Su Met Luti Na Paye?

KE sie meeting lun World Council of Churches yiu 40 somla, sapkinyuk nu sin met nu kemwa su wi ke alu inge nu kemwa in “akkalemye ngunin met luti” a in luti met lalos in “oru orekma in luti.” Tukun yiu limekosr John A. O’Brien, sie met tol lun Catholic, el simusla ke ma enenu in orala met tumal lutlut sasu “ke inkanek in fwasr nu yurolos” a tia ke “muta na in loom sesr.” Ke January 1994, Pope John Paul II el fwak la “tia pa inge pal in mwekin ke gospel, a pa inge pal in luti ma inge fwin sekunim in loom.”

Arulanu kalem la me pangpang inge in luti ke kais kutu pal tia longyuk sin met. Sie me sramsram ke sie newspaper fwin an Australia pangpang Illawarra Mercury el fwak: “Met pengpeng ke alu lun Catholic ke South Coast lun an Australia elos tianu pwar in srukye oiyen Met Lo lun Jeova ke lalalfongi lalos.” Sie mokul el fwak la orekma in forfor “tia ipen nunuk lun met Catholic.” Siepa met el fwak: “Arulanu mwo in akkalemye alu lasr sifwanu tusruktu tia ke inkanek in tungtung ke srungal. Saap ke inkanek lun loom lutlut ku ke pok in leta pa mwo.” Fwinne met lulap ke loom alu lulap we el tia etu etu fuka in aketeye kas lun pope. “Kut ku in kaifwe nu sin metu in akkalemye gospel su elos etu tari ke oiyen moul lalos,” el fwak. “Siepanu fwin kalmen ma inge pa tungtung ke srungal. Sifwen sramsram yok ke news el aketeye ke kas futoto me sramsram ke ma se inge nu fon: “Catholic elos tia porongo pangpang lal Pope in luti.

Fwinne Kristendom elos tia ku in luti, tusruktu pus liki limekosr million sin Met Lo lun Jeova elos akos ma sap lal Jisus in “Komwos som . . . oru met tumal lutlut in mutanfwal nu kemwa.” (Mattu 28:19, 20; srike liye Orekma 5:​42.) Orekma lun forfor lalos srungal nu ke srungal orekla ingenu ke an 230 kutu. Me sramsram su elos wis arulanu mwo, el akfulatye mwolela sakuruk lun Baibel ke pal fwasru. Efu kom in tia sramsram nu selos ke pal se ma elos sifwil fwasr nu yurom?