Nikmet Lwelah Ma Tahfonglac luhn Mwet Sahyac in Ahktihkuhlkuhlye Kom

1, 2. Bible uh palye fuhkah kapkapwack ke mwet luhn Jeova uh?

FIN facluh nohfohn, oasr u se ma mwet kac uh luhngse Jeova ac luhngse in kuhlwacnsuhpwacl. Eltahl pa Mwet Loh luhn Jeova. Eltahl finne sesuwohs ac oasr pacl eltahl tahfonglac, Jeova el kol mwet lal inge ke nguhn muhtahl. Lwelah kuht in liye kuhtuh inkacnek ma el ahkinsewowoyacltahl kac.

² Ke yac 1914, suhpuhs mwet kuhlwacnsap luhn Jeova inge. Tuhsruhktuh, Jeova el ahkinsewowoye orekma in luti uh. Ke pacl inge, million sin mwet eltahl etwaclah ma pwacye ke Bible uh ac eltahl eklac mwet Loh lal. Jeova el palye ke kapkapack inge lah u srihsrihk se “ac fah puhseni ac yohkwelihk oacna sie muhtuhnfacl na kuh. Nga fah oruh ma inge in sa sikyak ke pacl fal. Nga pa LEUM GOD!” (Isaiah 60:22) Ke pacl inge arlacna kahlwem mwe ahkpwacyeye nuh ke kahs pahluh se inge. Mwet luhn Jeova uh oacna sie muhtuhnfacl luhlahp. Kuht kuh in fahk ohinge, mweyen oasr muhtuhnfacl pucspucs fin facluh ma pihsen mwet kac uh suhpuhs liki pihsen mwet luhn Jeova uh.

3. Mwet kuhlwacnsap luhn God uh ahkkahlwemye fuhkah luhngse?

³ Ke lusen lwen sahflah inge, Jeova el kahsruh mwet lal uh in ahkkweye luhngse laltahl nuh sin sie sin sie. “God El luhng,” ac eltahl etahel. (Sie John 4:8) Jesus el sapkihn nuh sin mwet nuhkewa suc fahsr tohkohl in “luhngse sie sin sie.” El oacyacpac fahk nuh seltahl: “Kowos fin luhngse sie sin sie, na mwet nuhkewa ac fah etuh lah kowos mwet tumuk lutlut.” (John 13:34, 35) Ke kuhtuh pacl somlah, mwet kuhlwacnsap luhn Jeova uh ahkkahlwemye luhngse se inge nuh sin sie sin sie finne ke pacl ma muhtuhnfacl pucspucs som mweuni sie sin sie. Ke sie mwe puhpuhlyuck, ke mweun luhlahp se ahkluo ah, apkuhran nuh ke 55 million ke mwet ma acnwucki kac. Tuhsruhktuh, mwet luhn Jeova uh tiac uniyac kuhtwena mwet ke mweun se inge. (Riti Micah 4:1, 3.) Ma inge kahsreltahl in “nwacsnwacs liki srahn mwet e nuhkewa.”​—Orekma 20:26, BMK.

4. Efuh kuh kapkapwack ke mwet luhn Jeova uh fal in akihlenyuck?

⁴ Pihsen mwet luhn God uh srackna kap, finne oasr mwet lokoalok na kuh se laltahl. El pa Satan suc “god kuluk luhn facl se inge.” (Luo Corinth 4:4) El kihfucs u luhn politic fin facluh wekuhnacng media ke tv, retio, ac internet. Ac el orekmakihn ma inge in tulokihnyac orekma in luti ke pweng wo uh. Tuhsruhktuh, el tiac kuh in tulokihnyac ma inge. Satan el etuh lah srihklac pacl luhlah lal uh, pwacnacng el kwacfeacng in tulokihn kuht in tiac alu nuh sin Jeova.​—Fwackyuk 12:12.

SRUOKYACNA OARU LOM KE PACL MA MWET SAHYAC UH ORUH MA TAHFOHNGLAC

5. Efuh kuh oasr pacl ma kuhtuh mwet uh ahkngalye puhlakihn lasr uh? (Liye petsac se meet ke mwe lutlut se inge.)

⁵ Mwet kuhlwacnsap luhn God uh lotwelah lah arlacna yohk srihpac in luhngse God ac mwet sahyac uh. Jesus el fahk: “‘Kom fah luhngse Leum God lom ke insiom kewa, ke nguhnum kewa, ac ke nuhnkom kewa.’ Pa inge ma sap se ma yohk emeet ac yohk srihpac emeet. Ma sap se ahkluo yohk srihpac oacpacna ma se meet an: ‘Kom fah luhngse mwet tuhlan lom oacna kom luhngse kom sifacna.’” (Matthew 22:35-39) Tuhsruhktuh, Bible uh ahkkahlwemye lah mwet nuhkewa sesuwohs ke srihpen ma kuluk lal Adam. (Riti Rome 5:12, 19.) Pwacnacng, oasr pacl ma mwet ke congregation uh ac fahk kuh oruh kuhtuh ma ma ahkngalye puhlakihn lasr uh. Ke pacl ma inge sikyak, meac kuht ac fah oruh? Yac luhngse lasr nuh sin Jeova uh srackna kuh? Yac kuht ac sruokyacna oaru lasr nuh sel ac nuh sin mwet lal uh? Bible uh ahkkahlwemye nuh sesr ke kuhtuh mwet kuhlwacnsap luhn God suc fahk kuh oruh kuhtuh ma ma ahkngalye mwet sahyac. Lwelah kuht in liye lah meac kuht kuh in lotwelah ke ma sikyak nuh seltahl inge.

6. Ke inkacnek fuhkah Eli el tiac kai wen luo nahtuhl ah?

⁶ Ke sie mwe puhpuhlyuck, Eli pa mwet tol fuhlwact luhn acn Israel, tuhsruhktuh tuhlihk mukul luo nahtuhl uh seahkos masap luhn Jeova. Bible uh fahk: “Wen nahtuhl Eli elos elah kuluk. Elos tiac akihlen LEUM GOD.” (Sie Samuel 2:12) Eli el etuh lah wen nahtuhl inge oruh ma na kuluk. Finne ohinge, el tiac kaeltahl kac. Tok kuhtuh, Jeova el sang mwe kai nuh sel Eli ac wen luo nahtuhl inge. Ac tok pac kuhtuh, el tiac sifwil lwelah sruf in sucu lal Eli in kuhlwacnsap oacna mwet tol fuhlwact. (Sie Samuel 3:10-14) Kom fuhnuh muhta ke pacl lal Eli ac kom etuh lah el lwelah wen luo nahtuhl inge in oruh ma kuluk, yac kom ac tihkuclkucl kac? Yac ma sikyak inge ac ahkmuhnahsye luhlahlfongi lom nuh sin Jeova ac oruh kom in tilac kuhlwacnsuhpwacl?

7. David el oruh ma kuluk upac fuhkah, ac meac God el oruh kac?

⁷ Oasr ohiyac wowo pucspucs lal David, ac pa inge srihpac se oruh Jeova el arlacna luhngse el uh. (Sie Samuel 13:13, 14; Orekma 13:22) Tuhsruhktuh, David el oacyacpac oraclah ma na kuluk. Ke pacl se Uriah el som nuh ke mweun, David el oan yohrohl Bathsheba, suc muhtwacn kiyacl Uriah ac el pihtuctucyak. David el sruhnga in oasr mwet konwacack ma el oruh inge. Pwacnacng, el sap Uriah elan tuhkuh nuh yohrohl ac el kwacfel in som nuh lohm sel ah. David el finsrak tuh Uriah elan oan yohrohl Bathsheba tuh mwet uh in nuhnkuh muh Uriah pa pahpah tuhmuhn ahwowo sac. Tuhsruhktuh, Uriah el tiac som nuh lohm sel ah. Pwacnacng, David el oruh tuh in acnwucki Uriah ke mweun ac. Ke srihpen ma na kuluk ma David el oraclah inge, el ac sucu lal uh puhla mwe kweok upac. (Luo Samuel 12:9-12) Tuhsruhktuh, Jeova el pahkomuhtahl David ac nuhnak muhnahs nuh sel. El etuh lah David el luhngse in oruh ma wo. (Sie Tokosra 9:4) Kom fin wi muhta ke pacl sac, ac fuhkah puhlakihn lom ke ma David el oruh inge? Yac kom ac tui in kuhlwacnsuhpuh Jeova?

8. (a) Ke inkacnek fuhkah mwet sap Peter el tiac oaru nuh ke kahs lal uh? (b) Tukun tahfonglac se lal Peter inge, efuh kuh Jeova el srackna orekmakuhnuhl?

⁸ Sie pac mwe srihkasrak wo in Bible pa mwet sap Peter. Jesus el sulacllah elan sie mwet sap. Oasr pac pacl ma Peter el fahk kuh oruh ma tiac wo. Ke sie mwe puhpuhlyuck, Peter el fahk lah finne mwet nuhkewa som luhkel Jesus, el ac tiac. (Mark 14:27-31, 50) Tuhsruhktuh, tukun Jesus el sruhoh, mwet sap nuhkewa weluhlacng Peter eltahl som luhkel. Na ke pacl tolu, Peter el lahfwekuhnuhl Jesus. (Mark 14:53, 54, 66-72) Tuhsruhktuh, tok Peter el arlacna ahsor ke ma el oruh inge. Pwacnacng, Jeova el nuhnak muhnahs nuh sel ac el tahfwelah in orekmakuhnuhl. Fin pa kom sie sin mwet tuhma lutlut in pacl sac ac kom etwacack ma Peter el oruh inge, yac kom ac tahfwelah na in luhlahlfongi Jeova?

9. Efuh kuh kom luhlahlfongi lah God el suwohs pacl nuhkewa?

⁹ Ke mwe srihkasrak inge nuhkewa, kuht kuh in liye lah oasr ma kuluk ma mwet kuhlwacnsap luhn God uh oraclah ac oasr pac pacl ma eltahl ahkngalye mwet sahyac. Fin ma inge sikyak ke pacl inge, meac kom fah oruh? Yac kom ac tui ac tilac fahsr wi miting kuh sahp som luhkel Jeova ac liki mwet lal uh? Kuh yac kom nuhnkuh pac lah Jeova el pahkotwen ac el sano mwet in auliyak? Tuhsruhktuh, oasr pacl ma sie mwet suc oraclah ma kuluk upac el tiac ahsor kac pwacnacng el tiac auliyak. Yac kom luhlahlfongi lah Jeova el etuh ma sikyak inge ac lah el fah oruh ma enenweyuck uh ke pacl fal? Sahp el ac eislah mwet ingacn liki congregation uh, fin enenweyuck. Yac kom luhlahlfongi lah Jeova el ac fah oruh ma wo ac suwohs pacl nuhkewa?

SRUOKYACNA OARU LOM

10. Meac nuhnak lal Jesus ke orekma sesuwohs lal Judas Iscariot ac Peter?

¹⁰ Ke Bible, kuht riti lah puhs mwet suc sruokyacna oaru laltahl nuh sin Jeova ac nuh sin u lal uh, finne oasr mwet sahyac suc oraclah ma kuluk upac. Jesus pa mwe srihkasrak wo emeet kac uh. Tukun el orekmakihn fong na fohn se in puhruhe siyuck ke kahsruh luhn Pahpah tuhmwacl, el sulaclah mwet sap 12 lal uh. Tuhsruhktuh, sie seltahl pa Judas Iscariot suc tuh tuhkahkuhnuhlwack ke sahflahiyac ah. Oacyacpac, mwet sap Peter el tuh lahfwekuhnuhl Jesus. (Luke 6:12-16; 22:2-6, 31, 32) Jesus el tiac sis kuhtwena ma kuluk nuh sin Jeova kuh nuh sin mwet tuhma lutlut lal ke pacl ma kuhtuh seltahl ahktoasryacl. A, Jesus el sruokyacna fototo lal nuh sin Pahpah tuhmwacl uh ac el tahfwelah in kuhlwacnsuhpwacl ke oaru. Ke sahflahiyac, Jeova el ahkinsewowoyacl ke el ahkmoulyelack ac oraclah elan Tohkohsrah ke Tohkohsrahi lal inkuhsrao.​—Matthew 28:7, 18-20.

11. Meac Bible uh palye ke mwet kuhlwacnsap luhn Jeova ke pacl inge?

¹¹ Mwe srihkasrak lal Jesus uh luti kuht in sruokyacna oaru lasr nuh sin Jeova ac nuh sin u lal uh. Ac oasr srihpac wo lom in oruh ma inge. Kuht kuh in liye lah Jeova el kol mwet lal uh ke lwen sahflah inge. El kahsreltahl in som fahkwack ke ma pwacye uh fin facluh nohfohn ac eltahl na pa oruh orekma se inge uh. Eltahl oacyacpac inse sefanna ac engan ke srihpen ma nuhkewa ma Jeova el luti nuh seltahl uh. Bible uh ahkuhtweyac lah mwet kuhlwacnsap luhn God, “elos ac fah on ke engan.”​—Isaiah 65:14.

12. Meac nuhnak lasr ke orekma suhfal luhn mwet sahyac uh?

¹² Kuht arlacna engan ke srihpen Jeova el kol kuht ac kahsre kuht in oruh ma pucspucs. Ma inge siena liki mwet ke facl lal Satan uh suc tiac insewowo ac wacngihn finsrak pwacye laltahl nuh ke pacl fahsruh uh. Tiac inkacnek wo ac suwohs se in som liki Jeova ac u lal uh ke na srihpen sie mwet ke congregation uh fahk kuh oruh sie ma suhfal! A, kuht enenuh in sruokyacna oaru lasr nuh sin Jeova ac ukwe kolyuck lal uh. Kuht enenuh pac in etwaclah lah nuhnak ac ohiyac fuhkah kuht ac ahkkahlwemye ke pacl ma mwet sahyac uh oruh ma suhfal.

OHIYAC FUHKAH KOM AC AHKKAHLWEMYE?

13, 14. (a) Efuh kuh kuht enenuh in mongfihsracsr nuh sin sie sin sie? (b) Wuhlelah fuhkah kuht luhngse in esam uh?

¹³ Meac kom enenuh in oruh fin sie mwet lili wiyom el fahk kuh oruh sie ma ma ahkngalye puhlakihn lom an? Bible uh sang kahs in kahsruh se inge: “Nimet sa in muhlat, sie ma lahlfon pa in kohkoh srihpen muhlat.” (Ecclesiastes 7:9) Kuht nuhkewa sesuwohs ac oasr pacl ma kuht tahfonglac. Pwacnacng, kuht tiac kuh in nuhnkuh muh mwet lili wiyacsr uh ac fahk kuh oruh ma wo ac suwohs pacl nuhkewa. Ac tiac pac wo kuht in sikaleni na in nuhnkuh ke tahfonglac laltahl uh. Kuht fin oruh ma inge, kuht ac tilac engankihn kuhlwacnsap lasr nuh sin Jeova uh. Kuluk liki na inge, luhlahlfongi lasr uh ac kuh in muhnahslah ac sahp kuht ac kuh in som liki u luhn Jeova uh. Na kuht ac tilac kuh in kuhlwacnsuhpuh Jeova ac wacngihnlac finsrak lasr in wi moul ke facl sasuc lal uh.

¹⁴ Pwacnacng, meac ac kuh in kahsre kom in sruokyacna engan lom in kuhlwacnsuhpuh Jeova ke pacl ma mwet sahyac uh ahktoasrye kom? Pacl nuhkewa esam kahs in ahkkweye ma el wuhlelah inge: “Nga oraclah kuhsrao sasuc ac sie facluh sasuc. Ma meet ah ac fah muhlkihnyucklac.” (Isaiah 65:17; Luo Peter 3:13) Jeova el ac fah acsot mwe insewowo inge kom fin sruokyacna oaru lom nuh sel uh.

15. Meac Jesus el fahk kuht in oruh ke pacl ma mwet sahyac uh tahfonglac?

¹⁵ Ahok, kuht soenna oasr ke facl sasuc uh. Pwacnacng, fin sie mwet el ahkngalye puhlakihn lasr uh, kuht enenuh in nuhnkuh yohk ke ma Jeova el luhngse kuht in oruh uh. Ke sie mwe puhpuhlyuck, Jesus el fahk: “Kowos fin nuhnak muhnahs nuh sin mwet suc orekma kuluk nuh suwos, Pahpah tomowos suc inkuhsrao El ac fah oacyacpac nuhnak muhnahs nuh suwos. A kowos fin tiac nuhnak muhnahs nuh sin mwet uh, na Pahpah tomowos El ac fah tiac pac nuhnak muhnahs ke ma kuluk ma kowos oraclah uh.” Ac ke pacl se ma Peter el siyuck sel Jesus fin el ac nuhnak muhnahs nuh sin mwet sahyac uh “pacl itkohsr,” Jesus el tohpkohl ac fahk, “Moh, tiac pacl itkohsr, a itngucul pacl itkohsr.” Jesus el luti kuht in nuhnak muhnahs nuh sin mwet sahyac pacl nuhkewa.​—Matthew 6:14, 15; 18:21, 22.

16. Mwe srihkasrak wo fuhkah Joseph el oakiyac uh?

¹⁶ Mwe srihkasrak lal Joseph uh luti kuht pac ke ohiyac ma kuht enenuh in ahkkahlwemye ke pacl ma mwet sahyac uh ahktoasrye kuht. Joseph ac mukul srihsrihk se wiyacl uh pa tuhlihk luoiyac nahtuhl Jacob ac Rachel uh. Oasr tuhlihk mukul singucul sahyac nahtuhl Jacob, tuhsruhktuh el luhngse Joseph yohk liki tuhlihk nuhkewa sahyac. Ma inge oruh eltahl in arlacna sok sel Joseph. Eltahl arlacna sruhngwacl pwacnacng, eltahl kuhkwackuhnuhllah elan sie mwet kohs ac utucklac el nuh Egypt. Tukun yac pucspucs, tohkohsrah luhn acn Egypt el oraclah Joseph elan mwet kol ahkluo ke muhtuhnfacl sac ke srihpen el arlacna fwefwelac ke orekma wo lal uh. Tok, tuhlihk mukul wiyacl Joseph uh tuhkuh nuh Egypt in moul mongo ke srihpen sie sracl. Ke pacl se eltahl liyaclack Joseph, eltahl tiac akihlenuhl tuhsruhktuh el akihlenuhltahl. Finne eltahl oruh kuluk nuh sel, el tiac fohlohkihn ma kuluk laltahl uh. A, el srihke in liye fin eltahl auli na pwacye. Ke Joseph el liye lah eltahl eklac uh, el fahk nuh seltahl lah suc el uh. Ac tok, el ahkkweyacltahl ac fahk nuh seltahl: “Wacngihn ma kowos ac sahngweng kac. Nga ac fah liyekowosyang ac tuhlihk nuhtuwos an.”​—Genesis 50:21.

17. Meac kom luhngse in oruh ke pacl ma mwet sahyac uh tahfonglac?

¹⁷ Esam lah ke srihpen mwet nuhkewa sesuwohs, oasr pac mwet suc kom ac kuh in ahktihkuclkuclye. Pwacnacng, kom fin akihlen lah kom ahktoasrye sie mwet, ukwe kahs in kahsruh luhn Bible inge. Siyuck elan nuhnak muhnahs nuh sum ac suk in ahkwoyelah inmahsrlomtacl. (Riti Matthew 5:23, 24.) Kuht luhngse ke mwet sahyac uh nuhnak muhnahs nuh sesr. Pwacnacng, kuht enenuh in oruh pac nuh sin mwet sahyac uh. Colossae 3:13 el fahk nuh sesr: “Ke pacl nuhkewa ma kuhtwena suwos oasr toasr la inmahsrlowos, kowos in muhtweng ac nuhnak muhnahs nuh sin sie sin sie oacna ke Leum el nuhnak muhnahs nuh suwos.” Kuht fin luhngse na pwacye mwet lili wiyacsr uh, kuht ac tiac sruokyacna kasrkuhsrak lasr ke kuhtwena ma eltahl oruh ke pacl somlah ah. (Sie Corinth 13:5) Ac kuht fin nuhnak muhnahs nuh sin mwet sahyac, Jeova el fah nuhnak muhnahs nuh sesr pac. Pwacnacng, ke pacl ma mwet sahyac uh tahfonglac, kuht enenuh in pahkotwen nuh seltahl oacna Jeova, Pahpah tuhmwacsr el pahkotwen nuh sesr.​—Riti Psalm 103:12-14.