Finsrak Nuh Sin Mwet Misac​—Kom Ac Etuh Fuhkah?

Yac suhtuh kuht in nuhnkuh muh mwet misac uh kuh in sifwil moul? Mwet sap Paul el tiac nuhnkuh muh nuhnak suhtuh se. El suhmuhslah ma inge: “Finsrak lasr in Christ fin ma na nuh ke moul se inge muhkwena, na fal mwet uh in pahkomuhtahsr yohk liki mwet nuhkewa. Tuhsruhktuh suwohsiyac pa Christ el ahkmoulyeyuckyak liki misac, in mwe ahkpwacyei lah elos suc mutul in misac fah oacyacpac ahkmoulyeyuckyak.” (Sie Corinth 15:19, 20) Paul el etuh lah finsrak in sifwil moul se inge ma na pwacye se. Ma inge ahkpwacyeyuck ac kahlwem ke sifwil moulyak lal Jesus sifacna.a—Orekma 17:31.

Jeova el God luhn ma pwacye. Pa inge sie pac srihpac pwacnacng kom kuh in etuh na pwacye lah oasr finsrak in sifwil moul. ‘God el koflahna kikiacp.’ (Titus 1:2) Jeova el soenna wi kikiacp uh, ac el ac fah tiac na kikiacp sie pacl. Yac el kuh in wuhlelah sie finsrak in sifwil moul, ac ahkkahlwemye pac lah el kuh in ahkpwacyeye ma inge tuhsruhktuh el tiac oruh? El tiac na kuh in oruh ohinge!

Efuh kuh Jeova el oakiyac finsrak se nuh ke moulyak luhn mwet misac ke pacl fahsruh uh? Ke srihpen luhngse lal. Job el tuh siyuck: “Kuh mwet se fin misac, yac el kuh in sifwil moulyak? . . . Na kom fah pang ac nga ac topuk kom. Ac kom fah insewowo keik, suc ma oreklac lun poum.” (Job 14:14, 15) Job el luhlahlfongi na pwacye lah Pahpah na luhngse se tuhmwacl inge el luhngse in ahkmoulyelack. Yac God el eklac? “Nga pa LEUM GOD, ac nga tiac ekyek.” (Malachi 3:6) God el srackna ke liye mwet misac uh in sifwil moul, ke mahno kuh ac engan. Ma inge oacpacna nuh ke ma pahpah kuh ninac na luhngse se ac puhla tukun tuhlihk se nahtuhltahl wacngihnlac ke srihpen misac. Tuhsruhktuh, ma siena kac uh pa oasr kuh luhn God elan oruh ma el ke oruh inge.—Psalm 135:6.

Jeova el sang kuh nuh sin Wen nahtuhl tuh elan ahkenganye ma pahtpaht moul luhn mwet ma ahsor ke srihpen wacngihnlac luhn mwet laltahl. Ac meac Jesus el puhla ke finsrak in sifwil moul? Meet liki Jesus el ahkmoulyelack Lazarus, el liye luhpan ahsor yohk luhn tuhlihk muhtwacn wiyacl Lazarus ac kawuck nuhkewa lal inge, ac ke srihpac se inge “el tuhng.” (John 11:35) Ke sie pac pacl ah, Jesus el sun muhtwacn katinmas se fin acn Nain, ac wen sefanna nahtuhl ah misac. Jesus “el arlacna pahkomuhtahl ac el fahk nuh sel, ‘Nimet tuhng.’” Ac el ahkmoulyeack wen se natul inge. (Luke 7:13) Pwacnacng, arlacna yohk pahkomuhta lal Jesus ke mwe ahsor ac misac. Jesus el ac arlacna engan in sang sie srihpac wo nuh sin mwet uh in engan ac in tiac ahsor!

Yac kom nuh wi tari puhla ahsor? Sahp kom puhla pac muh misac uh sie ma na upac ma ac tiac kuh in wacngihnlac. Tuhsruhktuh, ma inge kuh in wacngihnlac, ac finsrak se ma ac fah ahkpwacyeye ma inge pa ke God el orekmakihn Wen nahtuhl in ahkmoulyeack mwet misac pucspucs. Esam lah God el ke kom in liye ma inge. El ke kom in oasr ke pacl sacn tuh kom in sifwil sruokyac mwet lom inge. Srihke petsacelah ke pacl se komtacl tuhkweni ahkoo moul se lomtacl inge ma pahtpaht uh, ac tiac enenuh in sifwil fahsrelihk.

Lionel, suc kuht sramsramkihn tari, el fahk pac: “Nga tuhfahna etwaclah ke finsrak nuh ke sifwil moul uh. Pacl se emeet ma nga lohng ke ma inge, nga arlacna suhlahlahlfongi, ac nga tiac luhlahlfongi mwet se ma fahk ma inge nuh sihk ah. Tuhsruhktuh nga sifacna liyacack ke Bible ac nga konwacack lah ma inge ma na pwacye se! Nga ke tari liye pacl se nga ac sulpac ohsun nuh sin pahpah mahtuh tuhmuhk ah.”

Yac kom luhngse in ahkyohkye etuh lom kac uh? Mwet Loh luhn Jeova uh arlacna engan in ahkkahlwemye nuh sum ke Bible nuhtum an lah efuh eltahl luhlahlfongi ke finsrak se inge in sifwil moul ke pacl fahsruh uh.b