Yac Oasr Finsrak luhn Mwet Misac uh?

Yac mwet misac uh kuh in sifwil moul?

TOP LUHN BIBLE: “Pacl se ac tuhkuh ke mwet misac nuhkewa fah lohng puhsracl [Jesus] ac ilme liki kuclyuck lalos.”​—John 5:28, 29.

Ke ma inge Jesus el palye ke pacl fahsruh uh, lah ye kolyuck luhn Tohkohsrahi lal, kuclyuck nuhkewa ac fah wacngihnlac koano. Fernando suc sramsramkihnyuck ke mwe lutlut se tari ah el esam ac fahk: “Nga arlacna lut ke pacl se emeet ma nga riti John 5:28, 29. Ke pacl sacn nga muhtwacwack in nuhnkuh ke ma wowo ma ac sikyak ke pacl fahsruh uh, ac ma inge use finsrak wowo se nuh sihk.”

In pacl meet ah, mukul oaru se pahngpahng Job el luhlahlfongi muh tukun el misac, God el ac fah ahkmoulyelack. Job el siyuck: “Kuh mwet se fin misac, yac el kuh in sifwil moulyak?” Ac el sifacna topuk: “Nga ac soano in oasr pacl wo se, ke pacl kuluk se inge [Inkuclyuck] ac wacngihnlac. Na kom fah pang ac nga ac topuk kom.”​—Job 14:14, 15.

Orekma in ahkmoulyeack inge tiac ma sasuc se nuh sel Martha, muhtwacn se wiyacl Lazarus. Tukun Lazarus el misac, Jesus el fahk nuh sel Martha: “Ma wiyom el ac sifwil moulyak.” Martha el topuk ac fahk, “Nga etuh lah el ac sifwil moulyak ke lwen sahflah.” Jesus el fahk nuh sel, “Nga pa ahkmoulyeack mwet uh liki misac nuh ke moul. Kuhtwena mwet suc luhlahlfongi in nga fah moul, el finne misac.” (John 11:23-25) Na Jesus el ahkmoulyelack Lazarus in pacl sacn na! Ma suhmuhslah se inge use nuh sesr kuhtuhsrihsrihk na ke ma na yohk se ma ac fah sikyak ke pacl fahsruh uh. Srihke petsacelah ke orekma in ahkmoulyeack inge ke pacl se orek fin facluh nohfohn!

Yac oasr mwet ma ac som nuh inkuhsrao?

TOP LUHN BIBLE: Kahs luhn God uh ahkkahlwemye lah moulyak lal Jesus uh siena liki moulyak luhn mwet oalkosr sahyac in Bible uh. Mwet oalkosr inge moulyak ac muhta na facluh. Tuhsruhktuh ke moulyak lal Jesus ah, kuht riti lah: ‘Jesus Christ el sohwack tari nuh inkuhsrao ac muhta lac po lacyot sin God.’ (Sie Peter 3:21, 22) Yac Jesus na pa ac ahkmoulyeyuckyak nuh inkuhsrao uh? Jesus el tuh fahk nuh sin mwet sap lal ah: “Tukun nga ac som akoo acn suwos, nga ac fah fohlohkoh ac eis kowos nuh yuruk, tuh yen nga muhta we kowos fah oacyacpac muhta we.”​—John 14:3.

Christ el som nuh inkuhsrao ac ahkolah nuh ke som luhn mwet tuhma lutlut lal uh. Pihsen mwet ma ac moulyak nuh inkuhsrao uh oasr ke 144,000. (Fwackyuk 14:1, 3) Tuhsruhktuh, meac mwet tuhma lutlut luhn Jesus inge ac oruh we uh?

Eltahl ac arlacna kahfofo! Ma suhmuhslah uh ahkkahlwemye nuh sesr: “Engan ac arlacna insewowo elos suc wi moulyak se meet. Wacngihn kuh luhn misac ahkluo nuh faclos. Elos fah mwet tol luhn God ac luhn Christ, ac elos fah weluhl leumi ke sie tausin yac.” (Fwackyuk 20:6) Mwet ma ahkmoulyeyuckyak nuh inkuhsrao inge ac fah weluhl Christ oacna tohkohsrah ac mwet tol in kol facluh.

Suc ac fah ahkmoulyeyuckyak tohkoh?

TOP LUHN BIBLE: Ma Suhmuhslah luhn God uh ahkkahlwemye ke sie sramsram luhn mwet sap Paul: “Finsrak luhk in God oacpacna finsrak lalos uh, ahok finsrak se ma fahk muh mwet nuhkewa, mwet suwohs ac mwet sesuwohs ac fah moulyak liki misac.”​—Orekma 24:15.

Suc ac fah wi ke u se ma Paul el pahngon “mwet suwohs” inge? Nuhnkuh ke sie mwe puhpuhlyuck ke mukul oaru se inge Daniel. Ke apkuhranyang nuh ke sahflahiyen moul lal ah, pa inge ma fwack nuh sel: “Na kom ac fah misac, tuhsruhktuh kom ac sifwil moulyak in eis mwe usru lom ke pacl sahflah uh.” Daniel el ac moulyak oyac liki misac lal? “Mwet suwohswohs fah usrui acn uh, ac elos ac fah muhta fac ma pahtpaht.” (Psalm 37:29) Ac Jesus el palye: “Insewowo elos suc fakpacp, tuh facluh fah ma lalos.” (Matthew 5:5) Daniel ac kuhtuh pac mukul ac muhtwacn oaru ac fah ahkmoulyeyuckyak in sifwil moul fin facluh ac muhta we ma pahtpaht.

Suc ac fah wi ke u se ma Paul el pahngon “mwet sesuwohs” inge? Eltahl pa billion sin mwet ma moul meet nwe misac, puhs seltahl wacngihn pacl wo la in eis etwacack pwacye ke Bible ac in orekmakihn ke moul laltahl. Tukun eltahl ahkmoulyeyuckyak, ac oasr pacl wowo se ituckyang nuh seltahl in etwaclah ac sang kuloh nuh sin Jeovaa ac Jesus. (John 17:3) Mwet nuhkewa ma sulaclah in kuhlwacnsuhpuh God ac fah kuh in wi moul ma pahtpaht.

Ac fuhkah ohiyen moul fin facluh ke pacl fahsruh uh?

TOP LUHN BIBLE: God “El ac fah elah sronin muhtahlos nuhkewa. Ac fah wacngihn misac, wacngihn ahsor kuh tuhng kuh kweok, mweyen ma nuhkewa meet ah wacngihnlac.” (Fwackyuk 21:4) “Elos fah muhsahi lohm ac muhta loac; elos ac yukwi imac in grape ac kang fahko kac.”​—Isaiah 65:21.

Srihke petsacelah ke kom muhta ke pacl na wowo inge wi mwet lom ma moulyak inge! Tuhsruhktuh, srackna oasr kihsen siyuck se, Kom ac etuh fuhkah lah oakwuck in ahkmoulyeack mwet inge ac sikyak na pwacye?