Oruh Moul In Pahyuck Lom Oacna Mwet Christian In Insewowo

1. Finne muhtwacwaciyen moul in pahyuck uh arlac engan, meac mwet suc pahyuck uh kuh in etuh muh ac sikyak nuh ke moul in pahyuck laltahl uh? (Liye petsac se meet ke mwe lutlut se inge.)

KE PACL se sie muhtwacn na kahto el ahkolah in pahyuck ac el fahsryak nuh ye muhtuhn mukul se ma el ac pahyuck nuh se ke lwen in macruht laltahl uh, wacngihn kahs ma kuh in ahkuhtweyac na pwacye luhpan engan laltahl uh. Ke pacl se ma eltahl srackna ahko ah, luhngse laltahl nuh sin sie sin sie uh arlacna yohkwelihk pwacnacng eltahl ahkolah in pahyuck ac eltahl oruh wuhlelah laltahl in oaru nuh sin sie sin sie. Pwacye lah ac oasr ma eltahl ac enenuh in ekuhllah tuhfah moul luhn kais sie seltahl kuh in falweni nuh sie ac sucu sasuc se in kuh in oakwucki. Tuhsruhktuh, Kahs luhn God uh use kahs in kahsruh na lahlmwetmwet nuh sin mwet suc sulaclah in pahyuck, ke srihpen God suc oraclah oakwuck ke macruht uh el luhngse kais sie siacnyacn in engankihn moul in pahyuck laltahl uh. (Soakas 18:22) Finne ohinge, ma suhmuhslah uh ahkkahlwemye pac nuh sesr lah ke moul in pahyuck luhn mwet sesuwohs uh, eltahl ac fah sun “mwe ahkfohs luhn facluh ma kwacna sikyak inmahsrlon mwet pahyuck uh.” (Sie Corinth 7:28) Ac ahksrihkyeyucklac kuh karihngihnyuck fuhkah mwe ahkfohs kuh ma upac ma ac kuh in sikyak ke moul in pahyuck uh? Ac meac ac oruh moul in pahyuck luhn mwet Christian uh in insewowo?

2. Kain in luhngse fuhkah ma mwet pahyuck uh enenuh in ahkkahlwemye?

² Bible uh luti lah luhngse pa sie ohiyac ma yohk srihpac. Tuhsruhktuh, oasr kain in luhngse ma enenuh in ahkkahlwemyeyuck inmahsrlon siacnyacn se. Ke sie mwe puhpuhlyuck, eltahl enenuh in ahkkahlwemye luhngse kuhlwacng ac oacyacpac luhngse ma ahkkahlwemyeyuck inmahsrlon mukul ac muhtwacn. Ac fin oasr tuhlihk nahtuhltahl, arlacna yohk srihpac in ahkkahlwemyeyuck kain in luhngse ma ahkkahlwemyeyuck inmahsrlon sucu se. Tuhsruhktuh, kain in luhngse se ma ahkkahlwemyeyuck inmahsrlon mwet Christian uh pa ac oruh moul in pahyuck se in insewowo na pwacye. Mwet sap Paul el ahkuhtweyac kain in luhngse se inge ke el tuh fahk: “Kais sie mukul tuhma elan luhngse muhtwacn kiyacl oacna el sifacna, ac kais sie muhtwacn kiac elan ahkfuhlwactye mukul tuhmwacl.”​—Ephesus 5:33.

TUNI AHKWOYAC KUNOHKOHN LUHN KAIS SIE MWET KE MOUL IN PAHYUCK SE

3. Kuhiyen luhngse ke moul in pahyuck se enenuh in fuhkah?

³ Paul el suhmuhslah: “Mukul tuhma, kowos in luhngse muhtwacn kiowos, oacna ke Christ el luhngse church [congregation, NW] ac acsang moul lal kac.” (Ephesus 5:25) Mwet Christian ke pacl inge uh etahi mwe srihkasrak lal Jesus ke eltahl luhngse sie sin sie oacna ke el luhngse mwet tuhma lutlut lal ah. (Riti John 13:34, 35; 15:12, 13.) Sie mukul ac muhtwacn Christian suc pahyuck eltahl enenuh in arlacna luhngse sie sin sie ac ahkolah in misac ke mwet se sahyac an. Tuhsruhktuh, ke pacl oasr ma upac ke moul in pahyuck se, kuhtuh mwet uh sahp puhla muh luhngse laltahl uh tiac arlacna kuh. Meac ac kuh in kahsreltahl? Luhngse ma ahkkahlwemyeyuck inmahsrlon mwet Christian, ma “tiacna fuhleack; el luhlahlfongi ac finsrak ac muhtweng in pacl nuhkewa.” Kain in luhngse se inge ac “tiacna wacngihnlac.” (Sie Corinth 13:7, 8) Siacnyacn se enenuh in esam lah eltahl oraclah sie wuhlelah. Eltahl wuhlelah muh eltahl ac fah luhngse sie sin sie ac oaru nuh sin sie sin sie. Siacnyacn Christian se fin esam ma inge, ac kuh in mokleltahl in suk kahsruh luhn Jeova ac in tuhkweni orekma in ahkwoyelah ma upac laltahl uh.

4, 5. (a) Meac kunohkohn luhn mukul pahyuck se oacna sie sifac ke sucu? (b) Meac nuhnak luhn muhtwacn pahyuck se nuh sin sifac lal uh? (c) Kain in eklac fuhkah ma sie siacnyacn eltahl enenuh in oruh?

⁴ Paul el ahkuhtweyac kunohkohn luhn kais sie mwet pahyuck ke el fahk: “Muhtwacn kiac, kowos ahkpuhsisaclye kowos nuh sin mukul tomowos, oacna nuh sin Leum. Tuh mukul tuhma el sifen muhtwacn kiacl, oacna ke Christ el sifen church [“congregation,” NW].” (Ephesus 5:22, 23) Tiac kalmen ma inge pa, mukul uh wo liki muhtwacn kiyacltahl uh. Jeova el sramsramkihn kunohkohn sacohk luhn muhtwacn uh ke el fahk: “Tiac wo mukul se inge [Adam] in muhkwena muhta. Nga ac oruh sie mwet in weluhlacng in kahsrel.” (Genesis 2:18) Sie muhtwacn pahyuck el enenuh in kahsruh mukul tuhmwacl uh in sie sifac wo ke sucu lal uh. Ac mukul pahyuck uh enenuh in etahi mwe srihkasrak wo ke luhngse ma ahkkahlwemyeyuck sel Jesus suc sifen congregation. Ke pacl se ma sie mukul pahyuck el oruh ma inge, muhtwacn kiyacl uh puhla karihngihnyuck wo ac fihsracsr nuh sel in suhnakuhnuhl ac ahkkweyacl.

⁵ Cathy, sie muhtwacn suc pahyuck nuh sel Fred el fahk: “Ke pacl se ma nga srackna lolacp ah, nga sifacna ac nga karihngihn mwe enenuh nuhkewa luhk uh. Ke pacl se ma nga pahyuckyak ah, oasr ma nga enenuh in ekuhllah ke nga etwaclah in luhlahlfongi mukul tuhmuhk uh. Tiac fihsracsr pacl nuhkewa, tuhsruhktuh kuht arlacna fototoeni nuh sie oacna sie siacnyacn ke pacl se kuht oruh ma fal nuh ke inkacnek luhn Jeova uh.”^[1] (Liye endnote.) Fred el fahk: “Emeet me na, tiac ma fihsracsr se nuh sihk pa in orek sulaclah. Ke pacl se nga pahyuckyak ah, sie ma upac pa in nuhnkuh ke puhlakihn luhn mwet se sahyuck inge. Tuhsruhktuh, ke nga suk kahsruh luhn Jeova ke inkacnek luhn puhruhe ac ke nga lohng ahkwoyac ma muhtwacn kiyuck uh nuhnkuh, ma inge oruh in fihsracsr nuh sihk pacl nuhkewa. Nga puhla muh kuht oraclah team na wowo se!”

6. Luhngse uh “kapreni ma inge nuhkewa in ma sefannalac” fuhkah?

⁶ Pahyuck uh kuh in fokoko fin siacnyacn sacn tahfwelah na in “muhtweng ac nuhnak muhnahs nuh sin sie sin sie.” Ke srihpen eltal sesuwohs, eltah kewa ac oraclah ma tahfonglac. Ke pacl ma inge sikyak, eltahl kuh in etwaclah tahfonglac laltahl uh, etwaclah in nuhnak muhnahs ac ahkkahlwemye luhngse ma fal nuh ke kahs in kahsruh ke Bible uh. Luhngse se inge “kapreni ma inge nuhkewa in ma sefannalac.” (Colossae 3:13, 14) Siacnyacn ma pahyuck uh kuh in ahkkahlwemye luhngse se inge ke eltahl mongfihsracsr ac kuhlwacng ac tiac “oacklah ma kuluk orek nuh sel” uh. (Sie Corinth 13:4, 5) Ke pacl ma oasr ma siacnyacn se tiac insese kac, eltahl enenuh in kwacfeacng in ahkwoyelah ma inge ke pacl na sa, meet liki sahflah sie lwen. (Ephesus 4:26, 27) Enenweyuck ohiyen inse puhsisacl ac puhlaik in fahk “sislah kuluk ke nga ahkngalye kom uh,” tuhsruhktuh kuht fin oruh ma inge ac kuh in kahsre kuht in ahkwoye ma upac lasr ac in fototoyang nuh yurin mukul tuhmwacsr kuh muhtwacn kiyacsr uh.

ENENUH NA YOHK IN NUHNKUH KE SIE SIN SIE

7, 8. (a) Kahs in kahsruh fuhkah Bible uh use ke tuhkweni luhn mahno inmahsrlon mukul ac muhtwacn pahyuck uh? (b) Efuh kuh siacnyacn pahyuck uh enenuh in ahkkahlwemye lah eltahl nuhnkuh ke sie sin sie?

⁷ Bible uh use kahs in kahsruh na wo ma ac kuh in kahsruh siacnyacn se in wo nuhnak laltahl ke tuhkweni oan luhn mukul ac muhtwacn uh. (Riti Sie Corinth 7:3-5.) Arlacna yohk srihpac nuh sin siacnyacn se in nuhnkuh ke puhlakihn ac mwe enenuh luhn sie sin sie. Mukul pahyuck se fin tiac nuhnkuh ke muhtwacn kiyacl uh, ac upac nuh sin muhtwacn sacn in engankihn tuhkweni laltahl uh. Mukul pahyuck uh enenuh in ahkkahlwemye ohiyac “lahlmwetmwet” nuh sin muhtwacn kiyacltahl uh. (Sie Peter 3:7) Tuhkweni laltahl ke mahno uh enenuh in orek ke inkacnek ma eltahl kewa engan kac ac tiac ke srihpen sie mwet pahtok kuh sapkihn mwet se sahyac an. Mukul uh arlac sa in ahkkahlwemye kain in puhlakihn inge liki na muhtwacn uh. Tuhsruhktuh, pacl fal nuh sin mwet luo ingacn enenuh in puhlakihnyuck seltahl kewa.

⁸ Bible uh tiac ip srihsrihkiyac masap nuhkewa nuh ke kain in orekma ac luhpah ma fal ke tuhkweni luhn mahno inmahsrlon siacnyacn se. Tuhsruhktuh, oasr sramsramkihnyen ohiyac luhn luhngse ma ahkkahlwemyeyuck uh. (On Lal Solomon 1:2; 2:6) Siacnyacn Christian uh enenuh in ahkkahlwemye lah eltahl nuhnkuh ke sie sin sie.

9. Efuh kuh arlacna suhfal in oasr nuhnak lasr in oan yurin sie mwet suc kuht tiac pahyuck nuh se?

⁹ Luhngse yohk nuh sin God ac nuh sin mwet tuhlan lasr uh ac kahsre kuht in tiac lwelah kuhtwena mwet kuh kuhtwena ma in ahkkulukye moul in pahyuck lasr uh. Kuhtuh siacnyacn ma pahyuck uh eltahl ahkmuhnahsye ac ahkkulukye pac pahyuck laltahl uh ke eltahl pahlah in liyeyuck petsac fohkfohk. Kuht enenuh in fahsr liki kuhtwena luhngse lasr nuh ke petsac fohkfohk kuh kuhtuh pac kain in kena kuluk in oan yurin mwet sahyac. Kuht enenuh pac in fahsr liki kuhtwena luhmah ma oraclah muh kuht orek fihlacng nuh sin sie mwet suc kuht tiac pahyuck nuh se, ke srihpen ma inge tiac ahkkahlwemye luhngse. Kuht enenuh in esam lah God el etuh nuhnak ac orekma nuhkewa lasr uh. Ma inge ac kahsre kuht in ahkkweye luhngse lasr in ahkinsewowoyacl ac in oaru na nuh sin mukul tuhmwacsr kuh muhtwacn kiyacsr uh.​—Riti Matthew 5:27, 28; Hebrew 4:13.

KE PACL OASR MA UPAC KE MOUL IN PAHYUCK UH

10, 11. (a) Meac nuhnak luhn mwet ke divorce? (b) Meac Bible uh fahk ke fahsrelihk uh? (c) Meac ac kahsruh moul in pahyuck uh in tiac sa na fahsrelihk?

¹⁰ Ke pacl oasr ma upac ma tiac ahkwoyeyucklac inmahsrlon siacnyacn pahyuck uh, kuhtuh siacnyacn uh sulaclah in fahsrelihk kuh divorce. Ke kuhtuh muhtuhnfacl uh, inkaiyen siacnyacn uh sulaclah in divorce. Pwacye, ma inge suhkwac sikyak ke congregation uh. Tuhsruhktuh, inmahsrlon mwet luhn God inge puhseni siacnyacn ma sun ma upac ke moul in pahyuck laltahl uh.

¹¹ Bible uh use kahs in kahsruh inge: “Sie muhtwacn pahyuck fah tiac som liki mukul tuhmwacl; tuhsruhktuh el fin som, el enenuh in muhtana ac tiac sifwil pahyuck, kuh elan suk in ahkwoye inmahsrloltahl ac sifwil fohlohklac nuh yurin mukul tuhmwacl. Ac sie mukul pahyuck enenuh in tiac sislah muhtwacn kiyacl.” (Sie Corinth 7:10, 11) Sahp kuhtuh siacnyacn uh puhla muh ma upac laltahl uh arlacna yohk pwacnacng eltahl enenuh in fahsrelihk. Tuhsruhktuh, Jesus el ahkkahlwemye yohk srihpaciyac in nuhnkaclah ahkwoyac meet liki siacnyacn se fahsrelihk ke el kalweni ma God el fahk ke oakwuck lal nuh sin mwet pahyuck uh ke el fahk: “Ma God el falseni, lwelah mwet uh in tiac esaclihk.” (Matthew 19:3-6; Genesis 2:24) Pwacnacng Jeova el luhngse mukul pahyuck ac muhtwacn pahyuck uh in tuhkweni muhta. (Sie Corinth 7:39) Kuht nuhkewa enenuh in esam lah kuht fahkkuhtyak sifacna ye muhtuhn Jeova ke orekma lasr uh. Ma inge ac kuh in kahsre kuht in sa na ahkwoyelah ma upac uh meet liki ma inge upaclah.

12. Meac srihpac luhn sie siacnyacn in fahsrelihk?

¹² Efuh kuh kuhtuh siacnyacn uh sun ma upac? Mweyen kuhtuh seltahl tiac pahngon muh ac pa inge atacn moul in pahyuck laltahl uh ac eltahl tiac insewowo. Inkaiyen pacl uh ma upac uh sikyak ke srihpen tiac oacna sie ke kapkapwack luhn mwet kuh ke puhlakihn ma eltahl ahkkahlwemye uh. Ma upac inmahsrlon mwet ma fahsr nuh ke sie sucu kuh fin wacngihn insese inmahsrlon siacnyacn se ke sisi mani ac karihngihnyen tuhlihk nahtuhltahl. Tuhsruhktuh, arlac wo in liye lah inkaiyen mwet Christian pahyuck uh kuh in konwacack inkacnek in sang ahkwoye ma upac laltahl uh mweyen eltahl lwelah God elan kohluhltahl ke moul laltahl uh.

13. Meac kuhtuh srihpac wo luhn siacnyacn se in fahsrelihk?

¹³ Sahp, oasr srihpac wo luhn siacnyacn se in fahsrelihk. Ohiyac upac oacna sruhnga luhn sie mwet in sang mwe enenuh luhn sucu, acnwuck upac, ac in tulokihn sie mwet ke alu lal nuh sin Jeova, pa inge srihpac ma oruh kuhtuh mwet uh sulaclah in fahsrelihk. Mwet Christian suc sun ma upac ke moul in pahyuck laltahl uh, eltahl enenuh in suk kahsruh sin mwet elder. Mukul lili suc yohk etwacack la inge ac kuh in sang kahsruh nuh sin siacnyacn pahyuck uh in orekmakihn kahs in kahsruh ke kahs luhn God inge. Ac ke pacl ma siacnyacn se siyuck ke nguhn muhtahl luhn Jeova, ma inge ac kahsreltahl in orekmakihn kahs in kahsruh ke Bible uh ac in ahkkahlwemye ohiyac luhn mwet Christian.​—Galatia 5:22, 23.^[2]

14. Meac Bible uh fahk ke mwet Christian suc pahyuck nuh sin mwet suc tiac alu nuh sin Jeova?

¹⁴ Bible uh ahkkahlwemye lah oasr srihpac wo nuh sin siacnyacn uh in tuhkweni finne mukul tuhmwacltahl kuh muhtwacn kiyacltahl uh tiac kuhlwacnsuhpuh Jeova. (Riti Sie Corinth 7:12-14.) Mukul kuh muhtwacn kiyacn sie mwet lili fin tiac oasr ke luhlahlfongi uh, mwet inge “ahkmuhtahlyeyuck” ke srihpen el pahyuck nuh sin sie mwet kuhlwacnsap luhn God. Tuhlihk srihsrihk nuhtin siacnyacn se inge ekihn “muhtahl” ac ke ma inge eltahl karihngihnyuck sin God. Paul el ahkkweye siacnyacn Christian uh: “Muhtwacn Christian, kom ac etuh fuhkah lah kom ac tiac kuh in molwelah mukul tuhmom an? Kuh mukul Christian, kom ac etuh fuhkah lah kom ac tiac kuh in molwelah muhtwacn kiyom an?” (Sie Corinth 7:16) Arlacna puhs mwe srihkasrak wo ke mukul ac muhtwacn Christian pahyuck suc kahsruh mukul tuhmwacltahl kuh muhtwacn kiyacltahl uh in eklac mwet kuhlwacnsap luhn Jeova.

15, 16. (a) Kahs in kahsruh fuhkah ke Bible uh ituckyang nuh sin muhtwacn Christian pahyuck suc mukul tuhmwacltahl uh tiac kuhlwacnsuhpuh God? (b) Fuhkah “fin sie mwet suc tiac mwet Christian el ke fahsr liki mwet Christian se el pahyuck se”?

¹⁵ Mwet sap Peter el sang kahs in kahsruh nuh sin mwet Christian uh eltahl in inse puhsisacl nuh sin mukul tuhmwacltahl uh, “tuh kuhtwena selos fin tiac luhlahlfongi ke kahs luhn God, orekma wo lowos an ac fah pwacnuhlosme in wi luhlahlfongi. Ac tiac enenuh kowos in fahklah kuhtwena kahs. Mweyen elos ac liye na moul nwacsnwacs lowos, ac luhman ahkfuhlwactyen God suwos.” Ke orekma laltahl ma ahkkahlwemye “inse mislac ac efahl, ac pa sacohk na pwacye ye muhtuhn God,” sie muhtwacn pahyuck el kuh in kahsruh mukul tuhmwacl uh in welah ma pwacye uh liki na elan sruhmuhn muhkwena ke luhlahlfongi lal uh pacl nuhkewa.​—Sie Peter 3:1-4.

¹⁶ Fuhkah fin sie mwet pahyuck suc tiac oasr ke luhlahlfongi el sulaclah in fahsrelihk? Bible uh fahk: “Fin sie mwet suc tiac mwet Christian el ke fahsr liki mwet Christian se el pahyuck se, lwelah elan som. In ohiyac se inge, el suc Christian seltahl, finne mukul kuh muhtwacn, el sukohsohklah. God El pahngon kowos in moul in mislac.” (Sie Corinth 7:15) In fal nuh ke Bible, finne fahsrelihk inge kuh in oraclah mislac, mwet Christian pahyuck sacn tiac sukohsohk in sifwil pahyuck. Tuhsruhktuh el tiac enenuh in pahtok mukul tuhmwacl kuh muhtwacn kiyacl uh in muhta na. Tukun kuhtuh pacl, mwet se ma tiac oasr ke luhlahlfongi uh el ac kuh in fohlohk ac luhngse in sifwil ahkwoye moul in pahyuck lal uh. Ac ke pacl fahsruh uh, mwet se suc tiac oasr ke luhlahlfongi inge el ac kuh pac in eklac sie mwet kuhlwacnsap luhn Jeova.

MEAC YOHK SRIHPAC EMEET KE MOUL IN PAHYUCK SE?

17. Meac siacnyacn Christian uh enenuh in oraclah in pa yohk srihpac emeet nuh seltahl uh?

¹⁷ Ke srihpen kuht muhta “ke lwen sahflah,” kuht puhla “mwe ongaiyac luhlahp.” (Luo Timothy 3:1-5) Pa inge srihpac ma pwacnacng kuht enenuh karihngihnyuck wo ke fototo lasr nuh sin Jeova. Paul el fahk, “Tiac yohk pacl luhlah. Pacl se ingelac, mukul ma pahyuck uh enenuh in moul oacna elos tiac pahyuck . . . ac elos suc orekmakihn ma luhn facluh, elos in orekma oacna elos in tiac lihksreni kahfofo kac.” (Sie Corinth 7:29-31) Tiac kalmen ma Paul el fahk inge pa siacnyacn uh tiac enenuh in lohacng nuh sin mukul tuhmwacltahl kuh muhtwacn kiyacltahl uh. Tuhsruhktuh ke srihpen kuht muhta ke lwen sahflah, kuht enenuh in likiyac alu lasr nuh sin Jeova in pa ma yohk srihpac emeet uh.​—Matthew 6:33.

18. Efuh kuh mwet Christian uh kuh in engan ac insewowo ke moul in pahyuck laltahl uh?

¹⁸ Kuht finne oasr ke pacl upac ac tiac wo moul in pahyuck luhn mwet suc raunikuhtlac uh, kuht kuh in engan ac insewowo ke moul in pahyuck lasr uh. Ahok, kuht fin fototo nuh sin Jeova ac mwet lal, orekmakihn kahs in kahsruh lal ke Bible, ac eis kahsruh ke nguhn muhtahl luhn Jeova pa inge ma ac kuh in karihngihn “ma God El falseni.”—Mark 10:9.