Mwet Misac Ac Fah Sifwil Moulyak!

Sahp, kom esamuhl Gail suc sramsramkihnyuck ke muhtwacwacyen mwe rit se inge ke el ahlohloh kac el fin ac muh tilac ahsor ke misac lal Rob, suc mukul tuhmwacl uh. Tuhsruhktuh, el ngwetlah liye ke pacl se ma el ac fah sifwil liyacl ke oakwuck sasuc luhn God uh. El fahk, “Fuhs se nga luhngse emeet uh pa Fwackyuck 21:3, 4.” Fuhs se inge fahk: “God sifacna El ac fah muhta yohrohlos ac El fah God lalos. El ac fah elah sronin muhtahlos nuhkewa. Ac fah wacngihn misac, wacngihn ahsor kuh tuhng kuh kweok, mweyen ma nuhkewa meet ah wacngihnlac.”

Gail el fahk: “Arlacna kahlwem wuhlelah se inge. Nga pahkomuhta mwet suc oasr mwet laltahl suc misac tuhsruhktuh eltahl tiac etuh lah oasr finsrak laltahl in sifwil liye mwet inge.” Gail el moulkihn moul lal in fal nuh ke luhlahlfongi se lal inge ke el orekmakihn pacl ac kuh lal nuh ke orekma in luti uh. El sramsramkihn wuhlelah se luhn God inge nuh sin mwet tuhlan lal uh lah ‘ac fah wacngihnlac misac’ ke pacl fahsruh uh.

Sahp kom ac kuh in nuhnkuh, ‘Kuh pwacye?’ Pwacnacng, nuhnkuh ke mwe srihkasrak luhn mukul se inge pahngpahng Job. El wi ke sie mas na upac. (Job 2:7) Job el finne finsrakkihn elan misac, el srackna luhlahlfongi ke kuh luhn God in sifwil ahkmoulyelack fin facluh. El luhlahlfongi na pwacye ac fahk: “Nga ke kom in wihkihnyuclac in facl sin mwet misac [“inkuclyuck uh,” NW] . . . Na kom fah pang ac nga ac topuk kom, ac kom fah insewowo keik, suc ma oreklac luhn poum.” (Job 14:13, 15) Job el luhlahlfongi na pwacye lah God lal uh ac fah ahsroellah ac luhngse in sifwil fohlohkuhnack moul lal.

Ke pacl na sa, pa inge ma God el ac fah oruh nuh sel Job ac nuh sin mwet pucspucs sahyac ke pacl se facluh eklac nuh ke sie paradise. (Luke 23:42, 43) Bible uh fahk lah “ac fah oasr sifwil moulyak.” (Orekma 24:15, BMK) Jesus el ahkkweye luhlahlfongi lasr uh ke el fahk, “Nik kowos lut ke ma se inge: pacl se ac tuhkuh ke mwet misac nuhkewa fah lohng puhsracl ac ilme liki kuclyuck lalos.” (John 5:28, 29) Job el ac liye ke wuhlelah inge ahkpwacyeyuck uh. Ac fah oasr finsrak lal in “sifwil fuhsri ac kuhi” ac mahnol fah oan ma pahtpaht. (Job 33:24, 25) Ma inge ac fah sikyak pac nuh sin mwet nuhkewa suc ahkkahlwemye srui laltahl ke mwe sang na wowo se luhn God inge in sifwil moul fin facluh.

Fin oasr mwet lom suc misac, sahp mwe kahsruh pucspucs kuht sramsramkihn inge ac tiac eislah nohfohn ahsor lom an. Tuhsruhktuh, ke kom muhta nuhnkuh yohk ke wuhlelah pucspucs luhn God in Bible, kom kuh in ahkkweyeyuck ke finsrak pwacye ma ac kahsre kom in kwacfeacng na.​—Sie Thessalonica 4:13.

Yac kom luhngse in ahkyohkye etwacack lom lah kom ac muhtwacnglah fuhkah ke ahsor lom an? Kuh sahp, oasr kihsen siyuck lom ma kuhpahsr nuh ke ma kuht sramsramkihn inge, oacna “Efuh God el lwelah ma kuluk ac mwe kweok?” Nuhnak muhnahs som nuh ke website se lasr inge, jw.org, in liye lah Bible uh acse mwe ahkkweye ac mwe kahsruh fuhkah.