‘Som Nuh Yurin Mwet In Muhtuhnfacl Nuhkewa ac Oruh Tuh Elos In Mwet Tuhmuhk Lutlut’
“Som nuh yurin mwet in muhtuhnfacl nuhkewa fin facluh, ac oruh tu elos in mwet tuhmuhk lutlut, bacptaiselos . . . , luti nuh selos in ahkos ma nuhkewa nga sapkihn nuh suwos.”—MATTHEW 28:19, 20.
1, 2. Kihsen siyuck fuhkah ma siyuckyuck ke srihpen kahs lal Jesus ma sihmlac in Matthew 24:14?
JESUS el palye lah ke lwen sahflah uh, pweng wo ke Tohkohsrahi ac fah sulkackihnyuck nuh sin mwet nuhkewa. (Matthew 24:14) In oacna Mwet Loh luhn Jeova, kuht etweyuck fin facluh nohfohn ke orekma in luti lasr uh. Kuhtuh mwet uh luhngse pweng ma kuht luti uh, ac kuhtuh sruhnga. Tuhsruhktuh, kuhtuh sin mwet inge finne sruhnga lohng ke pweng ma kuht luti uh, eltahl suhnakihn orekma lasr uh. Kuht kuh in fahk lah kuht pa oruh orekma se ma Jesus el palye kac inge. Yac oasr suwos lasr in fahk ma inge? Kuht etuh fuhkah lah orekma in fahkwack lasr uh pa orekma se ma Jesus el palye kac uh?
2 Oasr alu pucspucs fahk muh eltahl pa sulkackihn pweng lal Jesus uh. Tuhsruhktuh, eltahl oruh orekma in fahkwack laltahl uh nuh sin mwet ke lohm alu laltahl, ke television kuh ke Internet muhkwena. Kuh eltahl ac fahk muhkwena nuh sin mwet sahyac lah eltahl lotwelah fuhkah ma kacl Jesus. Kuhtuh mwet uh nuhnkuh muh in kahsruh mwet suc oasr enenuh la kuh oruh kuhtuh pac orekma sahyac ma wacngihn molo oacna doctor, nurse kuh mwet luti pa inkacnek laltahl in fahkwack. Tuhsruhktuh, yac orekma inge pa orekma in fahkwack ma Jesus el sramsramkihn inge?
3. In fal nuh ke Matthew 28:19, 20 meac ma ahkosr ma mwet tuhma lutlut luhn Jesus uh enenuh in oruh?
3 Yac Jesus el luhngse mwet tuhma lutlut lal ah in soano mwet uh in tuhkuh nuh yohrohltahl? Moh! Tukun sifwil moulyak lal Jesus, el fahk nuh sin mwet tuhma lutlut pucspucs lal: “Som nuh yurin mwet in muhtuhnfacl nuhkewa fin facluh, ac oruh tuh elos in mwet tuhmuhk lutlut, bacptaiselos . . . , luti nuh selos in ahkos ma nuhkewa nga sapkihn nuh suwos.” (Matthew 28:19, 20) Pwacnacng, in oacna mwet tuhma lutlut lal Jesus, kuht enenuh in oruh ma ahkosr inge. Kuht enenuh in orek mwet tuma lutlut, bacptaiseloslac, ac in lotweltahl. Tuhsruhktuh ma se meet, kuht enenuh in som nuh yurin mwet uh. Sie scholar ke Bible el ahkuhtweyac: “In ‘som’ nuh yurin mwet pa orekma luhn kais sie mwet luhlahlfongi, finne ke acn fototo kuh acn loessalah.”—Matthew 10:7; Luke 10:3.
4. Meac ma enenweyuck in eklac mwet koa mwet?
4 Meac Jesus el luhngse mwet tuhma lutlut lal uh in oruh? Yac el luhngse eltahl in sifacna oruh orekma in luti uh, kuh el luhngse eltahl in orekmakihn oakwuck wo oacna sie u? Ke srihpen orekma in fahkwack “nuh yurin mwet in muhtuhnfacl nuhkewa” tiac kuh in orek sin mwet sefanna, pwacnacng mwet tuma lutlut lal eltahl enenuh in tuhkweni orekma oacna sie u. Pa inge kalmen kahs lal Jesus ke pacl se ma el suli mwet tuhma lutlut lal in eklac mwet koa mwet. (Riti Matthew 4:18-22.) Jesus el tiac sramsramkihn sie mwet pahtuhr suc orekmakihn ah ac pa lal sifacna, sano ke ik uh in kanglah pa se. A orekma in pahtuhr ma Jesus el sruhmuhn inge enenuh in orekmakihn koa in pahtuhr. Kain in pahtuhr se inge enenuh orekma upac, oasr oakwuck wo, ac oasr mwet pucspucs suc tuhkweni orekma.—Luke 5:1-11.
5. Kihsen siyuck ahkosr fuhkah ma enenuh in topukyucklac, ac efuh?
5 In etuh lah suc fahkwack pweng wo ke pacl inge, kuht enenuh in tohpohklah kihsen siyuck ahkosr inge:
Pweng wo fuhkah mwet tuhma lutlut lal Jesus enenuh in luti?
Srihpac fuhkah se ma ac mokleltahl in oruh kain in orekma se inge?
Kain in inkacnek fuhkah ma eltahl enenuh in orekmakihn?
Ma inge ac fah sulkackihnyuck oyac, ac orekma in luti uh ac orek ne ngac?
Top nuh ke kihsen siyuck inge ac fah kahsre kuht in akihlen lah suc oruh orekma in molwelah moul luhn mwet uh ac ma inge ac fah ahkkweye kena lasr in tafwela na in sulkackihn pweng wo.—Sie Timothy 4:16.
PWENG FUHKAH AC FAH SULKACKIHNYUCK?
6. Efuh kom kuh in luhlahlfongi lah Mwet Loh luhn Jeova uh pa luti ke pweng wo uh?
6 Riti Luke 4:43. Jesus el luti “pweng wo ke Tohkohsrahi,” ac el luhngse mwet tuhma lutlut lal uh in oruh oacpacna. Piyac kac un mwet se ma fahkwack pweng wo inge nuh sin mwet nuhkewa? Mwet Loh luhn Jeova muhkwena! Finne mwet suc sruhngwac kuht akihlen pac ma inge. Ke sie mwe puhpuhlyuck, lohacng nuh ke ma sie priest kuh mwet kol ke alu luhn Catholic, suc muhta ke kain in muhtuhnfacl el fahk ke Mwet Loh luhn Jeova. Ke kais sie muhtuhnfacl inge, priest se inge el siyuck sin Mwet Loh lun Jeova lah pweng fuhkah eltahl luti nuh sin mwet uh. Priest se inge el fahk, “Eltahl nuhkewa arlacna lahlfon mweyen top laltahl uh nohfohn na oacna sie: ‘Pweng wo ke Tohkohsrahi.’” Kahs luhn priest se inge mwe ahkpwacyeye lah kuht tiac lahlfon tuhsruhktuh kuht inse sefanna oacna mwet Christian pwacye. (Sie Corinth 1:10) Oacyacpac, Tohkohsrahi luhn God pa pweng se ma yohk ke Tower in San Fahkwack Tohkohsrahi luhn Jeova. Mackuhsin se inge oasr ke kahs 254 ac pihsac uh oasr ke million 59 ma oreklac ke kais sie mwe lutlut, ma inge oruh tuh mackuhsin se inge in pa puhs emeet kihtakatlah la fin facluh!
7. Kuht ac etuh fuhkah lah mwet kol ke alu ma fahk muh eltahl mwet Christian tiac luti ke pweng wo ac suwohs?
7 Mwet kol ke alu suc fahk muh eltahl mwet Christian eltahl tiac luti ke Tohkohsrahi luhn God. Fin pwacye eltahl sramsram ke Tohkohsrahi, puhs seltahl fahk muh ma inge oasr ke insiacn sie mwet Christian. (Luke 17:21) Eltahl tiac na luti mwet uh lah Tohkohsrahi pa sie government na pwacye inkuhsrao suc Jesus pa kol kac uh. A eltahl sramsramkuhnuhl Jesus ke pacl in Christmas kuh Easter muhkwena. Eltahl tiac ahkuhtweyac lah Tohkohsrahi ac fah ahksuwohsye ma upac nuhkewa luhn mwet uh, ac ke pacl na sa ma inge ac fah ahkwacngihnyelah ma kuluk nuhkewa fin facluh. (Fwackyuk 19:11-21) Kahlwem lah, mwet kol ke alu ma fahk muh eltahl mwet Christian elos tiac etuh lah meac Jesus el ac oruh oacna sie Tohkohsrah ke Tohkohsrahi luhn God. Ac ke srihpen eltahl tiac kahlwem ke pweng ma Jesus el luti, pwacnacng eltahl tiac pac kahlwem kac lah efuh eltahl enenuh in luti.
OHIYAC FUHKAH ENENUH IN OASR YOHROHSR IN ORUH OREKMA INGE?
8. Ohiyac kuluk fuhkah ma enenuh in taranyuck nuh ke orekma in luti uh?
8 Mwet tuhma lutlut lal Jesus eltahl enenuh in tiac luti in orek mani kuh in muhsahelah lohm kahto. Jesus el fahk: “Kowos in tiac pac eis molin ma kowos oruh.” (Matthew 10:8.) Pwacnacng, orekma in luti uh enenuh in tiac orek oacna sie business. (Luo Corinth 2:17) Mwet tuhma lutlut lal Jesus uh tiac enenuh in siyuck in moul nuh seltahl ke orekma in luti laltahl uh. (Riti Orekma 20:33-35.) Finne ma Jesus el sapkihn inge arlacna kahlwem, inkaiyen alu uh lohsrlah ke oakwuck laltahl in oracni mani in muh kuh in kahsruh alu laltahl uh in moli mwet kol ac mwet orekma ke alu laltahl uh. Ke srihpac inge, puhs mwet kol ke alu inge eltahl arlacna kahsruhpi.—Fwackyuk 17:4, 5.
9. Fuhkah Mwet Loh luhn Jeova ahkkahlwemye lah eltahl oruh orekma in luti uh ke ohiyac suwohs?
9 Yac Mwet Loh luhn Jeova eis mani ke Lohm in Toeni kuh ke toeni luhlahp laltahl uh? Moh! Orekma laltahl uh kahsreyuck ke mwe kahsruh ma tuhkuh ke inse muhlahlah luhn mwet uh. (Luo Corinth 9:7) Ke yac tari ac, Mwet Loh luhn Jeova oraclah apkuhran nuh ke ao luo billion ke orekma in luti ke pweng wo uh ac puhs liki mwet million yuc eltahl lutlut Bible yohroh ke kais sie mahlwem. Tiac na moul nuh seltahl ke orekma in luti laltahl inge tuhsruhktuh, eltahl engan in orekmakihn mani laltahl sifacna in oruh orekma se inge. Oasr sie mwet suc oruh lutlut yohk la el fahk ke Mwet Loh lun Jeova: “Ma se ma yohk srihpac emeet uh pa in fahkwack ac luti pweng wo.” El oacyacpac fahk lah, Mwet Loh lun Jeova eltahl tiac moli nuh sin kuhtwena mwet in kol ke alu laltahl uh. Kuht fin tiac eis molo ke orekma in luti lasr uh, meac na pwacye srihpac lasr in oruh orekma se inge? Kuht engan in oruh orekma se inge, ke srihpen kuht luhngse Jeova ac mwet uh. Ohiyac se inge ahkpwacyeye kahs in pahluh se in Psalm 110:3. (Riti.)
INKACNEK FUHKAH ENENUH IN OREKMAKIHNYUCK?
Kuht som fahkwack ke yen nuhkewa ma kuht kuh in konwacack mwet we (Liye paragraph 10)
10. Inkacnek fuhkah Jesus ac mwet tuhma lutlut lal uh orekmakihn in luti ke pweng wo uh?
10 Inkacnek fuhkah Jesus ac mwet tuhma lutlut lal uh orekmakihn in luti ke pweng wo? Eltahl som nuh yen nuhkewa ma eltahl kuh in konwacack mwet uh we. Ke sie mwe puhpuhlyuck, eltahl luti ke inkacnek uh ac oacyacpac ke acn in kuhka. Eltahl oacyacpac som ac sukok mwet ke lohm seltahl uh. (Matthew 10:11; Luke 8:1; Orekma 5:42; 20:20) Orekma in luti ke sie lohm nuh ke sie lohm pa sie inkacnek wo in sun kain in mwet nuhkewa.
11, 12. Meac tiac oacna sie ke kwacfeacng luhn alu ma fahk muh eltahl mwet Christian ac mwet luhn Jeova uh nuh ke orekma in fahkwack pweng wo?
11 Yac alu ma fahk muh eltahl mwet Christian uh som fahkwack ke pweng wo in oacna ke Jesus el oruh? Inkaiyen pacl uh, oasr molin mwet kol ke alu ma oruh mwe sramsram nuh sin mwet laltahl uh. Mwet kol inge tiac sukok mwet tuhma lutlut sasuc, a eltahl suk in sruokyacna mwet ma oasr tari ke alu laltahl uh. Oasr pacl ma eltahl ahkkweye mwet ke alu laltahl inge in som fahkwack. Ke sie mwe puhpuhlyuck, ke yac 2001, Pope John Paul II el fahk ke sie lwacta lah, mwet ke alu laltahl uh enenuh in som fahkwack ke puk luhn Matthew nuh ke John ac moniyuck laltahl uh enenuh in oacna mwet sap Paul suc tuh fahk: “Ac fuhkah kulukiyac nuh sihk nga fin tiac fahkwack Gospel!” Tohkoh, Pope el fahk lah orekma in luti se inge tiac enenuh in orek sin mwet na ekahsr suc ahkpahyeyuck, a enenuh in orek sin mwet nuhkewa ke alu laltahl uh. Tuhsruhktuh, arlacna suhpuhs mwet suc orekmakihn kuh ukwe kahs in ahkkweye se inge.
12 Ac fuhkah nuh sin Mwet Loh luhn Jeova uh? Eltahl muhkwena pa som fahkwack lah Jesus el muhtwacwacack kol oacna sie Tohkohsrah ke yac 1914. Eltahl ahkos Jesus ac oruh tuh orekma in luti pweng wo uh pa yohk srihpac emeet ke moul laltahl uh. (Mark 13:10) Puk se inge Pillars of Faith—American Congregations and Their Partners fahk lah orekma in luti uh arlacna yohk srihpac nuh sin Mwet Loh luhn Jeova. Puk se inge fahk pac lah ke pacl ma eltahl konwacack mwet suc masrinsracl, ahsor ke muhkwena laltahl, ac mas, eltahl kwacfeacng in kahsreltahl. Tuhsruhktuh, eltahl tiac muhlkuhnlah lah finsrak yohk laltahl uh pa in som fahkwack ke sahflahiyen oakwuck kuluk luhn facl se inge ac in luti mwet uh ke mwe molwelah. Mwet Loh luhn Jeova uh tahfwelah in fahkwack pweng se inge ac eltahl etahi inkacnek in luti lal Jesus ac mwet tuhma lutlut lal ah.
FUHKAH LUHPAN OREKMA IN LUTI UH AC MA INGE AC OREK NE NGAC?
13. Fuhkah luhpan orekma in luti se ma enenuh in orek inge?
13 Jesus el fahk lah mwet tuhma lutlut lal uh enenuh in som fahkwack ac luti ke pweng wo “fin facluh nohfohn.” Sapkihnyuck eltahl in orek mwet tuhma lutlut ke “mwet in muhtuhnfacl nuhkewa fin facluh.” (Matthew 24:14; 28:19, 20) Kalmen ma inge pa, pweng wo uh enenuh in lutiyuck ke yen nuhkewa fin facluh nohfohn.
14, 15. Meac ahkpwacyeye lah Mwet Loh luhn Jeova uh pa mwe ahkpwacyeye nuh ke kahs pahluh lal Jesus ke orekma in luti se ma orek fin facluh nohfohn uh?
14 Mwet Loh luhn Jeova uh muhkwena pa ahkpwacyeye kahs pahluh lal Jesus muh pweng wo uh ac fah lutiyuck fin facluh nohfohn. Efuh kuh kuht fahk ohinge? Fin acn America, oasr mwet kol 600,000 ke alu ma fahk muh eltahl mwet Christian, tuhsruhktuh oasr 1,200,000 ke Mwet Loh luhn Jeova suc fahkwack ke pweng wo uh fin acn we. Fin facluh nohfohn, oasr priest 400,000 ke alu luhn mwet Catholic, tuhsruhktuh puhs liki million 8 ke Mwet Loh luhn Jeova suc som fahkwack ke pweng wo inge ke acn 240. Kahlwem lah, Mwet Loh luhn Jeova uh pa som fahkwack ke pweng wo inge fin facluh nohfohn ac ma inge sang wolacna ac kaksak nuh sin Jeova!—Psalm 34:1; 51:15.
15 Finsrak lasr, Mwet Loh luhn Jeova uh pa pweng wo inge in fahsrelihk nuh sin mwet nuhkewa meet liki sahflah uh tuhkuh. In oruh orekma se inge, kuht luhngaslah ac oraclah million ke puk pucspucs, mackuhsin, mwe rit srihsrihk ac mwe solsol nuh ke toeni luhlahp wi Mwe Acsmakihn ke kahs 700 kuhtuh. Kuht sang ma inge nuh sin mwet uh ke wacngihn molo. Ke yac tari ah, kuht oraclah 4.5 billion ke mwe rit ma tuhkuh ke Bible. Kuht oacyacpac oraclah million 200 kuhtuh ke New World Translation of the Holy Scriptures ke kahs 130 kuhtuh. Ke website lasr uh, oasr mwe lutlut ke kahs puhs liki 750. Mwet Loh luhn Jeova muhkwena pa oruh orekma na wowo se inge.
16. Kuht etuh fuhkah lah nguhn muhtahl luhn God uh oasr yurin Mwet Loh luhn Jeova uh?
16 Puhtahkah kahs pahluh ke orekma in luti uh ac fah orek? Jesus el fahk lah orekma in luti se inge ac fah orek ne ke sahflah uh tuhkuh. Kuht, Mwet Loh luhn Jeova, kuh in muhtweng ac tahfwelah na ke orekma in luti se ma ahkfahsryeyuck ke lusen lwen sahflah inge ke na srihpen nguhn muhtahl luhn Jeova uh wi kuht ac kahsre kuht. (Orekma 1:8; Sie Peter 4:14) Kuhtuh mwet ke alu sahyac uh ac kuh in fahk muh, “Nguhn muhtahl lal uh wi kuht kuh oasr yohrohsr.” Tuhsruhktuh, yac eltahl kuh in oruh orekma ma Mwet Loh luhn Jeova uh oruh ke lusen lwen sahflah inge? Oasr u ma srihke in som fahkwack oacna ke kuht oruh, tuhsruhktuh eltahl tiac kuh in oruh. Kuhtuh, eltahl luhngse in som fahkwack, tuhsruhktuh eltahl oruh ma inge ke kihtin pacl na. Ac oasr pac mwet sahyac ma som fahkwack ke lohm nuh ke lohm, tuhsruhktuh eltahl tiac fahkwack ke pweng wo ke Tohkohsrahi uh. Pwacnacng, eltahl tiac oruh orekma se ma Jesus el muhtwacwacack kac ah.
SUC NA PWACYE FAHKWACK PWENG WO SE INGE KE PACL INGE?
17, 18. (a) Efuh kuht kuh in luhlahlfongi lah Mwet Loh luhn Jeova uh pa som fahkwack pweng wo ke Tohkohsrahi uh ke pacl inge? (b) Fuhkah tuh kuht srackna kuh in oruh orekma se inge ke pacl inge?
17 Na suc fahkwack pweng wo ke Tohkohsrahi uh ke pacl inge? Mwet Loh luhn Jeova muhkwena! Kuht etuh fuhkah ma inge? Mweyen kuht som fahkwack ke pweng wo ke Tohkohsrahi uh. Kuht sukok mwet ke orekma in luti lasr uh, pwacnacng kuht orekmakihn inkacnek wo uh. Oasr srihpac wo lasr in som fahkwack, pa luhngse lasr nuh sin Jeova ac nuh sin mwet uh. Orekma in luti lasr uh sun mwet ke yen nuhkewa fin facluh nohfohn, mweyen kuht som fahkwack nuh sin mwet ke muhtuhnfacl nuhkewa ac ke kahs nuhkewa. Kuht ac oacyacpac tahfwelah na in fahkwack ke pweng wo ke Tohkohsrahi uh ne ke sahflah uh tuhkuh!
18 Kuht arlacna fwefwelac in liye orekma wolacna se ma mwet luhn Jeova uh oruh in luti ke pweng wo ke lusen lwen sahflah inge. Tuhsruhktuh, fuhkah tuh kuht kuh in oruh orekma inge nuhkewa? Mwet sap Paul el ahkuhtweyac: “Mweyen God el orekma in kowos pacl nuhkewa, tuh kowos fah kuh ac engan in ahkos ma luhngse lal.” (Philippi 2:13) Lwelah Jeova elan tahfwelah na in use kuh ma kuht enenuh tuh kuht in sang kuhiyacsr pacl nuhkewa in fahkwack ke pweng wo se inge!—Luo Timothy 4:5.