“Paul El . . . Sang Kuloh Nuh Sin God ac Arulacna Kuhi Nuhnkacl”

Ke pacl se congregation in acn Rome lohngack lah Paul el ac tuhkuh, oasr un mwet lili se suc oruh fuhfahsryucsr lalos ke lusen mael 40 kuhtuh in ohsun nuh sel. Fuhkah ohiyen luhngse in kihsackuhnacng lalos inge moklacl Paul? “Ke Paul el liyaclosyak el sang kuloh nuh sin God, ac arulacna kuhi nuhnkacl.” (Orek. 28:15) Paul el finne etweyuck ke muhsaheack congregation ma el muhtwacta nuh kac inge, ke pacl inge el oasr in presin, ac el pa mwet se suc eis mwe ahkkweye.​—II Cor. 13:10.

Ke pacl inge, circuit overseer uh elos oruh fuhfahsryucsr lalos ke sie congregation nuhke sie congregation in sang mwe ahkkweye nuh sin mwet lili. In oacna mwet nuhkewa luhn God, ke kuhtuh pacl uh elos ac puhla tohtohlah, elyah, ac muhnahslah. Ke pacl se tok ma circuit overseer ac muhtwacn kiyacl uh ac muhtwacta nuhke congregation lom an, meac kom kuh in oruh in kahsreltahl in puhlaik, ac “kuht kewa fah akacsruhi”?​—Rom. 1:11, 12.

• Wi ke toeni nuhke orekma in luti. Circuit overseer el ahkkweyeyuck ke pacl se mwet lili suc bacptais elos kwacfeacng na pwacye in eis ma wo ke wik in muhtwacta lal. (I Thes. 1:2, 3; 2:20) Nuhnkuh ke orekma in auxiliary pioneer ke mahlwem in muhtwacta lal an. Yac kom kuh in siyuck sel in weluhl ac muhtwacn kiyacl an ke orekma in fahkwack, kuh us sie selos in wi kom nuhke lutlut Bible lom an? Elos engankihn in wi kais sie sin mwet lili, wekuhnacng mwet suc sasuc kuh mwet suc puhla muh elos srackna suhpah ke orekma in luti uh.

• Ahkkahlwemye kuhlwacng. Yac kom kuh in kahsruh ke acn in muhta kuh fosrngahkihn sie pacl in mongo lalos an? Ma inge ahkkahlwemye nuh sin circuit overseer ac muhtwacn kiyacl an lah, kom luhngse eltahl. Eltahl tiac tuhpan muh in arlac ahluhkwelah ma fal in orek nuh selos.​—Lk. 10:38-42.

• Lohng ac orekmakihn kahs in kolyuck ac kahs in kahsruh lal. Circuit overseer el luhngse in kahsre kuht ke inkacnek kuhlwacng in liye lah, fuhkah kuht kuh in ahkwoye orekma in kuhlwacnsap lasr nuh sin Jeova uh. Ke kuhtuh pacl uh, sahp el ac kuh in sang kahs in kai. (I Cor. 5:1-5) Ma inge mwe engan nuh sel ke kuht ahkos ac puhsisacl.​—Heb. 13:17.

• Ahkkahlwemye srui. Fahk nuh sin circuit overseer ac muhtwacn kiyacl lah fuhkah kom eis ma wo ke kwacfeacng lalos. Kom kuh in fahk ma inge nuh selos, kuh ke inkacnek luhn lwacta kuh card.—Col 3:15.