Suk Ma Wo Liki Gold
Yac nuh oasr pacl kom konwacack ipin gold se? Suhkwac oasr mwet konwacack ma inge. Tuhsruhktuh, million sin mwet eltahl konwacack sie ma ma wo liki na gold. Ma se inge pa lahlmwetmwet sin God me, ma “gold tiac kuh in sang moli.”—Job 28:12, 15.
KE INKACNEK ohinge, mwet lutlut Bible uh oacpacna mwet suc sukok gold. Kain in mwet lutlut inge enenuh in orekma upac ac tahfwelah na in suk ma suhmuhslah ma ac kuh in sang lahlmwetmwet yohk ma wacngihn ma oacna. Ke ma inge, meac kuht kuh in lotwelah ke kuht nuhnkuh yohk ke inkacnek tolu ma gold uh kuh in konweyuckyak kac?
KOM KONWACACK SIE MA SACOHK!
Srihke petsacelah ke kom fahsr pe infacl soko ac kom liyacack yot na srihsrihk se ma oan sahromrom ye faht uh. Ke pacl sacn kom kuhi nuh ten ac engan in konwacack ipin gold se. Ma inge srihk liki na muhtuhn mactsis se ac sacohk liki kuhtwena yot yohk molo. Kahlwem lah kom ngwetngwet liye fin oasr pac ipin gold sahyac ma kom ac kuh pac in konwacack.
In oacpacna, sahp ke kuhtuh pacl somlah ah oasr lwen se ma kom tiac kuh in muhlkuhnlah, ma sie sin mwet kuhlwacnsap luhn Jeova el tuhkuh nuh ke lohm sum an in sramsramkihn finsrak nuh ke moul ma oasr in Bible uh. Sahp, kom esam ma nuhkewa ke pacl se ma kom konwacack ma sacohk se meet in Bible ma oacna ipin gold se. Sahp, ma inge sikyak ke pacl se meet ma kom tuhfahna liyacack inen Jeova ke Bible uh. (Psalm 83:18, BMK) Kuh sahp, ke pacl se ma kom konwacack lah kom kuh in eklac sie kawuck luhn Jeova. (James 2:23) Kom sa na akihlacnwack lah kom konwacack sie ma ma sacohk liki na gold! Ac sahp, kom arlacna luhngse in ahkyohkye etwacack lom ke ma pwacye ke God.
PUHS MA KOM KONWACACK!
Kuhtuh pacl uh, kihtin na ip ke gold inge tuhkweni oan ke infacl uh. Ke puhlan pacl se, oasr mwet suc sukok yot sacohk suc orekma upac ac kuh in konwacack paun in gold na ekahsr ma molo uh oasr ke tausin tala ke kain in acn inge.
Ke kom muhtwacwacack in lutlut Bible yurin sie Mwet Loh luhn Jeova, sahp kom puhla muh kom oacna sie mwet suc sukok yot sacohk suc kwacfeacng in eis mwe kahsruhp ke gold inge ac kuh in oasr we. Kom fin nuhnkuh yohk ke fuhs pucspucs in Bible, kahlwem lah ma inge weacng pacna nuh ke etwacack lom an ma ac kuh in ahkkahsruhpye moul in Christian lom uh. Ke kom engan in kwacfeacng ac nuhnkuh yohk ke mwe luti pwacye in Bible ma sacohk, kom ac etwaclah pac lah fuhkah kom ac kuh in fototoyang nuh sin Jeova ac muhtana in luhngse lal uh tuh kom in eis moul ma pahtpaht.—James 4:8; Jude 20, 21.
In oacna ke sie mwet suc suk yot sacohk el kwacfeacng in konwacack gold, yac kom kwacfeacng in etwaclah mwe luti pwacye in Bible ma arlacna sacohk?
In oacna ke sie mwet suc sukok yot sacohk ke acn ma oasr gold we, sahp kom arlac alken in suk ma sacohk ke kahs luhn God uh. Tukun kom lotwelah mwe luti yohk ma sramteack Bible uh, kahlwem lah ma inge mokle kom in oruh ma nuhkewa ma kom enenuh in oruh tuhfah kom wuhlelah moul lom ac eis bacptais.—Matthew 28:19, 20.
TAHFWELAH NA IN SUK!
Sie mwet suc sukok ma sacohk el ac kuh in konwacack ip srihsrihk ke gold luun yot na luhlahp. Kuhtuh ipin yot inge, ma pahngpahng ore, oasr gold kac ma kuh in ip srihsrihkiyucki ac lihklihkiyucki tuh in eislah gold kac inge. Gold kac inge tiac arlac kahlwem ke pacl se ma srackna oasr eot ma sremlah kac uh. Efuh? Mweyen gold ma oasr ke yot inge oasr na ke gram 10 ke ton sefanna! Finne ohinge, ma inge arlacna yohk srihpac nuh sin mwet suc oruh orekma in suk yot sacohk inge.
Kwacfeacng luhn sie mwet pa pac enenweyuck tukun el kahlwem tari ke “ma sramteack luhn etwacack luhn Christ.” (Hebrew 6:1, 2) Kom enenuh in kwacfeacng in eis mwe luti sasuc ma ac kuh in kahsre kom ke lutlut Bible lom an. Pwacnacng, meac kom kuh in oruh tuh lutlut lom sifacna ke Bible uh in wo, finne kom lutlutkihn ma suhmuhslah uh ke lusen yac pucspucs?
Ahkkahlwemye luhngse na pwacye in lutlut. Lohacng ahkwoyac nuh ke mwe luti nuhkewa. Tahfwelah na in sang kuhiyom ac kom fah konwacack ma suhmuhslah sacohk ma tuhkuh ke lahlmwetmwet ac kolyuck luhn God. (Rome 11:33) In ahkyohkye etwacack lom ke ma suhmuhslah uh, orekmakihn kuhfwen mwe research ma oasr ke kahs lom sifacna uh. Mongfihsracsr in suk kahsruh ma kom enenuh in sang topuk kihsen siyuck lom ke Bible uh. Siyuck sin mwet sahyac lah ma suhmuhslah fuhkah ac mwe lutlut fuhkah eltahl puhla muh kahsreltahl ac ahkkweyacltahl uh. Sramsramkihn ma wo ma kom konwacack ke lutlut lom ke Kahs luhn God uh.
Pwacye lah tiac finsrak lom uh pa in ahkyohkye muhkwena etwacack lom ke ma pwacye uh. Mwet sap Paul el tuh sensenkihn muh “etwacack mwe ahkfuhlwactye insiacn mwet uh.” (Sie Corinth 8:1) Ke ma inge, kwacfeacng in sruokyacna ohiyen inse puhsisacl ac in fokoko luhlahlfongi lom an. Lutlut luhn sucu lom ke pacl nuhkewa ac lutlut lom sifacna ke Bible uh ac kahsre kom in moulkihn moul lom in fal nuh ke oakwuck suwohs luhn Jeova ac ma inge ac fah mokle kom in kahsruh mwet sahyac. Yohk liki nuhkewa, kom fah insewowo ke srihpen kom konwacack sie ma ma sacohk liki na gold.—Soakas 3:13, 14.