SIFAC KE KOLO | KUHT AC KUHTANGLAH FUHKAH MWE FOSRNGAH UH?

Fosrngah Ke Mani

Paul el sie mukul pahyuck suc oasr tuhlihk luo nahtuhl. Pa inge ma el fahk uh, “Ke puhlan pacl se ma wacngihn suhnuhn ma pucspucs ke acn sesr uh, tuh oasr pac sracl luhlahp se ke mwe mongo ac yohkwelihk na pwacye molin mongo ah. Kuht tu tahklac ke lain soko ao nuh ke ao, tuh inkaiyen pacl uh lihsr tari mongo ah meet liki kuht sun muhtuhn lain sac. Mwet uh arlacna srilac ke srihpen eltahl masrinsracllah, ac kuhtuh seltahl muhlallah pe inkacnek uh. Molin mwe enenuh lasr nuh ke kais sie lwen uh yohkwelihk na pwacye sun million, tohkoh sun billion na tohkoh wacngihnlac srihpen mani uh. Wacngihnlac mani luhk ke bank ac tui insurance wi social security luhk ah.”

Paul el etuh lah sucu lal uh enenuh in “lahlmwetmwet” tuh eltahl in moul. (Soakas 3:21, BMK) El fahk: “Yohk molihk ke nga tuh orekma ke acn in sahrom ah, ingena nga srihke ngacn oruh orekma nuhkewa ma nga kuh in sruokyac, finne srihklac molo. Kuhtuh sin orekma luhk inge moli nuh sihk ke mwe mongo kuh kuhtwena ma nga enenuh nuh ke lohm sihk ah. Fin pa molin orekma luhk ke lwen se pa soap in yihyih ahkosr, nga ac orekmakuhnlah luo ac kuhkwackuhnlah ma luo sahyac ah. Mani se inge nga sang moul torokrok. Ke sie pacl ah tuh oasr torokrok 40 nuhtihk ac ke pacl se eltahl mahtuhlah ah nga kuhkwackuhnlah nohfohn. Ke mani sac nga sulpac na molwelah torokrok 300. Tohkoh nga ayaol nuh sin sie mwet, nga sang won 50 nahtuhl ac el use pack luo ke fuhlao tahkmwek ma oreklac ke korn ac kais sie pack inge oasr ke paun 110. Ke pacl na loeloes se, pa inge mongo ma nga sang kihte sucu luhk ah wi sucu ekahsr pac sahyac.”

Paul el oacyacpac etuh lah ma se ma wo emeet sie mwet el kuh in oruh uh pa in luhlahlfongi ke God. Kuht fin oruh ma God el sapkihn nuh sesr uh, el ac kahsre kuht. Jesus el fahk ma inge ke ohiyen moul luhn mwet ma suk in eis ma nuhkewa ke moul: “Nik kowos . . . fosrngah” mweyen “Pahpah tomowos El etuh lah kowos enenuh ma inge.”​—Luke 12:29-31.

Mwe ahsor se lah Satan, suc mwet lokoalok luhn God el srihfaclah inkaiyen mwet fin facluh uh in nuhnkaclah yohk ke mwe enenuh laltahl. Oasr mwet ma nuhnkaclah yohk ke mwe enenuh laltahl uh ac kuhtuh pacl uh eltahl kwacfeacng in eis, finne tiac ma eltahl enenuh na pwacye. Puhs seltahl oraclah misac luhlahp, ac etwacack tok lah, “kom fin ngihsre mani sin sie mwet, na kom mwet kuhlwacnsap [kohs] luhn mwet sac.”​—Soakas 22:7.

Kuhtuh mwet uh oruh sulaclah ma eltahl ac muh auli kac tok. Paul el fahk: “Puhs mwet tuhlan lasr ma som liki sucu ac kawuck laltahl uh in suk sie moul wo sahyac. Kuhtuh seltahl som ac tiac oraclah pwepuh ma enenweyuck nuh ke acn eltahl fahsr nuh we uh ac eltahl koflah konwacack pac orekma. Puhs pacl ma eltahl enenuh in kahinglac liki police ac mutul pe innek uh. Arlac kahlwem lah eltahl tiac ahkkahlwemye luhlahlfongi laltahl nuh sin God in tuhpan ke kahsruh lal uh. Kuht finne sun ma upac ke srihpen kwacoh lasr ke mani, sucu lasr uh sulaclah in tuhkweni kuhtanglah ma upac lasr uh ke kahsruh luhn God.”

OREKMAKIHN KAHS IN KAHSRUH LAL JESUS

Paul el oacyacpac fahk: “Jesus el fahk ohinge: ‘Nimet fosrngah ke ma ac fah sikyak lutu; tuh ma sikyak lutu fal in fosrngahkihnyuck lutu. Tiac enenuh in lahesyuck mwe fosrngah luhn kais sie lwen.’ Pwacnacng ma nga puhruhe siyuck ke lwen nuhkewa uh pa God elan ‘kihte kuht lwen se inge ma kuht mongo mihsenge’ tuh kuht in moul. Ac el kahsre kuht na pwacye, oacna ke Jesus el wuhlelah inge. Tiac pacl nuhkewa el use ma kuht ke na pwacye uh. Ke sie pacl ah nga tu tahklac ke lain in soan mongo sac ac nga nihkihn lah meac ac kuhkwackihnyuck kac ah. Ke nga sun muhtuhn lain ah, nga liyacack lah yogurt. Nga sruhnga na pwacye mongo yogurt. Tuhsruhktuh, pa na inge mongo ma oasr uh, pwacnacng pa inge ma nga kang ke fong sac. Nga kuloh nuh sin God lah wacngihn sie pacl ma sucu luhk ah masrinsracl na mutullac.”a

“Ke pacl inge kuht tiac arlacna kwacoh ke mani oacna meet ah. Tuhsruhktuh ma sikyak nuh sesr ah luti kuht lah ma se ma wo emeet in kahsruh mwe fosrngah lasr uh pa in luhlahlfongi ke God. Jeovab el ac kahsre kuht pacl nuhkewa kuht fin tahfwelah in oruh ma luhngse lal uh. Kuht liye lah arlacna pwacye kahs ke Psalm 34:8 uh: ‘Kom in sifacna akihlenack luhpan woiyen Leum God. Insewowo elos suc konwacack mislac in el.’ Ke srihpac se inge, fin oasr ma upac ma sifwil sikyak ke moul lasr uh, kuht tiacna sahngweng.”

“Ke pacl inge kuht kahlwem ke ma mwet uh enenuh na pwacye tuh eltahl in moul. Eltahl enenuh mongo tiac orekma kuh mani. Kuht rahrahlac in sun pacl se ma God el ac fah ahkpwacyeye wuhlelah lal inge: Ac fah ‘puhkantwen wheat fin acn uh.’ Tuh ke pacl inge, ‘fin oasr yohrohsr mwe mongo nwacsr ac nuknuk lasr, lwelah kuht in falkihn ma inge.’ Kuht eis mwe ahkkweye na yohk ke kahs luhn Bible inge: ‘Kowos in tiac nuhnkuhn mani, a kowos in falkihn ma oasr yurowos. Tuh God el fahk, “Nga ac fah tiacna fahsr liki kom; nga fah tiacna siskomlac.” Ke ma inge kuht kuh in puhlaik in fahk, “Leum el kahsreyuc, Nga fah tiacna sahngweng.”’”c

In oacna ke ma Paul ac sucu lal uh oruh, kuht enenuh luhlahlfongi pwacye tuh kuht in ‘fahsr wi God.’ (Genesis 6:9) Kuht fin sun ma upac ke srihpen kwacoh yohk ke mani ke pacl inge kuh sahp ke pacl fahsruh uh, yohk ma kuht kuh in lotwelah ke mwe srihkasrak lal Paul ke luhlahlfongi ac lahlmwetmwet lal uh.

Tuhsruhktuh ac fuhkah fin ma upac in sucu lasr uh pa oruh kuht in fosrngah?

[Sihm srihsrihk e ten]

[Mwe ahkuhtweyac srihsrihk ke sra 5]

God el wuhlelah ma inge: “Nga ac fah tiacna fahsr liki kom; nga fah tiacna siskomlac.”—Hebrew 13:5