Ahksuwohsye Ma Upac Ke Inkacnek luhn Luhngse

1, 2. Ma upac fuhkah luhn mwet uh ma sihmlac in puk luhn Genesis, ac efuh kuh ma inge yohk srihpac?

YAC oasr pacl kom muhta nuhnkuh ke ma upac ma sikyak inmahsrlon mwet se mwet se ma sihmlac in Bible? Nuhnkuh ke sapta ekahsr emeet ke puk luhn Genesis, kuht lotwelah lah Cain el unilyac Abel (Genesis 4:3-8); Lamech el uniyac mukul fuhsr se mweyen el tuh puokilyac (Genesis 4:23); mwet liyacacng kosro lal Abraham ac Lot eltahl amaci inmahsrloltahl (Genesis 13:5-7); Hagar el nuhnkuh muh el wo luhkel Sarah, ac Sarah el toasr sel Abraham (Genesis 16:3-6); Ishmael el lain mwet nuhkewa ac mwet nuhkewa laenuhl.​—Genesis 16:12.

² Efuh kuh kain in ma upac inge ahkkahlwemyeyuck in Bible? Mweyen kuht kuh in lotwelah ke mwe srihkasrak luhn mwet sesuwohs inge suc oasr pac ma upac laltahl. Kuht nuhkewa sesuwohs, ac ke pacl se kain in ma upac inge sikyak pac ke moul lasr uh, kuht kuh in etahi mwe srihkasrak wowo inge ma sihmlac in Bible uh. Ac kuht in taran in tiac etahi mwe srihkasrak luhn mwet kuluk inge. (Rome 15:4) Ma inge kuh in kahsre kuht in lotwelah in karihngihn mislac yurin mwet sahyac uh.

3. Sifac fuhkah mwe lutlut se inge ac sramsramkihn?

³ Ke mwe lutlut se inge, kuht ac fah lotwelah lah efuh kuht enenuh in ahksuwohsye ma upac inmahsrlosr, ac fuhkah kuht kuh in oruh ma inge. Kuht ac fah lotwelah pac ke kuhtuh kahs in kahsruh luhn Bible ma ac kahsre kuht in ahkwacngihnyelah ma upac ac in karihngihn fototo lasr nuh sin Jeova ac nuh sin mwet sahyac uh.

EFUH KUH MWET KUHLWACNSAP LUHN GOD UH ENENUH IN AHKSUWOSYE MA UPAC?

4. Kain in ohiyac fuhkah ma fahsrelihk fin facluh nohfohn, ac meac tuhkuh kac?

⁴ Satan pa srihpac yohk se ma pwacnacng tiac wo inmahsrlon mwet uh ac tiac inse sefanna. Efuh kuh kuht fahk ohinge? In imac Eden, Satan el fahk muh kais sie mwet ac kuh ac enenuh in oruh sulaclah lal sifacna ke ma wo ac ma kuluk, finne wacngihn kahsruh luhn God nuh kac. (Genesis 3:1-5) Tuhsruhktuh, kuht fin lohacng nuh ke ma sikyak fin facluh ke pacl inge, kuht kuh in liye lah kain in ohiyac inge oraclah muhkwena ma upac pucspucs. Mwet pucspucs puhla muh oasr suwohs laltahl in oruh sulaclah laltahl sifacna ke ma wo ac ma kuluk. Eltahl inse fuhlwact, nuhnkuh kac sifacna, ac luhngse in amaci, ac eltahl tiac elyah fin sulaclah laltahl inge ahkngalye mwet sahyac. Kain in ohiyac inge kol nuh ke ma upac. Bible uh ahkacsmakihnye kuht lah kuht fin sa in muhlat, ac fah oasr ma upac pucspucs lasr nuh sin mwet sahyac ac kuht ac kuh in oraclah ma kuluk pucspucs.​—Soakas 29:22.

5. Jesus el luti fuhkah mwet uh in ahksuwohsye ma upac laltahl?

⁵ Ke pacl se Jesus el oruh Mwe Sramsram lal Finohl ah, el luti mwet tuma lutlut lal in orek mislac ac ahksuwohsye ma upac ma sikyak inmahsrloltahl, finne luhman ma inge ac tiac wo nuh seltahl. Ke sie mwe puhpuhlyuck, el fahk nuh seltahl in kuhlwacng, in orek mislac nuh sin mwet sahyac, in sislah kain in puhlakihn oacna kasrkuhsrak, in sa ahksuwohsye ma upac ac in luhngse mwet lokoalok laltahl uh.​—Matthew 5:5, 9, 22, 25, 44.

6, 7. (a) Efuh kuh yohk srihpac in ahksuwohsye ma upac ma sikyak inmahsrlosr uh ke pacl na sa? (b) Kihsen siyuck fuhkah mwet nuhkewa luhn Jeova uh enenuh in siyuck seltahl sifacna uh?

⁶ Ke pacl inge, kuht kuhlwacnsuhpuh Jeova ke inkacnek luhn puhruhe, ke orekma in luti, ac in wi ke miting nuhkewa lasr uh. Kuht fin tiac orek mislac nuh sin mwet lili wiyacsr, Jeova el tiac insewowo ke ohiyen alu lasr nuh sel uh. (Mark 11:25) Kuht fin luhngse in kawuck nuh sin Jeova, kuht enenuh in nuhnak muhnahs nuh sin mwet sahyac ke pacl ma eltahl oraclah ma kuluk uh.​—Riti Luke 11:4; Ephesus 4:32.

⁷ Jeova el siyuck mwet kuhlwacnsap nuhkewa lal in nuhnak muhnahs ac in oasr mislac laltahl yurin mwet sahyac. Kuht kuh in siyuck sesr sifacna: ‘Yac nga sa na in nuhnak muhnahs nuh sin mwet lili wiyuck? Yac nga engan in weluhltahl?’ Kom fin akihlen lah upac nuh sum in nuhnak muhnahs nuh sin mwet sahyac, puhruhe nuh sin Jeova ac siyuck sel in kahsre kom in kapkapack ke ohiyac inge. Pahpah tuhmwacsr suc inkuhsrao ac fah lohng kain in puhruhe ke inse puhsisacl inge ac topuk.​—Sie John 5:14, 15.

YAC KOM KUH IN MUHLKUHNLAH SIE MA UPAC MA OREK NUH SUM?

8, 9. Meac kuht enenuh in oruh fin sie mwet el ahktoasrye kuht?

⁸ Kuht nuhkewa sesuwohs, pwacnacng kuht etuh lah ma mwet uh ac fahk kuh oruh uh, ac oasr pacl ma inge ac kuh in ahktoasrye kuht. (Ecclesiastes 7:20; Matthew 18:7) Meac kom ac oruh? Kuht kuh in lotwelah sie mwe lutlut yohk srihpac ke ma sikyak inge: Oasr sie muhtwacn lili suc paing mukul lili luo ke sie tuhkweni laltahl. Tuhsruhktuh, sie sin mukul lili inge el toasrlah ke inkacnek in paing se ma orek nuh sel ah. Ke mukul lili luo inge muhkwena, mukul lili se suc toasrlah inge el muhtwacwacack in tohrkahskahs ke muhtwacn lili sac. Tuhsruhktuh, mukul lili se sahyac ah ahkacsmakihnyacl lah muhtwacn lili sac el kuhlwacnsuhpuh Jeova ke oaru ke lusen yac 40 finne oasr ma upac pucspucs lal. El etuh na pwacye lah muhtwacn lili sac tiac luhngse in ahktoasryacl. Meac mukul lili se ma toasrlah inge el oruh? El fahk, “Pwacye sum.” Na el sulaclah in muhlkuhnlah ma sikyak inge.

⁹ Meac ma sikyak inge luti nuh sesr? Ke pacl se sie mwet el ahktoasrye kuht, kuht kuh in sulaclah lah meac kuht ac oruh. Sie mwet suc oasr luhngse yohroh, el ahkolah in nuhnak muhnahs. (Riti Soakas 10:12; Sie Peter 4:8.) Kuht fin “tiac lohacng” nuh ke ma kuluk, ma inge arlacna wo ye muhtuhn Jeova. (Soakas 19:11; Ecclesiastes 7:9) Ke ma inge, fin sulpac oasr pacl se ma sie mwet el fahk kuh oruh ma ac ahktoasrye kom, siyuck sum sifacna: ‘Yac nga kuh in tiac lohacng nuh ke ma upac se inge? Yac nga enenuh in nuhnkuh kac pacl nuhkewa?’

10. (a) Meac sie muhtwacn lili el oruh nuh ke kahs ma tiac wo ma fwack kacl ingacn? (b) Kahs in kahsruh fuhkah luhn Bible ma kahsruh muhtwacn lili se inge in sruokyacna inse mislac lal?

¹⁰ Ke pacl ma kuhtuh mwet uh fahk ma tiac wo kacsr, sahp ac upac in muhlkuhnlah ke ma eltahl fahk inge. Nuhnkuh ke ma sikyak nuh sel Lucy, sie muhtwacn lili suc orekma oacna sie pioneer. Kuhtuh sin mwet lili ke congregation uh fahk ma tiac wo ke inkacnek in luti lal ac orekmakihnyen pacl lal uh. El arlacna toasrlah kac ac el siyuck ke kahs in kahsruh sin kuhtuh mukul lili suc pah ke nuhnak ac orekma. Meac sikyak tohkoh? El fahk lah eltahl orekmakihn Bible in kahsrel in tiac nuhnkuh yohk ke kahs ma tiac wo luhn kuhtuh mwet lili ac in nuhnkuh yohk kacl Jeova. Ahkkweyeyuck el ke el riti Matthew 6:1-4. (Riti.) Fuhs inge ahkacsmakihnyacl lah, ma yohk srihpac emeet uh pa in ahkenganye Jeova. Pwacnacng, el sulaclah in tiac lohacng nuh ke kahs ma tiac wo inge. Ingena, finne oasr kuhtuh mwet lili suc fahk kahs ma tiac wo ke orekma in luti lal uh, el engan mweyen el etuh lah el kwacfeacng ke kuhiyacl kewa in ahkinsewowoye Jeova.

KOM FIN TIAC KUH IN MUHLKUHNLAH MA UPAC SE

11, 12. (a) Meac sie mwet Christian ac oruh el fin luhlahlfongi muh sie mwet lili wiyacl uh oruh “ma suhfal” nuh sel? (b) Meac kuht kuh in lotwelah ke ma Abraham el oruh in ahksuwohsye ma upac sac? (Liye petsac se meet ke mwe lutlut se inge.)

¹¹ “Kuht nuhkewa tahfonglac pacl pucspucs. (James 3:2) Fin pa kom etwacack lah sie mwet lili el tihkuclkucl sum ke srihpen sie ma kom fahklah kuh oraclah. Meac kom ac oruh? Jesus el fahk “kom fin ahkolah in oruh mwe kisac lom nuh sin God fin loang in kisac uh, ac kom esamack ingoh lah oasr ma suhfal lom nuh sin mwet lim, fihliyac mwe kisac lom an sisken loang an, ac fohlohklac ahkwoyelah inmahsrlomtacl meet, na kom fah fohlohkoh ac oruh mwe kisac lom nuh sin God.” (Matthew 5:23, 24) Ke ma inge, sramsram nuh sin mwet lili wiyom an. Kom fin oruh ma inge, finsrak lom an pa in orek mislac nuh sel. Kom enenuh in akihlen tahfonglac lom sifacna ac tiac suk in ahkpwacyeye lah el pa kuluk uh. Ma yok srihpac emeet uh pa in orek mislac nuh sin mwet lili wiyacsr uh.

¹² Bible uh ahkkahlwemye lah fuhkah mwet kuhlwacnsap luhn God kuh in sruokyacna mislac ke pacl ma oasr ma upac inmahsrloltahl. Ke sie mwe puhpuhlyuck, Abraham ac Lot kewana oasr kosro pucspucs nahtuhltahl, ac mwet suc liyacacng kosro nahtuhltahl inge muhtwacwacack in akuhkuhin mweyen suhfal acn ma eltahl orekmakihn inge. Ke srihpen Abraham el luhngse in orek mislac, pwacnacng el lwelah Lot elan sulaclah acn ma wo emeet uh. (Genesis 13:1, 2, 5-9) Sie mwe srihkasrak na wo nuh sesr pa inge! Ke srihpen kuhlwacng lal Abraham, yac el puhla kweok ke ma pucspucs ma wacngihnlac yohrohl ingacn? Moh, tiac ohinge! Tiac paht tohkoh, Jeova el wuhlelah in ahkinsewowoyacl Abraham yohk liki ma ma tuhlac luhkel ingacn. (Genesis 13:14-17) Meac kuht kuh in lotwelah kac? Kuht finne sun ma upac ke srihpen oasr ma tuhlac liki kuht, na Jeova el ac fah ahkinsewowoye kuht ke pacl ma kuht ahksuwohsye ma upac inmahsrlosr ke inkacnek ma ahkkahlwemye luhngse.^[1]​—Liye endnote.

13. Ohiyac fuhkah ma sie mwet liyacacng el ahkkahlwemye ke kahs upac ma fwack nuh sel ah? Meac kuht kuh in lotwelah ke mwe srihkasrak lal uh?

¹³ Nuhnkuh ke sie mwe srihkasrak ma sikyak ke pacl lasr uh. Sie mwet liyacacng sasuc ke toeni luhlahp uh el pangon sie mukul lili in siyuck sel lah el ac kuh in wi orekma ke department se inge. Mukul lili se ingacn el fahk kahs ma tiac wo ac fihliyac telephone sac mweyen el srackna kasrkuhsrak sin mwet liyacacng se meet ke department se ingacn. Mwet liyacacng sasuc sac el tiacna toasrlah, tuhsruhktuh el tiac kuh in pihlesruh ke ma se ma sikyak ah. Tukun ao se, el sifwil pangon mukul lili sac ac siyuck eltahl in ohsun. Ke wik se tohkoh ah, mukul lili luo inge ohsun ke Lohm in Toeni ac, ac tukun eltahl puhruhe nuh sin Jeova, eltahl sramsram ke lusen ao se. Mukul lili sac ahkuhtweyac ke ma sikyak nuh sel ac mwet liyacacng se meet ah. Mwet liyacacng sasuc sac lohacng ahkwoyac ac sramsramkihn kuhtuh fuhs ma yohk srihpac. Ke sahflahiyac ah, oasr mislac inmahsrloltahl ac eltahl tuhkweni orekma ke toeni luhlahp sac. Mukul lili sac arlacna srui lah mwet liyacacng se inge sramsram nuh sel ke inkacnek wo ac kuhlwacng.

YAC KOM ENENUH IN SIYUCK KASRUH SIN MWET ELDER?

14, 15. (a) Kain in pacl fuhkah ma wo kuht in orekmakihn kahs in kahsruh ke Matthew 18:15-17 inge? (b) Inkacnek tolu fuhkah ma Jesus el ahkkahlwemye, ac meac finsrak lasr ke kuht orekmakihn ma inge?

¹⁴ Inkaiyen ma upac inmahsrlon mwet Christian luo ac kuh in ahksuwohsyeyucklac inmahsrloltahl sifacna. Tuhsruhktuh, kuhtuh pacl uh ma inge tiac kuh in orek. Kuhtuh ma sikyak inge sahp enenuh kahsruh luhn mwet sahyac in fal nuh ke Matthew 18:15-17. (Riti.) “Orekma kuluk” ma Jesus el ahkkahlwemye ke fuhs inge tiacna ma upac srihsrihk se inmahsrlon mwet Christian. Kuht etuh fuhkah? Jesus el fahk lah fin sie mwet orekma kuluk el sruhnga in auliyak tukun el sramsram nuh sin mwet lili wiyacl, mwet ma etuh ke ma sikyak, ac nuh sin mwet elder, enenuh in “oracl oacna sie mwet pegan, kuh sie mwet eisacni tax.” Ke pacl inge, kalmen ma inge pa el enenuh in sisilac liki congregation. “Orekma kuluk” inge pa orekma kuhtasrihk ke mani kuh business, kuh in ahkkulukye mwet se ke inkacnek luhn lwesrihk. Tuhsruhktuh, ma inge tiac kalmackihn nuh ke kain in orekma kuluk oacna orekma in kosro, mukul nuh sin mukul, som liki alu pwacye, kuh alu nuh ke ma sruhloaclah. Kain in ma kuluk inge enenuh in karihngihnyuck sin mwet elder.

¹⁵ Jesus el sang kahs in kahsruh inge mweyen el luhngse in ahkkahlwemye nuh sesr lah, kuht ac kahsruh fuhkah sie mwet lili suc kuht luhngse. (Matthew 18:12-14) Kom ac ahkos fuhkah kahs in kahsruh inge? (1) Ke pacl ma kom ac el muhkwena, ahksuwohsye ma upac lomtacl an. Sahp, komtacl enenuh in sramsramkuhnlah ke pacl puhs. Tuhsruhktuh, meac kom enenuh in oruh fin tiacna wolac? (2) Kom enenuh in sramsram nuh sin mwet lili se wiyom ingacn wi sie mwet suc etuh ke ma sikyak an kuh sie mwet suc kuh in liye fin oasr kuhtwena ma kuluk ma oreklac. Fin ma upac se inge ahksuwohsyeyucklac, “orekma wo lom fohlohkohnuhlma.” Tuhsruhktuh, kom fin sramsram nuh sin mwet lili wiyom pacl puhs ac tiac fahlac wo, na pa inge pacl se ma kom enenuh in (3) fahk nuh sin mwet elder ke ma upac lomtacl uh.

16. Meac ahkkahlwemye lah inkacnek wo ac luhngse se pa in ukwe kahs in kahsruh lal Jesus uh?

¹⁶ Inkaiyen pacl uh, tiac enenweyuck in orekmakihn inkacnek tolu ma sihmlac ke Matthew 18:15-17. Mwe ahkkweye na pwacye pa inge. Efuh kuht fahk ohinge? Mweyen inkaiyen pacl uh, mwet se ma orekma kuluk inge akihlen tahfonglac lal uh ac ahksuwohsye. Pwacnacng, kain in mwet inge tiac enenuh in sisilac. Mwet se suc toasrlah inge el enenuh in nuhnak muhnahs nuh sin mwet lili wiyacl in muh oasr mislac. Pwacnacng, arlacna kahlwem ke kahs in kahsruh lal Jesus inge lah kuht tiac enenuh in suhlahklahk som nuh yurin mwet elder uh. Kuht enenuh na in reporti ma sikyak inge tukun kuht oruh inkacnek luo emeet ac fin oasr mwe ahkpwacyeye lah oasr kuhtwena ma kuluk ma sikyak.

17. Mwe insewowo fuhkah kuht ac fah engankihn ke kuht ‘suk moul mislac’ yurin sie sin sie?

¹⁷ Ke srihpen kuht sesuwohs, kuht ac kuh in ahktoasrye na mwet sahyac uh. Mwet tuhma lutlut James el suhmuhslah: “Tuhsruhktuh fin oasr mwet tiac tahfonglac ke kahs lal, el sie mwet suwohs suc kuh in leumi mahnol nohfohn.” (James 3:2) In ahksuwohsye ma upac, kuht enenuh in ‘sang insiacsr nohfohn in suk moul mislac.’ (Psalm 34:14) Kuht fin tahfwelah na in orek mislac nuh sin mwet lili wiyacsr uh, kuht ac fah engankihn fototo wowo lasr nuh seltahl, ac ma inge fah oruh kuht in inse sefanna. (Psalm 133:1-3) Yohk liki nuhkewa, kuht ac fah engankihn fototo wowo lasr nuh sin Jeova, “God suc acse mislac nuh sesr.” (Rome 15:33) Kuht ac fah engankihn kain in mwe insewowo inge ke kuht ahksuwohsye ma upac inmahsrlosr ke luhngse.