Sano Len lun Jeova Wi Mongfusesr

“Toeni nu ke lulalfongi lomwos . . . mongfusesr.”​—2 PITER 1:5, 6.

1, 2. Mea se inge mongfusesr, a efu ku met Kristian elos enenu ma inge?

LEN LULAP lun Jeova el arulanu apkurun. (Joel 1:15; Zefenaia 1:14) In oana met Kristian kut arlanu lungse in sruokye ku oaru a paye lasr nu sin God, a kut sano ke pal se su ku a sumwos lun Jeova in kol el akmutalyeyuk. Ke pal inge ke kut sano, kut pulakin kain in oiya lun srunga, kas in akkolukye kut, me kalyai, a mise ke sripen lulalfongi lasr. (Mattu 5:10-12; 10:22; Fwakyuk 2:10) Oasr ma eneneyuk in akkalemye ke mongfusesr​—oiya mwomwo in muteng ke ma upa puspus. Met sap Piter el kaifwe kut: “Toeni nu ke lulalfongi lomwos . . . mongfusesr.” (2 Piter 1:5, 6) Kut enenu in mongfusesr meyen Jisus el fwak: “A el su muteng nu ke safla, el nu fwa moul.”​—Mattu 24:13.

² Kut sun pa mas, kut asor yok ke mise lun sou lasr, a kutupa ma upa saye. Setan el arulanu insemwomwo kut fwin fuleak lulalfongi lasr! (Luk 22:31, 32) Ke kasru lun Jeova, kut ku in muteng ke ma upa puspus. (1 Piter 5:6-11) Loang akmwoye nu ke kutu experience lun met lili puspus su sang me akpayeye ka la kut ku in sano ke len lun Jeova wi mongfusesr a lulalfongi fukoko pal nukewa.

Mas Upa el Tia Tulokinelosi

3, 4. Sang sie me pupulyuk in akkalemye la kut ku in oaru in kulansap nu sin Jeova fwinne oasr mas upa lasr.

³ God el tia akkeye kut ke pal inge ke inkanek lun mwenmwen, tusruktu el ase nu sesr ku tu kut in muteng nu ke mas. (Sam 41:1-3) “Ke ma su Nga ku in esamek,” Sharon el fwak, “Nga muta pal nukewa ke wheelchair. Mutamwauk ke pal se Nga isusla, mas inge cerebral palsy el tulokinyuwi in engankin moul mwomwo lun tulik fwusr.” Lutlut kel Jeova a ke mwulela lal ke mano fukoko wangin mas sang me fwinsrak mwomwo nu sel Sharon. Fwinne upa nu sel in kaskas a in fwasr, el koneak insemwomwo ke orekma in luti lun met Kristian. Yea 15 kutu somla el fwak: “Mas luk el ku in yokelik a upala, tusruktu lulalfongi luk nu sin God a fototo luk nu sel el orala me kasru yok a akkeye moul luk na paye. Nga arulanu insemwomwokin in oana sie sin met lun God a ke me kasru lal su oasr pal nukewa!”

⁴ Met sap Poul el kaifwe met Kristian in an Tesalonika in “akpulaikyelos su munas insie.” (1 Tessalonika 5:14) Oiya puspus oana inse toasr el ku in sripen asor upa. In yea 1993, Sharon el simusla: “Nga pulakin mu Nga tia eis me insemwomwo ke inkanek nukewa, paenang nga pulakin na paye me asor su arulanu upa ke lusen yea tolu. . . . Kas in akkeye a kas in kasru tuku sin met elder. . . . Ke inkanek lun Tauer In San, Jeova el luti kut a akkelemye nu sesr ke oiyen asor su arulanu upa. Aok, el karungin na paye met kulansap lal nukewa a el etu a kalem ke pulakin lasr.” (1 Piter 5:6, 7) Sharon el srakna oaru in kulansap nu sin Jeova a el sano len lulap lun Jeova.

5. Oasr me akpayeye fuka met Kristian elos ku in muteng ke ma upa ke nunak a pulakin?

⁵ Oasr kutu met Kristian elos sun ma upa ke nunak a pulakin lalos ke sripen ma sikyak puspus ke moul lalos in pal somla. Oasr sie mokul su pangpang Harley el liye meun upa orek ke pal in Meun Lulap II a ke sripe inge oasr mwemwe koluk puspus lal ke meun. Ke el motul, el wowoyuk: “Loang akmwoye! Liye!” Ke el ngetalik, el arulanu sroksroki ke fiyo. Fwinne oinge, el moulkin moul su fwal nu ke kas in kasru lun God, a tokin kutu pal mwemwe koluk lal el srikeni in sikyak.

6. Fuka sie met Kristian el sun ma upa ke nunak a pulakin lal?

⁶ Oasr sie met Kristian su sun kain in mas inge bipolar disorder a el koneak mu upa nu sel in wi ke orekma in sulkakin peng mwo sie loom nu ke sie loom. Ne oinge, el kafweang in oru ma inge meyen el etu la kalmeyen orekma in sulkakin peng mwo nu sel a nu sin met puspus su long ka pa moul. (1 Timote 4:16) “Kutu pal el tia ku in oru tongtong ke srungul,” tusruktu el fwak: “Tokin kitin pal, Nga ku in kutongye pulakin luk, a Nga som nu ke siepa srungul, a sifwilpa srike in tongtong. Ke Nga tafwela in wi ke orekma in luti peng mwo, Nga karungin a akkeye orekma luk in kulansap nu sin God pal nukewa.” Orekma in wi ke tukeni nukewa el sie pa ma upa nu sel, tusruktu brother se inge el lulalfongi na paye ke saokiyen asrouki yurin met puspus su alu nu sin God. Ke ma inge, el kaifweang yok in akos ma eneneyuk in wi ka.​—Hibru 10:24, 25.

7. Fwinne oasr kutu met lili su sangeng in oru sramsram lalos ye mutun met puspus ku in wi ke sie meeting, fuka elos akkalemye muteng lalos?

⁷ Oasr kutu met Kristian su pulakin sangeng ku phobia​—kalme pa sangeng ke oiya puspus ku ke ma puspus. Ke sie me pupulyuk, saap elos sangeng in sramsram yurin met puspus ku fwinne in wi ke sie meeting. Srike nunku ke upaiya nu selos in sang me top ke meeting lun met Kristian a in oru sie me sramsram ke Theocratic Ministry School! Ne oinge, elos muteng, a kut arulanu kaksakinelos a aksaokye orekma lalos in wi ka a sang comment ka.

8. Mea ma yok sripe emeet in sang kasru in muteng ke ma upa nukewa ke nunak a pulakin?

⁸ Mongla fwal a motul fwal ku in kasru sie met in muteng ke ma upa ke nunak a pulakin lalos. Mwo in eis kasru ke akwuk lun ono. Arulanu yok sripe pa in fungla nu sin God ke inkanek lun pre. “Filiye me utuk lom fwin Jeova, a El a fwa kasre kom,” Sam 55:22 el akkalemye. “El koflana filiye met sumwosmwos tu in mukuikui.” Ke ma inge, ke inkanek nukewa “lulalfongi Jeova ke insiom kemwa.”​—Soakas 3:5, 6.

Muteng Fwin Oasr Met in Sou el Mise

9-11. (a) Mea ku in kasre kut in muteng ke pulakin asor yok ke pal se met su kut lungse el mise? (b) Fuka me srikasrak lal Anna el kasre kut in muteng ke pal in asor ke mise lun met su kut lungse?

⁹ Ke pal se oasr met in sou el mise, kain in oiya inge ku in oru met puspus ke sou in pulakin asor yok. Ebream el tung a memelil ke Sera mutan kiyel el mise. (Genesis 23:2) Fwinne Jisus su met sumwosmwos “el tung” ke pal se Lazarus kawuk se lal el mise. (Jon 11:35) Ke ma inge paye la asor yok ku in pulakinyuk ke pal se met su kom lungse el mise. Tusruktu, met Kristian elos etu la e fwa oasr sifwil moulyuk. (Orekma 24:15) Ke sripe inge, elos tia “asor oana elos su wangin fwinsrak lalos.”​—1 Tessalonika 4:13.

¹⁰ Fuka kut ku in muteng ke pal se fwin oasr met su kut lungse el mise? Saap me pupulyuk se inge ku in sang kasru. Kut tia pulakin asor ke pal loeloes fwin met kawuk se lasr el som nu ke kutu an saye, meyen kut etu la kut ku in sifwilpa liyel ke pal se el foloko. In nunku oinge nu ke mise lun sie met Kristian oaru ku in aksrikyela asor lasr meyen kut etu la el fwa sifwil moulyuk.​—Ekklisiastis 7:1.

¹¹ Lulalfongi ke inkanek nukewa nu sin “God lun pwarak nu kemwa” fwa kasre kut in muteng fwin oasr sie met mise. (2 Korint 1:3, 4) Orekma lasr in sifwilpa nunku yok ke orekma lal Anna sie mutan kutinmas in century se meet ku in kasre kut pa in muteng. Mokul tumal el mise tokin elos payuk ke lusen yea itkosr na. Tusruktu ke el yea 84 matwe, Anna el srakna oru orekma in kulansap nu sin Jeova ke temple. (Luk 2:36-38) Kain in moul lal inge su kafofo in kulansap nu sin God kasrel in muteng ke asor yok a supwar. Orekma lasr in wi pal nukewa ke orekma nukewa lasr oana met Kristian, wekunang orekma in sulkakin peng mwo lun Togusrai, ku in kasre kut in muteng ke pal in asor su tuku ke mise lun met su kut lungse.

Muteng ke Ma Upa Puspus

12. Kutu met Kristian elos muteng ke ma upa fuka su sikyak ke moul in sou?

¹² Kutu met Kristian elos enenu in muteng ke ma upa puspus su sikyak ke moul lun sou. Ke sie me pupulyuk, fwin mokul ku mutan payuk el orek kosro, ma inge ku in akasorye met nukewa ke sou! Ke sripen lut upa a asor yok, mutan ku mokul su tia oru ma koluk el tia ku in motul a el ku pa in tung. Fwinne el oru orekma fusrasr e ku in oana ma upa se nu sel in oru paenang ku in oasr ma tafongla puspus su ku in sikyak ku sie accident ku in sikyak. Mutan ku mokul payuk su tia oru ma koluk saap el tia ku in mongo, el ku pa in srila a el ku pa in pulakin ma upa ke nunak a pulakin lal. Saap upa nu sel in wi ke orekma nukewa lal oana sie met Kristian. A tulik nukewa ku in asor yok pa ka!

13, 14. (a) Me akkeye fuka kom ku in eis ke pre lal Solomon ke pal in kisekin temple? (b) Efu kut pre ke ngun mutal?

¹³ Kut fwin pulakin kain in ma upa puspus, Jeova el ase nu sesr me kasru su eneneyuk. (Sam 94:19) God el loang nu ke pre lun met kulansap nukewa lal, oana ke ma akkalemyeyuk ke pre lal Togusra Solomon ke pal in kisekin temple lun Jeova. Solomon el pre nu sin God: “Kutena pre ku kaifwe, kutena met fwa oru, ku Israel met sram nukewa, kais sie selos fwa etu me lokwalok insie sifwana, a asroela paul ngetmu nu ke loom se inge: na kom long in kosrao niyen muta lom, a nunak munas, a oru, a sung nu sin kais sie met fwal nu ke inkanek lal nukewa, su kom etu insie, (tu kom, aok kom mukena, etu insien tulik nutin met e nukewa); tu elos fwa sangeng sum len nukewa ke elos moul in fwal se su kom ase nu sin papa tumasr.”​—1 Togusra 8:38-40.

¹⁴ Kafweang yok in pre ke ngun mutal el me kasru su arulanu yok sripe. (Mattu 7:7-11) Fwako lun ngun mutal oasr oiya mwomwo ka in oana engan a misla. (Galetia 5:22, 23) Sie me akkeye na yok pa ma kut pulakin ke pal se Papa tumasr su oasr in kosrao el topuk pre lasr​—kut tila asor a kut engan, a misla fwa aolla me keok upa!

15. Ma simusla puspus fuka ku in sang kasru in aksrikyela me fosnga lasr?

¹⁵ Lupan me fosrnga ku in pulakinyuk fwin kut muteng ke ma upa yok ke nunak a pulakin lasr. Tusruktu me fosrnga inge ku in aksrikyeyukla kut fwin esam pal nukewa kas lun Jisus inge: “Nik komwos nununkala ke moul lomwos, mea komwos fwa mongo, ku mea komwos fwa nim; a tia ke monumwos, mea komwos fwa nukomang. ... A komwos suk meet togusrai lal, a ma inge nukewa fwa etukot pa nu sumwos.” (Mattu 6:25, 33, 34) Met sap Piter el kaifwe kut in ‘likiye nu kemwa sensen lasr nu sin God, tu El karungin kut.’ (1 Piter 5:6, 7) Fwal pa kut in kaifweang yok in aksumwosye ma upa. Tusruktu, tokin kut orala tari ma kut ku in oru, in fosrngakin yok ke ma upa tia ku in kasre kut tusruktu pre lasr pa ku in kasre kut. “Esung inkanek lom nu sin Jeova, kom in oayepa lulalfongi el, a el fwa oru,” met sim lun sam el akkalemye.​—Sam 37:5.

16, 17. (a) Efu ku kut tia sukosokla na paye liki me fosrnga? (b) Mea kut fwa pulakin kut fwin orekmakin Filippai 4:6, 7?

¹⁶ Poul el simusla: “Nik komwos nununkala in kutena ma, a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God; a misla lun God, su alukela ma eteyuk nu kemwa, fwa liaung insiomwos a nunkomwos in Kraist Jisus.” (Filippai 4:6, 7) Paye la, tulik nukewa natul Adam su sesumwos tia ku in sukosokla na paye liki me fosrnga. (Rom 5:12) Mutan luo kiyel Iso su met Het “eltal me akasorye” nu sin papa a nine kiyel Iso, Isaak a Rebeka. (Genesis 26:34, 35) Mas upa ku in oru met Kristian puspus oana Timote a Trofimus in pulakin me fosrnga. (1 Timote 5:23; 2 Timote 4:20) Oasr me fosrnga lal Poul nu sin met lili puspus. (2 Korint 11:28) Tusruktu, God su “Long pre” el oasr pal nukewa in sang kasru nu selos su lungse el.​—Sam 65:2.

¹⁷ Ke kut sano len lun Jeova, oasr me kasru a me akkeye lasr sin “God lun misla.” (Filippai 4:9) Jeova el “pakomuta a kulang,” el “mwo, a lungse in nunak munas,” a ‘el esam la kut kutkut.’ (Exodus 34:6; Sam 86:5; 103:13, 14) Ke ma inge lela kut in ‘fwakak me siyuk lasr nu sel,’ meyen ma inge fwa kasre kut in oasr “misla lun God”​—ku inse misla su alukela ke ma metu elos kalem ka.

18. In oana ke ma akkalemyeyuk in Job 42:5, fuka kut ku in “liye” God?

¹⁸ Ke pal se pre lasr topukyak, kut etu la God el wi kut. Tokin Job el muteng tari ke ma upa nukewa lal, el fwak: “Nga long tari keyum ke long in sre; a inge mutuk liye kom.” (Job 42:5) Ke mutun etauk, lulalfongi, a kulo wi kas in kaksak, kut ku in nunku ke orekma nukewa lun God nu sesr a kut ku in “liyel” su tia oana meeta. Kain in fototo mwomwo inge nu sin God oru kut in pulakin misla ke insiesr a nunak lasr!

19. Mea fwa sikyak kut fwin ‘filiye me fosrnga nukewa lasr nu sin Jeova’?

¹⁹ Fwin kut ‘filiye me utuk lasr nu sin Jeova,’ kut fwa ku in muteng ke ma upa puspus ke kut pulakin misla su karungin insiesr a ku lun nunak lasr. Ke insiesr, kut fwa pulakin sukosokla liki me fosrnga, sangeng, a me sensen. Nunak lasr fwa tia nunku yok ke me fosrnga.

20, 21. (a) Ma upa su sikyak nu sel Stefen el sang me akpayeye fuka ke misla fwin sun me kalyai? (b) Akkalemye kutu me srikasrak ke pal inge su akkalemye ke oiyen inse misla fwin sie met el muteng ke ma upa puspus.

²⁰ Met tuma lutlut Stefen el akkalemye inse misla ke pal se el muteng ke sie me srifwe upa ke lulalfongi lal. Meet liki el sang ma lo safla lal, met nukewa ke Sanhedrin elos “liye mutal oana mutun sie lipufan.” (Orekma 6:15) Mutal arulanu misla​—oana mutun sie lipufan, sie met tutafpo lun God. Tokin Stefen el akkalemye ma koluk lalos ke mise lun Jisus, met nununku “fwakisye insielos a elos ngalseni mwuselos nu sel.” “Tingtingi ke ngun mutal,” Stefen el “suiye nu sin kosrao a liye mwolena lun God a Jisus su tu lepo leyot sin God.” Ke sripen el akkeyeyuk ke araramu se inge, Stefen el akpayeye oaru lal nu ke na el mise. (Orekma 7:52-60) Fwinne kut tia liye aruruma ke pal inge, kut ku in pulakin misla lulap su God el ase nu sesr ke pal su kut kalyaiyuk.

²¹ Nunku ke nunak lun met Kristian puspus su sun me keok a mise ke paun met Nazi ke pal se orek Meun Lulap II. Sie met su srumon nu sin court ma upa su el sun, el fwak: “Nununku nu sik ngan mise sapkinyuk tari. Nga long, a tokin ma inge Nga kaskaskin kas inge ‘Kom oaru nu ke na kom mise,’ a kutupa kas lun Leum, ma nukewa inge tari. Tusruktu nik met fosrnga ka ingena. Oasr yuruk misla lulap, su kom tia ku in nunku ka la fuka ma inge!” Sie met Kristian fwusr su apkurun in anwuki ke inkanek in tatla sifwel el simusla leta lal nu sin papa a nine kiyel: “Infulwen fong tari. Srakna oasr pal luk in ekulla nunak luk. Ah! ya nga ku in sifwilpa insemwomwo fwin fwalu tokin Nga lafwekin Leum lasr? Mo tia! Tusruktu kom ku in lulalfongi la Nga som liki fwalu tusruktu Nga insemwomwo a oasr misla yuruk.” Wangin alolo ka la Jeova el sang kasru nu sin met kulansap oaru nukewa lal.

Kom Ku In Muteng!

22, 23. Ke mea kom ku in lulalfongi ke kom sano len lun Jeova ke muteng a mongfusesr lom?

²² Saap kom tia sun ma upa puspus su kut akuteye tari. Ne oinge, Job su sangeng nu sin God el paye ke pal se el fwak: “Met, su isusla sin mutan, len pu lal, a tingtinginu ke asor.” (Job 14:1) Saap kom sie papa ku nine su kafweang yok in sang me kasru lun ngun nu sin tulik natum. Elos muteng ke ma upa puspus sikyak ke loom lutlut, tusruktu paye la kom arulanu engan ke pal se elos tu na ku a oaru nu sin Jeova a ke akwuk sumwosmwos lal! Saap kom sun ma upa a me srifwe puspus ke niyen orekma lom. Tusruktu ke ma sikyak inge nukewa a ke kutupa oiya kom ku in muteng ka, meyen ‘Jeova el wis me utuk lom len nu kemwa.’​—Sam 68:19.

²³ Saap kom nunku keim sifwana la kom sie met su oana met puspus, tusruktu esam pal nukewa la Jeova el fwa tia mulkunla orekma mwo lom a lungse lom su kom akkalemye ke e mutal lal. (Hibru 6:10) Ke kasru lal, kom ku in muteng ke me srifwe puspus ke lulalfongi. Ke ma inge kafweang in akkalemye ke pre lom a akwuk lom orekma in oru ma lungse lun God. Na kom fwa ku in lulalfongi ke me insemwomwo lun God a ke kasru lal ke kom sano len lun Jeova wi muteng a mongfusesr.

Kom E Topuk Fuka?

• Efu ku met Kristian elos enenu mongfusesr?

• Mea ku in kasre kut in muteng ke mas a mise lun met su kut lungse?

• Fuka pre el ku in kasre kut in muteng ke ma upa puspus?

• Efu ku kut ku in sano ke len lun Jeova wi mongfusesr?

[Picture on page 25]

Lulalfongi Jeova kasre kut in muteng ke mise lun met su kut lungse

[Picture on page 27]

Pre su tuku ke insiesr kasre kut in muteng ke me srifwe nukewa ke lulalfongi