Sie Mwet Liyacacng Presin Lotwelah Ma Pwacye

Fin acn Philippi, oasr sie muhtwacn kohs suc oasr nguhn fohkfohk yohrohl. Ke srihpen nguhn fohkfohk, muhtwacn se inge kuh in palye ma ac fah sikyak ke pacl fahsruh uh. Yohk mani el sruokyac luhn leum lal ah ke srihpen pahluh lal inge. Ke pacl se Paul ac Silas tuhkuh nuh Philippi, muhtwacn se inge el fahsr tohkohltahl ke lwen na puhs. Nguhn fohkfohk oruh elan wowoyak: “Mwet inge elos mwet kuhlwacnsap lun God Fuhlwactlacna.” Sahflahiyac, Paul el fahk nuh sin nguhn fohkfohk sac: ‘Ke inen Jesus nga sapkihn nuh sum, illac luhkwel!’ Na nguhn fohkfohk som liki muhtwacn sac.

Leum luhn muhtwacn sac arlacna kasrkuhsrak mweyen eltahl akihlenack lah ac wacngihnlac inkacnek in orek mani laltahl sel. Eltahl amackuhnuhltallah Paul ac Silas nuh ye muhtuhn mwet fuhlwact, ac fahk: ‘Mwet inge eltahl kuhnauslah masap ac orek lokoalok in siti uh!’ Mwet leum inge el sap in srihngsrihng Paul ac Silas, ac sisiyang eltahl nuh in presin. Mwet liyacacng presin uh sisuhltahlwacng nuh infuhkihl se oeloac uh, ac kapriyac niacltahl ke sahk in kapihr luhlahp.

Paul ac Silas eltahl onkihn on in kaksak nuh sin Jeova, ac mwet kapihr sahyac uh lohng ke eltahl on uh. Ke infulwen fong uh, tiac paht na kusrusr na upac se sikyak, ma osrokak yen nuhkewa in presin uh. Sruhnguhl nuhkewa ikacklah, sein ma kapriyac mwet kapihr uh puhtatlac luhkeltahl nohfohn. Mwet liyacacng presin el kahsruhsr nuh luun presin ac el liye lah sruhnguhl uh ikacklah. El nuhnkuh muh mwet kapihr uh kahinglac, pwacnacng el faesack cutlass nahtuhl ac oruh elan sifacna unilyac.

Paul el lihksreni na wolac ac fahk: ‘Nimet sifacna unikomi! Kuht pa na inge!’ Mwet liyacacng presin el yuyang nuh luun presin ac puhtati sisken niacl Paul ac Silas. Ac el siyuck seltahl: “Meac nga ac oruh tuh nga in moliyucklac?” Eltahl fahk nuh sel: ‘Kom ac mwet in lohm sum uh enenuh in luhlahlfongi in Jesus.’ Paul ac Silas lotweltahl kahs luhn Jeova uh, ac mwet liyacacng presin ac mwet nuhkewa in lohm sel bacptaislac.