fwin oasr enenu in oru ou inge, fwako mwo fuka ku in sikyuk ke sripen nunuk munas?
12. Efu ku moniyuk ke orekma lun forfor lun met Kristian arulanu yok sripe?
13. Mea sie met fwafwasryesr elos enenu in filiye ke nunuk lalos fwin elos wi sin met lili Kristian wiel ke orekma lun forfor?
14. Efu kut ku in fwak la met fwafwasyesr moniyuk purakak alken nu sin kutu met?
15. Kain in experience mwo fuka ekinsemwomwoye sie circuit overseer su moniyuk fwin an Mexico?
16. Efu arulanu yok sripe fwin met fwafwasyesr a mutan kiel elos sang kas in akkeye?
17. Mea pulakin lun sie circuit overseer matou ke me sang nu sel in sang kasru nu sin kutu met?
18. Mea nien sun ke ma lun ngun oasr yurin met fwafwasyesr?
19, 20. Fuka met fwafwasyesr a mutan kielos akinsemwomwoyeyuk ke orekma oaru lalos?
21. Efu kom ku in fwak la 1 Korint 15:58 fwal nu ke orekma lun met fwafwasryesr?
[Picture on page 27]
Met fwafwasyesr elos suk inkanek in akkeye met lili wielos
[Pictures on page 28]
Met fwusr a met matu ku in eis ma lane su tuku ke asrouki lalos nu sin met fwafwasyesr a mutan kielos
[Picture on page 29]
Moniyuk lun met fwafwasryesr ke orekma lun forfor purakak moniyuk pa nu sin kutu met