Utucklac Paul nuh in Rome

Orekma in luti ahktolu lal Paul uh sahflah in acn Jerusalem. Sruokyucki Paul we ac sisiyang nuh in presin. Ke sie fong ah, Jesus el fahk nuh sel ke sie aruhruhma: ‘Kom ac fah som nuh in acn Rome ac fahkwack pweng wo we.’ Utucklac Paul liki acn Jerusalem nuh Caesarea, acn se ma el muhta in presin ke lusen yac luo. Ke pacl se nuhnuhnkweyuck el ye muhtahl Governor Festus, Paul el fahk: ‘Lwelah ngan nuhnuhnkweyuck sel Caesar, in acn Rome.’ Festus el fahk: “Kom siyuck tari tuh kom in nuhnuhnkweyuck sel Tohkohsrah Fuhlwact, ohinge ac fah suhpweyucklac kom nuh yohrohl Tohkohsrah Fuhlwact.” Sapkihnyuck Paul elan sroacng nuh fin oak soko ma som nuh Rome, ac mukul lili luo, Luke ac Aristarchus, weluhl som.

Ke eltahl oasr fin meoa, eltahl sun pahkah na upac se ke lusen lwen ekahsr. Mwet nuhkewa fin oak uh nuhnkuh muh eltahl ac misac. Tuhsruhktuh Paul el fahk nuh seltahl: ‘Sie lipufacn el fahk nuh sihk ke mwemwe se: “Paul, nikmet sahngweng. Kom ac fah sun acn Rome, ac mwet nuhkewa suc wi kom ke kal se inge ac fah moullac.” Ahkkweye komtacl! Kuht ac fah tiac misac.’

Pahkah se oanna ke lusen lwen 14. Ke eltahl sun finmes ah, oasr tuhka se eltahl liye. Inen tuhka sac pa Malta. Oak uh sun fin puhk se ye kof uh ac mwesia kac, ac muhsahlsahluh, tuhsruhktuh mwet 276 suc wi ke oak uh moullac ac sun tuhka se. Kuhtuh seltahl kofkof ac mwet sahyac uh sruokyac ipinsahk ma muhsahllah ke oak uh ac kofkofkihn nuhke sun finmes ah. Mwet in acn Malta uh kahsreltahl ac eltahl tanwack e se in ahkfucsrfucsryacltahl.

Tukun mahlwem tolu, eltahl kallah fin oak soko sahyac ac mwet mweun usacllah Paul nuh Rome. Ke el sun acn we, mwet lili eltahl tuhkuh ohsun nuh sel. Ke Paul el liyacltahl, el sang kuloh nuh sin Jeova, ac ma inge ahkkweyacl ac ahkpuhlaikyacl. Finne Paul el sie mwet in presin, eltahl fuhlwellah tuh elan sifacna muhta in sie lohm ma el moli elan muhta kac, tuhsruhktuh oasr sie mwet mweun in taranuhl. El muhta kac ke lusen yac luo. Mwet uh tuhkuh nuh yohrohl Paul, ac el fahkwack nuh seltahl ke Tohkohsrahi luhn God ac lotweltahl kacl Jesus. Paul el suhmuhslah pac lwacta nuh sin congregation in acn Asia Minor ac Judea. Jeova el orekmakuhnuhl Paul in fahkwelihk pweng wo nuhke muhtuhnfacl pucspucs.