SIFAC KE KOLO | KUHT AC KUHTANGLAH FUHKAH MWE FOSRNGAH UH?

Fosrngah Ke Sucu

Muhtwacn se inge, Janet el fahk: “Tukun na pahpah tuhmuhk ah misac, mukul tuhmuhk ah fahk lah el wi sie pacna muhtwacn. Tiac paht tohkoh, el tiac fahk lah el ac som a el uslah nohfohn ma lal ah ac el sisyuclac wi tuhlihk luo nahtuhsr.” Janet el konwacack orekma se lal, tuhsruhktuh srihklac molol pwacnacng el tilac kuh in muhta ke lohm se seltahl ah. Oacyacpac, arlac puhs ma upac el sun sahyacn elyah laltahl ke mani. Pa inge ma el esam kac: “Mwe fosrngah yohk nga puhla ke srihpen puhslaclac kunohkohn sasuc ma nga enenuh in elyah kac. Nga pahkomuhta tuhlihk nuhtihk uh lah nga tiac kuh in sang ma pucspucs ma pahpah ac ninac sahyac uh sang nuh sin tuhlihk nahtuhltahl uh. Ac nwe ingena, nga elyah ke nuhnak luhn mwet sahyac uh keik ac ke tuhlihk nuhtihk uh. Sahp eltahl nuhnkuh muh nga tena sang kuhiyuck in sruokyac moul in pahyuck luhk uh.”

Sie ma kahsrel Janet in ahkwoye puhlakihn lal ac in fototo nuh sin God uh pa puhruhe. “Fong ngwe pa upac emeet uh, ke pacl se ma nuhkewa mihsi ac nga tiac kuh in tui ke nuhnkeyacn fosrngah nuhkewa luhk uh. Puhruhe ac rit Bible luhk uh pa kahsreyuc in mutul ke fong ngwe. Sie ma suhmuhslah ma nga luhngse riti uh pa Phillipi 4:6, 7: ‘Nikmet fosrngah ke kuhtwena ma, a in puhruhe lowos nuhkewa, siyuck sin God ke mwe enenuh lowos, ac pacl nuhkewa kowos in siyuck sel ke inse kuloh. Ac mislac luhn God, suc yohk liki ma mwet uh kuh in kahlwem kac, ac fah karuhnguhnwacng insiowos ac nuhnak lowos liki kuhtwena mwe fosrngah.’ Fong pucspucs nga puhruhe ac nga puhla ke mislac luhn God uh ahkkweyeyuc.”

Kuht kuh in luhlahlfongi lah kahs in ahkkweye lal Jesus ke puhruhe se lal ke finohl ah kuh in kahsre kuht ke kain in mwe fosrngah. El fahk: “Pahpah tomowos El etuh tari ma kowos enenuh meet liki kowos siyuck sel.” (Matthew 6:8) Pwacnacng kuht enenuh in siyuck kahsruh sel. Puhruhe uh pa inkacnek se meet kuht kuh in “kaluckyang nuh yurin God.” Ma wo fuhkah ac tuhkuh kac uh? “El ac fah apkuhranwot nuh yuruwos.”​—James 4:8.

Ahok, ke pacl se kuht puhruhe uh kuht engan lah kuht fahkwack mwe fosrngah lasr uh, tuhsruhktuh oasr pac ma wo sahyac ke puhruhe uh. Jeova el “topuk puhruhe” uh, ac el mokleyuck in kahsruh mwet nuhkewa ma luhlahlfongel ac siyuck ke kahsruh lal. (Psalm 65:2) Pa inge srihpac se pwacnacng Jesus el luti nuh sin mwet tuhma lutlut lal ah in “puhruhe pacl nuhkewa ac tiac fuhleack.” (Luke 18:1) Kuht enenuh in siyuck ke kahsruh ac kolyuck luhn God pacl nuhkewa, ac etuh na pwacye lah el ac fah ahkinsewowoye luhlahlfongi lasr uh. Kuht tiac enenuh in ahlohloh ke kuh lal ac luhngse lal in kahsre kuht. Ke kuht “puhruhe pacl nuhkewa,” ma inge ahkkahlwemye luhlahlfongi pwacye lasr uh.​—Sie Thessalonica 5:17.

KALMEN LUHLAHLFONGI NA PWACYE

Tuhsruhktuh meac na pwacye kalmen luhlahlfongi? Kalmen luhlahlfongi pa in ‘etuh’ kacl God oacna sie kawuck. (John 17:3) Kuht srihke in etwacl ke kuht lutlut kuh eis etwacack ke nuhnak luhn God suc oasr in Bible. Kuht etwaclah lah el liye kais sie sesr ac el ke kahsre kuht. Tuhsruhktuh, tiac kalmac pa kuht fin etuh kacl God na oasr luhlahlfongi pwacye lasr. Kalmac pa kuht enenuh pac in fototo nuh sel oacna sie kawuck. In oacna fototo lasr nuh sin sie kawuck, kuht tiac kuh in puhla kain in fototo se inge tukun fong sefanna. Luhlahlfongi lasr uh “fah kapwack” ke yohkwelihk ma kuht etuh kacl uh, ke kuht “oruh ma el insewowo kac,” ac ke kuht puhla kahsruh lal nuh sesr uh. (Luo Corinth 10:15; John 8:29) Pa inge ohiyen luhlahlfongi se ma kahsrel Janet elan kuhtanglah mwe fosrngah lal uh.

Janet el fahk pac: “Ma se ma kahsreyuc na pwacye in muhsaheack luhlahlfongi luhk uh pa ke nga liye kahsruh luhn Jeova nuh sihk ke ma nuhkewa. Pacl puhs kuht sun kain in ma upac ma kuht nuhnkuh muh kuht tiacna kuh in kuhtanglah. Tuhsruhktuh ke nga sikaleni in puhruhe, pacl nuhkewa Jeova el ahkkahlwemye nuh sihk inkacnek kuh top nuh ke ma upac lasr ma nga puhla muh nga tiac kuh in sifacna nuhnkeack. Ke pacl se nga sang kuloh nuh sel uh, ma inge ahkacsmakihnyeyuc ke ma pucspucs ma el kahsreyuclac kac. Pacl nuhkewa, el kahsre kuhtlac ke pacl se na ma kuht enenuh na pwacye ah, ac inkaiyen pacl uh kuht puhla muh arlacna falyang. El use pac kawuck na wowo luhk ac eltahl mukul ac muhtwacn Christian pwacye. Pacl nuhkewa eltahl ahkolah in kahsreyuc ac eltahl mwe srihkasrak na wowo nuh sin tuhlihk nuhtihk uh.”a

“Nga etuh ingena lah efuh Jeova el fahk kahs inge in Malachi 2:16: ‘Nga sruhnga pahyuck fahsrelihk uh.’ Ohiyac se inge mwe kuhtasrihk na upac se nuh sin mwet se ma oaru ah. Finne yac pucspucs somlah tukun mukul tuhmuhk ah sisyuclac, srackna oasr pacl ma nga suhpwacr ac puhla muh wacngihn srihpuck. Ke pacl ma nga puhla ohinge, nga srihke nga in kahsruh sie mwet ah, ac ma inge kahsreyuc pac pacl nuhkewa.” Ke Janet el ahkos kahs in kahsruh luhn Bible uh in tiac srenglah, fosrngah lal uh srihkeni.b—Soakas 18:1.

Janet el fahk: “Mwe ahkkweye se ma kahsreyuck emeet uh pa ke nga etuh lah God el pahpah tuhmwacn ‘tuhlihk muhkaimtacl ac El karuhnguhnwacng katinmas’ nuhkewa. El ac fah tiacna siskuhtlac oacna ke mukul tuhmuhk ah oruh.” (Psalm 68:5) Janet el etuh lah God el tiac srihfe kuht “ke ma kuluk.” A el “insewowo in sang” lahlmwetmwet nuh sin mwet nuhkewa ac in use kuh lal in kahsre kuht kuhtanglah mwe fosrngah lasr uh.—James 1:5, 13; Luo Corinth 4:7.

Tuhsruhktuh, ac fuhkah fin kuht fosrngah ke srihpen moul lasr uh oasr ke mwe sensen?

[Sihm srihsrihk e ten]

[Mwe ahkuhtweyac srihsrihk ke sra 7]

God el pahpah tuhmwacn “tuhlihk muhkaimtacl ac El karuhnguhnwacng katinmas” nuhkewa.​—Psalm 68:5