Oasr Ku Lun Sifwil Moulyuk
“Nga oekla ma nu kemwa oanu ma tula . . . tu Nga in eis [ Jisus Kraist] a sifwil moulyuk lal.”—FILIPPAI 3:8-10.
1, 2. (a) Ke yiu puspis somla fuka sie met kol lun alu el aketeye sifwil moulyuk? (b) Fuka oiyen sifwil moulyuk?
KE MUTAMWEYEN 1890 kutu, sie news el sramsram ke sie ma sakuruk lun sie met kol lun alu fwin an Brooklyn, New York, U.S.A. El fwak la sifwil moulyuk e fwa orek ke inkanek lun sifwil esani lun sri a ikwe nu kemwa su orala monin met se, fwinne ma inge musalla tari ke inkanek lun e ku accident, kosro lemnak el kangla ku el ekla tari fertilizer. Met luti se inge el fwak la ke lusen aur 24 ke len se, eng arulanu sralsral ke sripen pao, nie, tokinpao, sri, alko, a kolon met mise su piselos oasr ke billion puspis. Ipen mano inge nu kemwa suk mano lalos sifwanu. Tokin ma inge ngun su tuku kosrao me ku ngun su tuku hell me e fwa tuku a muta ke mano inge nu kemwa su sifwil moulyuk orani.
2 Nunuk ke sifwil moulyuk ke inkanek lun esani lun atom nu kemwa lun sie met meet liki el mise tia sumwos, ngun ouyepa ku in mise. (Ekklisiastis 9:5, 10; Ezekiel 18:4) Jeova, God lun sifwil moulyuk, el tia enenu in sifwil oreni nu fon atom nu kemwa su ipen mano lun sie met. El ku in orala mano sasu nu selos nu kemwa su sifwil moulyuk. Nu sin Mwen nutul, Jisus Kraist, Jeova el sang ku in akmoulyeak met mise, wikin fwinsrak in moul ma patpat. (Jon 5:26) Ke ma inge Jisus el fwak: “Nga sifwil moulyuk, a me moul, el su lalalfongi yu, el fwinne mise, el fwa sifwil moul.” (Jon 11:25, 26) Sie mwolela pa inge su akpwarye insiesr! Ma inge akkeye kut in muteng me srifwe a in tu ku nu ke mise oanu sie Met Lo oaru lun Jeova.
3. Efu Poul el enenu in sramsram in akkeye sifwil moulyuk?
3 Sifwil moulyuk el tia insese ke me luti ke ngun su oasr yurin met su tia ku in mise—sie kain in lalalfongi pa inge su tuku sin met Greek philosopher Plato. Ke ma inge, mea sikyuk ke pal se met sap Poul el sang ma lo nu sin met Greek pengpeng in Areopagus fwin an Athens, a el sramsram kel Jisus, a el fwak la God el akmoulyeak? “A inge” me sramsram el fwak: “ke elos long ke sifwil moulyuk liki met mise, kutu selos aksruksruk.” (Orekma 17:29-34) Met puspis in pal meeta su srakna moul a liye sifwil moulyuk lal Jisus Kraist, elos fwinne sun me aksruskruk koluk su tuku sin met, tusruktu elos sang me akpayeye la el moulyuk na paye liki mise. Tusruktu met luti kikiap puspis su wi ke congregation fwin an Korint elos tia lalalfongi ke sifwil moulyuk. Ke ma inge Poul el sang aketeye mwo in kasre me luti lun met Kristian inge in 1 Korint sapter 15. Lutlut mwo ke me sramsram lal eisla alollo a sang kasru in sroukye ku fwinsrak nu ke sifwil moulyuk.
Me Akpayeye Fukoko ke Sifwil Moulyuk lal Jisus
4. Kain in me akpayeye su liyeyuk na paye sifwil moulyuk lal Jisus Poul el aketeye?
4 Loang akmwoye ke Poul el ekasla sramsram lal. (1 Korint 15:1-11) Met Korint elos fwin tia lalalfongi na wangin sripe, elos fwin srukye ku peng mwo lun molela. Ke Kraist el mise ke ma koluk lasr, pukpuki, a sifwil moulyuk. A tu el sikme nu sel Sifas (Piter), “na nu sin met siengoul luo.” (Jon 20:19-23) Pus liki met 500 pa elos liyel, ke pal se el sapkin nu selos: ‘Komwos som, oru met tuma lutlut.’ (Mattu 28:19, 20) Jemes el liyel, a met sap oaru nu kemwa. (Orekma 1:6-11) Futoto nu ke an Damascus, Jisus el sikme nu sel Poul “oanu nu sin sie su isusla in pal sufwal”—oanu el moulyuk tari in ngun. (Orekma 9:1-9) Met Korint elos ekla met lalalfongi meyen Poul el luti nu selos peng mwo, a elos eis ma inge.
5. Mea inkanek in sramsram lal Poul su simusyukla in 1 Korint 15:12-19?
5 Loang akmwoye ke sramsram lal Poul. (1 Korint 15:12-19) Ke sripen met nu kemwa su liye ma sikyuk paenang elos fwak la Jisus el moulyuk, na fuka kutu fwak tu wangin moulyuk lun met mise? A Kraist el fwin tia moulyuk, na wangin sripen luti lasr, aok, kut met lo kikiap tusruktu kut lo ke God meyen el akmoulyeak Kraist. Na met mise elos fwin tia moulyuk, na ‘kut muta na in ma koluk lasr,’ a elos su motul in Kraist elos a tia pa moulyuk. Sayen ma inge, “in moul se inge mukena kut fwin fwinsrak kasr in Kraist, kut met pakomuta liki met nu kemwa.”
6. (a) Mea Poul el fwak in sang akpayeye ke sifwil moulyuk lal Jisus? (b) Mea “me lokwalok se tok,” a fuka ma inge ku in wanginla?
6 Poul el akkeye sifwil moulyuk. (1 Korint 15:20-28) A inge Kraist el “fwako se meet” lalos su motul, ke ma inge oasr pa kutu met su e fwa sifwil moulyuk. Tu oanu mise el tuku ke sripen seakos lun met inge Edam, ouyepa ke sie met moulyuk liki met mise tuku—pa inge Jesus. Elos su sran Kraist elos fwa sifwil moulyuk ke lusen pal in oasr tari lal. Kraist el “ella guferment nu kemwa a mwal nu kemwa a ku nu kemwa” su lain kolyuk lun God a el kol oanu sie Togusra nu ke na pa Jeova el filiye met lokwalok lal nu kemwa ye niel. Fwinne “met lokwalok se tok”—mise su kut usru sel Edam—el fwa ella ke sripen me kise lal Kraist. Na, Kraist el fwa sifwil sang Togusrai nu sin Papa tumal a God, el e fwa sifwanu akpusisilyeyuk nu Sel “su akpusisilye ma nu kemwa nu sel, tu God el fwa ma nu kemwa in ma nu kemwa.”
Baptaisla ke Met Mise?
7. Su met inge su “baptais ke mise,” a mea kalmen ma inge nu selos?
7 Met lokwalok lun sifwil moulyuk el siyuk: “Mea elos fwa oru su baptaisla ke met mise?” (1 Korint 15:29) Poul el tia lungse in akkalemye la met moul elos enenu in baptaisla ke met mise, meyen kais sie met tumal lutlut lal Jisus elos enenu in lutlut, lalalfongi, a in baptaisla. (Mattu 28:19, 20; Orekma 2:41) Met Kristian akmusrala elos “baptaisla ke met mise” ke pal se elos kafofo ke sie inkanek lun moul su ku in kol nu ke mise a sifwil moulyuk. Kain baptais inge mutamwauk ke pal se ngun mutal lun God el filiye ke insielos a nunkelos fwinsrak in kosrao a el safla ke pal se elos moulyuk liki met mise a moul in kosrao oanu sie ngun su tia ku in sifwil mise.—Rom 6:3-5; 8:16, 17; 1 Korint 6:14.
8. Met Kristian elos ku in lalalfongi na paye ke mea fwin Setan a met kulansap lal elos kutangla in unilosla?
8 Oanu kas lal Poul el lungse in akkalemye, fwinsrak ke sifwil moulyuk sang kasru nu sin met Kristian in tu ku ke me fosrnga aur nu kemwa a mise ke len nu kemwa ke sripen orekma in luti ke Togusrai. (1 Korint 15:30, 31) Elos etu la Jeova el ku in akmoulyelosla el fwin lela Setan a met kulansap lal in unilosla. God mukena ku in kunausla ngunalos, ku moul lalos, in Gehenna, su ku in kalmekin kunausla ma patpat.—Luk 12:5.
Sie Enenu in Akola
9. Fwin oasr ku lun sifwil moulyuk ke moul lasr, na mea ma inge su kut enenu in fwasr liki?
9 Fwinsrak ke sifwil moulyuk akkeyel Poul. Ke pal se el muta fwin an Efesus, saap met lokwalok lal elos sisilla nu in nien sritel in lain kosro lemnak. (1 Korint 15:32) Fwin ma inge sikyuk na paye, el aksukosokyeyuk, oanu ma sikyuk nu sel Daniel su moliyukla liki oalin laion. (Daniel 6:16-22; Hibru 11:32, 33) Ke sripen el fwinsrak ke sifwil moulyuk, Poul el tia wi ke orekma lun met luti kikiap lun an Juda in len lal Isaia. Elos fwak: “Lela kut in mongo a nim, tu lutu kut fwa mise.” (Isaia 22:13, Septuagint) Fwin oasr ku lun fwinsrak ke sifwil moulyuk in moul lasr oanu ma sikyuk nu sel Poul, na kut enenu in fwasr liki met nu kemwa su akkalemye ngun koluk. “Komwos tia kiapeyukla,” Poul el sang kas in sensen. “Aenguni yurin met kamwuk koluk me akkolukye oiye mwo.” (1 Korint 15:33) Paye, ma sap inge fwal nu ke kain in oiyen moul nu kemwa.
10. Fuka kom ku in kurunganang fwinsrak ke sifwil moulyuk tu in tia wanginla?
10 Nu selos nu kemwa su alollo ke sifwil moulyuk, Poul el fwak: “Komwos in ngutalik nu ke sumwosmwos, a tia oru ma koluk, tu kutu tia etu God. Nga kaskas ma inge in akmwekinye komwos.” (1 Korint 15:34) Ke “len safla” se inge, kut enenu in orekma fwal nu ke etauk sumwos lun God a Kraist. (Daniel 12:4; Jon 17:3) Ma inge kasru in ku fwinsrak lasr ke sifwil moulyuk pal nu kemwa.
Sifwil Moulyuk ke Kain in Mano Fuka?
11. Fuka Poul el sang me pupulyuk ke sifwil moulyuk lun met akmusrala Kristian?
11 Tok Poul el sramsram ke kutu kusensiyuk. (1 Korint 15:35-41) Ke sripen kaifweung in sang alollo ke sifwil moulyuk, saap sie met el siyuk: “Fuka akmoulyeak met mise? A mea oiyen mano elos tuku ka?” Oanu Poul el akkalemye, sie fute su taknelik nu ke fok tia kapek, fwin tia mise meet. In oupanu, sie met su pakiyuki sin ngun mutal el enenu meet in mise. Oanu soko sak su kapek ke fute oasr mano sasu lal, ke ma inge, mano lun met akmusrala Kristian su sifwil moulyuk siena liki mano in ikwe. Fwinne oiyen moul lal meet liki el mise srakna oasr yurol, tusruktu el moulyuk oanu sie ma orekla sasu su oasr mano in ngun su ku in moul in kosrao. Paye elos nu kemwa su ku in moul fwin fwalu, elos e fwa sifwil moulyuk ke mano in ikwe.
12. Mea kalmen kas se inge “mano in kosrao” a “mano fwin fwalu”?
12 Oanu Poul el fwak, oasr sie ikwen met, a siepa ikwen kosro. Fwinne ikwen kosro tia oanu sie ke kais sie kain lalos. (Genesis 1:20-25) “Mano in kosrao” lun ma orekla in ngun siepa mwolanu lal liki “mano fwin fwalu” in ikwe. Oasr pa ma tia oanu sie ke mwolanu lun fwat, malem, a itue. Tusruktu mwolanu lun met akmusrala su sifwil moulyuk yok liki.
13. Fwal nu ke 1 Korint 15:42-44, mea ma inge su taknelik a mea ma inge su moulyukyuk?
13 Tukun el srukak ma tia oanu sie, Poul el tafwela in fwak: “Ouyepa ou inge moulyuk lun met mise.” (1 Korint 15:42-44) El fwak: “Taknelik in punoela, moulyuk in tia punoela.” Ke fus se inge el sramsram ke met akmusrala oanu sie u. Taknelik in punoela ke pal in mise, el moulyuk in tia punoela, sukosok liki ma koluk. Fwinne pilesreyuk lun fwalu, el moulyuk ke moul in kosrao a sikme yurol Kraist in mwolanu. (Orekma 5:41; Kolosse 3:4) Ke pal in mise el taknelik in “mano in luman met” a moulyuk “in mano in luman ngun.” Meyen oiye se inge ku in sikyuk nu sin met akmusrala Kristian, paenang kut ku in lalalfongi la kutu met fwin fwalu ku in sifwil moulyuk fwin fwalu.
14. Fuka Poul el akkalemye ma tia oanu sie inmaslon Kraist a Edam?
14 Tok Poul el akkalemye ma tia oanu sie inmaslon Kraist a Edam. (1 Korint 15:45-49) Edam, met se meet, “orekla tu lan met su moul.” (Genesis 2:7) “Edam safla”—Jisus—“orekla tu lan ngun in akmoul.” El sang moul lal oanu sie me kise lango, ma se meet ke met tuma lutlut akmusrala lal. (Mark 10:45) Oanu met, elos ‘oanu luman met su orekla ke kutkut,’ tusruktu, ke pal in sifwil moulyuk elos ekla oanu Edam se toko. Aok, me kise lal Kraist sang ma lane nu sin met nu kemwa su akos, wekunang met nu kemwa su sifwil moulyuk fwin fwalu.—1 Jon 2:1, 2.
15. Efu met Kristian akmusrala elos tia sifwil moulyuk in ikwe, a fuka elos moulyuk ke lusen pal in oasr tari lal Kraist?
15 Ke pal in mise lun met akmusrala, elos tia sifwil moulyuk in ikwe. (1 Korint 15:50-53) Sie mano su ku in kulamwi orekla ke ikwe a sra tia ku in eis usru in Togusrai lun God, a punoela tia eis usru lal in tia punoela. Kutu sin met akmusrala elos tia enenu in pulakin motul ke lusen pal na loeloes in mise. Ke pal se elos aksafyela moul oaru lalos fwin fwalu ke lusen pal in oasr tari lal Kraist, elos e fwa “ekla, in minit se, in sarup se.” Elos fwa moulyuk nu ke moul in ngun tia sifwil kulamwi a in mwolanu. Ke saflaiye pisen “mutan pusrla” lal Kraist in kosrao oasr ke 144,000.—Fwakyuk 14:1; 19:7-9; 21:9; 1 Tessalonika 4:15-17.
Kutangla Liki Mise!
16. Fwal nu ke kas lal Poul a kutu met palu, mea sikyuk ke mise su usrui sel Edam su koluk?
16 Poul el kutangla in sulkakin la mise e fwa wanginla ma patpat. (1 Korint 15:54-57) Ke pal se ma kulamwi a ma se su ku in mise el nukomang ma tia ku in kulamwi a tia ku in mise, na kas se inge akpayeye: “Mise okumyukla ma patpat.” “Mise, piye kutangla lom? Mise, Piye me anwuk lom?” (Isaia 25:8; Hosia 13:14) Me anwuk lun mise, ma koluk, a ku lun ma koluk, Ma Sap, su lisyukla met koluk in mise. Tusruktu, ke sripen me kise lal Kraist a sifwil moulyuk, mise su kut usru sel Edam su koluk tia sifwil kutangla.—Rom 5:12; 6:23.
17. Fuka kas in 1 Korint 15:58 fwal nu ke len lasr?
17 “Ke ma inge met lili kulu luk, Poul el fwak, “komwos in tu ku, tia mokuikui, a akkeye komwos in orekma nu sin Leum pal e nu kemwa, tu komwos etu tu orekma lomwos tia pilesr in Leum.” (1 Korint 15:58) Kas se inge fwal nu ke met akmusrala lula ke pal inge a nu sin “sip ngie” lal Jisus elos fwinne mise ke len safla inge. (Jon 10:16) Orekma lalos oanu met sulkakin Togusrai tia pilesr, meyen sifwel moulyuk sanelos. Ke ma inge, oanu met kulansap lun Jeova, lela kut in kafofo ke orekma lun Leum ke kut sano sie len, ke pal se su kut ku in fwak ke engun: “Mise, piye kutangla lom?”
Fwinsrak ke Sifwil Moulyuk Akpayeye!
18. Fuka lupan ku lun lalalfongi lal Poul ke sifwil moulyuk?
18 Kas lal Poul su simusyukla in 1 Korint sapter 15 akkalemye la fwinsrak ke sifwil moulyuk arulanu ku ke moul lal. El arulanu lalalfongi na paye la Jisus el sifwil moulyuk liki met mise a kutu met elos ouyepa aksukosokyeyuk liki kalyuk lun met. Ya oasr kain in lalafongi fukoko inge lom? Poul el nunku la ma lane nu kemwa su tuku ke rapku oanu “kutkut” a el ‘mensis ke ma puspis su tula lukel’ tu lan ‘etal Kraist a ku lun sifwil moulyuk lal.’ Met sap inge el akola in mise oanu luman mise lal Kraist meyen el lalalfongi in eis “sifwil moulyuk sa.” Kutupal ma inge pangpang “moulyuk se meet,” lun Jisus a 144,000 met tuma lutlut akmusrala lal. Aok, elos sifwil moulyuk in ngun in kosrao, a “elos su lula sin met mise” elos fwa sifwil moulyuk fwin fwalu.—Filippai 3:8-11; Fwakyuk 7:4; 20:5, 6.
19, 20. (a) Kain in met fuka ke record lun Baibel e fwa sifwil moulyuk in moul fwin fwalu? (b) Kom ngetuk nu ke sifwil moulyuk lun su?
19 Fwinsrak ke sifwil moulyuk sie ma paye mwolanu nu sin met akmusrala su muta na oaru nu ke mise. (Rom 8:18; 1 Tessalonika 4:15-18; Fwakyuk 2:10) Met nu kemwa su moul a sasla ke “ongoiye lulap” elos fwa liye akpayeye lun fwinsrak ke sifwil moulyuk fwin fwalu meyen ‘mwea sang elos su mise we, a mise a Hedis sang elos su mise in eltal.’ (Fwakyuk 7:9, 13, 14; 20:13) Inmaslon met su sifwil moulyuk fwin fwalu pa Job, su arulanu keok ke sripen mise lun tulik mokul itkosr a tulik mutan tolu nutul. Nunku ke insemwomwo lal ke pal se el paingnulos—a fuka lupan insemwomwo lalos ke pal se elos konaok la oasr tulik mokul itkosr a tulik mutan akosr su ma wielos a arulanu kato!—Job 1:1, 2, 18, 19; 42:12-15.
20 Fuka sie me insemwomwo na paye ke pal se Ebream a Sera, Isaak a Rebekah—aok, a kutupa met, wekunang “met palu nu kemwa”—elos moulyuk in moul fwin fwalu! (Luk 13:28) Sie sin met palu inge pa Daniel, su eis mwolela ke sifwil moulyuk ye koko lun Messaia. Ke lusen yiu 2,500 kutu, Daniel el mongle ke kalyuk, tusruktu, ke ku lun sifwil moulyuk, el ‘tu in me usru lal’ oanu sie “met fwisrak lun fwalu.” (Daniel 12:13; Sam 45:16) Sie me insemwomwo na paye in paing tia met oaru mukena in pal meeta, a ouyepa papa tumom, nine kiom, mwen nutum, an nutum, a kutu met mise su kom lungse su met lokwalok inge mise el eisla liki kom!
21. Efu kut tia enenu in patla in oru mwo nu sin kutu met?
21 Saap kutu nu ke kamwuk lasr a met su kut lungse elos kulansap tari nu sin God ke lusen yiu puspis a elos matuo. Saap moul matou ku in oru in tia fwusesr nu selos ma sikyuk puspis in moul. Fuka sie inkanek in lungse na paye in sang nu selos kutena kasru su kut ku in oru ke pal inge! Ke ma inge kut tia auliyuk oanu kut tia oru kunokon lasr nu sin met su kut lungse ke inkanek saye fwin mise el tuku nu selos. (Ekklisiastis 9:11; 12:1-7; 1 Timote 5:3, 8) Kut ku in lalalfongi na paye la Jeova el tia mulkunla orekma mwo puspis su kut oru nu sin kutu met, ke kutena matwe a ma sikyuk selos. “Ke ma inge, oanu oasr pal fwal yurosr,” Poul el simusla, “lela kut in oru mwo nu sin met nu kemwa, a yokna nu selos su sou lun lalalfongi.”—Galetia 6:10; Hibru 6:10.
22. Nu ke pal in akpayeye lun fwinsrak ke sifwil moulyuk, mea kut enenu na paye in kaifweung in oru?
22 Jeova el “Papa tuman pakomuta a God lun pwarak nu kemwa.” (2 Korint 1:3, 4) Kas Lal akpwarye kut a kasre kut in akpwarye kutu met ke ku lun fwinsrak ke sifwil moulyuk. Nu ke pal kut liye na paye akpayeyen fwinsrak inge ke inkanek in moulyuk lun met mise nu ke moul fwin fwalu, lela kut in oanu Poul, su lalalfongi ke sifwil moulyuk. Lela kut in etawi Jisus, su fwinsrak ke ku lun God in akmoulyak el akpayeyukla. Elos nu kemwa su muta in kalyuk elos fwa long ke pal futoto pusren Kraist a elos illa. Lela ma inge in ase nu sesr pwarak a insemwomwo. Tusruktu, yok liki nu kemwa, lela kut in sang kulo nu sin Jeova, su oru kutangla ke mise in sikyuk ke inkanek lun Leum lasr Jisus Kraist!
Mea Topuk Lom?
• Mea me akpayeye su liye na paye sifwil moulyuk lal Jisus su Poul el akkalemye?
• Mea se inge “me lokwalok safla,” a fuka ma inge ku in wanginla?
• Fwin ke ma sikyuk nu sin met akmusrala Kristian, mea ma inge su taknelik a mea ma inge su moulyukyuk?
• Su met in Baibel su kom lungse in osun nu sa ke pal in sifwil moulyuk fwin fwalu?
[Picture on page 14]
Met sap Poul el oru sie sramsram fukoko in akkeye sifwil moulyuk
[Pictures on page 18]
Sifwil moulyuk lal Job, sou lal, a kutupa met sie sropon me insemwomwo lulap na paye!