Paul ac Timothy

Timothy el sie mwet lili fuhsr ke congregation fin acn Lystra. Pahpah tuhmwacl ah mwet Greek, ac ninac kiacl el sie muhtwacn Jew. Ke el tuhlihk ah me, ninac kiacl Eunice ac ninac mahtuh kiacl Lois lotwel Timothy kacl Jeova.

Ke pacl se Paul el som nuh Lystra ke muhtwacta ahkluo lal in fahkwack ac luti, el akihlen lah Timothy el luhngse na pwacye mwet lili uh ac luhngse in kahsreltahl. Paul el solwacl Timothy in weluhl fuhfahsryucsr. Tukun yac ekahsr, Timothy el eklac sie mwet fahkwack ac luti wo ke pweng wo ke srihpen mwe ahkpah lal Paul.

Nguhn muhtahl kohluhl Paul ac Timothy yen nuhkewa eltahl som nuh we. Ke fong sac, Paul el liye sie aruhruhma, oasr mukul se ma fahk nuh sel in som nuh Macedonia ac kahsreltahl. Pwacnacng Paul, Timothy, Silas, ac Luke tuhkweni som nuh we in fahkwack ac in oakiyac congregation uh.

Ke siti luhn Thessalonica in acn Macedonia, puhs sin mukul ac muhtwacn eklac mwet Christian. Tuhsruhktuh, oasr kuhtuh mwet Jew sok sel Paul ac mwet suc weluhl. Eltahl pahngon mwet uh tuh in sruokyac ac amackuhnlac mwet lili inge nuh yurin mwet leum ke siti sac, ac eltahl wowoyak ac fahk: ‘Mwet inge mwet lokoalok luhn government luhn acn Rome!’ Moul lal Paul ac Timothy oasr na pwacye ke mwe sensen, pwacnacng ke fongeni, eltahl kahinglac som nuh acn Berea.

Mwet Berea eltahl engan in lohng ke pweng wo, mwet Greek ac mwet Jew suc muhta we eklac mwet luhlahlfongi. Tuhsruhktuh oasr mwet Jew in acn Thessalonica eltahl tuhkuh nuh Berea in pihrihk ac ahkfohsye mwet suc muhta we, pa sis Paul el som ac kallah nuh Athens. Timothy ac Silas muhtana in acn Berea tuh in ahkkweye mwet lili we. Tukun kuhtuh pacl, Paul el suhpwacllah Timothy in sifwil fohlohk nuh Thessalonica tuh in kahsruh mwet lili we in muhtwacnglah ke mwe kalyei upac ma orek nuh seltahl. Na Paul el suhpwacllah Timothy in muhtwacta nuhke congregation pucspucs sahyac ac in ahkkweyacltahl.

Paul el fahk nuh sel Timothy: ‘Mwet nuhkewa suc luhngse in kuhlwacnsuhpuh Jeova ac fah kalyeiyuck.’ Timothy el kalyeiyuck ac sruokyucki ke srihpen luhlahlfongi lal. Tuhsruhktuh, el engan mweyen oasr pacl wowo lal in ahkpwacyeye oaru lal nuh sin Jeova.

Paul el fahk nuh sin mwet Philippi: ‘Nga ac suhpwacoht Timothy nuh yurumtacl. El ac luti komtacl in fahsr nuhke ma pwacye, ac el ahkpahye komtacl ke orekma in fahkwack ac luti.’ Paul el etuh lal Timothy el kuh in luhlahlfongiyuck. Ke lusen yac pucspucs, eltahl tuhkweni orekma oacna mwet kawuck ac mwet lili ke luhlahlfongi.