Fwinsrak Ke Sifwil Moulyuk Arulanu Paye!

“A oasr fwinsrak luk in God . . . tu e fwa oasr sifwil moulyuk nu sin met sumwos a met sesumwos.”​—OREKMA 24:15.

1. Efu kut in lalalfongi ke sifwil moulyuk?

JEOVA el sang sripe mwomwo puspis in fwinsrak nu ke sifwil moulyuk. Oasr yurosr kas lal su akkalemye la met mise elos fwa sifwil moulyuk, sifwil tuyuk nu ke moul. A akmwuk lal nu selos nu kemwa su motul tari in mise e fwa akpayeyuk. (Isaia 55:11; Luk 18:27) Ke ma inge, God el akkalemye tari ku lal in akmoulyeak met mise.

2. Fwinsrak ke sifwil moulyuk akinsemwomwoye kut fuka?

² Lalalfongi ke me sang lun God in akmoulyeak met mise ke inkanek lun Mwen nutul, Jisus Kraist, ku in akkeye kut ke pal in ma upa. Ma paye lun fwinsrak ke sifwil moulyuk ku in ouyepa kasru kut in srukye oaru lasr nu sin Papa tumasr in kosrao fwinne kut mise. Aok, fwinsrak lasr ke sifwil moulyuk e fwa akkeyeyuk ke kut tuni akmwoye sifwil moulyuk su simusyukla in Baibel. Menmen inge nu kemwa akpayeyuk ke inkanek lun ku su tuku sin Leum Ku Liki Ku, Jeova.

Elos Eis Mise Lalos ke Moulyuk

3. Mea Elaija el oru ke pal se mwen nutin sie katinmas fwin an Zarefat el mise?

³ Sie me esmakin mwo ke lalalfongi su akkalemyeyuk sin met lo lun Jeova meet liki pal lun met Kristian, met sap Poul el simusla: “Mutan elos eis mise lalos ke moulyuk.” (Hibru 11:35; 12:1) Sie sin mutan inge pa mutan katinmas se su muta ke sie mura lun an Phoenicia pangpang Sarefat. Meyen el arulanu kulang nu sin met palu lun God pangpang Elaija, paenang ke inkanek lun menmen God el sang nu sel flau a oil su tia lusr a ma inge kasrelos ke lusen pal in sral su ku in unilye a tulik nutul. Ke pal se mwen nutul el mise tari, Elaija el fililye fwin me on kiel, el pre, a sifwanu asroelik fwin tulik nutul pal tolu, a pang nu sin Jeova: “O Jeova God luk, Nga siyuk sum, lela ngunin tulik se inge in sifwil tuku nu yurol.” God el lela, ku lun moul, in sifwil foloko nu yurin tulik mokul se inge. (1 Togusra 17:8-24) Nunku ke insemwomwo lun mutan katinmas inge ke pal se lalalfongi lal akinsemwomwoyeyuk ke sifwil moulyuk se meet su simusyukla​—lun mwen kulu nutul!

4. Kain in menmen fuka Elaisa el oru fwin an Sunem?

⁴ Siepa mutan su eis met mise lal ke moulyuk el muta ke sie mura lun Sunem. Mutan kien mokul matou se inge, el akkalemye kulang nu sel met palu Elaisa a met kulansap lal. El inge akinsemwomwoyeyuk paenang el ku in oswela sie mwen. Tusruktu, tokin yiu ekasr somla el pangon met palu ke sripen el, konoiyuk tulik nutul mise in loom sel. Tokin Elaisa el pre a oru kutu orekma, “a ikwen tulik se fwusrfwusryuk.” El mutamwauk “in senala pal itkosr, a tulik se ngetalik.” Wangin alollo la sifwil moulyuk inge sang insemwomwo nu sin nine a tulik nutul. (2 Togusra 4:8-37; 8:1-6) A fuka lupan insemwomwo lun kais sie selos elos fwin sifwil moulyuk fwin fwalu ke sie “moulyuk mwo liki”​—su akola nu selos wikin sie fwinsrak la wanginla mise! Sie sripen kulu na paye pa inge sin God lun sifwil moulyuk, Jeova!​—Hibru 11:35.

5. Elaisa el srakna orek menmen tokin el mise tari?

⁵ Tokin mise lal Elaisa a pakpuki lal, God el oru srel in ku ke inkanek lun ngun mutal. Kut ku in rid: “A ma te oru ke elos [met Israel] pukinye sie met, liye elos liyeak sie un met [met Moab], elos sisla met se nu in luf kiel Elaisa. A ke met se [met mise] tufwanu kalye srel Elaisa, el moulyuk a tuyuk.” (2 Togusra 13:20, 21) Fuka lupan pwar a insemwomwo na paye lun met inge! Nunku ke insemwomwo su kut fwa pulakin fwin met nu kemwa su kut lungse elos sifwil moulyuk fwal nu ke akmwuk mwolanu lun Jeova su tia ku in tafongla!

Mwen Nutin God El Akmoulyeak Met Mise

6. Kain in menmen fuka Jisus el oru futoto nu ke siti lun Nain, a fuka ma sikyuk inge purakak insiesr?

⁶ Mwen nutin God, Jisus Kraist, el ase nu sesr sripe mwo puspis in lalalfongi la met mise ku in sifwil moulyuk, wikin fwinsrak in moul ma patpat. Oasr sie ma sikyuk apkurun futoto nu ke city lun Nain su ku in kasru kut in akilen la kain in menmen inge ku in sikyuk na paye ke inkanek lun ku su tuku sin God. Sie pal, Jisus el osun nu sin un met su memelil illa liki sitiu, elos wisla monin sie met fwusr su mise in pakpuki. El mwen siefwunnu nutin sie nine su katinmas. Jisus el fwak nu sel: “Nikmet tung.” A el kalye me on lun met mise sa, a fwak: “A el fwak, met fwusr, Nga fwak nu sum, Tukakek!” Ke ma inge el tuyuk a sramsram. (Luk 7:11-15) Menmen se inge arulanu akkeye lalalfongi lasr la fwinsrak ke sifwil moulyuk arulanu paye.

7. Mea sikyuk ke mwen nutul Jairus?

⁷ Nunku pa, sie ma sikyuk ke sou lal Jairus, sie leum in imwen lolngok fwin an Capernaum. El siyuk sel Jisus in tuku a kasre an kulu nutul su yiu 12 matwe, su on apkurun in mise. Tia pat toko akkalemyeyuk la tulik mutan sa el mise tari. El kaifwe nu sel Jairus su arulanu asor in akkalemye lalalfongi, Jisus el welul in loom sel, un met elos tung. Elos isrusr ke pal se Jisus el fwak nu selos la: “Tulik se inge tia mise, a el motul.” Aok el mise na paye, tusruktu Jisus el akola in akkalemye nu sin met la metu elos ku in sifwil moulyuk oanu elos motul folosumwos su ku in sifwil tukakek. A el eis paon tulik se, a el fwak: “Tulik mutan, tukakek!” El tukakek, a “papa a nine kiel su tukeni muta” elos lut. (Mark 5:35-43; Luk 8:49-56, NW) Wangin alollo la, met nu kemwa in sou elos “tukeni muta” ke pal se met mise se su elos lungse fwa sifwil moulyuk ke sie paredais fwin fwalu.

8. Mea Jisus el oru ke kalyuk lal Lazarus?

⁸ Lazarus el mise ke lusen len akosr ke pal se Jisus el som nu in kalyuk lal a sisla eot se ke an in utyuk lal. Tokin el pre ye mutun met nu kemwa in akkalemye nu sin met la el oru ou inge ke ku lun God su etukyung nu sel, Jisus el wowoyuk ke pusra lulap: “Lazarus ilme!” El tuku na paye! Pupla paol a niel ke nuknuk lun inkulyuk, a mutal pupla ke sie nuknuk. “Tulalla a lela lan som,” Jisus el fwak. Ke pal se elos liye menmen inge, met nu kemwa su muta we in akpwarye ma wiel Lazarus, Mary a Martha, elos filiye lalalfongi nu sel Jisus (Jon 11:1-45) Ya me sramsram inge tia purakak insiom in lalalfongi la met nu kemwa su kom lungse elos fwa sifwil moulyuk ke fwal sasu lun God?

9. Efu kut ku in lalalfongi na paye la Jisus el ku in akmoulyeak met mise ke pal inge?

⁹ Ke pal se Jon Baptais el muta in prison, Jisus el supwela kas in akpwaryel a fwak: “Met kun elos liye, . . . a met mise elos akmoulyeyukyuk.” (Mattu 11:4-6) Meyen Jisus el akmoulyeak met mise ke pal se el muta fwin fwalu, paenang el ku in sulpa oru ma inge oanu sie ma orekla in ngun kulanu su God el sang ku in oru ou inge. Jisus el “sifwil moulyuk lun moul,” pa inge sie me insemwomwo na paye in etu la ke pal fwasru su arulanu futoto “elos nu kemwa su muta in kalyuku fwa long pusrel, a fwa tuku liki”!​—Jon 5:28, 29; 11:25.

Kutu Sifwil Moulyuk Akkeye Fwinsrak Lasr

10. Fuka kom ku in aketeye sifwil moulyuk se meet su orekla sin sie met sap?

¹⁰ Ke pal se Jisus el supwela met sap lal oanu met luti ke Togusrai, el fwak nu selos: “Akmoulyeak met mise.” (Mattu 10:5-8) Paye, in oru ou inge, elos enenu in filiye lalalfongi lalos ke ku lun God. In an Joppa in yiu 36 C.E., mutan se su sangeng sin God pangpang Dorcas ku (Tabitha) el motul in mise. Orekma mwo nu kemwa su el oru nuknuk a kaot lun mutan katinmas sikasrup, paenang elos arulanu asor tung kal. Ke met tuma lutlut elos akola in puknilye elos supwela kas nu sel met sap Piter el lan tuku, saap in akpwaryelos. (Orekma 9:32-38) Piter el supelosla nu kemwa liki infwokil lung, el pre a fwak: “Tabita, tukakek!” A el ngetalik, a muta, a el sang paol nu sel Piter, a tulokunulak. Sifwil moulyuk se meet inge su orekla sin met sap purakak met puspis in ekla met lalalfongi. (Orekma 9:39-42) Ma inge wise pa nu sesr la oasr fwinsrak nu ke sifwil moulyuk.

11. Mea sifwil moulyuk safla ke record lun Baibel?

¹¹ Sifwil moulyuk safla ke record lun Baibel sikyuk fwin an Troas. Ke pal se Poul el tu fwin an we ke fwafwasryesr aktolu lal oanu sie missionary, el akloesye luti lal nu ke infwulwen fong. Ke sripen totola a saap ke sripen fol su tuku ke lam a ke met pukanten su muta ke nien toeni, sie mokul fwusr pangpang Eutikus el motul fulosumwosla, el toasr ke motul a putatla liki windo se ke infwokil se aktolu lung. Elos “sruklulak tu el nu mise” tari. Poul el oatula a putati nu fwel Eutikus, kafselmu, a fwak nu sin met: “Nik komwos tung; tu moul lal oasr in el.” Poul el lungse in akkalemye la moul lun mokul fwusr se inge sifwil foloko nu yurol. Na elos nu kemwa su muta we “engun lalos tia srik.” (Orekma 20:7-12) Ke len inge, met kulansap lun God elos etu me insemwomwo lulap ke sripen etu la met wielos in pal meeta ke orekma lun God elos pulakin a akpayeyuk lun sifwil moulyuk.

Sifwil Moulyuk​—Sie Fwinsrak ke Mutamwauk Me

12. Kain in lalalfongi fuka Poul el akkalemye ke pal se el tu ye mutun nununku lun Governor Felix lun an Rom?

¹² Ke pal se el tu ye mutun nununku lun gufernor lun an Rom su pangpang Filix, Poul el fwak: “Nga lalalfongi ma nu kemwa su fwal nu ke ma sap a ma simusla in buk lun met palu; a oasr fwinsrak luk in God . . . tu a fwa oasr sifwil moulyukl nu sin met sumwos a met sesumwos.” (Orekma 24:14, 15) Fuka kutu ipen Kas lun God, oanu “Ma Sap,” el sramsram ke sifwil moulyuk lun met mise?

13. Efu kut ku in fwak la God el sramsram ke sifwil moulyuk ke pal se el wise kas palu se meet?

¹³ God el sifwanu akkalemye la oasr sifwil moulyuk ke pal se ke el sang kas palu se meet in imae Eden. Ke pal se el oru nununku lal nu ke “serpent matu,” Setan su Devil, God el fwak: “A Nga fwa filiye srunga in maslom a mutan se inge, a inmaslon fute lom a fute lal, el fwa kunausla sifwom, a kom fwa kunausla kapiniel.” (Fwakyuk 12:9; Genesis 3:14, 15) Kunausla kapinien fute lun mutan sa ku in kalmekin mise lun Jisus Kraist. Fute se inge el fwin akola in kunausla sifwen serpent soko, Kraist el enenu in sifwil moulyuk liki mise.

14. Ke inkanek fuka Jeova el “sie God, tia lun met mise, a lun met moul”?

¹⁴ Jisus el fwak: “A tu met mise elos sifwil moulyuk, aok Moses el luti in kas ke sak tusak, ke el pangon Jeova ‘God lal Ebream, a God lal Isaak, a God lal Jekob.’ A el tia God lun met mise, a lun met moul, tu met e nu kemwa moul nu sel.” (Luk 20:27, 37, 38; Exodus 3:6) Ebream, Isaak, a Jekob elos mise tari, tusruktu akmwuk lun God in akmoulyelosla e fwa akpayeyuk na paye paenang nu sel sifwanu elos nu kemwa oanu moul.

15. Efu oasr sripe lal Ebream in lalalfongi ke sifwil moulyuk?

¹⁵ Oasr sripen Ebream el lan lalalfongi ke sifwil moulyuk, meyen ke pal se el a mutan kiel, Sera, arulanu matou, oanu mise tari meyen wanginla ku lalos in orala fwako, God el oru menmen in sifwil folokunang nu selos ku lalos in orala fwako. Ma inge oanu ku lun sifwil moulyuk. (Genesis 18:9-11; 21:1-3; Hibru 11:11, 12) Ke pal se mwen nutul, Isaak, el yiu 25 matwe, God el fwak nu sel Ebream in kisekunal Isaak. Ke pal se Ebream el akola in unilye Isaak, lipufon lun Jeova el srukye paol. “Tu el nunku tu God el ku in akmoulyeak [Isaak], aok, liki met mise; a el esal pa liki an ingo in sie me pupulyuk.”​—Hibru 11:17-19; Genesis 22:1-18.

16. Ebream el motul ingenu ke mise, a sano mea?

¹⁶ Ebream el fwinsrak ke sifwil moulyuk ye koko lun Messaia, sie Fute su mwoleyukla. Meet liki el ekla sie met fwin fwalu Mwen nutin God el liye lalalfongi lal Ebream. Ke ma inge, oanu sie met fwin fwalu tok, Jisus Kraist el ku in fwak nu sin met Ju: “Ebream papa tumomwos el engun in liye len luk.” (Jon 8:56-58; Soakas 8:30, 31) Ebream el srakna motul in mise lal, sano sifwil moulyuk in moul fwin fwalu ye koko lun Togusrai lun God ke kolyuk lun Messaia.​—Hibru 11:8-10, 13.

Me Akpayeye Su Tuku ke Ma Sap a Sam

17. Mea “ma puspis su oakiyuki in Ma Sap” el sramsramkin ke sifwil moulyuk lal Jisus Kraist?

¹⁷ Fwinsrak lal Poul ke sifwil moulyuk fwal nu ke “ma puspis su oakiyuki nu ke Ma Sap.” God el sapkin nu sin met Israel: “Komwos . . . fwa wise kap in fwako se meet nu sin met tol. A [ke Nisan 16] el fwa furok kap se inge ye mutun Jeova, tu in eisyuk keyumwos.” (Livitikus 23:9-14) Poul ke el srukye ma sap inge ke nunuk lal, el simusla: “A inge Kraist el moulyuk tari liki met mise, fwako se meet lalos su motul in mise.” Oanu “fwako se meet,” Jisus el sifwil moulyuk ke Nisan 16, 33 C.E. Tok, ke lusen pal in oasr tari lal, oasr pa sifwil moulyuk lun ‘fwako toko’​—pa nu sin met tuma lutlut akmusrala lal.​—1 Korint 15:20-23; 2 Korint 1:21; 1 Jon 2:20, 27.

18. Fuka Piter el akkalemye la sifwil moulyuk lal Jisus oasr ke kas palu lun Sam?

¹⁸ Sam el ouyepa akkeye sifwil moulyuk. In len in Pentekost 33 C.E., met sap Piter el orekmakin Sam 16:8-11, el fwak: “Tu Devid el fwak kel [Kraist], ‘Nga liye Jeova pal e nu kemwa ye mutuk; tu el muta lepouk leyut, tu Ngan tia mokuikui. Ke ma inge insiuk engunak, a louk insemwomwo. A kutu pa ikuk a fwa muta in fwinsrak; tu kom a fwa tia likiye ngunik in Hedis, a kom fwa tia fulela ma mutal lom in liye ma kulamwi.’ ” Piter el tafwela: “Ke el [Devid] etu ma se inge meet el kaskas ke sifwil moulyuk lun Kraist, tu el tia filiyuki in Hedis, a ikwel tia liye kulamwi. God el akmoulyeak Jisus se inge.”​—Orekma 2:25-32.

19, 20. Nge Piter el srukak Sam 118:22, a fuka ma inge wekunang nu ke mise a sifwil moulyuk lal Jisus?

¹⁹ Tokin len ekasr, Piter el tu ye mutun Sanhedrin a sulpa srukak Sam. Ke el aketeye fuka el kasru met ngusr sikapas, met sap el fwak: “Lela komwos nu kemwa a met Israel nu kemwa, in etu, tu in en Jisus Kraist lun Nasaret, su komwos uniye fwin sak soko, su God el akmoulyeak liki met mise, aok in el met se inge el tu ye mutomwos kelanu. El inge [Jisus] ‘eot se su komwos met musa aklusrongtenyel, su orek mutun srumwasrik.’ A wangin lango ke siena, tu wangin siena e ye kosrao eyeyung nu sin metu, tu kut fwa moul ka.”​—Orekma 4:10-12.

²⁰ Ke kas lal inge Piter el srukak Sam 118:22, orekmakin ma inge aketeye ke mise a sifwil moulyuk lal Jisus. Mokleyuk sin met kol lun alu, met Ju elos tia esel Jisus. (Jon 19:14-18; Orekma 3:14, 15) ‘Met musa su aklosrontenye eot’ se inge su paenang kol nu ke mise lal Kraist, tusruktu ‘eot se inge ekla mutun srumwasrik’ su kalmekin sifwil moulyuk lal in ngun in mwolanu in kosrao. Oanu met sim lun Sam el palye, ‘ma inge orekma lun Jeova.’ (Sam 118:23) Ke pal se el orala “eot” se inge in Mutun srumwasrik ma inge akkalemye la el akfulatyel oanu sie Togusra su pakiyuki.​—Efesus 1:19, 20.

Akkeyeyuk ke Fwinsrak ke Sifwil Moulyuk

21, 22. Kain in fwinsrak fuka Job el akkalemye, oanu ma akkalemyeyuk in Job 14:13-15, a fuka ma inge akkeye met asor puspis ke len inge?

²¹ Kut fwinne sonna liye na paye sie met su sifwil moulyuk liki mise, tusruktu kut etu tari kutu me sramsram in Baibel su oru kut in lalalfongi ke sifwil moulyuk. Ke ma inge, kut ku in lalalfongi ke fwinsrak su Job el akkalemye, sie met sumwos. Ke pal se el keok, el siyuk ou inge: “O ke kom [Jeova] in lungsum in mwukunyula in Hedis, ke kom lungsum in srukyuwi in lukma, . . . pakiye sie pal nu sik, a esam yu! Ya sie met fwin mise, el fwa sifwil moul? . . . Kom fwa pang, a Nga fwa topuk kom. Na kom fwa lungse orekma lun poum.” (Job 14:13-15) God el ‘lungse orekma lun poul,’ el lungse na paye in akmoulyeak Job. Sie fwinsrak na paye pa inge su el ase nu sesr!

²² Sie met in sou su sangeng sin God saap el weak mas, oanu ma sikyuk nu sel Job in pal meeta, a saap me lokwalok inge mise ku pa in oru el an mise. Met in sou lal su moul saap elos arulanu asor a tung, oanu Jisus el tung ke pal se Lazarus el mise. (Jon 11:35) Tusruktu, sie me pwarak na paye in etu la God el a fwa pang a elos nu kemwa su el esam elos fwa topuk! Oanu elos foloko tokin elos fwafwasyesr ke sie an loes​—tia mas, sikapas, a arulanu ku in mano.

23. Fuka kutu met elos akkalemye lalalfongi lalos ke sifwil moulyuk?

²³ Mise lun sie met matu Kristian su oaru mokleyuk met lili wiel in lalalfongi in simusla: “Kut wi kom ke asor lasr ke mise lun nine kiom. Tusruk ke pal na futoto kut e sifwil paingnul​—kato a fukoko in mano!” Papa a nine su mise mwen nutulos elos fwak: “Kut ngetuk na paye ke pal fwasru ke pal se Jason el tukakek! El liye ma raunella a konaok sie paredais su el arulanu lungse. . . . sie me purakak yok na paye pa inge nu sesr kemwa su lungse el in ouyepa muta we.” Aok, kut sang kulo na paye meyen sifwil moulyuk el arulanu paye!

Mea Top Lom?

• Fuka lalalfongi ke me sang lun God in akmoulyeak met mise sang me insemwomwo nu sesr?

• Kain in ma sikyuk puspis fuka su simusyukla in Ma Simusla ase nu sesr sripe in lalalfongi ke sifwil moulyuk?

• Efu kut ku in fwak la sifwil moulyuk sie fwinsrak na paye ke mutamwauk me?

• Kain in fwinsrak mwo fuka kut ku in lalalfongi fwin kut sramsram ke met mise?

[Picture on page 8]

Ke ku su tuku sin Jeova, Elaija el oru in folokyang moul lun mwen nutin katinmas se

[Picture on page 10]

Ke pal se Jisus el akmoulyeak an nutul Jairus, papa a nine kiel elos muta siskel a lut na paye

[Picture on page 13]

Ke len in Pentecost 33 C.E., met sap Piter el pulaik in aketeye la Jisus el sifwil moulyuk liki mise