Sie Ohiyac Wowo Ma Sacohk Liki Diamond

Haykanush, sie mwet lili fin acn Armenia suc soenna bacptais el konwacack passport se sisken lohm sel uh. Luun passport se inge, oasr luhpah na yohk ke mani wi card ke bank. El fahk ma el konwacack inge nuh sin mukul tuhmwacl uh, el sie pac mwet lili suc soenna bacptais.

Arlacna yohk elyah laltahl ke mani ac oasr pac misac laltahl; tuhsruhktuh eltahl sulaclah in fohlohkohnlah mani inge nuh ke acn ma sihmlac ke passport sac. Mukul se ma la passport inge el arlacna lut, ac oacyacpac sucu lal uh. Haykanush ac mukul tuhmwacl uh ahkuhtweyac lah eltahl pwacye ac suwohs ke srihpen ma eltahl lotwelah ke Bible uh. Na, eltahl orekmakihn pacl sac in sruhmuhn ke Mwet Loh luhn Jeova ac in sang pac kuhtuh mwe rit nuh sin sucu se inge.

Sucu se inge luhngse in sang kuhtuh mani inge nuh sel Haykanush in oacna mwe sang, tuhsruhktuh el sruhnga eis. Ke lwen tok ah, muhtwacn kiyacn mukul se ma tuhlac passport la uh som muhtwacta yohrohl Haykanush ac mukul tuhmwacl uh ke lohm seltahl uh. In ahkkahlwemye luhpan kuloh yohk lal uh, el kwacfel Haykanush elan sruokyac ring diamond se.

In oacna sucu se inge, mwet pucspucs ac lut in lohng ke ohiyen pwacye ac suwohs ma Haykanush ac mukul tuhmwacl uh ahkkahlwemye inge. Tuhsruhktuh, yac Jeova el lut kac? Meac nuhnak lal ke ohiyen pwacye ac suwohs laltahl uh? Yac oasr srihpen pwacye laltahl uh?

OHIYAC PUCSPUCS MA SACOHK LIKI MWE KAHSRUHP

Top nuh ke kihsen siyuck inge uh tiac upac. Efuh? Mweyen mwet kuhlwacnsap luhn God uh etuh lah kwacfeacng laltahl in etahi ohiyen Jeova pa yohk srihpac emeet nuh sel liki na diamond, gold ac kuhtuh pac mwe kahsruhp sahyac. Ahok, ma Jeova el liye muh sacohk uh siena liki ma inkaiyen mwet uh ahksacohkye. (Isaiah 55:8, 9) Ac mwet kuhlwacnsap lal uh puhla lah kwacfeacng laltahl in etahi Jeova inge arlacna sacohk.

Kuht kuh in liye ma inge ke ma Bible uh fahk ke ohiyen liyactwen ac lahlmwetmwet. “Insewowo mwet se suc konwacack lahlmwetmwet, ac suc sun etwacack. Ma laheslah kac yohk liki ma laheslah ke silver, ac yohk srihpac nuh sum liki gold. Lahlmwetmwet el sacohk liki wek sacohk. Wacngihn kuhtwena ma kom luhngse ma kuh in luhmweyuck nuh kac.” Kahlwem lah Jeova el ahksacohkye ohiyac inge yohk liki kuhtwena kain in mwe kahsruhp.

Na, fuhkah nuh ke ohiyen pwacye ac suwohs?

Jeova el sie God pwacye ac suwohs. El “koflahna kikiacp.” (Titus 1:2) Ac el moklel Paul elan sihm nuh sin mwet Christian fin acn Hebrew in pacl meet ah ac fahk: “Kowos in tiac tui in puhruhe kacsr. Kuht puhlakihn na pwacye lah wacngihn ma suhfal lasr, mweyen kuht kena tuh orekma lasr in suwohs pacl nuhkewa [“in ma nuhkewa,” BMK.].”​—Hebrew 13:18.

Jesus Christ el oakiyac sie mwe srihkasrak na wo ke ohiyen pwacye ac suwohs. Ke sie mwe puhpuhlyuck, mwet tol fuhlwact Caiaphas el fahk, “Nga fahk nuh sum tuh kom in fuhlahk nuh sesr Inen God moul, yac kom pa Messiah, Wen nuhtin God?” Jesus el suwohs ac fahk lah el pa Messiah. El fahk ma pwacye uh finne el etuh lah un mwet pwacpa fuhlwact luhn mwet Jew inge ac kuh in kikiacp ac fahk muh el sie mwet suc fahk kahs kuluk ke God ac ma inge ac kuh in kol nuh ke acnwucki lal uh.​—Matthew 26:63-67.

Fuhkah nuh sesr? Kuht fin oasr ke sie ohiyac ma kuht ac kuh in eis ma wo kac kuht fin tiac fahk ma pwacye uh kuh kuht fin ekuhllah kuhtuh srihsrihk ke ma pwacye uh, yac kuht ac srackna pwacye ac suwohs?

MA UPAC KE PWACYE AC SUWOHS UH

Pwacye, upac in pwacye ac suwohs ke lwen sahflah inge ke srihpen mwet pucspucs eltahl “nuhnkuh kaclos sifacna, luhngse mani.” (Luo Timothy 3:2) Ke pacl oasr ma upac ke mani kuh ke upac in konwacack orekma, tiac upac nuh sin mwet pucspucs eltahl in pihsrapasr, kuhtasrihk kuh oruh kuhtuh pac ma sahyac ma tiac ahkkahlwemye ohiyen pwacye. Kain in nuhnak se inge oasr yurin mwet pucspucs suc puhla muh inkacnek sefanna ma eltahl kuh in eis ma eltahl luhngse uh pa in kikiacp kuh kuhtasrihk. Oasr pac mwet Christian suc tiac wo sulaclah laltahl uh ac ke srihpen eltahl “rahpkuhi mani,” wacngihnlac ine wo laltahl ke congregation uh.​—Sie Timothy 3:8; Titus 1:7.

Tuhsruhktuh, inkaiyen mwet Christian uh etahel Jesus. Eltahl akihlen lah yohk srihpac in oasr yohrohltahl kain in ohiyac luhn God inge liki na kuhtwena mwe kahsruhp kuh ma wo sahyac. Pa inge srihpac se pwacnacng mwet Christian fuhsr uh tiac kuhtasrihk kuh pihsrapasr in eis teng wo ke lutlut ac. (Soakas 20:23) Tiac pacl nuhkewa ma sie mwet el pwacye ac suwohs, na oasr opi se kuh mwe sang se ituckyang, in oacna ma sikyak nuh sel Haykanush inge. Finne ohinge, God el fahk muh inkacnek se ma wo emeet uh pa in pwacye ac suwohs. Ma inge acse sie nuhnak ac puhlakihn wo, sie ma na sacohk.

Mwe srihkasrak lal Gagik uh ahkkahlwemye wo ke ma inge. El fahk: “Meet liki nga eklac sie mwet Christian, nga orekma ke sie company luhlahp ma mwet kol se kac ah kuhtasrihk in moli tax ke el reporti luhpah na srihsrihk se ke kap luhn company uh. Ke srihpen nga pa managing director, el siyuck nga in orek inkacnek nuh sin tax auditor sac elan tiac lohacng nuh ke orekma kuhtasrihk luhn company uh. Ke sahflahiyac ah, nga etweyuck oacna sie mwet kuhtasrihk. Ke nga etwaclah ma pwacye uh, nga sruhnga in sifwil tahfwelah in oruh orekma se inge, finne arlac wo molo. Ke ma inge, nga oraclah business se luhk sifacna. Ac muhtwacwacack ke lwen sac, nga oraclah oakwuck ke company luhk uh ac nga moli tax nuhkewa luhk.​—Luo Corinth 8:21.

Gagik el fahk: “Luhpan mani ma nga oraclah uh srihkeni ke tahfuh, pwacnacng upaclah nuh sihk in sang mwe enenuh luhn sucu luhk uh. Tuhsruhktuh, nga arlac engan ke pacl inge. Nuhnak ac puhlakihn luhk uh wo ye muhtuhn Jeova. Nga sie mwe srihkasrak wo nuh sin tuhlihk mukul luo nuhtihk uh, ac nga kuh in wi pac oruh kunohkohn pucspucs ke congregation uh. Ke nga orek business yurin tax auditor ac mwet sahyac, ingena nga etweyuck oacna sie mukul pwacye ac suwohs.”

JEOVA EL KAHSRE KUHT

Jeova el luhngse mwet suc sang kaksak nuh sel ke srihpen eltahl etahi ohiyac wo lal uh, wekuhnacng ohiyen pwacye ac suwohs lal uh. (Titus 2:10) Ac ke kuht oruh ma inge, el wuhlelah muh el ac fah kahsre kuht. El moklel Tohkohsrah David elan fahk: “Nga mahtuhoh inge; nga moul paht na, tuhsruhktuh nga soenna liye sie mwet wo in pihlesreyuck sin LEUM GOD, kuh tuhlihk nahtuhl in nguhsr mwe mongo.”​—Psalm 37:25.

Ma sikyak nuh sel Ruth uh ahkpwacyeye ma inge. El oaru ac muhta na yohrohl Naomi, ninac kiyacn mukul tuhmwacl ah ac el tiac som luhkel ke srihpen el mahtuhoh. Ruth el som muhta fin acn Israel tuh elan kuh in alu nuh sin God pwacye. (Ruth 1:16, 17) El pwacye ac el orekma upac in oracni mongo in fal nuh ke oakwuck ke masap nuh sin mwet suhkahsruhp. Ac in oacna ma David el puhla tok, Jeova el tiacna sisuhllah Ruth ac Naomi. (Ruth 2:2-18) El sang ma wo pucspucs nuh seltahl sahyacn el sang mwe enenuh lal Ruth. El sulaclah elan wi ke tahk in sucu lal Tohkohsrah David ac luhn Messiah suc wuhleyucklac!​—Ruth 4:13-17; Matthew 1:5, 16.

Sahp upac na pwacye nuh sin kuhtuh mwet kuhlwacnsap luhn Jeova uh in eis mani ma eltahl enenuh in sang eislah mwe enenuh laltahl uh. Finne ohinge, eltahl tiac suk inkacnek ma fihsracsr ac oasr inkacnek kuhtasrihk kac, a eltahl orekma upac ac alken. Ke eltahl oruh ma inge, eltahl ahkkahlwemye lah ohiyac wo pucspucs luhn God uh sacohk nuh seltahl liki kuhtwena mwe kahsruhp.​—Soakas 12:24; Ephesus 4:28.

In oacna Ruth, mwet Christian fin facluh nohfohn uh ahkkahlwemye luhlahlfongi laltahl nuh ke kuh luhn Jeova in kahsreltahl. Eltahl luhlahlfongi na pwacye ke wuhlelah luhn God inge: “Nga ac fah tiacna fahsr liki kom; nga fah tiacna siskomlac.” (Hebrew 13:5) Pacl puhs, Jeova el ahkkahlwemye lah el kuh ac el fah kahsruh mwet suc pwacye ac suwohs ke pacl nuhkewa. El sruokyac na wuhlelah lal in sang mwe enenuh luhn mwet kuhlwacnsap lal uh.​—Matthew 6:33.

Ahok, sahp mwet uh ahksacohkye diamond ac kuhtuh pac mwe kahsruhp sahyac. Tuhsruhktuh, kuht kuh in etuh na pwacye lah Pahpah tuhmwacsr inkuhsrao el ahksacohkye ohiyen pwacye ac suwohs lasr uh wekuhnacng ohiyac wo sahyac ma kuht ahkkahlwemye. Ac el ahksacohkye ma inge yohk liki kuhtwena yot sacohk!