Ahkkahlwemye Srui Lom nuh ke Mwe Kihte Sacohk luhn God

1, 2. (a) Meac wi ke mwe kihte luhn God uh? (b) Kihsen siyuck fuhkah kuht ac fah topuk ke mwe lutlut se inge?

JEOVA el use nuh sesr mwe sang se ma yohk emeet ma ahkkahlwemye luhngse lal ke pacl se el suhpwaclma Jesus suc Wen sefanna nahtuhl nuh facluh. (John 3:16; Sie John 4:9, 10) Mwet sap Paul el pahngon mwe sang se inge “mwe kihte . . . suc yohk liki in fahk” kuh tiac kuh in ahkuhtweyucki. (Luo Corinth 9:15) Efuh kuh Paul el fahk ohinge?

² Paul el etuh lah wuhlelah wolacna nuhkewa luhn God uh kuh in ahkpwacyeyuck ke srihpen mwe kihsac luhn Christ. (Riti Luo Corinth 1:20.) Kalmen mwe kihte luhn God uh pa mwe kihsac lal Jesus wi mwe insewowo nuhkewa ma Jeova el ahkkahlwemye nuh sesr uh. Sacohkiyacn mwe kihte inge tiac kuh in ahkuhtweyucki ke sie inkacnek ma kuht ac kuh in kahlwem na pwacye kac. Meac puhlakihn lasr ke mwe kihte se inge? Ac mwe sang se inge mokle insiacsr fuhkah ke pacl se kuht ahkolah nuh ke Mwe Acsmakihn ke Misac luhn Christ ke March 23, 2016?

MWE SANG SACOHK LUHN GOD

3, 4. (a) Meac kom puhla ke pacl se sie mwet el usot mwe sang se lom? (b) Mwe sang na sacohk se ac kuh in ekuhllah fuhkah moul lom an?

³ Kuht arlacna luhngse ke pacl se sie mwet el use nuh sesr sie mwe sang. Tuhsruhktuh, kuhtuh mwe sang uh arlac yohk srihpac kuh sacohk nuh sesr ac ma inge kuh in ekuhllah moul lasr uh. Ke sie mwe puhpuhlyuck, srihke luhmahlah ke nuhnak lom an muh kom oraclah ma na kuluk se ma kuhnahoslah masap uh. Na mwe kai ma ituckot nuh sum ke srihpen ma kom oraclah ingacn pa misac. Tuhsruhktuh, sie mwet suc kom tiacna etuh sifacna eisaclacng muh el ac ahol kom ac eis mwe kai lom an. El macnsiskuhnlah elan misac keim! Meac mwe sang se inge ac mokle kom in puhla?

⁴ Sie mwe sang na sacohk ma ahkkahlwemye luhngse inge ac mokle kom in ekuhllah moul lom an. Sahp, ma inge ac oruh pac kom in kuhlwacng nuh sin mwet, luhngse mwet sahyac ac nuhnak muhnahs nuh sin kuhtwena mwet suc tiac wo nuh sum. Ke lusen pacl luhlah ke moul lom an, sahp kom ac ke ahkkahlwemye lah kom arlacna srui ke mwe sang se ma mwet se ingacn oraclah nuh sum an.

5. Fuhkah mwe sang luhn God ke mwe molwelah uh yohk liki kuhtwena mwe sang sahyac?

⁵ Mwe sang luhn God ke mwe molwelah se inge arlacna yohk liki na mwe sang se ke mwe puhpuhlyuck se inge. (Sie Peter 3:18) Srihke nuhnkuh ke ma se inge: Kuht nuhkewa usrui ma kuluk sel Adam ac molin ma kuluk inge pa misac. (Rome 5:12) Luhngse pa moklel Jeova elan suhpwaclma Jesus nuh facluh tuh “elan misac ke mwet nuhkewa.” (Hebrew 2:9) Tuhsruhktuh, puhs ma sahyac ma mwe kihsac lal Jesus uh ac ahkfahsrye! Ma inge pa ac ahkwacngihnyelah misac ma pahtpaht. (Isaiah 25:7, 8; Sie Corinth 15:22, 26) Mwet nuhkewa suc ahkkahlwemye luhlahlfongi laltahl kacl Jesus ac fah engankihn moul mislac ac insewowo ma pahtpaht, ke eltahl weluhl Jesus oacna sie tohkohsrah inkuhsrao kuh muhta ye kolyuck ke Tohkohsrahi luhn God fin facluh. (Rome 6:23; Fwackyuk 5:9, 10) Mwe insewowo fuhkah pac sahyac tuhkuh ke mwe sang se luhn Jeova inge?

6. (a) Mwe insewowo fuhkah ke mwe sang luhn Jeova uh kom engan in wi puhla? (b) Meac ma tolu ma mwe sang luhn God ac fah mokle kuht in oruh?

⁶ In wekuhnacng pac nuh ke mwe sang luhn God uh, facluh ac fah eklac sie paradise, mwet mas ac fah unweyucklac ac mwet misac fah sifwil moulyak. (Isaiah 33:24; 35:5, 6; John 5:28, 29) Kuht luhngse Jeova ac wen kuloh se nahtuhl uh ke “mwe kihte . . . suc yohk liki in fahk.” Meac mwe sang se inge ac mokle kuht in oruh? Ac fah mokle kuht (1) in etahel Jesus ahkwoyac, (2) in luhngse mwet lili wiyacsr ac (3) in nuhnak muhnahs nuh sin mwet sahyac ke insiacsr kewa.

“LUHNGSE LUHN CHRIST PA LEUM FACSR”

7, 8. Meac kuht enenuh in puhla ke luhngse luhn Christ ac meac ma inge ac mokle kuht in oruh?

⁷ Ma se meet, kuht enenuh in arlacna luhngse in orekmakihn moul lasr uh in ahkfuhlwactye Jesus. Mwet sap Paul el fahk: “Luhngse luhn Christ pa Leum facsr.” (Riti Luo Corinth 5:14, 15.) Mwet sap Paul el etuh lah kuht fin eis luhngse yohk luhn Jesus inge, ma inge ac mokle kuht in luhngse ac ahkfuhlwactye Jesus. Ahok, ke pacl se kuht kahlwem na pwacye ke ma Jeova el oraclah nuh sesr inge, luhngse lal uh ac mokle kuht in moulkihn moul lasr ke sie inkacnek ma ahkkahlwemye lah kuht ahkfuhlwactye Jesus. Kuht ac oruh ma inge fuhkah?

⁸ Luhngse lasr nuh sin Jeova uh ac mokle kuht in etahi mwe srihkasrak lal Jesus uh ac fahsr in falkacl ahkwoyac. (Sie Peter 2:21; Sie John 2:6) Ke pacl se kuht ahkos God ac Christ, kuht ahkkahlwemye luhngse lasr nuh seltahl. Jesus el fahk: “Kuhtwena mwet suc lohng ac liyacacng ma sap luhk, el luhngse nga. Ac el suc luhngse nga, Pahpah tuhmuhk El fah luhngse pac el. Nga fah oacyacpac luhngse el ac sifacna fahkyucyak nuh sel.”​—John 14:21; Sie John 5:3.

9. Mwe sruhf fuhkah raunikuhtlac uh?

⁹ Ke puhlan pacl in Mwe Acsmakihn uh, wo kuht in lihksreni na nuhnkuh lah kuht orekmakihn fuhkah moul lasr uh. Pwacnacng siyuck sum sifacna: ‘Inkacnek fuhkah ma nga etahel Jesus tari kac? Ke inkacnek fuhkah nga srackna kuh in kapkapack?’ Arlacna yohk srihpac kuht in siyuck sesr sifacna kihsen siyuck inge mweyen mwet fin facluh uh ke kuht in moulkihn moul lasr oacna eltahl. (Rome 12:2) Kuht fin tiac taran, kuht ac kuh in muhtwacwacack etahi mwet luti luhn facluh, mwet pwengpweng, ac mwet ma etweyuck ke sritacl. (Colossae 2:8; Sie John 2:15-17) Kuht ac fahsr liki mwe sruhf inge fuhkah?

10. Kihsen siyuck fuhkah kuht enenuh in siyuck sesr sifacna ke puhlan pacl in Mwe Acsmakihn uh? Meac top nuh ke kihsen siyuck se inge ac kuh in mokle kuht in oruh? (Liye petsac se meet ke mwe lutlut inge.)

¹⁰ Arlacna wo kuht in oraclah pacl ke puhlan pacl in Mwe Acsmakihn uh in tuni nuknuk, movie, on, ma oan ke computer, cell phone kuh tablet nahtuhsr uh. Siyuck sum sifacna: ‘Jesus el fin oasr yuruk ke pacl se inge ac liye ma nga nukum uh, yac nga ac mwekihn?’ (Riti Sie Timothy 2:9, 10.) ‘Yac nuknuk luhk uh ahkkahlwemye lah nga sie mwet tuhma lutlut luhn Christ? Yac Jesus el ac luhngse in liye movie nuhtihk inge? Yac el ac luhngse lohng on nuhtihk inge? Jesus el fin ngihsraclah cell phone kuh tablet nuhtihk uh, yac nga ac mwekihn ke ma el ac liye kac uh? Yac nga ac kuh in ahkuhtweyac nuh sel Jesus lah efuh nga luhngse sritaclkihn video game se inge?’ Luhngse lasr nuh sin Jeova uh enenuh in mokle kuht in sislah kuhtwena ma suhfal nuh sin sie mwet Christian, ma inge finne yohk molo. (Orekma 19:19, 20) Ke pacl se kuht wuhlelah moul lasr nuh sin Jeova, kuht wuhlelah pac muh kuht ac orekmakihn moul lasr in kaksakihn Christ. Pwacnacng, kuht tiac enenuh in oruh kuhtwena ma ma ac oruh upac nuh sesr in etahi Jesus.​—Matthew 5:29, 30; Philippi 4:8.

11. (a) Luhngse lasr nuh sin Jeova ac Jesus uh mokle kuht fuhkah ke orekma in luti uh? (b) Luhngse lasr uh ac mokle kuht fuhkah in kahsruh mwet sahyac ke congregation uh?

¹¹ Luhngse lasr nuh sel Jesus uh mokle kuht in som fahkwack ac luti ke inkacnek moniyuck. (Matthew 28:19, 20; Luke 4:43) Ke puhlan pacl in Mwe Acsmakihn uh, sahp kom kuh in oraclah oakwuck nuh ke ma kom ac oruh ke kais sie lwen tuh kom in auxiliary pioneer ac wi ke ao 30 kuh 50 ke orekma in luti uh. Sie mukul tuhmuhn mas suc matwacl oasr ke yac 84 el pahngon muh el tiac kuh in pioneer ke srihpen mahtuhoh ac muhnahslah lal. Tuhsruhktuh, mwet suc pioneer ke yen sel uh luhngse in kahsrel. Eltahl kahsrel ke mwe wiwac ac sulaclah acn in forfor ma el ac kuh in weluhltahl orekma kac. Ke sahflahiyac ah, mukul lili se inge sun ao 30. Yac kom kuh in kahsruh sie mwet ke congregation lom an in pioneer ke mahlwem luhn March kuh April? Ahok, pwacye lah tiac mwet nuhkewa kuh in pioneer tuhsruhktuh, kuht kuh in orekmakihn pacl ac kuh lasr uh in ahkyohkye orekma in kuhlwacnsap lasr nuh sin Jeova. Kuht fin oruh ohinge, in oacna Paul kuht ahkkahlwemye lah luhngse luhn Jesus uh mokle insiacsr. Meac pac luhngse luhn God ac kuh in mokle kuht in oruh?

KUHT ENENUH IN LUHNGSE SIE SIN SIE

12. Meac luhngse luhn God uh mokle kuht in oruh?

¹² Ma se ahkluo an, luhngse luhn God uh enenuh in mokle kuht in luhngse mwet lili wiyacsr uh. Mwet sap John el suhmuhslah: “Mwet kawuck sacohk luhk, God el fin luhngse kuht ohinge, kuht enenuh pac in luhngse sie sin sie.” (Sie John 4:7-11) Pwacnacng, kuht fin ke God elan luhngse kuht, kuht enenuh pac in luhngse mwet lili wiyacsr uh. (Sie John 3:16) Kuht ac ahkkahlwemye fuhkah luhngse nuh seltahl?

13. Mwe srihkasrak fuhkah Jesus el oakiyac ke luhngse nuh sin mwet sahyac?

¹³ Mwe srihkasrak lal Jesus uh ahkkahlwemye lah kuht ac luhngse fuhkah mwet sahyac. Ke pacl se el muhta fin facluh ah, el kahsruh mwet pucspucs, yohk na mwet inse puhsisacl. El unwelah mwet mas, mwet ul, mwet kun, mwet suhlohng kahs ac mwet suc tiac kuh in sramsram. (Matthew 11:4, 5) Jesus el tiac oacna mwet kol ke alu pucspucs in pacl lal ah mweyen el engan in luti mwet suc luhngse in eis etwacack ke God. (John 7:49) El luhngse mwet inse puhsisacl inge ac orekma upac in kahsreltahl.​—Matthew 20:28.

14. Meac kom kuh in oruh in ahkkahlwemye luhngse lom nuh sin mwet lili wiyom uh?

¹⁴ Puhlan pacl in Mwe Acsmakihn uh use sie pac pacl na wo in nuhnkuh kac lah kom ac kahsruh fuhkah mwet lili wiyom ke congregation uh, yohkna nuh sin mwet mahtuh. Yac kom kuh in muhtwacta nuh yurin mwet lili inge? Yac kom kuh in us kuhtuh mongo an nwacl, kahsrel ke orekma in lohm sel an, wucnuhl nuh ke toeni uh kuh suhlwacl in wi kom ke orekma in luti uh? (Riti Luke 14:12-14.) Lwelah luhngse luhn God in mokle kom in ahkkahlwemye luhngse nuh sin mwet lili wiyom inge!

AHKKAHLWEMYE PAHKOTWEN NUH SIN MWET LILI WIYACSR

15. Meac kuht enenuh in akihlen uh?

¹⁵ Ma se ahktolu an, luhngse luhn Jeova uh mokle kuht in nuhnak muhnahs nuh sin mwet lili wiyacsr uh. Kuht nuhkewa usrui ma kuluk ac misac sel Adam, pwacnacng kuht tiac kuh in fahk, “Nga tiac enenuh mwe molwelah uh.” Finne nuh ke mwet kuhlwacnsap se ma oaru emeet luhn God uh enenuh mwe molwelah uh. Kais sie sesr eis nuhnak muhnahs ke ma kuluk lasr uh! Efuh kuh yohk srihpac in akihlen ma inge? Kuht ac kuh in konwacack top nuh kac uh ke sie mwe puhpuhlyuck lal Jesus ma kuht ac fah sramsramkihn tok inge.

16, 17. (a) Meac kuht lotwelah ke mwe puhpuhlyuck lal Jesus ke tohkohsrah se ac mwet kuhlwacnsap lal? (b) Tukun kom lihksreni na nuhnkuh ke mwe puhpuhlyuck lal Jesus inge, meac ma inge mokle kom in oruh?

¹⁶ Jesus el ahkkahlwemye mwe puhpuhlyuck se ke sie tohkohsrah suc sang nuhnak muhnahs nuh sin mwet kuhlwacnsap se lal suc oraclah misac na luhlahp se ke talen 10,000 kuh ahluhkwelah million dollar. Tuhsruhktuh, tok mwet kuhlwacnsap se inge tiac na sang nuhnak muhnahs nuh sin mwet kuhlwacnsap se wiyacl ke misac srihsrihk se lal. Pahkotwen luhn tohkohsrah sac enenuh in mokle mwet kuhlwacnsap se inge in nuhnak muhnahs pac nuh sin mwet kuhlwacnsap se wiyacl ah. Tohkohsrah sac foloyak ke el lohngack lah mwet kuhlwacnsap se lal inge tiac sang nuhnak muhnahs ke luhpah na srihsrihk se inge. El fahk: “Kom sie mwet kuhlwacnsap arulacna kuluk! Nga nuhnak muhnahs nuh sum ke ma kewa kom soemoul nuh sihk kac, mweyen na kom kwacfe nuh sihk. Yac tiac fal kom in nuhnak muhnahs pac nuh sin mwet kuhlwacnsap se wiyom ah, oacna ke nga oruh nuh sum?” (Matthew 18:23-35) In oacna tohkohsrah se inge, Jeova el nuhnak muhnahs nuh sesr ke luhpah na yohk se ma kuht misac sel kac uh. Meac luhngse ac pahkotwen luhn Jeova inge mokle kuht in oruh?

¹⁷ Ke kuht ahkolah nuh ke Mwe Acsmakihn uh, kuht kuh in siyuck sesr sifacna: ‘Yac oasr mwet lili ma ahkngalyeyuc? Yac upac nuh sihk in nuhnak muhnahs nuh sel?’ Fin ohinge, pa inge sie pacl wo in etahi Jeova suc ahkolah in “nuhnak muhnahs” pacl nuhkewa. (Nehemiah 9:17; Psalm 86:5) Kuht fin srui ke pahkotwen yohk luhn Jeova nuh sesr uh, kuht ac oacyacpac ahkkahlwemye pahkotwen nuh sin mwet sahyac ac nuhnak muhnahs nuh seltahl ke insiacsr kewa. Kuht fin tiac luhngse ac nuhnak muhnahs nuh sin mwet lili wiyacsr uh, kuht tiac kuh in nuhnkuh muh Jeova el ac fah luhngse kuht ac nuhnak muhnahs nuh sesr. (Matthew 6:14, 15) Ke pacl se kuht nuhnak muhnahs nuh sin mwet sahyac uh, tiac kalmac pa eltahl tiac ahkngalye kuht, tuhsruhktuh ma inge ac kahsre kuht in insewowo ke pacl fahsruh uh.

18. Luhngse nuh sin God kahsruh fuhkah sie muhtwacn lili elan muhtweng ke ohiyac sesuwohs luhn sie pac muhtwacn lili?

¹⁸ Kuhtuh pacl uh ma upac se in muhtweng ke ohiyac sesuwohs luhn mwet lili wiyacsr uh. (Riti Ephesus 4:32; Colossae 3:13, 14.) Sie muhtwacn lili ma oruh ma inge pa Lily. ^[1] (Liye endnote.) El kahsrel Carol, sie muhtwacn katinmas. Ke mwe puhpuhlyuck, oasr pacl el wucnuhl Carol nuh ke acn nuhkewa ma el enenuh in som nuh we, el kahsrel in moli mwe enenuh lal ac el oruh ma puhs pac sahyac lal. Finne ke kahsruh nuhkewa lal Lily nuh sel inge, Carol el tiac tui in fahk ma el tiac wo kac uh. Pwacnacng, kuhtuh pacl uh tiac fihsracsr in kahsrel. Tuhsruhktuh, Lily el liye muhkwena ohiyac wo lal Carol uh ac el kahsrel ke yac ekahsr nwe ke Carol el muhnahslah na pwacye ac misac. Finne ma upac se nuh sel Lily in kahsrel Carol, el fahk: “Nga ngetlah liye pacl se nga ac sifwil liyacl Carol ke sifwil moulyak uh. Nga ke etwacllah na pwacye ke pacl se el eklac sie mwet suwohswohs.” Ma na kahlwem se lah luhngse luhn God uh kuh in mokle kuht in muhtweng nuh sin mwet lili wiyacsr uh ac in tuhpan ke pacl se ma ohiyac sesuwohs luhn mwet uh fah wacngihnlac nwe tok ma pahtpaht.

19. “Mwe kihte” luhn God inge mokle kom fuhkah?

¹⁹ Jeova el acse nuh sesr sie “mwe kihte . . . suc yohk liki in fahk.” Lwelah kuht in arlacna srui ke ma inge! Puhlan pacl in Mwe Acsmakihn uh pa sie pacl na wowo in lihksreni na nuhnkuh ke ma nuhkewa ma Jeova ac Jesus eltahl oruh nuh sesr inge. Lwelah luhngse laltahl nuh sesr inge in mokle kuht in etahi Jesus ahkwoyac, luhngse mwet lili wiyacsr ac in nuhnak muhnahs nuh sin mwet sahyac ke insiacsr kewa.