MWE LUTLUT 17
Mwet Liyacacng Suc Fuhfahsryucsr uh Kahsre Kuht Fuhkah?
Malawi
U in forfor se
Orekma in luti
Miting luhn mwet elder uh
Puhs pacl Ma Suhmuhslah uh sramsramkuhnuhl Barnabas ac mwet sap Paul. Mwet luo inge kuhlwacnsap oacna mwet liyacacng suc fuhfahsryucsr nuh ke congregation pucspucs in pacl meet ah. Efuh? Eltahl nuhnkuh yohk in ahkkweye mwet lili wiyacltahl uh. Paul el fahk lah el luhngse in ‘fohlohklac ac liye mwet luhlahlfongi’ in liye lah eltahl fuhkah. Eltahl inse muhlahlah in fuhfahsryucsr nuh ke acn ma arlacna loeslac ke mael pucspucs in ahkkweye mwet lili nuhkewa. (Orekma 15:36) Ke pacl inge mwet liyacacng suc fuhfahsryucsr nuh ke congregation pucspucs eltahl oruh pac ma inge.
Eltahl tuhkuh in ahkkweye kuht. Met elder suc fuhfahsryucsr nuh ke congregation pucspucs inge muhtwacta pacl luo ke kais sie yac. Eltahl muhta yurin kais sie congregation ke lusen wik se. Ke srihpen pah in nuhnak ac orekma in fahkwack pweng wo laltahl uh, pwacnacng kuht eis ma wo ac mwe ahkkweye seltahl. Eltahl fin pahyuck tari, kuht eis pac mwe ahkkweye sin muhtwacn kiyacltahl uh. Eltahl arlacna ke etwaclah mwet lili nuhkewa, mwet mahtuh ac mwet fuhsr ac eltahl ke wi kuht nuh ke orekma lasr in fahkwack pweng wo ac nuh yurin mwet kuht lutlut Bible nuh se uh. Eltahl wi pac mwet elder ke congregation uh in muhtwacta nuh yurin mwet lili in ahkkweyacltahl. Eltahl ahkkweye kuht pac ke pacl eltahl oruh mwe sramsram laltahl ke miting ac toeni luhlahp nuhkewa lasr uh.—Orekma 15:35.
Eltahl ahkkahlwemye kuhlwacng ac luhngse nuh sin mwet nuhkewa. Mwet liyacacng suc fuhfahsryucsr inge eltahl nuhnkuh yohk ke orekma in kuhlwacnsap luhn congregation nuh sin Jeova uh. Eltahl toeni yurin mwet elder ac mukul lili nuhkewa suc kahsruh mwet elder in liye kapkapack luhn congregation. Eltahl sang pac kahs in kahsruh nuh seltahl ke inkacnek wowo in oruh kunohkohn laltahl uh. Eltahl kahsruh pac mwet lili suc orekma oacna pioneer in wo fukun orekma in luti laltahl uh. Ac eltahl engan pac in aetuhilac nuh sin mwet sasuc ke congregation ac lohng kapkapack luhn mwet sasuc inge. Kais sie mwet liyacacng suc fuhfahsryucsr inge eltahl alken na pwacye ac ‘wi kuht orekma in kahsre kuht.’ (Luo Corinth 8:23) Kuht enenuh in etahi luhlahlfongi ac luhngse yohk laltahl nuh sin God uh.—Hebrew 13:7.
Efuh kuh mwet liyacacng suc fuhfahsryucsr inge muhtwacta nuh ke congregation pucspucs?
Kom ac eis fuhkah ma wo nuhkewa ke muhtwacta laltahl uh?