Efuh Kuh Arlacna Yohk Srihpac In Suwohs ac Pwacye

Ke Bible uh, kahs Greek se ma luhngasyucklac nuh ke “suwohs” el kalmackihnyuck nuh ke sie ma arlacna wo. Ma inge kuh pac in kalmackihnyuck nuh ke sie ma wo ma ahkkahlwemyeyuck ke sie ohiyen moul nwacsnwacs.

Mwet Christian uh arlacna oaru nuh ke kahs ma Paul el suhmuhslah inge: “Kuht kena tuh orekma lasr in suwohs pacl nuhkewa.” Meac kalmen ma inge?

MWE AMACI LASR SIFACNA

Inkaiyen mwet uh ngwetacng nuh ke selnguhn uh in liyacltahl ke lututacng nuhkewa meet liki eltahl som nuh in walihl. Efuh? Mweyen eltahl ke in wo luhmahltahl. Tuhsruhktuh, oasr ma yohk srihpac liki na in nahweyucklac wo insifacsr kuh karak lasr ac in sasuc ac kahto nuknuk lasr uh. Pwacye lah ohiyacsr ac kuh in ahkwoye kuh ahkkulukye atacsr ke luhkuh uh.

Kahs luhn God uh fahk lah nuhnak lasr uh kena nuhnkuh ke ma kuluk pacl nuhkewa. Genesis 8:21 el fahk: “Nga etuh lah nuhnak lalos nuhna kuluk na oe ke elos fuhsr ah me.” Pwacnacng, kuht fin ke suwohs ac pwacye kuht enenuh in kwacfeacng in lain kena kuluk inge pacl nuhkewa. Mwet sap Paul el ahkkahlwemye sie mwe ahkuhtweyac na yohk srihpac ke sie amaci lal nuh ke ma kuluk. El fahk: “Insiuck engankihn ma sap luhn God. Tuhsruhktuh nga liye siena kain ma sap pa orekma in monuk, sie ma sap suc lain ma sap suc nuhnak luhk uh ahkkweye. El oruh nga mwet kapihr nuh ke ma sap luhn ma kuluk suc orekma in monuk.”​—Rome 7:22, 23.

Sie mwe puhpuhlyuck pa ke pacl se ma kena luhn insiacsr uh mokle kuht in oruh sie ma kuluk ac kuht kena oruh orekma suhfal inge. Kuht tiac enenuh in mwet kuhlwacnsap se nuh ke puhlakihn lasr uh. Sulaclah uh srackna ma lasr. Ke pacl se kuht sulaclah in sislah sie nuhnak kuluk, kuht ac kuh in sruokyac na ohiyac suwohs ac pwacye lasr finne mwet suc raunikuhtlac uh tiac ahkkahlwemye ohiyac wo ingacn.

KUHTANGLAH MWE AMACI LOM

Kuht enenuh in sulaclah ke insiacsr muh kuht ac kwacfeacng in oruh ma wo, kuht fin ke suwohs ac pwacye. Tuhsruhktuh, mwe ahsor se lah mwet pucspucs sislah pacl yohk laltahl nuh ke nuknuk ma fal ac wo nuh seltahl sifacna liki na ohiyen moul ma wo ac fal eltahl in moulkihn uh. Ke srihpac se inge, ke pacl se ma eltahl oruh ma sesuwohs, eltahl tiac nuhnkuh muh kuluk. Puk se inge, The (Honest) Truth About Dishonesty el fahk ohinge: “Ke srihpen kuht ke mwet sahyac uh in nuhnkuh na muh kuht suwohs ac pwacye, kuht ahkkahlwemye ohiyac wo inge ye muhtahltahl ac tiac lwelah kuhtwena mwet in liye ke pacl kuht oruh ma sesuwohs.” Tuhsruhktuh, yac oasr ma kuh in kahsre kuht in etuh ke pacl ma kuht sesuwohs uh? Kuht arlacna srui lah oasr.

Million sin mwet fin facluh nohfohn konwacack lah Bible uh sang mwe enenuh se laltahl inge. Bible uh ahkuhtweyac ke ohiyen moul nwacsnwacs ma wo liki kuhtwena oakwuck sahyac. (Psalm 19:7) El sang mwe kahsruh ma kuh in luhlahlfongiyuck, nuh ke moul in sucu, orekma, ohiyen moul ac fototo luhn sie mwet nuh sin God. Ma inge ahkpwacyeyuck muh wo in pacl meet ah nwe ke pacl lasr uh. Masap ac kahs in kahsruh kac uh fal nuh sin mwet ke muhtuhnfacl ac sruf nuhkewa. Ke kuht tuni Bible uh, nuhnkuh yohk ke ma fwack kac uh ac orekmakihn kahs in kahsruh kac inge, kuht kuh in ahkpahye insiacsr in suwohs ac pwacye pacl nuhkewa.

Kwacfeacng lasr inge in eis etwacack pwacye ke Bible kuh in kahsre kuht na pwacye in kuhtanglah in lain ohiyac sesuwohs, tuhsruhktuh srackna oasr ma yohk srihpac sahyac kuht enenuh in oruh. Srihpac uh pa, kuht muhta ke sie facl ma nwacnwaclah ke orekma kuluk ac ma inge kuh in ahkkulukye kuht in nuhnkuh muh ma inge tiac kuluk. Pa pwacnacng kuht enenuh in puhruhe nuh sin God ke kahsruh ac karihngihnyuck lal. (Philippi 4:6, 7, 13) Ke kuht oruh ma inge, kuht kuh in puhlaik in tu na kuh ke ma suwohs ac in pwacye ke ma nuhkewa.

MA WO KE OHIYAC SUWOHS AC PWACYE UH

Hitoshi, suc sramsram ke mwe lutlut se emeet ke mwe rit se inge el engankihn ine wo lal in etweyuck oacna sie mwet suwohs ac pwacye ke orekma lal. Ke pacl inge el orekma luhn sie mwet suc ahksacohkye ohiyac suwohs ac pwacye lal uh. Hitoshi el fahk, “Nga arlacna kulohkihn lah nga kuh in konwacack sie orekma ma lwelah nga in sruokyac na nuhnak ac puhlakihn nwacsnwacs luhk uh.”

Oasr pac mwet sahyac suc puhla lah ma inge arlacna pwacye. Nuhnkuh ke kuhtuh mwe puhpuhlyuck ke mwet suc engankihn ma wo ke eltahl orekmakihn kahs in kahsruh luhn Bible inge, “orekma lasr in suwohs pacl nuhkewa.”

• Nuhnak ac Puhlakihn Nwacsnwacs

  

  “Nga srolah liki lutlut ac ke nga yac 13 tuh nga in wi mwet pihsrapasr orekma. Ke srihpac se inge, percent 95 ke mani ma nga oraclah ah ma tuhkuh ke pihsrapasr. Tok, nga pahyuckyak ac nga ac mukul tuhmuhk ah muhtwacwacack lutlut Bible yurin Mwet Loh luhn Jeova. Kuht etwaclah lah Jeovaa God el sruhnga orekma sesuwohs uh pwacnacng, kuht sulaclah muh kuht ac ekuhllah ohiyen moul se lasr inge. Ke yac 1990, kuht wuhleacng moul lasr uh nuh sin Jeova ac bacptaislac oacna Mwet Loh luhn Jeova.”​—Soakas 6:16-19.

  “Meet, lohm sihk uh nwacnwaclah ke ma pihsrapasrlah, tuhsruhktuh ingena, wacngihn na ma luhlah ma pihsrapasrlah kac; ac ma inge oruh nuhnak ac puhlakihn luhk uh in nwacsnwacs. Ke nga sifwil nuhnkuh ke yac pucspucs ma nga moulkihn ohiyac sesuwohs, nga arlacna kuloh nuh sin Jeova ke pahkotwen lal nuh sihk uh. Nga arlacna engan in mutul ke kais sie fong mweyen nga etuh lah Jeova el engan sihk.”​—Cheryl, Ireland.

  

  “Ke pacl se ma mwet kol se ke orekma luhk ah konwacack lah nga tiac eis mwe eyeinse luhn sie customer, el fahk nuh sihk: ‘God lom an oruh kom in mwet na luhlahlfongiyuck se! Mwe insewowo na pwacye se ke kom orekma luhn company lasr uh.’ Ke nga suwohs ac pwacye in ma nuhkewa, ma inge kahsreyuc in nwacsnwacs ke nuhnak ac puhlakihn luhk ye muhtuhn Jeova God. Ma inge oacyacpac lwelah nga in kahsruh sucu luhk uh ac mwet sahyac in oruh oacpacna.”​—Sonny, Hong Kong.

• Inse Mislac

  

  “Nga orekma ekihn sie mwet luhlahp ke sie bank ma etweyuck. Ke kain in business se inge, inkaiyen mwet uh tiac suwohs ac pwacye mweyen ma eltahl nuhnkuh na kac uh pa in kahsruhpi. Sie nuhnak ma oasr sin mwet pucspucs pa inge, ‘ Meac kuluk kac nga fin oruh ma sesuwohs ke kihtin pacl na in eis kuhtuh mani ac sang kahsruh nuh ke mwe enenuh luhn acn uh?’ Tuhsruhktuh, ke srihpen nga suwohs ac pwacye, nga puhla inse mislac. Nga sulaclah in sruokyacna ohiyac suwohs luhk, nga finne sun ma upac. Mwet kol ke orekma luhk uh etuh lah nga ac tiac kikiacp nuh seltahl kuh kikiacp kacltahl.​—Tom, United States.

• Suhnak

  

  “Mwet kol (supervisor) se ke acn in orekma luhk ah kwacfeyuc in kikiacp ke kuhtuh ma ma tuhlac ke acn in orekma uh, tuhsruhktuh nga sruhnga. Ke pacl se ma konweyuckyak mwet pihsrapasr inge, mwet se ma la orekma ah fahk kuloh nuh sihk ke nga suwohs ac pwacye uh. Enenweyuck puhlaik tuh in suwohs ac pwacye ke facl se inge ma nwacnwaclah ke mwet na sesuwohs. Tuhsruhktuh ke sahflahiyac uh, kuht eis luhlahlfongi ac suhnak luhn mwet sahyac uh.”​—Kaori, Japan.

Nuhnak ac puhlakihn nwacsnwacs, inse mislac ac suhnak, ma inge nuhkewa ahkkahlwemye lah oasr na pwacye ma wo ma tuhkuh ke kuht suwohs ac pwacye uh. Yac kom insese nuh kac?