Met Fwafwasyesr—Me Sang Nu Sin Met
“Ke el somwak nu lung, el akkosye me kos, a sang me sang nu sin metu.”—EFESUS 4:8.
ALUKELA liki sie century somla, Watch Tower el oru me fwakak ke ma sasu. El akkalemye la ma inge “Sie Laa ke Orekma.” Mea orekma sasu se inge? Pa inge mutamweyen orekma lun met fwafwasyesr ke len lasr. Ke September 1, 1894, me lutlut ke magasin se inge el aketeye la met lili mokul nu kemwa su fwal elos akola in oru muteta ke un met puspis lun Bible Student ‘ke sie nien sun in akkeyelos ke ma paye.’
2 Ke century se meet C.E., congregation nu kemwa lun met Kristian elos eis muteta sin met fwafwasyesr oanu Poul a Barnabas. Nien sun lun mokul oaru inge nu kemwa pa ‘in musaiyuk’ congregation nu kemwa. (2 Korint 10:8) Ke len inge, kut nu kemwa akinsemwomwoyeyuk ke mokul puspis su oru orekma se inge ke inkanek sumwos a takla. Governing Body lun Met Lo lun Jeova elos pakiyelos oanu circuit a district overseer. Sie circuit overseer el kulansap ke kai sie wik ke congregation 20 kutu, pal luo ke yiu se, elos tuni record, oru sramsram, a wi sin met orekma lun congregation su elos muteta nu se ke orekma lun forfor. District overseer pa chairman ke kais sie circuit assembly ke kais sie yiu ke circuit puspis, elos wi pa ke orekma lun forfor lun met orekma ke congregation su eselos, a sang sramsram nu selos su tuku ke Baibel in akkeyelos.
Orekma In Kisekin Moul Lalos
3 Pal nu kemwa met fwasfwasryesr elos forfor pal nu kemwa. Ma inge el siyuk nu selos ngunin mongfwusesr. In fwasfwasryesr nu ke kais sie congregation pal nu kemwa tia fwusesr, tusruktu mokul inge nu kemwa wekunang mutan kielos elos oru ou inge ke insemwomwo. Sie circuit overseer el fwak: “Mutun kiuk arulanu kasru yu na paye a tia torkaskas . . . el arulanu fwal ke me kaksak puspis ke sripen ngunin mongfwusesr lal.” Kutu sin circuit overseer elos fwafwasyesr ke lusen mail 600 kutu inmaslon kai sie congregation. Pus selos orekmakin sitosa, tusruktu kutu selos orekmakin me kasrusr su met nu kemwa ku in orekmakin, kutu ke bicycle, fwin ors, ku kutupal elos fwasr. Sie circuit overseer fwin an Africa kutupal el filiye mutan kiel fwin pisel ke elos sasla nu ke infwal soko som nu ke sie congregation. Ke orekma lun forfor lal oanu sie missionary, met sap Poul el enenu in muteng ke fol a musresr, musrensral a malu, fong puspis el tia motul, kain in me sensen nu kemwa, a kolyai upa. Ouyepa oasr yurol “nunuk ke congregation nu kemwa”—experience inge nu kemwa arulanu pengpeng pa nu sin met fwafwasyesr misinge.—2 Korint 11:23-29.
4 Oanu met asrouki lal Poul pangpang Timote, met fwafwasyesr puspis wikin mutan kielos kutupal oasr ma upa ku mas ke mano. (1 Timote 5:23) Ma inge sang ma upa nu selos. Sie mutan kien circuit overseer el fwak: “In muta pal nu kemwa yurin met lili ke pal se ma Nga mas ma inge akasorye yu. Ke sripen Nga apkurun in tui ke mas luk, paenang Nga konaok la ma inge arulanu upa. In filiye nuknuk a ma lasr nu kemwa ke filis ke kais sie wik a in som nu ke siepa congregation arulanu upa na paye. Pal nu kemwa, Nga enenu in tui a pre nu sin Jeova ke ku tu Nga ku in tafwela.”
5 Fwinne elos mas ke mano a oasr kutu me srifwe, met fwafwasyesr a mutan kielos elos konaok insemwomwo ke orekma lalos a elos akkalemye mongfwusesr ke sripen lungse. Kutu selos enenu in filiye moul lalos ke me sensen tu elos in ku in sang kasru ke ma lun ngun ke pal in kolyai ku meun. Ke pal se ma elos muteta nu ke congregation puspis, elos akkalemye sie kain in ngun oanu ma oasr yurol Poul su fwak kas inge nu sin met Kristian fwin an Tessalonika: “A kut kulang in maslomwos, oanu sie mutan to ke el kurunganang tulik nutul sifwanu. Ou inge, ke kut arulanu lungse komwos kut insemwomwo in sot nu sumwos, tia mwosasu lun God mukena, a ouyepa ngunasr sifwanu, meyen komwos arulanu kulu sesr.”—1 Tessalonika 2:7, 8.
6 Oanu kutu elder ke congregation lun met Kristian, met fwafwasyesr elos “orekma in kas a in luti.” Met elder inge nu kemwa “fwal nu ke sunak lulap.” (1 Timote 5:17) Me srikasrak lalos arulanu yok sripe fwin, ‘komwos etawi lalalfongi lalos, ke komwos liye sripen moul lalos.’—Hebru 13:7.
7 Fuka met fwafwasyesr elder inge purakak met saye? “Arulanu yok me purakak lal Brother P—HS-.3,— ke moul luk meet! Pa inge sie sin Met Lo lun Jeova el simusla. “El sie met fwafwasyesr fwin an Mexico mutamwauk 1960 fwasru. Oanu sie tulik srisrik, Nga sano pal nu kemwa pal in muteta lal ke insemwomwo. Ke pal se ma Nga yiu siengoul matwe, el fwak nu sik, ‘Kom ku in ekla pa sie circuit overseer.’ Ke lusen pal in ma upa ke moul luk oanu sie met fwusr, Nga sukol pal nu kemwa meyen oasr kas lalmetmet pal nu kemwa lal su el ase nu sik. El moul in kurunganang u! ke pal inge meyen Nga sie sin circuit overseer pa, pal nu kemwa Nga srike in orekmakin pal luk nu sin met fwusr a filiye nien sun ke ma lun ngun ye mutulos oanu ma el oru nu sik meet. Fwinne ke pal se ma el apkurun in mise, a fwinne oasr ma upa lal ke sripen heart lal mas, Brother P—HS-.5,— el suk pal nu kemwa inkanek tu lan ku in sang kas in akkeye. Sie len meet liki el mise ke February 1995, el wi yu ke sie special asembly a filiye sie nien sun mwo ke ma lun ngun nu sin sie brother architect. Brother se inge el silaklak in nekla application tu lan ku in kulansap ke Bethel.”
Elos Engunkinyuk
8 Met fwafwasyesr nu kemwa a kutu met elder su oasr kunokon ke sripen lungkulang lun God elos inge pangonyuk “me sang nu sin metu.” Oanu met tatafpo lun Jeova a Sifwen congregation, Jisus el sang mokul inge nu kemwa su matu in ngun tu in akkeye kais sie sesr a tu kut in ekla met matu in ngun. (Efesus 4:8-15) Kutena me sang enenu kas in kulo nu sin met su eis ma inge. Yokna ma inge arulanu paye ke me sang su akkeye kut tu kut in tafwela ke kulansap lasr nu sin Jeova. Ke ma inge, fuka kut ku in akkalemye insemwomwo lasr ke orekma lun met fwafwasyesr? Ke inkanek fuka kut ku in akkalemye la kut ‘sunakinalos su ou inge?’—Filippai 2:29.
9 In pal se muteta lun circuit overseer akkalemyeyuk, kut ku in mutamwauk in orala plan fuka kut ku in akesrui ke inkanek yok ke orekma lun congregation ke wik inge. Saap kut ku in pakiye pal tu kut in ku in sang kasru yok ke akmwuk ke orekma lun forfor ke lusen wik in muteta inge. Saap kut ku in sroang nu ke orekma lun auxiliary pioneer ke lusen malem se. Paye kut lungse in orekmakin kas in kai lun circuit overseer tu kut in kapkapek ke orekma lun forfor. Kain in ngun inge su lungse in akos ku in wise nu sesr ma lane a ma inge ku in kasrel in lalalfongi la muteta lal oasr sripe. Aok, met fwafwasyesr elos muteta in congregation in akkeye kut, tusruktu elos enenu pa me akkeye, a pal nu kemwa elos siyuk nu sin met lili wielos in pre kelos. (Orekma 28:15; Rom 15:30-32; 2 Korint 1:11; Kolosse 4:2, 3; 1 Tessalonika 5:25) Met fwafwasyesr ke len lasr elos enenu pa pre lasr a kas in akkeye.
10 Ya kut fwak tari nu sin sie circuit overseer a mutan kiel la kut arulanu insemwomwo ke muteta lalos? Ya kut sang kulo nu selos ke kai mwomwo su elos wise nu sesr? Ya kut akkalemye nu sel fwin me kasru ke orekma lun forfor su el ase nu sesr akyokye insemwomwo lasr ke orekma lun forfor? Kut fwin oru ou inge, ma inge ku in kasrel tu lan insemwomwo ke orekma lal. (Hibru 13:17) Sie circuit overseer fwin an Spain el akaklemye fuka el arulanu aksaokye leta in kulo su elos eis ke congregation puspis su elos muteta nu we. “Kut okanla card inge a kut ridi kut fwin pulakin asor a toasr,” el fwak: “Ma inge sropon me akkeye na paye.”
11 Mutan kien met fwafwasyesr arulanu eis ma lane ke kas in kaksak. El akkalemye mongfwusesr na paye ke insiesr ke el kasru mokul tumal ke orekma se inge. Sister oaru inge elos pilesru kena lalos in oasr loom selos na paye a, ke oiye puspis, in oasr tulik nutulos. Tulik mutan nutul Jepthah pa sie sin met kulansap lun Jeova su insemwomwo in sisla pal mwo lal in oasr mokul tuma a sou ke sripen fulak lun papa tumal. (Met Nununku 11:30-39) Fuka mongfwusesr lal ke insiel inge akilenyuk sin kutu met? Met Nununku 11:40 el fwak: “Tu an nutul Israel elos som yiu nu kemwa in esam an nutul Jepthah met Geliad ke len akosr in yiu se.” Fuka arulanu yok kut fwin kaifweung in akkalemye nu sin mutan kien circuit a district overseer la elos engunkinyuk a lungse!
“Nik Kom Mulkunla Oiye Kulang”
12 Oru ma kulang pa sie inkanek in akkalemye lungse a insemwomwo nu selos nu kemwa su oru orekma lun fwafwasyesr. (Hibru 13:2) Met sap Jon el kaksakin Gauis ke kulang lal nu selos nu kemwa su muteta ke congregation oanu missionary su fwafwasyesr. Jon el simusla: “Met kulu kom oaru in kutena orekma kom oru nu sin met lili a ouyepa met sa, su orek ma lo ke lungse lom ye mutun congregation. A kom oru mwo kom fwin akmwotyelos in fwafwasyesr lalos fwal nu sin Leum. Tu ke E sa elos fwasr a tia eis kutena ma sin met pegan. Ke ma inge fwal nu sesr in esalos su ou inge, tu kut in met orekma yurolos ke ma paye.” (3 Jon 5-8) Ke len inge, kut ku in akyokye orekma in luti ke Togusrai ke kut akkalemye kulang ou inge nu sin met fwafwasyesr a mutan kielos. Paye, met elder ke kais sie congregation elos kaifweung tu in oru nien muta lalos in mwo, tusruktu sie district overseer el fwak: “Ke kut asrouki nu sin met lili kut tia ku in fwak su akola in akkalemye kulang nu sesr. A kut tia lungse pa elos in pulakin la oasr kunokon lalos nu sesr ke ma se inge. Kut enenu in insemwomwo in eis kutena oiye kulang su met lili wiesr elos akkalemye, fwinne elos kasrup ku tia.”
13 Oiye kulang pal nu kemwa sang insemwomwo nu selos su eis muteta a nu selos su muteta. “Oasr oiye lun sou lasr, in suli met fwafwasyesr in muta yurosr,” Jorge el esam, sie sin circuit overseer meet a misinge el orekma ke Bethel. “Nga pulakin la muteta puspis inge arulanu kasru yu yok liki ma Nga nunku. Ke lusen pal in fwusr luk, oasr ma upa luk ke ma lun ngun. Nine kiuk arulanu fosrnga ke ma se inge tusruktu el tia etu mea el enenu in oru ke ma inge el siyuk nu sin circuit overseer in sramsram nu sik. Ke mutamwauk nga srunga in sramsram nu sel, meyen Nga mwekin in akkolukyeyuk. Tusruktu oiye mwo lal su lungse in kamwuk nu sik kutangyula. El suli yu in wilul ke sie mongo ke monday, ke pal inge Nga ekasla insiuk meyen Nga etu la el ku in kalem sik. El long mwo. Ma el kaifwe nu sik in oru arulanu mwo, a Nga mutamwauk in kapkapek ke ma lun ngun.”
14 Sie met fwafwasyesr el kaifweung in kasru met matu a met fwusr ke ma lun ngun. Ke ma inge, arulanu paye, kut enenu in akkalemye insemwomwo ke kaifweung lalos inge. Tusruktu, fuka kut fwin akkolukyel ke sripen munas lal ke ma saye a kut srikeye ku lal nu sin kutupa met fwafwasyesr su muteta tari ke congregation lasr? Paye, ma inge sie me toasr na yok. Tia me insemwomwo nu sel Poul in long kas akkoluk ke orekma lal. Aok arulanu kalem la, kutu sin met Kristian ke congregation lun Korint elos oru sramsram koluk ke atel, a ke inkanek in sramsram lal. El sifwanu akkalemye oiyen met inge su suk ma koluk nu sel ke pal se ma el fwak: “Tu in leta lal, elos fwak, oasr kwano a ku, a manol munas fwin liyeyuk, a kas lal pilesr.” (2 Korint 10:10) Tusruktu, sie me insemwomwo in etu la, met fwafwasyesr elos long kas in akkeye pal nu kemwa su tuku sin met lili.
15 Sie circuit overseer fwin an Latin America el keok in fwasr ke lusen len se ke sie inkanek su arulanu furarrar tu lan ku in muteta nu sin met lili wiel in ngun su muta ke sie an ye koko lun met koluk su lain guferment. “Arulanu purakak na paye insiuk ke Nga liye insemwomwo lalos ke muteta luk,” el simusla. “Fwinne Nga enenu in arulanu kaifweung na paye tu nga in sun an we, a filiye moul luk ke me sensen puspis a ma upa puspis, tusruktu ma inge nu kemwa wangin sripe fwin Nga srikeye nu ke lungse a moniyuk su met lili wiesr elos akkalemye.”
16 Sie circuit overseer fwin an an Africa el simusla: “Ke sripen lungse su met lili wiesr elos akkalemye nu sesr, paenang kut arulanu lungse territory lun an Tanzania! Met lili nu kemwa elos akola in lutlut nu sesr, a elos insemwomwo in eiskutla nu in loom selos.” Oasr lungse a futoto ke insemwomwo inmaslon Poul a met Kristian seanyen inge ke century se meet pangpang Aquila a Prisca. Ke ma paye, Poul el fwak kas inge kelos: “Paing Prisca a Aquila, met orekma yurok in Kraist Jisus, su likiye kaiwelos sifwanu ke moul luk, a tia Nga mukena sang kulo nu selos, a ouyepa congregation nu kemwa.” (Rom 16:3, 4) Met fwafwsyesr nu kemwa a mutan kielos elos arulanu sang kulo meyen oasr kamwuk lalos ke len inge su oanu Aquila a Prisca su akkalemye kulang a asrouki nu selos ke lungse.
Akkeye Congregation nu Kemwa
17 Jisus el fwak: “A lalmetmet aksumwosyeyuk ke orekma la.” (Mattu 11:19) Lalmetmet ke akmwuk lun met fwafwasryesr arulanu kalem meyen ma inge arulanu akkeyeyuk congregation puspis lun met lun God. Ke lusen fwafwasryesr akluo lal Poul oanu sie missionary, el a Silas elos oru ma paye in sun “fwasr sasla Siria a Sailisia, a akkeye met in congregation.” Buk lun orekma el aketeye nu sesr: “A ke elos fwasr inkanek lalos in fwasr sasla in siti se inge, elos sang nu selos in liaung ma sap, su met sap a met matu su muta Jerusalem, elos sapkin. Ou inge, met in congregation elos akkeyeyuk in lalalfongi, a puselik len nu kemwa.” (Orekma 15:40, 41; 16:4, 5) Met fwafwasyesr ke len lasr elos eis kas in lutlut ke ma lun ngun ke inkanek lun Ma Simusla a ke me rid lun “met kulansap oaru a lalmetet,” oanu met Kristian nu kemwa elos oru—Mattu 24:45.
18 Aok, met elder su oru fwafwasyesr elos enenu in tafwela mongo ke me mongo in ngun ke tebu lun Jeova. Elos enenu in etu na paye akmwuk a me kol su u lun God el fwasr toko. Fwin elos oru ou inge, na elos me insemwomwo na paye nu sin kutu met. Ke inkanek lun me srikasrak mwo a moniyuk lalos ke orekma lun forfor elos ku in kasru met lili wielos in akmwoye orekma lun forfor oanu sie met Kristian. Me sramsram su tuku ke Baibel lun met elder inge su oru muteta arulanu musaiyuk met su long ke ma lun ngun. Ke inkanek in kasru nu sin kutu met in orekmakin ma sap lun Baibel, in akesrui nu sin met lun Jeova fwin fwalu nu fon, a in orekmakin me kasru in ngun su tuku ke inkanek lun ‘met kulansap oaru a lalmetmet,’ met fwafwasyesr nu kemwa elos akkeye na paye congregation su elos muteta nu se.
19 Ke pal se ma u lun Jeova el oakiye orekma lun met fwafwasyesr elder inmaslon Baibel Student apkurun yiu siefok somla, magasin inge el fwak: “Kut fwa tuni fwokin orekma se inge a ke kolyuk lun Leum.” Kolyuk lun Jeova arulanu kalem. Ke sripen insemwomwo Lal a liaung lun Governing Body orekma se inge arulanu kapkapek a akmwoyeyuk ke lusen yiu puspis. Fwokin ma inge, congregation puspis lun Met Lo lun Jeova fwin fwalu nu fon elos akkeyeyuk in lalalfongi a arulanu pusine len nu len. Arulanu kalem, Jeova el akinsemwomwoye ngunin mongfwusesr lun me sang inge nu sin metu. Tusruktu fuka met fwafwasyesr elos oru mwo na paye orekma lalos? Mea nien sun lalos? Fuka elos ku in kasru na paye congregation puspis ke inkanek yok?
Fuka Kom Topuk?
◻ Mea kutu kunokon lun circuit a district overseer?
◻ Efu ku met fwafwasyesr nu kemwa elos enenu ngunin mongfwusesr ke insielos nu kemwa?
◻ Fuka me insemwomwo ku in akkalemye nu ke orekma lun met fwafwasyesr a mutan kielos?
◻ Mea met fwafwasyesr elos oru tu in akkeye congregation ke lalalfongi lalos?
[Study Questions]
1. Kain in orekma sasu fuka akkalemyeyuk ke me rid inge ke 1894?
2. Mea kunokon lun Circuit a district overseer?
3. Efu ku met fwafwasyesr elos enenu in oasr ngunin mongfusesr ke insielos nu kemwa?
4. Mea mas ke mano el ku in oru ke moul lun met fwafwasyesr a mutan kielos?
5. Ye kain in me srifwe puspis, kain in ngun fuka met fwafwasryesr a mutan kielos elos akkalemye?
6, 7. Me purakak fuka ke ma mwo met fwafwasyesr moniyuk elos ku in sang?
8. Su “me sang nu sin metu” su akkalemyeyuk in Efesus sapter 4, a fuka congregation elos eis ma lane nu selos?
9. Ke inkanek fuka kut ku in akkalemye insemwomwo lasr nu sin met fwafwasyesr?
10. Fuka kut ku in sang kasru in orala orekma lun met fwafwasyesr in sie me insemwomwo nu selos?
11. Efu kut enenu in lela mutan kien circuit a district overseers’ in etu la kut lungselos a engunkinyuk?
12, 13. (a) Ma Simusla fuka akkalemye la oasr enenu nu sesr in akkalemye kulang nu sin met fwafwasryesr a mutan kielos? (b) Aketeye efu oiye kulang inge ku in kasrelos su eis muteta a nu selos su oru muteta?
14. Efu kut enenu in akkalemye insemwomwo a tia suk ma tafongla lun met elder su oru fwafwasryesr?
15, 16. Fuka met fwafwasyesr a mutan kielos akkeyeyuk ke lungse a moniyuk su met lili wielos in lalalfongi akkalemye?
17. Efu kut ku in fwak la oasr lalmetmet ke akmwuk ke met fwafwasyesr, a piye elos eis kas in luti lalos?
18. Fuka met fwafwasyesr elos akkeye congregation?
19. Kain in kusensiyuk fuka srakna enenu in sramsramkin?
[Picture on page 21]
e sripen elos fwafwasyesr pal nu kemwa paenang elos enenu ngunin mongfwusesr ke insielos
[Picture on page 24]
Ya kom akkalemye kulang nu sin met fwafwasyesr a mutan kielos?