SIFAC KE KOLO | KUHT AC KUHTANGLAH FUHKAH MWE FOSRNGAH UH?

Fosrngah Ke Mwe Sensen

Alona el fahk: “Oasr puhsra se ac orek na nga ac tuhfalwack ac yuclac wihklac in loangeyuc liki bomb uh. Tuhsruhktuh nga finne wihklac nga srackna tuhfal. Sahngweng luhk uh ac upac liki na inge nga fin tu lihkihnum ah ac wacngihn acn nga in wihk kac. Sie pacl ah, ke nga fahsr inkacnek ah, nga muhtwacwack tuhng ac nga koflah in momong. Ao ekahsr tohkoh fah nga wolac. Na muh sulpac na kahslah puhsra sac.”

Mweun uh sie sin mwe sensen pucspucs. Ke sie mwe puhpuhlyuck, ke pacl se konweyuckyak lah kom kuh sie mwet kom fototo nuh se el weack sie mas na upac, ma inge kuh in sie mwe lut na yohk nuh sum. Ac nuh sin kuhtuh pac sahyac, sahngweng laltahl nuh ke ma ac kuh in sikyak ke pacl fahsruh uh kuh in mwe fosrngah se nuh seltahl. Eltahl sensen ac nuhnkuh, ‘Yac tuhlihk nahtuhsr ac nuhtin nahtuhsr uh ac mahtuhlah ke sie facl ma nwacnwaclah ke mweun, orekma suhlallacl, fohkfohk, eklac luhn puhlan pacl uh, ac mas upac?’ Kuht ac kuhtanglah fuhkah kain in fosrngah inge?

Ke kuht etuh lah ma kuluk uh sikyak, “pacl se mwe lokoalok tuhkuh, mwet etuh elos ac fahsr liki.” (Soakas 27:12) In oacna ke kuht arlacna liyacacng moul lasr uh, kuht kuh in oruh ma enenweyuck in karuhnguhnwacng nuhnak ac puhlakihn lasr uh. Ke kain in sritacl kuh petsac ahkmas ac ripohrt ke news ma nwacnwaclah ke petsac kuluk ac orekma suhlallacl uh weacng pac nuh ke fosrngah lasr ac luhn tuhlihk nahtuhsr uh. Ke kuht tiac liyeyuck petsac ahkmas, tiac kalmac pa kuht nuhnkuh muh ma nuhkewa wona. God el tiac oraclah mwe nuhnak lasr uh in muhta nuhnkuh ke ma kuluk. Pwacnacng, kuht enenuh in nwacklah nuhnak lasr uh ke “ma suc pwacye, . . . suwohs, . . . nwacsnwacs, . . . ohi.” Kuht fin oruh ma inge, “God, suc acse mislac” el ac fah acse nuh sesr nuhnak ac inse mislac.​—Philippi 4:8, 9.

YOHK SRIHPACIYACN PUHRUHE

Luhlahlfongi pwacye uh kahsre kuht in kuhtanglah kuhtwena fosrngah. Bible uh kwacfe kuht in “puhruhe.” (Sie Peter 4:7) Kuht kuh in siyuck ke kahsruh luhn God, kuh ke lahlmwetmwet wi puhlaik tuh in fahlac wo kuhtwena ohiyac ma kuht sun kuh oasr kac. Ac luhlahlfongi lah “el lohng kuht pacl nuhkewa” ke kuhtwena ma kuht siyuck kac.​—Sie John 5:15.

Bible uh ahkuhtweyac lah tiac God, a Satan pa “leum luhn facluh” ac “facluh nohfohn . . . oan ye kuh luhn el suc kuluklacna.” (John 12:31; Sie John 5:19) Arlacna kahlwem lah Satan el ma na pwacye se, tuhsruhktuh molwelah luhn Jeova uh pwacye pac. Pwacnacng, Jesus el luti kuht in puhruhe ohinge: ‘Eiskuhtlac liki el suc kuluklacna.’ (Matthew 6:13) Alona el fahk pac lah, “Pacl nuhkewa ma kahslah puhsra sac, nga ac siyuck sin Jeova elan kahsreyuc in kutong puhlakihn luhk uh. Oacyacpac, mukul tuhmuhk ah ac pahngonyucyak ac wiyuc puhruhe. Puhruhe uh kahsruh na pwacye.” In oacna ma Bible uh fahk: “El [Jeova] apkuhran nuh selos nuhkewa suc pahng nuh sel, suc pahng nuh sel ke inse pwacye.”​—Psalm 145:18.

FINSRAK LASR KE PACL FAHSRUH UH

Ke mwe sramsram lal Jesus ke finohl ah, el luti mwet tuhma lutlut lal ah in puhruhe siyuck: “Tohkohsrahi lom in tuhkuh.” (Luke 11:2) Tohkohsrahi luhn God ac fah ahkwacngihnyelah kain in fosrngah nuhkewa nwe tok ma pahtpaht. God el ac fah orekmakuhnuhl Jesus, “Fihsrack luhn Mislac” in “tulokihnyac mweun fin facluh nohfohn.” (Isaiah 9:6; Psalm 46:9) God el ac fah nuhnuhnkuh “muhtuhnfacl pucspucs . . . Muhtuhnfacl uh ac fah tiac sifwil pac mweun, ac tiac sifwil pac ahkoeyuck mweun. . . . Ac wacngihn sie fah ahksahngwengyaclos.” (Micah 4:3, 4) Sucu pucspucs suc insewowo “elos fah muhsah lohm ac muhta loac; elos ac yukwi imac in grape ac kang fahko kac.” (Isaiah 65:21) “Wacngihn mwet in facl sesr ac fah fahk muh, ‘Nga mas.’”​—Isaiah 33:24.

Ke pacl inge, kuht finne arlac taran ac karihngihn kuht ahkwoyac, “ma onglac ohiyac uh sikyak nuh sin mwet nuhkewa.” Ac kuhtuh pacl uh ma upac uh sikyak nuh sesr ke srihpen kuht falyang nuh ke pacl ac acn sacn. (Ecclesiastes 9:11) Mweun, ahkmas, ac mas upac uh srackna uniyac mwet wowo pucspucs, oacna ke ma sikyak tari ke lusen yac pucspucs somlah ah. Finsrak fuhkah oasr yurin mwet nuhkewa ma sun kuh puhla ma inge?

Million sin mwet, suc God muhkwena etuh ke pihsacltahl ac fah sifwil moul. Tuhsruhktuh ke pacl inge ke eltahl monglac uh, eltahl oasr pac tari ke mwe acsmak luhn God nwe ke “pacl se ac tuhkuh ke mwet misac nuhkewa . . . ac ilme liki kuclyuck lalos.” (John 5:28, 29) Pa inge ma Bible uh wuhlelah nuh sesr ke sifwil moulyak uh: “Finsrak se lasr inge oacna sie mwe kawuck ma kawuckkihnyac moul lasr, suc arlacna kuh ac pwacye.” (Hebrew 6:19) Ac God “el ahkpwacyei ma se inge nuh sin mwet nuhkewa ke El ahkmoulyeack mwet se inge [Jesus] liki misac!”​—Orekma 17:31.

Ke pacl inge, finne mwet ma srihke in ahkenganye God uh eltahl ac sun pac mwe fosrngah. Ke Paul, Janet, ac Alona kwacfeacng ke ma eltahl oruh, ahkfototoyacltahl nuh sin God ke inkacnek luhn puhruhe, ac muhsahi luhlahlfongi laltahl ke finsrak se ma Bible uh ahkkahlwemye ke pacl fahsruh uh, eltahl kuhtanglah mwe fosrngah nuhkewa laltahl uh. In oacna ke God el kahsreltahl, “Lwelah God suc sesseslah ke finsrak, Elan oruh tuh kowos in tihngtihngi ke engan ac mislac ke srihpen luhlahlfongi lowos in El.”​—Rome 15:13.

[Pohk ke sra 9]

Ac Fuhkah nuh ke Mwe Kahsruh luhn Doctor?

Kom fin oruh ma nuhkewa ma kom kuh in oruh a fosrngah lom uh srackna ahkkulukye kom ke moul lom, sahp ac wo kom in som nuh yurin sie doctor ah. Ke pacl se mwe fosrngah uh arlacna yohk liki ma upac kuh ma toasr ma mwet se sun, sahp kalmac pa oasr ma upac na pwacye se. Doctor lom uh ac kuh na in checki monum (physical checkup), mweyen fosrngah lom uh ac kuh in ma tuhkuh ke sie mas keim ma soenna kahlwem. Ke pacl sacn, doctor sacn ac kuh in kahsre kom ke ono kuh mwe kahsruh ma kom enenuh an.a

[Sihm srihsrihk e ten]