SIFAC KE KOLO | KUHT AC KUHTANGLAH FUHKAH MWE FOSRNGAH UH?
Mwe Fosrngah Uh Oasr Yen Nuhkewa!
“Nga som in moul mongo tuh cookies na pa ke stoh ah ac arlacna yohkwelihk molo ah pacl 10,000! Na ke lwen tohkoh ah, e se na ngwe wacngihn mongo ke stoh nuhkewa.”—Paul, acn Zimbabwe.
“Mukul tuhmuhk ah sramsram nuh sihk ac fahk lah el ac som liki kuht. Nga nihkihn lah nga ac muhtwacnglah fuhkah orekma kuhtasrihk se el oruh nuh sesr inge. Moul luhn tuhlihk nuhtihk uh ac fuhkah?”—Janet, acn Macrike.
“Ac oasr puhsra se orek na nga etuh na lah nga enenuh in yuclac wihklac ac oanlah infohk ah mweyen eltahl ac fukul acn sesr uh. Finne ke ao ekahsr pacna tohkoh, pouk srackna rarrar ke sahngweng uh.”—Alona, acn Israel.
Kuht muhta ke pacl in “mwe ongaiyac luhlahp,” ac ma inge oruh kuht in arlac fosrngah. (Luo Timothy 3:1) Puhs mwet ma elyah ke srihpen kwacoh luhn mani, fohs inmahsrlon sucu, mweun, mas upac ma fahsrelihk, ac mwe ongaiyac pucspucs sahyac. In wekuhnacng ma inge nuhkewa, sahp oasr pac mwe elyah ma kais sie sesr nuhnkuh kac, ‘Yac fihti se nga puhla kap lun monuk uh ac kuh in eklac nuh ke cancer?’ ‘Moul fuhkah tuhlihk nuhtin tuhlihk nuhtihk uh ac mahtuhlah kac uh?’
Tiac kain in mwe fosrngah nuhkewa uh kuluk. Kuhtuh pacl uh kuht tuhfal meet liki kuht eis oacna sie kain in test, ke kuht tu ye muhtuhn mwet uh, kuh ke pacl se sie mwet el kihsen siyuck nuh sesr nuh ke sie orekma. Kain in fosrngah inge nohfohn ma na ac fahsr. Ac ke kuht sahngweng in sun ma upac uh, ma inge kahsre kuht in tiac sun kuhtwena ma ma ac kuh in ahkngalye kuht. Tuhsruhktuh mwe sensen na yohk se kuht fin arlacna fosrngah pacl nuhkewa. Sie survey ma orek nuh sin mwet mahtuh, suc pihsacltahl oasr ke 68,000 ahkkahlwemye lah mwe fosrngah luhn sie mwet ke ma srihsrihk ac kuh na in oruh elan sa na misac. Ke srihpac se inge, Jesus el siyuck: “Yac kuhtwena suwos kuh in ahkloesyaclihk moul lal el fin fosrngah kac?” Pwacye lah fosrngah uh tiac ahkloesye moul luhn kuhtwena mwet. Pwacnacng Jesus el fahk kahs in kahsruh inge: “Kowos in tiac fosrngah.” (Matthew 6:25, 27) Tuhsruhktuh kuht ac oruh ma inge fuhkah?
Top nuh kac uh pa kuht enenuh in ahkkahlwemye lahlmwetmwet, in ahkyohkye ac liyacacng luhlahlfongi lasr nuh sin God ac finsrak lasr nuh ke pacl fahsruh uh. Kuht finne tiac puhla ma upac ke pacl inge, kuht ac kuh in sun ma upac ke pacl fahsruh uh. Pwacnacng, ke mwe lutlut tok uh kuht kuh in liye lah kais sie step inge kahsrel Paul, Janet, ac Alona fuhkah in muhtwacnglah mwe fosrngah laltahl uh.