Suk Tohkohsrahi ac Tiac Ma Pucspucs

1. Meac tiac oacna sie ke ma kuht enenuh ac ke ma kuht luhngse uh?

OASR ma ekahsr ma kuht enenuh na pwacye tuh kuht in moul. Ke sie mwe puhpuhlyuck, kuht enenuh mwe mongo, nuknuk, ac acn kuht in muhta kac. Ac mwet pucspucs tiac na akihlen lah eltahl tiac enenuh na pwacye ma nuhkewa ma eltahl luhngse uh.

2. Meac kuhtuh ma ma mwet uh luhngse uh?

² Sie mwet suc muhta ke acn ma arlacna suhkahsruhp, sahp ma el luhngse uh tiac oacna sie nuh ke ma sie mwet suc muhta ke acn kahsruhp uh luhngse. Ke kuhtuh acn uh, mwet uh luhngse in oasr nahtuhltahl sie mobile phone, scooter soko, kuh sie ipin acn srihsrihk. Ke kuhtuh acn sahyac uh, mwet uh luhngse nuknuk puhkantwen ma yohk molo, lohm na luhlahp, kuh sitosah ma arlacna yohk molo. Tuhsruhktuh kuht finne oasr oyac, kuh fuhkah luhpan mani ma oasr yohrohsr, kena lasr nuh ke ma kuht tiac enenuh kuh kuht tiac kuh in moli uh ac yohkyohkwelihk.

LUHNGSE NUH KE MA PUCSPUCS KUH IN AKKULUKYE KUHT

3. Meac se inge luhngse nuh ke ma pucspucs uh?

³ Meac se inge luhngse nuh ke ma pucspucs uh? Pa inge ohiyac luhn sie mwet suc nuhnkuh yohk ke ma pucspucs liki na fototo lal nuh sin God. El tiac falkihn mwe enenuh ma oasr yohrohl tari, a pacl nuhkewa el luhngse ma puhs. Finne elos suc srihklac mani la kuh tiac moli ma yohk molo, eltahl kuh in eklac mwet suc luhngse ma pucspucs. Eltahl kuh in tui ac tilac suk meet tohkohsrahi uh ke moul laltahl.​—Hebrew 13:5.

4. Satan el orekmakihn fuhkah “ma mwet uh liye ac mwel”?

⁴ Satan el luhngse kuht in luhlahlfongi muh kuht kuh in engankihn muhkwena moul lasr uh fin oasr yohrohsr ma pucspucs. Pwacnacng, el orekmakihn facl se lal inge ac “ma mwet uh liye ac mwel” in srihfe kuht in luhngse in eis ma pucspucs. (Sie John 2:15-17; Genesis 3:6; Soakas 27:20) Pacl nuhkewa, kuht liye advertisement ma oruh kuht in luhlahlfongi muh wo kuht in moli ma sasuc pucspucs uh. Yac kom moli sie ma mweyen ma inge kahto kuh kom moli ke na srihpen kom liye ma inge ke sie advertisement? Fin ohinge, sahp tukun kuhtuh pacl kom ac akihlen lah kom tiac enenuh ma inge. Kuht fin moli ma pucspucs ma kuht tiac enenuh, ma inge ac oruh in upac moul lasr uh. Ma pucspucs inge ac kuh in kihfuhskuhtlac liki kuhlwacnsap lasr nuh sin Jeova ac oruh wacngihnlac pacl lasr in lutlut ke Bible, in ahkolah ac wi ke toeni uh, ac in som nuh ke orekma in fahkwack pacl nuhkewa. Esam lah mwet sap John el fahk kahs in sensen inge: ‘Facluh ac ma nuhkewa loac ma mwet uh mwel uh ac wacngihnlac.’

5. Meac sikyak nuh sin mwet suc orekmakihn kuh laltahl kewa in eis ma pucspucs?

⁵ Satan el sruhnga kuht in orekmakihn kuh lasr nuh sin Jeova, a el ke kuht in orekmakihn kuh lasr in eis mani yohk ac ma pucspucs. (Matthew 6:24) Tuhsruhktuh, kuht fin nuhnkuh na in eis ma pucspucs nuh sesr sifacna, moul lasr ac wacngihn na pwacye kalmac kuh srihpac. Kuht ac kuh in ahsor kuh kwacoh ke mani. Kuh kuluk liki na inge, luhlahlfongi lasr nuh sin Jeova ac ke Tohkohsrahi lal uh ac kuh in tuhlac. (Sie Timothy 6:9, 10; Fwackyuck 3:17) Jesus el fahk lah “mwel ke ma pucspucs sahyac” uh oacna kohkihl ma kuh in tulokihnyac fihtac in tiac kapwack ac orek fahko.

6. Mwe lutlut fuhkah kuht lotwelah kacl Baruch?

⁶ Nuhnkuh kacl Baruch, sie mwet sihm lal mwet pahluh Jeremiah. Ke Baruch el muhtwacwacack in nuhnkuh ac suk ke ma “wo” pucspucs nuh sel sifacna, Jeova el ahkacsmakihnyacl lah ac fah tiac paht Jerusalem ac fah kuhnausyucklac. Tuhsruhktuh, el wuhlelah nuh sel Baruch lah el ac fah molwellah. (Jeremiah 45:1-5) Baruch el tiac enenuh in nuhnkuh kuh tuhpan ke kuhtwena ma sahyac. Jeova el ac tiac karihngihn ma sacohk pucspucs luhn mwet uh. (Jeremiah 20:5) Ke pacl inge, kuht arlacna apkuhran nuh ke sahflahiyen oakwuck lal Satan. Pa sis, tiac pa inge pacl kuht in elohsack ma wo pucspucs nuh sesr sifacna. Ac kuht in tiac nuhnkuh muh tukun ongaiyac luhlahp uh, ma wo nuhkewa lasr inge ac srackna oasr yohrohsr, finne ma nuhkewa inge arlacna sacohk nuh sesr.​—Soakas 11:4, Matthew 24:21, 22; Luke 12:15.

7. Meac kuht ac fah tuni tok uh, ac efuh?

⁷ Ke ma inge, fuhkah kuht kuh in karihngihn kuht sifacna ac mwet in sucu lasr uh, ac tahfwelah na in lohacng yohk nuh ke ma yohk srihpac emeet ke moul uh? Kuht ac fahsr liki luhngse ke ma pucspucs uh fuhkah? Ac meac kuh in kahsre kuht in tiac nuhnkwelah yohk lah fuhkah kuht kuh in eis ma kuht enenuh uh? Ke mwe sramsram lal Jesus finohl uh, el use nuh sesr kahs in kahsruh ma wo emeet lah kuht ac oruh fuhkah ma inge. (Matthew 6:19-21) Lwelah kuht in riti ac sramsramkihn Matthew 6:25-34. Ma inge ac fah ahkpwacyeye nuh sesr lah kuht enenuh in tahfwelah na in suk meet Tohkohsrahi uh ac tiac ma pucspucs sahyac.​—Luke 12:31.

JEOVA EL USE MA KUHT ENENUH UH

8, 9. (a) Efuh kuh kuht tiac enenuh in arlacna elyahlac ke ma kuht enenuh uh? (b) Meac Jesus el etuh ke mwet uh ac enenuh laltahl uh?

⁸ Riti Matthew 6:25. Jesus el etuh lah mwet tuhma lutlut lal uh fosrngahlah ke ma eltahl ac kang, nihm ac nukum, pwacnacng ke mwe sramsram lal ke finohl uh, el fahk nuh seltahl: “Kowos in tiac fosrngah ke . . . moul lowos.” Jesus el luhngse in kahsreltahl in kahlwem kac lah efuh eltahl tiac enenuh in fosrngah ke ma inge. El etuh lah eltahl fin arulacna elyah ke ma inge, finne nuh ke ma eltahl enenuh na pwacye, eltahl ac kuh in muhlkuhnlah ke ma yohk srihpac ke moul uh. Jesus el nuhnkuh yohk ke mwet tuhma lutlut lal uh pwacnacng el sensenkuhnuhltahl pacl ahkosr ke mwe sramsram lal finohl ah.​—Matthew 6:27, 28, 31, 34.

⁹ Tuhsruhktuh, efuh kuh Jesus el fahk muh kuht in tiac elyah ke ma kuht ac fah kang, kuh nihm kuh nukum? Yac kuht tiac enenuh mongo ac nuknuk? Pwacye lah kuht enenuh! Ac fin suhfallac mani lasr in eis ma inge, tiac ma sasuc se in elyah. Jesus el etuh pac ma inge. El etuh ma mwet uh enenuh. El etuh pac lah “ke lwen sahflah uh,” mwet tuhma lutlut lal uh ac fah muhta ke pacl na upac. (Luo Timothy 3:1) Mwet pucspucs ke pacl inge eltahl tiac kuh in konwacack orekma ac molin ma uh yohkwelihk liki na meet ah. Ac ke acn pucspucs, mwet uh arlacna suhkahsruhp pwacnacng suhfallac kuh wacngihn na pwacye ma eltahl in kang. Tuhsruhktuh, Jesus el etuh pac lah “moul uh . . . sacohk liki mwe mongo ac mahno . . . sacohk liki nuknuk uh.”

10. Ke Jesus el luti nuh sin mwet tuhma lutlut lal ah in puhruhe, meac el fahk muh enenuh in pa yohk srihpac emeet ke moul laltahl uh?

¹⁰ Meet kuhtuh, Jesus el luti nuh sin mwet tuhma lutlut lal uh lah ke pacl ma eltahl puhruhe uh, eltahl enenuh in siyuck sin Pahpah tuhmwacltahl inkuhsrao uh elan sang ma eltahl enenuh uh. Eltahl kuh in puhruhe ac fahk: “Kihte kuht lwen se inge ma kuht mongo mihsenge.” (Matthew 6:11) Ke sie pac pacl ah el fahk nuh seltahl in puhruhe ohinge: “Kihte kuht mwe mongo ma kuht enenuh pingana lwen.” (Luke 11:3) Tuhsruhktuh, tiac kalmen ma inge pa kuht enenuh in nuhnkuh pacl nuhkewa in eis ma kuht enenuh uh. Na pwacnacng, Jesus el fahk nuh sin mwet tuma lutlut lal ah lah yohk srihpac in puhruhe ac siyuck ke Tohkohsrahi luhn God in tuhkuh liki na in puhruhe ke mwe enenuh lasr uh. (Matthew 6:10; Luke 11:2) In kahsruh mwet tuhma lutlut lal ah in tiac elyah, Jesus el ahkkweyacltahl ke el ahkacsmakihnyacltahl ke luhpan karihngihnyuck luhn Jeova nuh ke ma oreklac nuhkewa lal uh.

11, 12. Meac kuht lotwelah ke inkacnek luhn Jeova in karihngihn won yen engyeng uh? (Liye petsac se meet ke mwe lutlut se inge.)

¹¹ Riti Matthew 6:26. Kuht enenuh in “liye won yen engyeng uh.” Finne won uh arlacna srihk, yohk ma eltahl kang. Fin won uh yohk oacna mwet uh, mongo laltahl uh ac yohk liki na mongo luhn mwet uh. Won uh mongo fukun sahk, fihtac, won srihsrihk ac wet. Tuhsruhktuh, eltahl tiac enenuh in yok fihtac ac ahkkapye mongo nwacltahl uh. Jeova el sang ma nuhkewa ma eltahl enenuh uh. (Psalm 147:9) Pwacye, el tiac sang nuh inwacluhltahl mongo nwacltahl uh! Eltahl enenuh in som ac suk, tuhsruhktuh oasr ma eltahl kuh in konwacack pacl nuhkewa.

¹² Jesus el etuh lah fin Pahpah tuhmwacl uh karihngihn won uh, wacngihn ahlohloh kac lah el ac fah oacyacpac karihngihn mwet uh.^[1] (Liye endnote.) (Sie Peter 5:6, 7) Pwacye, in oacna won uh, kuht enenuh in tiac alsruhngesr. Kuht enenuh in orekma upac in yukwiyac mongo nwacsr kuh in eis mani in molwelah mongo nwacsr uh. Jeova el kuh in ahkinsewowoye kwacfeacng nuhkewa lasr uh. Ac ke suhfallac mani kuh mongo nwacsr uh, el srackna kuh in use ma kuht enenuh uh. Sie mwe puhpuhlyuck pa ke mwet sahyac uh use nuh sesr ma oasr yohrohltahl uh. Jeova el oacyacpac sang acn in muhta luhn won uh. El sang kuh nuh seltahl in oraclah ahng ac el pac pa oraclah ma won inge orekmakihn in sang muhsahelah ahng laltahl uh. Jeova el kuh in oruh oacpacna ac kahsre kuht in konwacack sie acn wo ma sucu lasr uh kuh in muhta we.

13. Meac ahkpwacyeye lah kuht sacohk liki won yen engyeng uh?

¹³ Tukun Jesus el ahkacsmakihnye mwet tuhma lutlut lal uh lah Jeova el kihte won uh, el siyuck pac seltahl: “Yac kowos tiac arlacna sacohk luhkelos?” (Liye pac Luke 12:6, 7.) Ke Jesus el fahk ma inge, sahp el nuhnkuh kac lah ke pacl na sa el ac fah sang moul lal ke mwet nuhkewa. Ahok, Jesus el tiac misac ke won kuh kuhtwena ma orahkrahk sahyac. El misac kacsr tuh kuht in kuh in moul ma pahtpaht.​—Matthew 20:28.

14. Meac sie mwet suc fosrngah el ac tiac kuh in oruh?

¹⁴ Riti Matthew 6:27. Meac kalmac ke Jesus el fahk muh kuht tiac kuh in ahkloesye moul lasr uh ke cubit se kuht fin fosrngah? Kalmen ma el fahk uh pa, kuht tiac kuh in ahkloesye moul lasr uh kuht fin fosrngah na ke ma kuht enenuh uh. Na pwacnacng, fin arulacna yohk mwe toasr ma kuht puhla, kuht kuh in masack ac sahp kuh pacna in misac.

15, 16. (a) Meac kuht kuh in lotwelah ke inkacnek luhn Jeova nuh ke karihngihnyen ros in imac uh? (Liye petsac se meet ke mwe lutlut se inge.) (b) Kihsen siyuck fuhkah se kuht enenuh in siyuck sesr sifacna ac efuh?

¹⁵ Riti Matthew 6:28-30. Kuht engan ke pacl ma oasr nuknuk kahto ma kuht kuh in nukum, yohkna ke pacl ma kuht som nuh ke orekma in luti uh kuh nuh ke toeni lasr uh. Tuhsruhktuh, yac kuht enenuh in ‘fosrngah ke ma kuht ac nukum’? Jesus el sifwil pacna ahkacsmakihnye mwet tuma lutlut lal uh ke inkacnek ma Jeova el karihngihn ma oreklac nuhkewa lal. Jesus el orekmakihn mwe puhpuhlyuck ke “kapwack luhn ros inimac uh.” Sahp, Jesus el nuhnkuh ke kain in ros pucspucs ma oacna kiyucf na kahto. Ros inge tiac enenuh in tuhta nuknuk laltahl, mweyen ma inge arlacna kahto tari. Pwacnacng, Jesus el fahk muh “finne Tohkohsrah Solomon in mwe kahsruhp lal, tiac kuh in yucnellah in kahto oacna sie sin ros inge”!

¹⁶ Nuhnkuh ke ma Jesus el fahk tok inge: “God pa yucnwelah mah inimac uh . . . , yac El ac fah tiac yucnikowoslac in arlacna wo liki? Srihklac na luhlahlfongi lowos uh!” (Matthew 8:26; 14:31; 16:8; 17:20) Eltahl enenuh in luhlahlfongi lah Jeova el luhngse in karuhnguhnuhltahl ac lah el fah oruh na pwacye. Fuhkah nuh sesr? Yac kuht luhlahlfongi lah Jeova el ac karihngihn kuht?

17. Meac ac kuh in ahkkulukye fototo lasr nuh sin Jeova uh?

¹⁷ Riti Matthew 6:31, 32. Mwet pucspucs suc tiac etwacl Jeova, eltahl orekmakihn inkaiyen pacl laltahl in ahkyohkye mani ac ma pucspucs laltahl. Tuhsruhktuh, kuht fin oruh ma inge, kuht ac ahkkulukyelah fototo lasr nuh sel uh. Kuht etuh lah Jeova pa Pahpah tuhmwacsr uh ac el luhngse kuht. Kuht luhlahlfongi pac lah kuht fin oruh ma el siyuck sesr uh ac kuht oruh meet ma nuh ke Tohkohsrahi lal uh, el ac fah use ma nuhkewa ma kuht enenuh uh ac ma pucspucs sahyac. Kuht oacyacpac akihlen lah fototo lasr nuh sin Jeova uh pa ac oruh kuht in engan na pwacye uh. Ma inge kahsre kuht in falkihn ma na oasr yohrohsr uh, oacna “mwe mongo nwacsr ac nuknuk lasr.”​—Sie Timothy 6:6-8.

YAC TOHKOHSRAHI LUHN GOD UH PA MA SE EMEET IN MOUL LOM?

18. Meac Jeova el etuh ke kais sie sesr? Meac el ac fah oruh nuh sesr?

¹⁸ Riti Matthew 6:33. Kuht fin suk meet Tohkohsrahi ke moul lasr uh, na Jeova el fah use ma nuhkewa ma kuht enenuh uh. Jesus el ahkuhtweyac lah efuh kuht kuh in luhlahlfongi ke wuhlelah se inge. El fahk: “Pahpah tomowos suc inkuhsrao El etuh lah kowos enenuh ma inge nuhkewa.” (Philippi 4:19) El etuh lah nuknuk fuhkah lasr ma ac kuhracna mahi uh. El etuh pac lah kain in mongo fuhkah kom ac enenuh uh. El etuh pac lah kom ac sucu lom an enenuh acn komtacl in muhta kac. Jeova el ac fah liye in oasr ma kom enenuh na pwacye uh.

19. Efuh kuh kuht tiac enenuh in elyah kuh fosrngah ke ma ac kuh in sikyak ke pacl fahsruh uh?

¹⁹ Riti Matthew 6:34. Jesus el sifwil pac fahk nuh sin mwet tuhma lutlut lal uh: “Nikmet fosrngah.” Jeova el fah use ma kuht enenuh nuh ke kais sie lwen. Pwacnacng, kuht tiac enenuh in elyahlac ke ma ac kuh in sikyak ke pacl fahsruh uh. Kuht fin fosrngah, kuht ac kuh in muhtwacwacack in luhlahlfongi kacsr sifacna, ac ma inge ac kuh in ahkkulukye fototo lasr nuh sin Jeova uh. Pwacnacng, kuht enenuh in luhlahlfongel in ma nuhkewa.​—Soakas 3:5, 6; Philippi 4:6, 7.

SUK MEET TOHKOHSRAHI UH AC JEOVA EL FAH KARIHNGIHN KOM

20. (a) Finsrak fuhkah kom kuh in oakiyac ke orekma in kuhlwacnsap lom nuh sin Jeova uh? (b) Meac kom kuh in oruh in ahkfihsracsrye moul lom an?

²⁰ Ac mwe ahsor yohk fin wacngihnlac kuh lom in kuhlwacnsuhpuh Jeova ke kuhiyom ke srihpen kom srihke in ahkyohkye ma lom uh! Kuht enenuh in sang kuhiyacsr nuh sin Jeova. Ke sie mwe puhpuhlyuck, yac kom kuh in som welah sie congregation ma enenuh kuhtuh pac mwet in forfor? Yac kom kuh in pioneer? Kuh kom fin pioneer ingena, yac kom nuh nuhnkuh tari in nwacklah pwepuh nuh ke School for Kingdom Evangelizers? Yac kom kuh in sang kahsruh in orekma ke Bethel kuh ke ohfuhs in lweng ke kuhtuh lwen? Kuh sahp, kom kuh in sang pacl ac kahsruh lom nuh ke Local Design/Construction ke kais kuhtuh pacl in muhsahi Lohm in toeni pucspucs. Nuhnkuh ke kuhtuh ma kom kuh in oruh in ahkfihsracsrye moul lom uh tuh in yohk pacl ac kuh lom in wi ke orekma pucspucs ke Tohkohsrahi uh. Oasr kuhtuh kahs in kahsruh ke pohk se inge, “Kom ac Ahkfihsracsrye Fuhkah Moul Lom an?” Puhruhe nuh sin Jeova elan kahsre kom oruh sulaclah ke ma kom enenuh in oruh uh? Tok, ekuhllah kuhtwena ma enenuh in eklac sum uh.

21. Meac ac fah kahsre kom in fototoyang nuh sin Jeova?

²¹ Jesus el luti kuht in suk meet Tohkohsrahi uh. Ke kuht oruh ma inge, kuht ac tiac arlacna fosrngah ke ma kuht enenuh uh. Kuht ac fah fototoyang nuh sin Jeova ke srihpen kuht luhlahlfongi lah el ac fah karihngihn kuht. Kuht ac fah etwaclah in sifacna leumi kuht ac tiac moli ma nuhkewa ma kuht luhngse kuh ma nuhkewa ma facluh fihliyac ye muhtahsr, kuht finne kuh in moli. Kuht fin ahkfihsracsrye moul lasr uh ingena, ma inge ac kahsre kuht in sruokyacna oaru lasr nuh sin Jeova ac in “sruokyac moul pwacye” se ma el wuhlelah nuh sesr inge.​—Sie Timothy 6:19.