Yac Kom Orekmakihn Nuhnak Lom In Luhmahlah Ma Uh Ke Inkacnek Lahlmwetmwet?
Meac se inge ma oasr ke paun tolu ac konweyuckyak muh pa usrnguck emeet uh? Ma se inge pa brain luhn mwet uh. El ma na usrnguck se. Ke yohkwelihk ma kuht lotwelah kac uh, yohkwelihk pac srui lasr nuh ke orekma “wolacna” pucspucs luhn Jeova. (Psalm 139:14) Srihke nuhnkuh ke sie sin ma pucspucs ma brain lasr uh kuh in oruh, pa in luhmahlah kuh petsacelah sie ma.
Meac kalmac in luhmahlah kuh petsacelah sie ma ke nuhnak lasr? Sie dictionary el ahkuhtweyac lah kalmen kahs se inge pa, “kuh luhn sie mwet in nuhnkeack sie luhmah ke nuhnak lal ma sasuc ac pwacr kuh ma soenna sikyak.” Ke kom etuh kalmeyacn kahs se inge, yac kom tiac insese kac lah kom orekmakihn kuh se inge pacl puhs? Ke sie mwe puhpuhlyuck, yac kom nuh riti kuh lohng ke sie acn ma kom soenna som nuh we? Yac kom ac tiac petsacelah ma inge ke nuhnak lom an? Ke ma na pwacye uh, kuhtwena pacl ma kuht nuhnkuh ke sie ma kuht tiac kuh in liye, lohng, puhla, ema kuh ngok, nuhnak lasr uh muhtwacwacack in luhmahlah kuh petsacelah ma inge.
Bible uh kahsre kuht in kahlwem kac lah mwet uh oreklac in luhman God. (Genesis 1:26, 27) Yac ma inge tiac kalmackihn muh oasr kuh luhn Jeova in luhmahlah kuh petsacelah ma uh ke nuhnak lal? Ke srihpen el sulaclah elan orekuhtlac ke inkacnek se inge, kahlwem lah el luhngse kuht in orekmakihn in kahlwem ke ma luhngse lal uh. (Ecclesiastes 3:11) Kuht ac orekmakihn fuhkah kuh lasr in luhmahlah kuh petsacelah ma uh ke nuhnak lasr ke inkacnek wo inge? Ac inkacnek lahlfon fuhkah kuht enenuh in fahsr liki in tiac luhmahlah kuhtwena ma ke nuhnak lasr uh?
INKACNEK LAHLFON IN OREKMAKIHN NUHNAK LASR UH
(1) In ngwetngwetlah ac nuhnkuh ke ma tiac fal kuh ke pacl tiac fal.
Tiac kuluk in muhta ngwetngwetlah nuhnak. Oasr mwe ahkpwacyeye nuh kac lah oasr ma wo ma tuhkuh ke ngwetngwetlah nuhnak uh. Tuhsruhktuh, Bible uh kahsre kuht in ahksacohkye ma inge ke srihpen “oasr pacl ke ma nuhkewa.” Sie mwet el kuh in oruh ma ma tiac fal nuh ke pacl. (Ecclesiastes 3:1, BMK) Ke sie mwe puhpuhlyuck, kuht fin lwelah nuhnak lasr uh in nuhnkuh ke ma sahyac ke pacl in miting kuh ke pacl ma kuht oruh lutlut lasr sifacna ke Bible, yac kuh lasr in luhmahlah ma uh ke nuhnak lasr inge kahsre kuht kuh ahkkulukye kuht? Jesus el sifacna sensenkihn kuht ke ma upac ma tuhkuh ke kuht lwelah nuhnak lasr in engankihn nuhnak kuluk, oacna nuhnak fohkfohk. (Matthew 5:28) Kuhtuh sin ma ma kuht lwelah nuhnak lasr uh in petsacelah ac kuh in mwe ahsor na yohk nuh sin Jeova. Nuhnak fohkfohk uh kuh in step se meet nuh ke sie orekma fohkfohk. Kwacfeacng kom in tiacna lwelah nuhnak lom an in ahkloesye fototo lom nuh sin Jeova!
(2) In nuhnkuh muh mwe kahsruhp lasr uh ac kuh in karihngihn kuht nwe tok.
Mwe enenuh lasr nuh ke moul uh yohk srihpac. Tuhsruhktuh, kuht ac arlacna suhpwacrlac fin kuht muhtwacwacack in petsacelah muh mwe kahsruhp uh pa ac use karihngihnyuck ac insewowo pwacye. Solomon suc sie mwet lahlmwetmwet el suhmuhslah: “Mwet kahsruhp elos nuhnkuh muh mwe kahsruhp lalos ac karuhnguhnuhlos oacna pot fuhlwact ma rauneack sie siti.” (Soakas 18:11) Ke sie mwe puhpuhlyuck, nuhnkuh ke ma sikyak ke September 2009 fin acn Manila, Philippine ke pacl se ma ahluhkwelah percent 80 ke acn we nwacnwaclah ke sronot ke srihpen af na mahtol. Yac mwet kahsruhp we inge tiac wi puhla ma upac ma sikyak inge? Sie mukul kahsruhp suc tuhlac ma pucspucs lal el fahk, “Sronot sac sun mwet nuhkewa, ac ma inge oraclah ma upac ac mwe kweok nuh sin mwet kahsruhp ac mwet suhkahsruhp.” Sahp, fihsracsr in muhtwacwacack in nuhnkuh ac petsacelah muh mwe kahsruhp uh ac kuh in karihngihn moul lasr uh. Ma na pwacye uh pa tiac kuh.
(3) In elyah ke ma pucspucs ma ac tiacna sikyak.
Jesus el fahk kahs in kahsruh inge nuh sesr, kuht in tiacna “fosrngah.” (Matthew 6:34) Sie mwet suc elyah pacl nuhkewa el orekmakihn nuhnak lal in petsacelah kuh luhmahlah ma uh pacl nuhkewa. Kuht kuh in sislah kuh lasr ke wacngihn srihpac in elyahlac ke ma upac ma kuht sifacna petsacelah ke nuhnak lasr uh, ma upac ma soenna sikyak kuh ke ma ac kuh pacna in tiac sikyak. Ma suhmuhslah uh ahkkahlwemye lah kain in mwe fosrngah inge ac kuh in kol nuh ke suhpwacr ac ahsor yohk. (Soakas 12:25) Arlacna yohk srihpac in orekmakihn kahs in kahsruh lal Jesus inge ac tiac elyahlac, a kom fosrngahkihn mwe enenuh luhn kais sie lwen ke pacl la.
INKACNEK LAHLMWETMWET IN OREKMAKIHN NUHNAK LASR UH
(1) Nuhnkaclah na meet ma upac ma ac kuh in sikyak uh ac fahsr liki.
Ma suhmuhslah uh ahkkweye kuht in lahlmwetmwet ac motkoaclah na meet. Ke kuht orekmakihn kuh lasr in luhmahlah kuh petsacelah ma uh, kuht kuh in nuhnkuh ke ma upac ma ac fah tuhkuh ke sulaclah lasr uh meet liki na kuht oruh ma inge. Ke sie mwe puhpuhlyuck, fin pa suliyuck kom nuh ke sie toeni, kom ac orekmakihn fuhkah nuhnak lom in luhmahlah sie ma in muh kahsre kom in oruh sulaclah wo nuh kac lah kom ac wi kuh tiac? Tukun kom nuhnkuh ke ip pucspucs kac oacna mwet ma suliyuck nuh kac an, pihsen mwet ma ac wi ke toeni sacn ac piyac acn ac pacl ma ac fah orek we an, ac nuhnkuh: ‘Meac ac kuh in sikyak we?’ Yac nga kuh in petsacelah muh toeni se inge wo ac fal nuh ke kahs in kahsruh ke Bible uh? Kain in ma inge ac kuh in kahsre kom in petsacelah ma ac sikyak uh ke nuhnak lom an. Ke kom orekmakihn nuhnak lom in oraclah sulaclah wo, ma inge ac fah kahsre kom in fahsr liki kuhtwena ma ma ac kuh in ahkkulukye fototo lom nuh sin God uh.
(2) Ahkpahye nuhnak lom an in kuhtanglah ma upac.
In luhmahlah kuh petsacelah ma uh ke nuhnak lom an, pa in oacyacpac “muhtweng ac ahksuwohsye kuhtwena ma upac.” Fin pa oasr sie ma ma kom ac sie mwet lili ke congregation uh tiac inseselac kac. Kom ac sramsram fuhkah nuh sin mwet lili se wiyom inge tuh kom in ahkwoye inmahsrlomtacl? Oasr ip pucspucs ma kom ac kuh in nuhnkuh kac. Fuhkah inkacnek in sramsram lal uh? Piyac pacl se ma ac wo emeet kom in sramsramkihn ma upac sacn? Kahs fuhkah ac puhsra fuhkah ac wo kom in orekmakihn? Ke kom orekmakihn kuh lom in luhmahlah ac petsacelah ma uh ke nuhnak lom an, kom kuh in ahkpahye nuhnak lom an ke inkacnek pucspucs ma kom kuh in kuhtanglah sie ma upac ac sulaclah sie inkacnek ma kom puhla muh wo emeet an. (Soakas 15:28) Inkacnek kuhlwacng in kuhtanglah ma upac inge ac kuh in sang kahsruh in ahkkweye inse mislac luhn congregation uh. Pa inge sie inkacnek na wo in orekmakihn kuh lom in luhmahlah kuh petsacelah ma uh ke nuhnak lom an.
(3) Ahkyohkye rit ac lutlut lom sifacna ke Bible uh.
Rit Bible lom ke lwen nuhkewa uh arlacna yohk srihpac. Tuhsruhktuh, yohk ma enenweyuck liki na in riti sra pucspucs kac ke kais sie lwen. Kuht enenuh in nuhnkaclah ahkwoyac mwe lutlut ma kuh in orekmakihnyuck ke ma sihmlac in Bible uh ac kwacfeacng in orekmakihn ma inge ke moul lasr uh. Nuhnak lasr in ahksacohkye inkacnek pucspucs luhn Jeova uh enenuh in kapkapack ke inkacnek luhn rit Bible lasr uh. Kuht kuh in orekmakihn kuh lasr in luhmahlah kuh petsacelah ma uh ke nuhnak lasr uh in kahsre kuht. Fuhkah? Nuhnkuh ke mwe rit se inge Imitate Their Faith. Ke kom riti ma suhmuhslah ke puk se inge, ma inge ac kuh in pihrihk nuhnak lom an in luhmahlah ma pucspucs kac ac kahsre kom in petsacelah ma nuhkewa ma sikyak ingacn ac kais kuhtuh ma ke mwet in Bible ingacn. Kuht eis kahsruh in liye acn, lohng puhsra, ngok folin ma, ac nuhnkuh ke puhlakihn luhn mwet kac inge. Ma inge oruh kuht kuh in akihlen mwe lutlut na wo ac eis mwe ahkkweye ke ma suhmuhslah in Bible ma kuht puhla muh kuht etuh tari kac. Ke kuht orekmakihn nuhnak lasr in luhmahlah ma uh ke inkacnek se inge ke pacl in rit ac lutlut lasr sifacna ke Bible, ma inge ac fah kahsre kuht in eis mwe ahkkweye yohk.
(4) Ahkkahlwemye ohiyen pahkotwen.
Pahkotwen el sie ohiyac ma ahkuhtweyucki oacna, in puhla ma upac luhn sie pacna mwet ke insiacsr. Ke srihpen Jeova ac Jesus eltahl kewana ahkkahlwemye ohiyen pahkotwen, ac wo kuht in etaheltahl. (Exodus 3:7; Psalm 72:13) Kuht ac kapkapwack fuhkah ke ohiyac se inge? Sie inkacnek yohk ma kuht kuh in ahkyohkye ohiyen pahkotwen lasr uh pa ke kuht orekmakihn kuh lasr in luhmahlah ma uh ke nuhnak lasr. Sahp, soenna oasr pacl ma kuht sun ma upac se ma sie mwet lili wiyacsr el sun. Tuhsruhktuh, kom kuh in siyuck sum sifacna: ‘Fin nga pa sun ma inge, meac nga ac puhla? Meac nga ac enenuh?’ Ke kuht luhmahlah ke nuhnak lasr uh top nuh ke kihsen siyuck inge, ma inge ac fah kahsre kuht in pahkotwen. Ke kuht ahkkahlwemye ohiyen pahkotwen, ip nuhkewa ke moul in Christian lasr uh ac fah eis mwe insewowo kac, wekuhnacng orekma in luti lasr ac fototo lasr nuh sin mwet lili wiyacsr uh.
(5) Petsacelah lah ac fuhkah moul uh ke facl sasuc.
Ma suhmuhslah uh nwacnwaclah ke kahs in ahkuhtweyac ma ac kuh in kahsre kuht in petsacelah moul ke facl sasuc ma God el wuhlelah kac uh. (Isaiah 35:5-7; 65:21-25; Fwackyuk 21:3, 4) Mwe rit nahtuhsr uh sang kahsruh nuh ke kahs in ahkuhtweyac inge ke petsac na kahto ma sruhlweyucklac. Efuh? Mweyen petsac uh ahkkweye nuhnak lasr uh ac kahsre kuht in sifacna petsacelah ke kuht engankihn mwe insewowo pucspucs ke wuhlelah inge. Jeova, suc oraclah kuh se inge in luhmahlah ma uh ke nuhnak lasr, el etuh wo liki kuhtwena mwet lah fuhkah fokokoiyen kuh se inge. Ke kuht orekmakihn in nuhnkuh yohk ke wuhlelah pucspucs lal uh ac kuh in ahkkweye luhlahlfongi lasr nuh ke ahkpwacyeyacn ma inge ac kahsre kuht in sruokyacna oaru lasr, finne ke kuht muhtweng ke ma upac pucspucs ke pacl inge.
Luhngse luhn Jeova pa oruh el in use kuh na yohk se inge ke nuhnak lasr uh. Ma inge ac kuh in kahsre kuht in kuhlwacnsuhpwacl in wo ke kais sie lwen ke moul lasr. Lwelah kuht in ahkkahlwemye srui lasr nuh sin God ke el use mwe sang na wowo se inge nuh sesr. Kuht kuh in oruh ma inge ke kuht orekmakihn ke inkacnek lahlmwetmwet ke kais sie lwen.